ང་ཚོ་བོད་པ་ཁ་ཆེ་དང་ནང་པ་ཚང་མ་ལུང་པ་གཅིག་པ་རེད།

འདས་པའི་ཟླ་བརྒྱད་ཙམ་གྱི་སྔོན་ལ་ཧཱ་ནའེ་ཧྥའེ་ལགས་གཙོས་བོད་པ་ཁ་ཆེ་གཞོན་སྐྱེས་ཁག་ཅིག་གིས། བཙན་བྱོལ་དུ་ཡོད་པའི་བོད་པ་ཁ་ཆེ་མང་ཚོགས་ཁྲོད་བོད་དོན་གོ་རྟོགས་མཐོར་འདེགས། བོད་པའི་སྐད་ཡིག་གཙོས་སོ་སོའི་རིག་གཞུང་མི་ཉམས་རྒྱུན་འཛིན་ཐུབ་ཆེད། ཀ་ཤི་མུར་བོད་པ་ཁ་ཆེ་གཞིས་ཆགས་ནང་དྭངས་བླངས་ཞབས་ཞུས་ཚོགས་པ་ཞིག་གསར་དུ་བཙུགས་ཡོད་པ་དང་། བོད་དོན་ལས་འགུལ་སྤེལ་ཕྱོགས་ཐད་ལ་ཉམས་མྱོང་བསྡུ་རུབ་ཆེད། ཉེ་ཆར་ཁོང་དྷ་སར་བསླེབས་པའི་སྐབས་དང་བསྟུན་ནས། ཀ་ཤི་མུར་བོད་པ་ཁ་ཆེ་གཞིས་ཆགས་ནང་གི་བོད་དོན་གནས་སྟངས་ཐད་བཅར་འདྲི་ཞུས་ཡོད།   

    དྲི་བ། ཁྱེད་རང་སྐྱེས་ས་གང་ཡིན། ད་ལྟའི་བར་གྱི་སོ་སོའི་འཚར་ལོངས་དང་སློབ་སྦྱོང་གི་བརྒྱུད་རིམ་ངོ་སྤྲོད་ཅིག་གནང་རོགས། 

    ལན། ངའི་མིང་ལ་ཧཱ་ནའེ་ཧྥའེ་ཟེར། ངའི་ཕ་མ་གཉིས་ནི་སྔོན་མ་ལྷ་ས་ནས་ཕེབས་པའི་བོད་པ་ཁ་ཆེ་རེད། ང་རང་རྒྱ་གར་ཀ་ཤི་མུར་བོད་པ་ཁ་ཆེ་གཞིས་ཆགས་ནང་སྐྱེས་པ་རེད། ང་རང་ཆུང་དུས་ཤཱ་འེན་རྒྱ་གར་གཏན་སློབ་(shine public School)ནང་སློབ་སྦྱོང་མཐར་ཕྱིན་རྗེས།  གྷན་དྷི་རྗེས་དྲན་སློབ་ཆེན་(Gandhi memorial college) དུ་བསྐྱོད་དེ་སློབ་སྦྱོང་བྱས་པ་ཡིན། སློབ་གྲྭ་ཐོན་རྗེས་དམིགས་བསལ་ལས་ཀ་གང་ཡང་བྱས་མེད། ད་ལྟའི་བར་སོ་སོ་སྒེར་ངོས་ནས་ཚོང་ལས་རིགས་གཉེར་ཏེ་བསྡད་པ་ཡིན། ང་རང་གིས་བོད་ཡིག་འབྲི་ཀློག་ཤེས་ཀྱི་མེད། ཡིན་ནའང་། བོད་སྐད་བཤད་རྒྱུར་དཀའ་ངལ་གང་ཡང་མེད།

    དྲི་བ། ཀ་ཤི་མུར་བོད་པ་ཁ་ཆེ་གཞིས་ཆགས་ཀྱི་ད་ལྟའི་གནས་སྟངས་གང་འདྲ་ཡོད་པ་རེད།  དམིགས་བསལ་ཀྱི་དཀའ་ངལ་དེ་འདྲ་འདུག་གམ།

    ལན། ང་ཚོ་ཀ་ཤི་མུར་བོད་པ་ཁ་ཆེ་རྣམས་ ༡༩༥༩ ལོར་རྒྱ་གར་ནང་བསླེབས་པ་རེད། སྔོན་མ་རྒྱ་མིས་བོད་ལ་དམག་རྒྱག་དུས་ང་ཚོ་བོད་པ་ཁ་ཆེ་མི་མང་པོས་རྒྱ་མིར་དང་འཛིང་རེ་བྱས་ཏེ་གྲོངས་པ་རེད། དེའི་སྐོར་ང་ཚོ་བོད་པའི་ལོ་རྒྱུས་ནང་ད་ལྟའི་ཆར་ཁ་གསལ་བོ་དེ་འདྲ་ཡོད་པ་མ་རེད། ང་ཚོ་གཞིས་ཆགས་ནང་པོ་པོ་རྨོ་མོ་རྣམས་ཀྱིས་གནས་ཚུལ་དེ་ལབ་མེད་པ་ཡིན་ན་ང་ཚོས་ཤེས་ཐབས་ཡོད་པ་མ་རེད། སྔོན་ཆད་ཀ་ཤི་མུར་ནང་བོད་པ་ཁ་ཆེ་གཞིས་ཆགས་གཅིག་མ་གཏོགས་ཡོད་པ་མ་རེད།  རྗེས་སུ་མི་གྲངས་ཇེ་མང་དུ་ཕྱིན་པའི་དབང་གིས་ད་ལྟ་གཞིས་ཆགས་ཁག་གསུམ་ཆགས་བསྡད་ཡོད།  གཞིས་ཆགས་གསར་ཤོས་དེ་བཙུགས་ནས་ལོ་ ༥ ཙམ་མ་གཏོགས་འགྲོ་གི་ཡོད་མ་རེད།  གཞིས་ཆགས་གསུམ་པོའི་ནང་ཁྱོན་བསྡོམས་བོད་པ་ཁ་ཆེ་ ༢༠༠༠ ལྷག་ཡོད། ང་ཚོ་ཀ་ཤི་མུར་བོད་པ་ཁ་ཆེ་ཚང་མར་རྒྱ་གར་པཱ་སེ་ཡོད་སྟབས།  ཡིག་ཐོག་ནས་རྒྱ་གར་གྱི་མི་སེར་ཆགས་ཡོད་ཀྱང་ནང་ལོག་གི་སེམས་དང་ཤ་ཁྲག་གི་རྒྱུད་པ་དེ་བོད་ཀྱི་སེམས་དང་ཁྲག་རེད། སོ་སོའི་སེམས་ནང་ནམ་རྒྱུན་བོད་པ་རང་ཡིན་པ་རེད། གཞིས་ཆགས་རེའི་བར་དུ་ལམ་ཐག་དུས་ཡུན་ཆུ་ཚོད་སྐར་མ་ ༡༥ ཙམ་ཡོད་ལ། གཞིས་ཆགས་དང་པོའི་མིང་ལ་ཨི་དྷི་གྷ་དང་། གཞིས་ཆགས་གཉིས་པའི་མིང་ལ་ཧཱ་ཝེལ། གཞིས་གསུམ་པའི་མིང་ལ་གྷོལ་ཆིན་ཀོ་ལི་ནའེ་བཅས་རེད། གཞིས་ཆགས་ནང་བོད་པའི་གཏན་སློབ་ (Tibetan public school) དང་སྨན་ཁང་(medical store )ཡོད་པ་རེད། བོད་པ་ཁ་ཆེ་བྱིས་པ་ཚོ་གཏན་སློབ་ནང་འགྲོ་བཞིན་ཡོད། ཡིན་ནའང་། ད་ལྟའི་ཆར་སློབ་གྲྭ་ཚོང་ལས་ཀྱི་ངོ་བོ་ཤུགས་ཆེ་རུ་ཕྱིན་ཡོད་སྟབས། མི་ཚང་སྐྱོ་བོའི་རིགས་ཀྱི་བྱིས་པ་སློབ་གྲྭའི་ནང་འགྲོ་ཐུབ་ཀྱི་མི་འདུག ང་ཚོའི་གཞིས་ཆགས་ནང་མི་མང་ཆེ་བའི་འཚོ་རྟེན་གཙོ་བོ་ནི་ཚོང་ལས་དང་འཚེམ་བཟོ་ཆགས་ཡོད། དེ་མིན་དམིགས་བསལ་དཀའ་ངལ་དེ་འདྲ་ཡོད་པ་མ་རེད།

    དྲི་བ། ཀ་ཤི་མུར་བོད་པ་ཁ་ཆེ་གཞིས་ཆགས་ནང་བོད་ཡིག་དང་བོད་སྐད་གཙོས་སོ་སོའི་རིག་གཞུང་རྒྱུན་འཛིན་གྱི་གནས་སྟངས་གང་འདྲ་འདུག 

    ལན།  ཀ་ཤི་མུར་བོད་པ་ཁ་ཆེ་རྣམས་བོད་མི་སྤྱི་མཚུངས་ལྟར་རྒྱ་གར་ནང་སྐྱབས་བཅོལ་དུ་བསླེབས་ཏེ་ལོ་ ༦༠ ལྷག་ཕྱིན་ཡོད་ཀྱང་། དེ་སྔོན་ང་ཚོ་བོད་པ་ཁ་ཆེ་གཞིས་ཆགས་ནང་བོད་ཡིག་སློབ་ས་མེད་སྟབས། ད་ལྟ་ང་རང་ཉིད་ལ་མཚོན་ནའང་བོད་ཡིག་འབྲི་ཀློག་ཤེས་ཀྱི་མེད། དེར་བརྟེན། སེམས་པ་ཧ་ཅང་སྐྱོ་བོ་འདུག སོ་སོ་བོད་པ་ཡིན་ལབ་ཀྱི་ཡོད་པ་རེད་དེ།  སོ་སོའི་སྐད་ཡིག་འབྲི་ཀློག་ཤེས་ཀྱི་ཡོད་པ་མ་རེད།  ཡིན་ནའང་།  སྔོན་མ་པོ་པོ་རྨོ་མོ་ཚོའི་སྐབས་ནས་བཟུང་ནམ་རྒྱུན་སོ་སོའི་ཁྱིམ་ཚང་ནང་ཚང་མར་བོད་སྐད་རྐྱང་པ་བཤད་འཇུག་གི་ཡོད་སྟབས།  ང་ཚོ་བོད་པ་ཁ་ཆེ་གཞོན་སྐྱེས་ཚང་མས་བོད་སྐད་བཤད་ཤེས་ཀྱི་ཡོད། ང་ཚོ་གཞིས་ཆགས་ནང་བོད་པ་ཁ་ཆེ་ནང་ཁུལ་ལ་མ་གཏོགས་རྒྱ་གར་དང་མཉམ་དུ་ཆང་ས་རྒྱག་འཇུག་གི་ཡོད་པ་མ་རེད། ད་ལྟ་ཡིན་ནའང་རྒྱ་གར་སྤྱི་ཚོགས་ནང་འདྲེས་མེད་པར་སོ་སོ་བོད་པ་ནང་གཙང་བྱས་བསྡད་ཐུབ་ཡོད།  རྗེས་སུ་ང་ཚོའི་ངོས་ནས་དབུས་བོད་མིའི་སྒྲིག་འཛུགས་ལ་སྙན་ཞུ་ཕུལ་པ་བརྒྱུད།  ད་ལྟའི་ཆར་བོད་ཡིག་ཁྲིད་མཁན་དགེ་རྒན་བུད་མེད་གཅིག་བསླེབས་ཡོད། དེར་ང་ཚོ་གཞིས་མི་ཚང་མ་ཧ་ཅང་དགའ་བོ་བྱུང་།  ཁོ་མོས་སློབ་གྲྭའི་ནང་བོད་ཡིག་བསླབ་མགོ་བརྩམས་ཏེ་ལོ་གཉིས་ལྷག་མ་གཏོགས་ཕྱིན་མེད་ཀྱང་། ད་ལྟའི་ཆར་བྱིས་པ་ཆུང་ཆུང་ཚོས་བོད་ཡིག་སློབ་ཐུབ་ཀྱི་ཡོད་པ་རེད། 

    དྲི་བ། ཁྱེད་རང་དྷ་སར་བསླེབས་པ་ཐོག་དང་པོ་ཆགས་ཡོད་པ་རེད། དྷ་སའི་བོད་མིའི་གནས་སྟངས་དང་དབུས་བོད་མིའི་སྒྲིག་འཛུགས་སོཊ་མཐོང་སྐབས་སེམས་ཚོར་ག་རེ་བྱུང་སོང་།

    ལན། སྔོན་མ་ནས་དྷ་རམ་ས་ལར་ལྟ་རུ་ཡོང་འདོད་ཀྱི་འདུན་པ་ཤུགས་ཆེན་པོ་ཡོད། རྒྱུ་མཚན་ང་ཚོ་བོད་པ་བཙན་བྱོལ་བ་མང་པོ་འདིར་གནས་སྡོད་བྱས་ཡོད་པ་མ་ཟད། ༸སྐུ་མདུན་གྱི་བཞུགས་གནས་དང་བོད་མིའི་དབུས་སྒྲིག་འཛུགས་ཀྱི་བསྟི་གནས་ཀྱང་འདིར་ཡོད་པ་རེད།  ད་ཐེངས་ང་རང་འདི་གར་བསླེབས་རྗེས་དབུས་བོད་མིའི་སྒྲིག་འཛུགས་ཀྱི་ལས་ཁུངས་ཁག་དང་། བོད་ཀྱི་གཞོན་ནུ་ལྷན་ཚོགས་དང་། བོད་རང་བཙན་སློབ་ཕྲུག་ཚོགས་པ་སོགས་གཞུང་འབྲེལ་མ་ཡིན་པའི་ཚོགས་པ་མང་པོའི་ནང་སྐོར་བ་བརྒྱབ་སྟེ་ལྟ་རུ་ཕྱིན་པ་ཡིན། ཚང་མས་ལས་ཀ་ཧ་ཅང་ཡག་པོ་བྱེད་ཀྱིན་འདུག དེ་བཞིན། དྷ་རམ་ས་ལར་བོད་ནང་དུ་སོ་སོའི་ཕ་མ་དང་འཚོ་བ་བློས་བཏང་སྟེ། འདིར་བཙན་བྱོལ་བསླེབས་བསྡད་པའི་བོད་པ་གསར་འབྱོར་མང་པོ་འདུག ཁོང་ཚོ་དང་ཁ་བརྡ་བྱས་ཡོང་དུས་བོད་ནང་གི་དཀའ་སྡུག་གནས་སྟངས་རྣམས་ཧ་གོ་ཡོང་གི་འདུག་ལ། ད་རེས་ང་འདིར་བསླེབས་རྗེས་ཉི་མ་རེ་རེར་བོད་ནང་བོད་མིས་རང་ལུས་མེར་བསྲེགས་གནང་བཞིན་པ་དང་།  བོད་མི་མང་པོ་རྒྱ་མིས་བཙོན་འཇུག་བྱེད་བཞིན་པའི་གནས་ཚུལ་ཐོས་ཡོང་དུས། སེམས་པ་ཧ་ཅང་སྐྱོ་ཡོང་གི་འདུག ང་རང་འདིར་བསྡད་པའི་དུས་ཡུན་རིང་ནམ་རྒྱུན་མར་མེ་ཁྲོམ་སྐོར་ལ་མཉམ་ཞུགས་བྱས་པ་ཡིན། བོད་ནང་གི་བོད་མི་ཚོར་གདུང་སེམས་མཉམ་སྐྱེད་ཆེད་མར་མེ་ཁྲོམ་སྐོར་དང་མཆོད་འབུལ་གནང་བཞིན་པ་དེ་ཧ་ཅང་ཡག་པོ་མཐོང་སོང་། ང་རང་ཕྱིར་གཞིས་ཆགས་ནང་ཕྱིན་རྗེས་མར་མེ་ཁྲོམ་སྐོར་དང་མཆོད་འབུལ་སོགས་ཀྱི་ལས་འགུལ་སྤེལ་རྩིས་ཡོད། ནང་པ་ཡིན་ན་རེད། ཁ་ཆེ་ཡིན་ན་རེད།  ཆོས་ག་རེ་ཡིན་ནའང་ཁྱད་མི་འདུག ང་ཚོ་བོད་པ་ཚང་མས་སོ་སོའི་ལུང་པའི་ནང་རང་ལུས་མེར་བསྲེཊ་བཏང་སྟེ་གྲོངས་མཁན་ཚོའི་ཆེད་དུ་ཆོས་སྒྲུབ་རྒྱུ་གལ་ཆེན་པོ་རེད། 

    དྲི་བ། ཁྱེད་ཚོ་བོད་པ་ཁ་ཆེ་གཞོན་སྐྱེས་ཁག་ཅིག་གིས་དྭངས་ཞབས་ཞུའི་ལས་འགུལ་ཚོགས་པ་ཞིག་བཙུགས་ཡོད་འདུག ཚོགས་པའི་མིང་དང་དམིཊ་ཡུལ་སོཊ་ངོ་སྤྲོད་ཅིག་གནང་རོཊ།  

    ལན།  ང་ཚོའི་ཚོགས་པ་དེར་དམིགས་བསལ་གྱི་མིང་ཞིག་མེད། ད་ལྟའི་ཆར་ཚོགས་མི་ ༨ ཡོད།  ཚོགས་པ་གསར་དུ་བཙུགས་ནས་ཟླ་བ་ ༨ ཙམ་མ་གཏོགས་ཕྱིན་མེད། འཛམ་གླིང་གང་སར་བོད་དོན་ཐོག་ལས་ཀ་བྱེད་མཁན་ཚོགས་པ་མང་པོ་ཡོད་པ་རེད། ང་ཚོའི་གཞིས་ཆགས་དམིགས་བསལ་བོད་དོན་ཐོག་ལས་ཀ་བྱེད་མཁན་ཡོད་པ་མ་རེད། དེར་བརྟེན་ང་ཚོས་དྭངས་བླངས་ཐོག་ཚོགས་པ་འདི་བཙུགས་པ་ཡིན།  ཡིན་ནའང་། ང་ཚོས་བོད་དོན་ཐད་ལས་ཀ་ག་རེ་བྱེད་དགོས་མིན་དང་། ལས་འགུལ་ཅི་ལྟར་སྤེལ་དགོས་མིན་ཐད་ཉམས་མྱོང་ཆེན་པོ་གང་ཡང་མེད། ང་ཚོའི་གཞིས་ཆགས་ནང་གཞན་ལ་སྐད་ཆ་འདྲི་བསམ་ནའང་འདྲི་ས་ཡོད་པ་མ་རེད།  ད་ཐེངས་ང་རང་འདིར་ཡོང་དགོས་དོན་གཙོ་བོ་ཡང་ལས་འགུལ་སྤེལ་སྟངས་ཐད་ཤེས་རྟོགས་དང་རྒྱུས་ལོན་བྱ་ཆེད་ཡིན། ང་ཚོའི་ཕ་མ་ཚོས་ཁ་བརྡ་བྱེད་སྐབས། སྔོན་མ་ལྷ་ས་ནས་ག་འདྲ་སུ་བསླེབས་ཡོད་མེད། རྒྱ་མིས་བོད་ལ་དམག་ཅི་ལྟར་བརྒྱབ་ཡོད་མེད་སོགས་ལོ་རྒྱུས་ཚང་མ་བཤད་ཡོང་གི་རེད། དེ་དག་ཐོས་ཡོང་དུས་སེམས་པ་ཧ་ཅང་སྐྱོ་ཡོང་གི་འདུག རྒྱ་མིས་སྔོན་མ་བོད་ནང་སྡུག་པོ་བཏང་ཡོད་པ་རེད་ལ། ད་ལྟའང་མུ་མཐུད་སྡུག་པོ་གཏོང་བཞིན་ཡོད་པ་རེད། ད་ལྟ་ང་རང་ལ་མཚོན་ན་ལོ་ ༣༢ ཡིན། ཡིན་ནའང་། ད་ལྟའི་བར་བོད་དོན་སྐོར་ལ་ལས་ཀ་རྐང་གཅིག་ཀྱང་བྱེད་མྱོང་མེད།  དེར་བརྟེན་སོ་སོའི་སེམས་ནང་ལ་བོད་དོན་ཐད་ལས་ཀ་ཞིག་བྱ་རྒྱུའི་འདུན་པ་བཅངས་ཏེ། ང་ཚོ་གཞོན་སྐྱེས་ཁག་ཅིག་མཉམ་རུབ་ཀྱིས་དྭངས་བླངས་ཐོག་ཚོགས་པ་འདི་བཙུགས་ཏེ། སོ་སོའི་གཞིས་ཆགས་ནང་བོད་དོན་ཐོག་ལས་འགུལ་སྤེལ་མགོ་རྩོམ་བཞིན་ཡོད། 

    དྲི་བ། ད་ལྟའི་ཆར་བོད་པ་ཁ་ཆེ་གཞིས་ཆགས་ནང་བོད་དོན་གོ་རྟོགས་གྱི་གནས་སྟངས་ག་འདྲ་འདུག  ཁྱེད་རང་ཕྱིར་ལོག་རྗེས་ལས་འགུལ་ག་རེ་སྤེལ་རྩིས་ཡོད་དམ།

    ལན།  སྔོན་མ་ ༢༠༠༨ ལོར་བོད་ནང་ཞི་བའི་ཡར་ལངས་བྱུང་སྐབས། ང་ཚོའི་གཞིས་ཆགས་ནང་དུའང་ངོ་རྒོལ་ལས་འགུལ་ཐེངས་གཅིག་སྤེལ་མྱོང་ཡོད། དེ་རྗེས་ནས་ད་ལྟའི་བར་དམིགས་བསལ་ལས་འགུལ་གང་ཡང་སྤེལ་ཡོད་པ་མ་རེད།  ང་ཚོའི་བོད་པ་ཁ་ཆེ་གཞིས་ཆགས་ནང་བོད་དོན་ལས་འགུལ་སྤེལ་མཁན་མེད་སྟབས། བོད་དོན་གོ་རྟོགས་ཧ་ཅང་སྐྱོ་བོ་འདུག  ད་ཐེངས་ང་རང་ཕྱིར་སོང་རྗེས་ང་ཚོ་ཚོགས་པའི་ངོས་ནས་མགོ་འཛུགས་བྱས་ཏེ། ངོ་རྒོལ་ལས་འགུལ་དང་མར་མེ་ཁྲོམ་སྐོར་སོགས་བྱ་རྒྱུ་ཡིན། གཞིས་ཆགས་ནང་བྱིས་པ་དང་གཞོན་སྐྱེས་ཡང་པོ་ཡར་འཚར་ལོངས་འབྱུང་བཞིན་ཡོད་པ་རེད།  ནམ་རྒྱུན་གཞིས་ཆགས་ནང་བོད་དོན་སྐོར་ལས་འགུལ་སྤེལ་བ་ཡིན་ན། བྱིས་པ་ཆུང་ཆུང་དག་གིས་མཐོང་ཡོང་དུས་དེ་ག་རེ་ཡིན་ནམ་བསམ་པ་དྲན་ཡོང་གི་རེད་ལ། རིམ་བཞིན་སོ་སོའི་བོད་ལུང་པའི་གནས་སྟངས་ཤེས་རྟོགས་དང་།  སོ་སོ་བོད་པའི་རིག་གཞུང་རྒྱུན་འཛིན་ཡོང་ཐུབ་ཀྱི་རེད།  དེ་ལྟར་ལས་འགུལ་སོགས་མ་སྤེལ་བ་ཡིན་ན། རིམ་པས་བྱིས་པ་དང་གཞོན་སྐྱེས་ཚོ་སོ་སོའི་རིག་གཞུང་དང་འཐབ་རྩོད་ལ་ཁ་འབྲལ་གྱི་རེད།  ང་ཚོ་བོད་པ་ཁ་ཆེ་དང་ནང་པ་གང་ཡིན་ཡང་ཚང་མ་གཅིག་པ་རེད། ལུང་པ་གཅིག་གི་མི་རེད། ཚང་མ་རྡོག་རྩ་གཅིག་ཆགས་བསྡད་པ་ཡིན་ན་ཧ་ཅང་ཡག་པོ་འདུག རྡོག་རྩ་གཅིག་ཆགས་མ་ཐུབ་པ་ཡིན་ན་ལས་ཀ་ག་རེ་བྱས་པ་ཡིན་ནའང་ཡོང་གི་མ་རེད། འདི་གར་ལས་ཁུངས་ཁག་ནང་བཅར་སྐབས་ཀྱང་། ང་ཚོ་བོད་པ་ཁ་ཆེ་གཞིས་ཆགས་ནང་བོད་པའི་འཐབ་རྩོད་དང་རིག་གཞུང་ཐོག་ལས་ཀ་བྱེད་མཁན་མི་འདུག་ཅེས་ཞུས་པ་ཡིན། རྒན་ལགས་ཞིག་གིས་གཞིས་ཆགས་ནང་དཔེ་མཛོད་ཅིག་རྒྱག་ཐུབ་ན་ཡག་པོ་ཡོད་པ་རེད་གསུངས་སོང་། ང་རང་ངོས་ནས་ཀྱང་དེ་ཧ་ཅང་ཡག་པོ་རེད་བསམ་གྱི་འདུག  བོད་པའི་དཔེ་མཛོད་ཁང་ཞིག་རྒྱག་ཐུབ་པ་ཡིན་ན། སློབ་ཕྲུག་རྣམས་གོང་གསེང་སྐབས་དེ་གར་ཡོང་སྟེ་བོད་པའི་སྐོར་གྱི་དཔེ་དེབ་ཀློག་པ་དང་། བོད་ཡིག་སློབ་སྦྱོང་བྱེད་པ་སོགས་བརྒྱུད་དེ་སོ་སོའི་རིག་གཞུང་ཉར་ཐུབ་རྒྱུར་ཕན་ཐོགས་ཆེན་པོ་ཡོང་གི་རེད་འདོད།

    དྲི་བ། ཁྱེད་རང་གི་ངོས་ནས་བོད་པ་ཁ་ཆེ་བ་རྣམས་བརྒྱུད་དེ་རྒྱ་གར་ཁ་ཆེ་བ་དང་། དེ་བཞིན། འཛམ་གླིང་རྒྱལ་ཁབ་གཞན་ནང་གི་ཁ་ཆེ་སྤྱི་ཚོགས་ཁྲོད་བོད་དོན་གོ་རྟོགས་སྤེལ་ཏེ་རྒྱབ་སྐྱོར་འཚོལ་རྒྱུ་གལ་ཆེན་པོར་མཐོང་གི་འདུག་གམ། 

    ལན།  ཀ་ཤི་མུར་ནང་བོད་པ་ཁ་ཆེ་དང་རྒྱ་གར་ཁ་ཆེ་གཉིས་མཉམ་འབྲེལ་ཐོག་ཁ་ཆེ་བོད་དོན་རྒྱབ་སྐྱོར་ཚོགས་པ་འཛུགས་ཐུབ་པ་བྱ་རྒྱུ་དེ་གལ་ཆེན་པོ་རེད།  ད་ལྟའི་ཆར་ཁ་ཆེ་ལུང་པའི་ནང་ཕྱིན་ནས་བོད་དོན་ལས་འགུལ་སྤེལ་ཏེ་སྐད་རྒྱག་མཁན་བྱུང་ཡོད་པ་མ་རེད། ང་ཚོ་བོད་པ་ཁ་ཆེ་རྣམས་མི་རིགས་གཞན་པའི་ཁ་ཆེ་སྤྱི་ཚོགས་ནང་ཕྱིན་ནས་བོད་དོན་ལས་འགུལ་སྤེལ་ཏེ་སྐད་རྒྱག་རྒྱུ་གལ་ཆེན་པོ་མཐོང་གི་འདུག  གཅིག་ནས་ཚང་མ་ཆོས་ལུགས་ཁ་ཆེ་གཅིག་པ་ཡིན་སྟབས། ཁོ་ཚོས་ཀྱང་མཉམ་དུ་རོགས་པ་བྱེད་ཀྱི་རེད། བོད་དོན་ལས་འགུལ་ཐད་ཤུགས་རྒྱག་འདུན་ཡོད་པའི་ང་ཚོ་བོད་པ་ཁ་ཆེ་གཞོན་སྐྱེས་ཁ་ཤས་ཤིག་ཡོད། ང་ཚོས་མ་འོངས་པར་དེ་དག་གི་ཕྱོགས་ལ་ཤུགས་རྒྱག་གི་ཡིན། ཡིན་ནའང་། ཐོག་དང་པོ་སོ་སོའི་གཞིས་ཆགས་ནང་བོད་པ་ཁ་ཆེ་ཚང་མ་རྡོག་རྡོག་གཅིག་བཟོས་ཏེ། བོད་པའི་འཐབ་རྩོད་ཐད་གོ་རྟོགས་དང་ལས་འགུལ་སྤེལ་དགོས་ཀྱི་འདུག དེ་རྗེས་རིམ་པའི་སོ་སོའི་ངོ་ཤེས་པའི་རྒྱ་གར་ཁ་ཆེ་བ་རྣམས་དང་འབྲེལ་ལམ་བཙུགས་ཏེ། རྒྱ་གར་ཁ་ཆེ་ནང་བོད་དོན་གོ་རྟོགས་སྤེལ་རྒྱུ་དང་བོད་དོན་རྒྱབ་སྐྱོར་བ་འཚོལ་རྒྱུ།  རིམ་པས་ཁ་ཆེ་རྒྱལ་ཁབ་ཀྱི་ལུང་པའི་ནང་དུའང་བོད་དོན་རྒྱབ་སྐྱོར་འཚོལ་ཐབས་བྱེད་དགོས་ཀྱི་འདུག མི་ག་ཚོད་ཀྱི་མང་པོས་བོད་ཀྱི་གནས་ཚུལ་ཤེས་རྟོགས་བྱུང་བ་ཡིན་ན། དེ་ཚོད་ཀྱིས་བོད་དོན་ཤུགས་ཆེན་པོ་ཆགས་ཐུབ་ཀྱི་རེད།

    དྲི་བ། བོད་མིའི་སྒྲིག་འཛུགས་ནང་ལས་ཀ་བྱེད་དུ་ཡོང་མཁན་བོད་པ་ཁ་ཆེ་མང་པོ་མི་འདུག དེའི་རྒྱུ་རྐྱེན་གཙོ་བོ་གང་ལ་ཐུག་ཡོད་པ་རེད་དམ།

    ལན། སྔོན་མ་ང་ཚོ་གཞིས་ཆགས་ནང་བོད་དོན་གོ་རྟོགས་དང་བོད་ཀྱི་རིག་གཞུང་རྒྱུན་འཛིན་ཡོང་ཐབས་ལ་དམིགས་ཏེ། བོད་ཀྱི་གཞོན་ནུ་ (Tibet youth congress) ཞེས་པའི་ཚོགས་པ་ཤིག་བཙུགས་པ་རེད། དང་ཐོག་ལས་ཀ་ཏོག་ཙམ་ཡག་པོ་བྱུང་འདུག ང་ཚོ་བོད་པ་ཁ་ཆེ་སློབ་གྲྭ་བ་འགའ་ཤས་བོད་ཡིག་སློབ་དུ་འདི་གའི་སློབ་གྲྭའི་ནང་བཏང་མྱོང་ཡོད་པ་འདྲ། རྗེས་སུ་རིམ་པས་ཉམས་ཞན་དུ་གྱུར་ཏེ་བོད་པའི་རིག་གཞུང་དང་བོད་དོན་ཐད་ནུས་པ་ཆེན་པོ་ཐོན་མི་འདུག  དེ་བཞིན། དབུས་བོད་མིའི་སྒྲིག་འཛུགས་དང་འབྲེལ་བ་ཤུགས་ཆེན་པོ་གནང་མ་ཐུབ་པར། ད་ལྟ་ང་ཚོ་ཀ་ཤི་མུར་བོད་པ་ཁ་ཆེ་གཞིས་ཆགས་ནི་ཏོག་ཙམ་ལོག་ག་ཞིག་ཆགས་བསྡད་ཡོད་པ་ལྟར། གཞིས་ཆགས་ནང་བོད་དོན་སྐོར་ལ་དབྱིངས་དང་གོ་རྟོགས་ཆེན་པོ་མེད་པ་ཆགས་པ་རེད།

    དྲི་བ།  མ་འོངས་པར་ཀ་ཤི་མུར་བོད་པ་ཁ་ཆེ་གཞིས་ཆགས་ཀྱི་མི་མང་རྣམས་བཙན་བྱོལ་བོད་པའི་སྤྱི་ཚོགས་དང་འབྲེལ་བ་ཡར་རྒྱས་སུ་གཏོང་ཕྱོགས་སྐོར་ནས་ཐབས་ལམ་ག་རེ་མཐོང་གི་འདུག 

    ལན།  ངའི་སེམས་ལ་ག་རེ་བསམ་སོང་ཟེར་ན། ང་ཚོ་ཀ་ཤི་མུར་བོད་པ་ཁ་ཆེ་གཞིས་ཆགས་ནང་སློབ་གྲྭ་ཐོན་མཁན་མང་པོ་ཡོད་པ་རེད། ཁོང་ཚོ་འདིར་ཡོང་སྟེ་ལས་ཁུངས་ཁག་ནང་ལས་ཀ་བྱས་པ་ཡིན་ན། རྗེས་ཕྱོགས་བོད་དོན་ཐད་ལས་ཀ་བྱེད་ཕྱོགས་ཐད་ཉམས་མྱོང་རག་འགྲོ་བ་མ་ཟད།  ཕན་ཚུན་བར་འབྲེལ་འདྲིས་ཀྱང་ཆགས་ཡོང་གི་རེད། དེ་བཞིན། བོད་ཀྱི་གཞོན་ནུ་ལྷན་ཚོགས་དང་བོད་རང་དབང་སློབ་ཕྲུག་ཚོགས་པ། བུད་མེད་ཚོགས་པ་སོགས་ང་ཚོ་ཀ་ཤི་མུར་བོད་པ་ཁ་ཆེ་གཞིས་ཆགས་ནང་ཕར་ཕེབས་ཏེ།  བོད་དོན་ལས་འགུལ་དང་གོ་རྟོགས་སྤེལ་རྒྱུ་ཧ་ཅང་གལ་ཆེན་པོ་རེད།  ཉེ་སྔོན་༸སྐུ་མདུན་ང་ཚོ་ཀ་ཤི་མུར་ནང་ཕེབས་པའི་སྐབས། བོད་པའི་གསར་འགོད་པ་མང་པོ་བསླེབས་སོང་། དེའི་སྔོན་ལ་ང་རང་ངོས་ནས་ང་ཚོ་བོད་པར་རང་ཉིད་ཀྱི་གསར་ཁང་དེ་འདྲ་མང་པོ་ཡོད་པ་ཤེས་ཀྱི་མེད། རྗེས་ཕྱོགས་བོད་པའི་གསར་ལམ་ཁག་གིས་ཀྱང་ང་ཚོ་ཀ་ཤི་མུར་བོད་པ་ཁ་ཆེ་གཞིས་ཆགས་ཀྱི་གནས་སྟངས་བོད་པའི་སྤྱི་ཚོགས་ནང་ངོ་སྤྲོད་དང་། དེ་བཞིན། ང་ཚོའི་གཞིས་ཆགས་ནང་བོད་དོན་སྐོར་གྱི་གནས་ཚུལ་ཁྱབ་བསྒྲགས་བྱས་ཏེ། བོད་པ་ནང་པ་དང་ཁ་ཆེ་ཚང་མའི་བར་འབྲེལ་ལམ་འཛུགས་རྒྱུ་དེ་གལ་ཆེན་པོར་མཐོང་གི་འདུག 

གསར་འགོད་པ། ཚེ་རིང་རྒྱལ།