བོད་མདོ་སྨད་ཆབ་ཆ་རུ་སློབ་མས་ངོ་རྒོལ་ཁྲོམ་སྐོར་བྱུང་རྗེས། རྒྱ་གཞུང་གིས་སློབ་ཕྲུག་ ༣ འཇུ་བཟུང་བྱས་འདུག
ཁ་སང་ཞོགས་པ་བོད་མདོ་སྨད་ཆབ་ཆ་རུ་སློབ་ཕྲུག་ ༡༠༠༠ ལྷག་གིས་ཞི་བའི་ངོ་རྒོལ་ཁྲོམ་སྐོར་སྐབས། རྒྱ་གཞུང་དྲག་ཆས་ཉེན་རྟོག་དམག་མིས་སློབ་ཕྲུག་རྣམས་ལ་དྲག་གནོན་གཅར་རྡུང་བྱས་ཏེ། སློབ་ཕྲུག་ཁག་ཅིག་ལ་རྨས་སྐྱོན་ཕོག་སྟེ་སྨན་ཁང་དུ་མྱུར་སྐྱོབ་བྱེད་དགོས་བྱུང་ཡོད་ལ། དེ་རིང་ཕྱི་ཚེས་ ༢༧ ཉིན་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་གནས་ཚུལ་ཤེས་རྟོགས་བྱུང་དོན་ལྟར་ན། རྒྱ་གཞུང་གིས་སློབ་ཕྲུག་ ༣ འཇུ་བཟུང་བྱས་ཡོད་འདུག་ལ། ཁོ་ཚོའི་ཁྲོད་ཀྱི་སློབ་ཕྲུག་གཅིག་གི་མིང་དབང་ཆེན་ཚེ་རིང་ཟེར་ཞིང་འབའ་རྫོང་ནས་ཡིན་པ་དང་། སློབ་ཕྲུག་གཅིག་གི་མིང་ལ་མཱ་མཱ་ཟེར་ལ། སློབ་ཕྲུག་གཞན་དེའི་མིང་དང་ས་གནས་གང་ནས་ཡིན་མིན་ཤེས་རྟོགས་བྱུང་མི་འདུག
བོད་མདོ་སྨད་མཚོ་ལྷོ་ཁུལ་གསོ་རིག་སློབ་གྲྭའི་སློབ་མ་རྣམས་ཀྱིས་ཞི་བའི་ངོ་རྒོལ་ཁྲོམ་སྐོར་གྱི་འབྱུང་རྐྱེན་གཙོ་བོ་ནི། ཉེ་ཆར་མཚོ་ལྷོ་ཁུལ་ས་གནས་རྒྱ་གཞུང་གིས་རྒྱ་ནག་དམར་ཤོག་པའི་མགོ་ཁྲིད་འོག་གི་མཚོ་ལྷོ་ཁུལ་གྱི་འདས་མ་ད་གསུམ་བརྗོད་གཞིར་བཟུང་ཐོག ༼མཚོ་ལྷོ་ཁུལ་གྱི་མིག་སྔའི་ལྟ་ཚུལ་འཛིན་སྟངས་བཅུ༽ཞེས་པའི་ཡིག་ཆ་ཞིག་སློབ་གྲྭ་ཁག་ནང་འགྲེམས་བསྒྲགས་བྱས་ཏེ། བོད་ཀྱི་སྐད་དང་ཡི་གེ་ཁོ་ན་གཙིགས་འཛིན་བྱས་ན་མདུན་ལམ་ཆེན་པོ་མེད་ཚུལ་དང་། རང་ལུས་མེར་བསྲེགས་ནི་བླུན་སྤྱོད་ཅིག་ཡིན་སྐོར་བརྗོད་དེ། བོད་བསྟན་སྲིད་མི་རིགས་ཆེད་རང་སྲོག་བློས་གཏོང་གནང་མཁན་རྒྱལ་གཅེས་དཔའ་བོ་དཔའ་མོ་རྣམས་ཀྱི་མཛད་སྤྱོད་ལ་དམའ་འབེབས་དང་། རྒྱ་ནག་དམར་ཤོག་པར་དྲིན་གཟོ་ཞུ་དགོས་པའི་སློབ་གསོའི་བྱ་འགུལ་སྤེལ་བ་ལ་བརྟེན་ནས་ཡར་ལངས་ངོ་རྒོལ་དེ་བྱུང་ཡོད་པ་དང་། སློབ་ཕྲུག་ཚོས་ཞི་བའི་ངོ་རྒོལ་ཁྲོམ་སྐོར་སྐབས་རྒྱ་གཞུང་གི་དྲིལ་བསྒྲགས་ཡིག་ཆ་དེ་མེར་བསྲེགས་བཏང་ཡོད་འདུག
རྒྱ་གཞུང་གི་ཡིག་ཆ་དེའི་ནང་བཀོད་ཡོད་པའི་དོན་ཚན་ཁག་བཅུ་ནི། གཅིག མཚོ་ལྷོ་ཡར་རྒྱས་གོང་འཕེལ་དུ་གཏོང་ན་ཅི་ལ་བརྟེན་དགོས། གཉིས། བོད་ཀྱི་རིག་གནས་ལ་སྲུང་སྐྱོབ་དང་གོང་སྤེལ་བྱས་མེད་པ་ཡིན་ནམ། གསུམ། སྐྱེ་ཁམས་སྲུང་སྐྱོབ་དང་གསར་སྤེལ་འཛུགས་སྐྲུན་གཉིས་འགལ་ཟླ་ཡིན་ནམ། བཞི། སྐད་གཉིས་སློབ་ཁྲིད་ཀྱིས་མི་རིགས་ཀྱི་སྐད་དང་ཡི་གེ་ཉམས་ཞན་དུ་བཏང་བ་ཡིན་ནམ། ལྔ། སུ་ཞིག་གིས་རང་ཅག་ལ་འགོ་ཁྲིད་མཛད་དེ་རི་མི་རིགས་འདྲ་མཉམ་མངོན་འགྱུར་བྱས་པ་ཡིན་ནམ། དྲུག རང་བསྲེགས་བྱ་སྤྱོད་ཀྱི་ངོ་བོ་ནི་ཅི་ཞིག་ཡིན་ནམ། བདུན། ཁྲིམས་འགལ་གྱིས་ཁྲོམ་སྐོར་འདུ་ཚོགས་བྱས་པའི་གནོད་སྐྱོན་ཅི་ཡིན་ནམ། བརྒྱད། སུ་ཞིག་གིས་ཁ་བྲལ་དང་ཟིང་ཆ་སློང་བཞིན་ཡོད་དམ། དགུ། ཅི་ལྟར་ཆོས་ལུགས་དད་མོས་རང་དབང་གི་སྲིད་ཇུས་ལ་ཕྱོགས་ཡོངས་དང་ཡང་དག་སྒོས་གོ་བ་ལེན་དགོས་སམ། བཅུ། ཅི་ལྟར་མིག་སྔའི་ཞོད་འཇགས་འཆམ་མཐུན་གྱི་གོང་སྤེལ་ཁོར་ཡུག་གཅེས་སུ་འཛིན་དགོས་སམ་བཅས་ཡིན་འདུག
མཚོ་ལྷོ་ཁུལ་ས་གནས་རྒྱ་གཞུང་གི་དྲིལ་བསྒྲགས་སློབ་གསོའི་ཡིག་ཆ་དེ་ནི། འདི་ལོའི་ཕྱི་ཟླ་ ༤ ཚེས་ ༡༠ མཚོ་ལྷོ་ཁུལ་དྲིལ་བསྒྲགས་སྡེ་ཁག་གིས་འགྲེམས་སྤེལ་བྱས་ཡོད་པ་དང་། ཕྱི་ཟླ་ ༥ ཚེས་ ༧ ཉིན་མཚོ་སྔོན་གསར་འགྱུར་དྲ་བའི་སྟེང་དྲིལ་བསྒྲགས་སློབ་གསོའི་བྱ་འགུལ་དེའི་སྐོར་གྱི་གནས་ཚུལ་བཀོད་འདུག ཡིན་ནའང་། དངོས་སུ་སློབ་གྲྭ་ཁག་ནང་དུ་ཉེ་ཆར་གསར་དུ་འགྲེམས་བསྒྲགས་བྱེད་མགོ་བརྩམས་ཡོད་འདུག
གསར་འགོད་པ། ཚེ་རིང་རྒྱལ།
རྒྱ་ནག་དམར་གཞུང་སྨྱོ་གྲབ་ཡོད་པ་འདྲ།