༸གོང་ས་མཆོག་གིས་རྒྱ་གར་ལྷོ་ཕྱོགས་ཀར་ན་ཊ་ཁ་མངའ་སྡེའི་གཙུག་ལག་སློབ་གྲྭ་ཁག་ཅིག་ཏུ་བཀའ་སློབ་གསུང་བཤད་དང་། ཁུལ་དེའི་ཆོས་ལུགས་ཁག་ཅིག་གི་དབུ་ཁྲིད་དང་མཇལ་འཕྲད་ཀྱིས་ཆོས་ཕྱོགས་ཀྱི་མཛད་འཕྲིན་ཁག་ཅིག་བསྐྱངས་དང་སྐྱོང་བཞིན་ཡོད་འདུག
ཟླ་འདིའི་ཕྱི་ཚེས་ ༢༣ ཉིན་ནས་བཟུང་༸གོང་ས་མཆོག་གིས་རྒྱ་གར་ལྷོ་ཕྱོགས་ཁུལ་དུ་ཆོས་ཕྱོགས་ཀྱི་མཛད་འཕྲིན་སྐྱོང་གི་ཡོད་པ་ལྟར། ཕྱི་ཚེས་ ༢༦ ཉིན་སྔ་དྲོར་བྷིང་ལོར་གྲོང་ཁྱེར་དུ་ཡོད་པའི་ཡེ་ཤུ་གཙུག་ལག་སློབ་ཆེན་ (Christ University) ཞེས་པར་ནང་ཆོས་དང་ཚན་རིག་ཅེས་པའི་བརྗོད་གཞིའི་ཐོག་བཀའ་སློབ་དང་། ཕྱི་དྲོར་དགེ་སློབ་ ༢༥༠༠ བརྒལ་བར་འདས་ཟིན་པའི་བྱུང་རབས་ལས་ང་ཚོས་བློ་སྐྱེད་ལེན་ཐུབ་པ་ལས་བསྐྱར་ལོག་བྱ་ཐབས་མེད་ཀྱང་། མ་འོངས་པའི་དུས་རབས་གང་འདྲ་ཆགས་མིན་ད་ལྟའི་བྱེད་ཕྱོགས་ལ་རག་ལུས་ཡོད་སྟབས། ང་ཚོས་རང་སེམས་ཀྱི་ཞི་བདེ་གོང་མཐོར་བཏང་བ་བརྒྱུད་འཛམ་གླིང་གི་སྤྱི་ཚོགས་ཇེ་ལེགས་སུ་གཏོང་རྒྱུ་ལས། དྲག་པོའི་དབང་ཤུགས་དང་དངུལ་སོགས་ཀྱིས་སྤྱི་ཚོགས་ལ་བདེ་སྐྱིད་བསྐྲུན་ཐབས་མེད་པ། འཛམ་གླིང་ནང་འགྱུར་བ་གཏོང་རྒྱུ་ཟེར་བ་དེ་ལས་དོན་རྒྱ་ཆེན་པོ་ཞིག་ཏུ་མཐོང་ཡང་། མི་སྒེར་མང་པོ་མཉམ་འཛོམ་གྱིས་མིའི་སྤྱི་ཚོགས་འགྲུབ་ཀྱི་ཡོད་སྟབས། མི་སྒེར་རེ་རེའི་སེམས་ནང་ཞི་བདེ་བསྐྲུན་ཐུབ་ཚེ་རིམ་གྱིས་སྤྱི་ཚོགས་ནང་ཞི་བདེ་བསྐྲུན་ཐུབ་པ་དང་། གཞོན་སྐྱེས་ཚོར་འཛམ་གླིང་ཞི་བདེ་ལྡན་པ་ཞིག་བཟོ་རྒྱུའི་འཆར་སྣང་དགོས་པའི་བཀའ་སློབ་སོགས་གནང་ཡོད་འདུག
ཕྱི་ཚེས་ ༢༧ ཉིན་བྷིང་ལོར་ཊུམ་ཀུར (Tumkur University) ཞེས་པ་དང་སེར་བྱེས་མཁས་སྙན་གྲྭ་ཚང་གི་སྐུ་ཚབ་རྣམས་པའི་ཕེབས་བསུའི་ཁྲོད་སློབ་གྲྭའི་ཚོགས་ཁང་དུ་ཆིབས་བསྒྱུར་གནང་ཡོད་པ་དང་། དེར་དགུང་གྲངས་ ༡༠༥ ཡིན་པའི་ཁུལ་དེའི་ཧིན་རྡུའི་བླ་ཆེན་སྐུ་ཞབས་ཤི་ཝ་ཀུ་མཱ་རཱ་མ་ཧཱ་སྭ་མི་ཇི་མཆོག་དང་བྱང་རྩེ་ཆོས་རྗེ། སེར་བྱེས་མཁན་པོ་བློ་བཟང་བདེ་ལེཊ། སེར་སྨད་མཁན་པོ་ངག་དབང་འབྱོར་ལྡན། རྒྱུད་སྨད་མཁན་པོ་བཀྲ་ཤིས་ཚེ་རིང་བཅས་དགོན་སྡེ་ཁག་གི་སྐུ་ཚབ་དང་སློབ་གཉེར་ཁང་དེའི་གཙུག་ལག་སློབ་དཔོན་རྣམ་པ། དགེ་ལས་སློབ་ཕྲུག་བཅས་མི་གྲངས་ ༡༥༠༠ བརྒལ་བ་འདུ་འཛོམས་བྱུང་ཡོད་འདུག
སྐབས་དེར་༸གོང་ས་མཆོག་གིས་༼ དེང་དུས་ཤེས་ཡོན་ལམ་ལུགས་ནང་རྣལ་འབྱོར་ཉམས་ལེན་གྱི་ཐབས་ལམ༽ ཞེས་པའི་ལྷན་ཚོགས་དབུ་འཛུགས་དང་། སེར་བྱེས་མཁས་སྙན་གྲྭ་ཚང་དང་ཊུར་ཀུར་གཙུག་ལག་སློབ་གཉེར་ཁང་གཉིས་ཀྱི་དབུ་འཛིན་བར་ཤེས་ཡོན་བརྗེ་ལེན་གྱི་ཡིག་ཆ་བརྗེ་ལེན། ༸གོང་ས་མཆོག་གིས་ཧི་རྡུའི་བླ་ཆེན་ཤི་ཝ་ཀུ་མཱ་རཱ་མ་ཧཱ་སྭ་མུ་ཇི་མཆོག་གིས་ཕུལ་བའི་སློབ་གཉེར་ཁང་དེའི་ཕུལ་བྱུང་གཙུག་ལག་སློབ་དཔོན་གྱི་ཕྱག་འཁྱེར་འབུལ་བཞེས་བཅས་གནང་རྗེས། ༸གོང་ས་མཆོག་གིས་༼འཛམ་གླིང་ཞི་བདེ་བསྐྲུན་རྒྱུར་འགྲོ་བ་མིའི་ཐབས་ལམ༽ཞེས་པའི་བརྗོད་གཞིའི་ཐོག་བཀའ་སློབ་གནང་ཡོད་པ་དང་། རྒྱ་གར་གྱི་སྲོལ་རྒྱུན་རིག་གནས་ཐད་ཁོང་གིས་རྒྱ་གར་འཕགས་པའི་ཡུལ་ནི་འཛམ་གླིང་ནང་སྤྱི་ཚོགས་དཔལ་ཡོན་ཧ་ཅང་ཕྱུག་པའི་རྒྱལ་ཁབ་འགའ་ཡོད་པའི་གྲས་ཀྱི་གཅིག་ཆགས་ཡོད་པ། འཚེ་བ་མེད་པ་དང་ཞི་བ་ནི་ཡུལ་འདིའི་སྲོལ་རྒྱུན་རིག་གཞུང་ཞིག་ཆགས་ཡོད་པ་མ་ཟད། དངོས་པོའི་གནས་ལུགས་ལ་དཔྱད་པ་བྱ་རྒྱུའི་སྲོལ་རྒྱུན་གྱི་རིག་པའི་གཞུང་ལུགས་ཧ་ཅང་ཚད་མཐོན་པོར་སོན་ཐུབ་ཡོད། འཚེ་བ་མེད་པའི་ཉམས་ལེན་ནི་རྒྱ་གར་ནང་ཆོས་ལུགས་འདྲ་མིན་ལ་བཟོད་བསྲན་དང་གུས་བརྩི་ཞུ་རྒྱུའི་ལམ་སྲོལ་རྒྱུན་འཁྱོངས་བྱེད་བཞིན་པ་དེས་མཚོན་ཐུབ། རྒྱ་གར་གྱི་གདོད་མའི་ཆོས་ལུགས་ལ་ཆ་མཚོན་ན་གྲངས་ཅན་པ་དང་གཅེར་བུ་བ། ནང་པ་སངས་རྒྱས་པ་བཅས་དང་། ཕྱིས་སུ་སིཀ་ཆོས་ལུགས་དང་ཕྱི་ཕྱོགས་ནས་ཡེ་ཤུ་དང་ཁ་ཆེ། ཇིའུ། ཛོ་ར་སི་ཊི་རན་ཆོས་ལུགས་སོགས་དར་འཕེལ་བྱུང་བ་ཙམ་མ་ཟད། ཆོས་ལུགས་དེ་དག་འཆམ་མཐུན་ཐོག་མཉམ་གནས་བྱས་དང་བྱེད་བཞིན་ཡོད། ཅེས་སོགས་ཀྱི་བཀའ་སློབ་གནང་བར་མ་ཟད། དེར་ཡོད་སློབ་ཕྲུག་ཁག་ཅིག་གི་དྲི་བར་བཀའ་ལན་གནང་ཡོད།
ཕྱི་ཚེས་ ༢༨ ཉིན་གྲོང་ཁྱེར་མུམ་བྷེ་ནང་༸གོང་ས་མཆོག་དབུ་བཞུགས་ཐོག རྒྱ་གར་གྱི་གློག་བརྙན་འཁྲབ་སྟོན་པ་དང་གནད་ཡོད་མི་སྣ། མི་མང་བཅས་འདུ་འཛོམས་ཀྱིས་རྒྱལ་སྤྱིའི་བྱམས་བརྩེའི་ཉིན་མོ་ཞེས་པ་ཞིག་སྲུང་གཙི་གནང་ཡོད་པ་མ་ཟད། ༸གོང་ས་མཆོག་གིས་ད་ལྟའི་དུས་སྐབས་ཀྱི་མི་སྒེར་བའི་མི་ཚེའི་དོན་སྙིང་དེ་རྒྱལ་ཁབ་དང་རྒྱལ་ཁབ་བར་གཅིག་པུར་མ་ཡིན་པར། མི་དང་མིའི་བར་གྱི་བརྩེ་སེམས་དང་འདུ་ཤེས་བཟང་པོ་དགོས་པ་མ་ཟད་། མི་དང་དུད་འགྲོ་སེམས་ཅན་བར་ལའང་འདུ་ཤེས་བཟང་པོ་འཛིན་དགོས་པའི་ལམ་སྟོན་བཀའ་སློབ་གནང་ཡོད།
གསར་འགོད་པ། དོན་གོ
་་་་་ མི་དང་མིའི་བར་གྱི་བརྩེ་སེམས་དང་འདུ་ཤེས་བཟང་པོ་དགོས་པ་མ་ཟད་། མི་དང་དུད་འགྲོ་སེམས་ཅན་བར་ལའང་འདུ་ཤེས་བཟང་པོ་འཛིན་དགོས་་་་་་་་་
མཛད་པ་ཀུན་ལས་གསུང་གི་ནི། །
མཛད་པ་མཆོག་དེ་ཡང་ནི། །
འདི་ཉིད་ཡིན་ཕྱིར་མཁས་པ་ཡིས། །
འདི་ལས་སངས་རྒྱས་རྗེས་དྲན་བྱོས། །
རྗེ་ཙོང་ཁ་བས་གསུངས་པ་ལྟར་༧ གོང་ས་སྐྱབས་མགོན་ཐམས་ཅད་མཁྱེན་ཅིང་གཟིགས་པ་ཆེན་པོའི་མཛད་འཕྲིན་དག་ལ་ང་ཚོས་རྗེས་དྲན་བྱེད་དགོས།
འདི་ལྟར་འཇིག་རྟེན་གྱི་མགོན་དུ་སྐུ་ཚེ་བསྐལ་བརྒྱར་རྟག་བརྟན་གནས་པར་ཤོག
གུས་ཕྱག་གྲངས་མེད་འབུལ་ལོ།།