རྒྱ་ནག་ལ་འགྱུར་བ་འགྲོ་མིན་བརྗོད་རྒྱུ་ཏོག་ཙམ་སྔ་དྲགས་པ་རེད།

དེ་རིང་༸ གོང་ས་མཆོག་གིས་དགའ་ལྡན་བྱང་རྩེ་གྲྭ་ཚང་དུ་བྱང་ཆུ་ལམ་རིམ་ཆེན་མོའི་གསུང་ཆོས་དབུ་འཛུགས་གནང་སྟེ། བྱང་ཆུབ་ལམ་རིམ་ཆེན་མོའི་གཞུང་ལ། བྱ་བྲལ་རྫོགས་ཆེན་པ་ཞབས་དཀར་ཚོགས་དྲུག་རང་གྲོལ་སོགས་ས་དགེ་བཀའ་རྙིང་རིས་ཀྱི་བླ་སྦྲུལ་ཚོས་ཐུགས་སྣང་གནང་སྟེ་རྒྱལ་བའི་བསྟན་པར་ཞབས་འདེགས་བསྒྲུབས་ཡོད་སྐོར་སོགས་གསུངས་འདུག   

རྒྱ་གར་ལྷོ་ཕྱོགས་མུམ་བྷེ་གྲོང་ཁྱེར་དུ་ཡོད་པའི་དུད་འགྲོ་སྲུང་སྐྱོབ་ཚོཊ་པས་གསོལ་འདེབས་ཞུས་དོན་ལྟར། ཕྱི་ཚེས་ ༢༨ ཉིན་༧གོང་ས་མཆོག་འཛམ་གླིང་བྱམས་བརྩེའི་ཉིན་མོ་ (World Compassion Day) ཞེས་པའི་ལྷན་ཚོགས་སུ་ཆིབས་བསྒྱུར་བསྐྱངས་ཏེ། ཚོགས་ཐོག་ཏུ་དཀར་ཟས་བསྟེན་ན་ཡག་པོ་ཡོད་པ་དང་། བཙན་བྱོལ་བོད་མིའི་སྤྱི་ཚོགས་ནང་དུའང་གདན་ས་གསུམ་གཙོས་གྲྭ་ཚང་ཕལ་མོ་ཆེའི་དཀར་ཟས་སྟེན་གྱི་ཡོད་ཚུལ་སོགས་གསུངས་འདུག

སྐབས་དེར་གསར་འགོད་པས་རྒྱ་ནག་གི་མགོ་ཁྲིད་གསར་བའི་འཕོ་འགྱུར་ཐད་ཐུགས་རེ་གང་ཡོད་དྲིས་པའི་ལན་དུ་ “ རྒྱ་ནག་གི་མགོ་ཁྲིད་གསར་པ་ཚོ་མི་སྒེར་གྱི་ཐོག་ནས་ལྟ་སྐབས་མི་ཡག་པོ་ཡོད་ཀྱང་། དམར་པོའི་ལམ་ལུགས་དེ་ཧ་ཅང་མཁྲེགས་པོ་ཡིན། དེང་སྐབས་འཛམ་གླིང་ནང་གཅིག་བསྡུས་རིང་ལུགས་ཇེ་ཉུང་དུ་འགྲོ་བཞིན་ཡོད། རྒྱ་ནག་ནས་ཀྱང་འཛམ་གླིང་སྤྱི་མཚུངས་ཐོག་ནས་དམངས་གཙོ་དང་ཁྲིམས་ཀྱི་དབང་བསྒྱུར་ཕྱོགས་སུ་འགྱུར་བ་གཏོང་རྒྱུ་ལས་གདམ་ཀ་གཞན་གང་ཡང་མེད། འོན་ཀྱང་འགྱུར་བ་ལམ་སེང་ཡོང་མིན་བརྗོད་རྒྱུ་ད་ཆར་ཏོག་ཙམ་སྔ་དྲགས་པ་རེད། དེར་བརྟེན་ངང་སྒུག་བྱས་ནས་ལྟ་རྒྱུ་རེད” ཅེས་གསུངས་འདུག  

ཕྱི་ཚེས་ ༢༩ ཉིན་གྱི་སྔ་དྲོར་༸གོང་ས་མཆོག་མུམ་བྷེ་ནས་མཁའ་ལམ་བརྒྱུད་གྷོའོ་གནམ་ཐང་དུ་ཞབས་སོར་བཀོད་ཡོད་ཅིང་། དེར་ཤར་རྩེ་མཁན་རིན་པོ་ཆེ་དགེ་བཤེས་བྱང་ཆུབ་ཆོས་ལྡན་མཆོག་དང་། འབྲས་སྤུངས་མཁན་པོ་ཁྲི་པ་བློ་བཟང་བསྟན་འཛིན་མཆོག གྲྭ་ཚང་ཁག་གི་མཁན་པོ་བླ་སྤྲུལ་དང་ལྷོ་སྤྱི། མོན་གྷོ་འདོད་རྒུ་གླིང་ས་གནས་མགོ་འཛིན། ཚོགས་པ་ཁག་གི་སྐུ་ཚབ་བཅས་ཀྱི་ཕེབས་བསུའི་དབུས་དཔལ་ལྡན་འབྲས་སྤུངས་ཚོགས་ཆེན་དུ་ཆིབས་བསྒྱུར་བསྐྱངས་ཡོད་འདུག ཉིན་རྒྱབ་འབྲས་སྤུངས་ཚོཊ་ཆེན་གྱི་བཞུགས་ཁྲིར་མངའ་གསོལ་གྱིས་དགའ་ལྡན་ཁྲི་རིན་པོ་ཆེ་མཆོག་དང་འབྲས་སྤུངས་མཁན་པོ་ཁྲི་པ་བློ་བཟང་བསྟན་པ་མཆོག་གིས་མཎྜལ་རྟེན་གསུམ་འདེཊ་འབུལ་གནང་གྲུབ་རྗེས་༸གོང་ས་མཆོག་གིས་རྒྱལདབང་སྐུ་ཕྲེང་རིམ་བྱོན་དང་དགའ་ལྡན་ཕོ་བྲང་བར་གྱི་འབྲེལ་བའི་སྐོར་གསུངས་དོན། “ ༸ གོང་ས་ལྔ་པ་ཆེན་པོས་ལུགས་གཉིས་ཀྱི་ཐུགས་འགན་བཞེས་ཏེ་འབྲས་སྤུངས་ནས་རྩེ་པོ་ཏ་ལར་ཚུར་ཕེབས་པ་རེད། ད་ལྟ་ང་ཚོ་བཙན་བྱོལ་བ་བྱས་ཏེ་བསྡད་ཡོད་པ་རེད་མ་གཏོགས་འགྲོ་སྟངས་ཏེ་རྩེ་ཕོ་བྲང་ནས་འབྲས་སྤུངས་ལ་ཡར་ལོག་རྒྱུའི་མཚམས་ལ་བསླེབས་ཡོད།
དེར་བརྟེན། ང་ཚོ་བྱེས་ཀྱི་དཔལ་ལྡན་འབྲས་དཀར་སྤུངས་པར་སྔོན་ལ་བཅར་ཐུབ་ན་བསམས་བྱུང་། གཙོ་ཆེ་ཤོས་གླིང་རིན་པོ་ཆེའི་གདུང་རྟེན་འདིར་བཞུགས་ཡོད། རྗེ་རིན་པོ་ཆེའི་སྨད་དུ་བྱུང་བའི་ལེགས་བཤད་གངས་ཅན་མཁས་པའི་གཞུང་པོད་བཅོ་བརྒྱད་ཡོད་པའི་ནང་བཤད་ལུང་ཡོད་པ་པོད་དགུ་ཙམ་འདུག འབད་བརྩོན་བྱས་ཏེ་བཤད་ལུང་གང་ས་ག་ནས་བཙལ་ཏེ་བཤད་ལུང་ཡོད་པ་དེའི་ནང་ནས་སྐབས་སུ་བབ་པ་དེ་ལམ་རིམ་ཆེ་འབྲིང་ཆུང་གསུམ་ཞུ་བ་ཡིན་ནའང་འདྲ། ལམ་རིམ་ཆེན་མོ་དང་ལམ་རིམ་ཆུང་ངུ་། ལམ་རིམ་བསྡུས་དོན་གཙོ་བོར་གྱུར་བ་དེ་དང་འབྲེལ་བའི་ཁྲིད་ཆེན་ཁག་གི་ཁྲིད་རྒྱུན་ཐོབ་པ་དེ་དག་ཆ་ཚང་དེ་རེས་འདོན་རྒྱུའི་གོ་སྐབས་བྱུང་བ་རེད། འཆད་ཉན་བྱེད་པའི་རིང་འདིར་རྗེ་རིན་པོ་ཆེས་གཏེར་ནས་བཞེས་པའི་ཆོས་དུང་དེ་མར་གདན་འདྲེན་ཞུས་ཏེ་དེའི་བྱིན་རླབས་དང་རྟེན་འབྲེལ་གྱི་ཁྱད་པར་ཏན་ཏན་ཡོང་གི་རེད་བསམ་བྱུང་། བདུན་ཕྲག་གཉིས་ཀྱི་རིང་ལམ་རིམ་གྱིས་ཆོས་འབྲེལ་བྱེད་ས་སོ་སོར་གདན་འདྲེན་ཞུ་རྒྱུ་ཡིན། ཆོས་དུང་དེ་འབྲས་སྤུངས་ཀྱི་ཡིན་དུས་འབྲས་སྤུངས་ཁྲི་པར་མར་གདན་འདྲེན་ཞུས་ཆོག་པའི་ཆོག་མཆན་ཞུ་གི་ཡིན” ཞེས་གསུངས་འདུག  

ཁ་སང་༸གོང་ས་མཆོག་གིས་འབྲས་སྤུངས་དགོན་པའི་མཛད་འཕྲིན་གྲུབ་རྗེས། དགའ་ལྡན་ཤར་རྩེ་གྲྭ་ཚང་གི་ཆོས་རར་དགེ་འདུན་པ་ ༣༠༠༠ བརྒལ་བའི་དབུས་སུ་ཆིབས་སྒྱུར་གྱིས་བྱང་ཆུབ་ལམ་རིམ་ཆེན་མོའི་མཁས་པའི་བགྲོ་གླེང་དབུ་འབྱེད་མཛད་ཅིང་། དེ་རིང་ཞོགས་པར་དགའ་ལྡན་ཁྲི་རིན་པོ་ཆེ་མཆོག་དང་ཤར་རྩེ་མཁན་པོ་དགེ་བཤེས་བྱང་ཆུབ་ཆོས་ལྡན་མཆོག མཆོག་སྤྲུལ་གླིང་རིན་པོ་ཆེའི་སྐུ་ཚབ་དགེ་བཤེས་རྣམ་རྒྱལ་དབང་ཆེན་མཆོག་བཅས་ཀྱིས་ཕེབས་བསུའི་ཁྲོད་༧གོང་ས་མཆོག་དགའ་ལྡན་བྱང་རྩེའི་གཙུག་ལག་ཁང་གི་བཞུགས་ཁྲིར་ཞབས་སོར་འཁོད་དེ། དགེ་འདུན་འདུས་མང་དང་རྒྱལ་ཁབ་ ༥༣ ཙམ་ནས་ཕེབས་པའི་ཆོས་ཞུ་བ་ ༢༥༠༠༠ ལྷག་ལ་བྱང་ཆུབ་ལམ་རིན་ཆེན་མོའི་གསུང་ཆོས་དབུ་འཛུགས་བསྐྱངས་ཡོད།

སྐབས་དེར་༸གོང་ས་མཆོག་གིས་རྗེ་རིན་པོ་ཆེའི་ལམ་རིམ་ཆེན་མོ་ལྗགས་རྩོམ་གནང་སྟེ་ལོ་ ༦༡༠ དང་། དགའ་ལྡན་ཕྱག་བཏབ་པའི་རྗེས་ཀྱི་དགའ་ལྡན་ལམ་རིམ་ཆེ་མོའི་གསུང་ཆོས་གནང་སྟེ་ལོ་ ༦༠༢ ཙམ་ཕྱིན་ཡོད་པ་དང་། རྗེ་རིན་པོ་ཆེ་སྐུ་དངོས་སུ་བཞུགས་པའི་རིང་གཞུང་འདི་ལ་བརྟེན་ནས་ཉམས་རྟོགས་མང་པོ་ཞིག་བྱུང་ཡོད་པ་མ་ཟད། ཁོང་དགོངས་པ་གཞན་དོན་དུ་གཤེགས་པའི་རྗེས་སུའང་། རྗེ་བཙུན་ཤེས་རབ་སེང་གེ་ནས་རྒྱལ་བ་དགེ་འདུན་གྲུབ་བར་གཞུང་འདིའི་ཐོག་ཉམས་བཞེད་དང་འཆད་ཉན་གནང་སྟེ་བསྟན་འགྲོའི་དོན་རླབས་ཆེན་མཛད་པའི་གང་ཟག་མང་པོ་བྱུང་བ་དང་། དགའ་ལྡན་པ་ཙམ་མིན་པར་བྱ་བྲལ་རྫོགས་ཆེན་པ་ཞབས་དཀར་ཚོགས་དྲུག་རང་གྲོལ་ཡང་ཐོག་མར་ཁོང་གིས་རྩ་བའི་བླ་མ་དེས་ལམ་རིམ་ཆེན་མོ་ཞིག་གནང་སྟེ། བློ་སྦྱངས་གནང་རྗེས་མཁས་གྲུབ་གཉིས་ལྡན་གྱི་ཆགས་པ་སོགས། བོད་ཀྱི་ས་དགེ་བཀའ་རྙིང་རིས་སུ་མ་ཆད་པའི་ལམ་རིམ་ཆེན་མོར་ཐུགས་སྣང་གནང་སྟེ་རིས་སུ་མ་ཆད་པའི་རྒྱལ་བའི་བསྟན་པར་ཞབས་འདེགས་བསྒྲུབ་ཡོད་པའི་སྐོར་སོགས་གསུངས་འདུག  

ཐེངས་འདིའི་གསུང་ཆོས་གོ་སྒྲིག་ཚོགས་ཆུང་གིས་སྐད་རིགས་ ༡༢ ཐོག་རྒྱང་སྲིང་མཐུན་རྐྱེན་བསྐྲུན་ཡོད་འདུག

གསར་འགོད་པ། དོན་གོ