གཞུང་འབྲེལ་མཆོད་འབུལ།

ཁ་སང་ཕྱི་ཚེས་ ༣༠ ཉིན་གྱི་ཕྱི་དྲོ་ཆུ་ཚོད་ ༣།༠༠ པའི་སྟེང་བོད་མིའི་སྒྲིག་འཛུཊ་ཆོས་རིག་ལས་ཁུངས་ཀྱི་གོ་སྒྲིག་འོག བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་སྐྱབས་རྗེ་ཀིརྟི་རིན་པོ་ཆེ་དབུ་བཞུགས་ཐོག དབུས་བོད་མིའི་སྒྲིག་འཛུགས་མང་གཙོ་ཀ་བ་གསུམ་གྱི་མཛད་གཙོ་རྣམ་པ་དང་།  ལྷན་ཁང་ཁག་གི་དྲུང་ཆེ་ཆུང་དང་སྲི་ཞུའི་ལས་བྱེད་ཡོངས། གཞན་ཡང་དྷ་སའི་ཉེ་འཁོར་གྱི་དགོན་སྡེ་ཁག་གི་གྲྭ་བཙུན་དང་སློབ་གྲྭ་ཁག་གི་སློབ་མ། སེར་སྐྱ་མི་མང་བཅས་འདུ་འཛོམས་ཀྱིས། ཉེ་ལམ་བོད་ནང་རང་ལུས་མེར་བསྲེཊ་ཀྱིས་རྒྱ་གཞུང་ལ་ངོ་རྒོལ་གནང་མཁན་རྒྱལ་གཅེས་དཔའ་བོ་རྟ་མགྲིན་སྐྱབས་ལགས་དང་། རྟ་མགྲིན་རྡོ་རྗེ། བཙུན་མ་སངས་རྒྱས་སྒྲོལ་མ། དབང་རྒྱལ། དཀོན་མཆོག་ཚེ་རིང་། མགོན་པོ་ཚེ་རིང་། སྐལ་བཟང་སྐྱབས། སངས་རྒྱས་བཀྲ་ཤིས། བན་དེ་མཁར། ཚེ་རིང་རྣམ་རྒྱལ་བཅས་ཀྱི་བསྔོ་སྨོན་དང་། ཁོང་རྣམ་པའི་ནང་མི་སྤུན་ཟླ་རྣམས་ལ་གདུང་སེམས་མཉམ་སྐྱེད་མཚོན་ཆེད་གཞུང་འབྲེལ་ཐོག་མཆོད་འབུལ་སྨོན་ལམ་གནང་ཡོད།

མཆོད་འབུལ་སྨོན་ལམ་ཐོག་ཆོས་རིག་བཀའ་བློན་པདྨ་ཆོས་འབྱོར་མཆོག་གིས་ཉེ་བའི་བདུན་ཕྲག་གཅིག་རིང་བོད་ནང་བོད་མི་ ༡༠ རང་ལུས་མེར་བསྲེཊ་ཀྱིས་རྒྱ་གཞུང་ལ་ངོ་རྒོལ་བྱས་ཡོད་པའི་གནས་ཚུལ་རིམ་པ་ངོ་སྤྲོད་གནང་བ་མ་ཟད། བཙན་བྱོལ་ནང་ཡོད་པའི་བོད་མི་ཚོས་རྒྱལ་གཅེས་པ་ཁོང་རྣམ་པའི་བློས་བཏང་བའི་གནས་ཚུལ་མཁྱེན་རྟོགས་ཡོད་པའི་ཐོག རང་ངོས་ནས་ལས་འགུལ་འདྲ་མིན་སྤེལ་དགོས་སྐོར་དང་། ཁོང་ཚོའི་ཞལ་ཆེམས་དང་མངོན་འདོད་ཆད་ལྷག་མེད་པར་རྒྱལ་སྤྱིའི་ཐོག་གསལ་བསྒྲགས་བྱ་དགོས་པའི་འབོད་སྐུལ་སོགས་གནང་ཡོད།