ཟླ་སྔོན་མའི་ཕྱི་ཚེས་ ༢༨ ནས་ཁ་སང་བར་ཨ་རིའི་མེ་སི་ཆུ་སཱི་རུ་སྨོན་ལམ་འདོན་པ་དང་མཚན་རྟགས་བསྡུ་རུབ་ཀྱི་བོད་དོན་ལས་འགུལ་ཞིག་སྤེལ་ཡོད་འདུག
ཨ་རིའི་མཱེ་སི་ཆུ་སཱི་མངའ་སྡེའི་གཙུག་ལག་སློབ་གཉེར་ཁང་(University of Massachusetts) གི་མཐོ་སློབ་ཁག་ལྔའི་ནང་དུ་ཡོད་པའི་བོད་རང་བཙན་སློབ་ཕྲུག་ཚོགས་པ་དང་། ས་གནས་བོད་མི་དང་བོད་དོན་རྒྱབ་སྐྱོར་བ་བཅས་མཉམ་རུབ་ཐོག ས་གནས་ནོར་ཐི་ཨམཊོན་(Northamton)དུ། ཟླ་སྔོན་མའི་ཕྱི་ཚེས་ ༢༨ ཉིན་ཏེ་ལྷག་དཀར་སྲུང་གཙི་དང་བསྟུན་ཏེ་བོད་དོན་ལས་འགུལ་ཞིག་སྤེལ་ཡོད་པ་དང་། འདས་པའི་ཉིན་བཞིའི་རིང་ལས་འགུལ་སྤེལ་ཡུལ་དེར་གུར་བརྒྱབ་སྟེ་སྨོན་ལམ་འདོན་པ་དང་། བོད་དོན་ལ་རྒྱབ་སྐྱོར་གྱི་མཚན་རྟགས་བསྡུ་རུབ་གནང་ཡོད་ཅིང་། ཁ་སང་ཕྱི་དྲོའི་ཆུ་ཚོད་ ༩ པའི་སྟེང་མར་མེ་ཁྲོམ་སྐོར་ཞིག་དང་བསྟུན་ཏེ་ལས་འགུལ་མཇུག་བསྒྲིལ་གནང་སོང་།
མཱེ་སི་ཆུ་སཱི་གཙུག་ལག་སློབ་གཉེར་ཁང་དུ་སློབ་གཉེར་གནང་བཞིན་པའི་མཁན་པོ་ཀུན་དགའ་འཕྲིན་ལས་ལགས་ཀྱིས་གསར་འགོད་པར་ངོ་སྤྲོད་གནང་པ་ལྟར་ན། ཉིན་བཞི་ཙམ་གྱི་ལས་འགུལ་འདིར་ཁོང་ཚོས་ད་ལྟའི་བར་དུ་རང་ལུས་མེར་བསྲེགས་གཏོང་མཁན་གྱི་རྒྱལ་གཅེས་དཔའ་བོ་རྣམ་པའི་ཆེད་དུ་བསྔོ་བ་སྨོན་ལམ་འདོན་པ་དང་། ཉིན་རེའི་དགོང་དྲོའི་ཆུ་ཚོད་ལྔ་པ་ནས་ནཱོརཐི་ཧམ་ཊོན་(Northhamton)ས་གནས་གྲོང་ཁྱེར་ནང་དུ་མར་མེ་ཁྲོམ་སྐོར་བྱེད་པ། དེ་བཞིན། མི་ཁག་ཅིག་གིས་བོད་ནང་གི་རང་ལུས་མེར་བསྲེགས་ལས་འགུལ་ལ་རྒྱབ་སྐྱོར་མཚོན་པའི་མཚན་རྟགས་བསྡུ་རུབ་བཅས་གནང་ཡོད་འདུག་ལ། དེ་ནི་ཨ་རིའི་གཞུང་དང་མཉམ་འབྲེལ་རྒྱལ་ཚོགས། རྒྱལ་སྤྱིའི་འགྲོ་བ་མིའི་ཐོབ་ཐང་ཚོགས་པ། བོད་དོན་རྒྱབ་སྐྱོར་ཚོགས་པ་བཅས་ལ་བསྐུར་ནས་བོད་མིའི་མངོན་འདོད་ལ་དོན་དང་ལྡན་པའི་རྒྱབ་སྐྱོར་ཡོང་བའི་འབོད་སྐུལ་ཞུ་འཆར་ཡོད་འདུག
ལས་འགུལ་གོ་སྒྲིག་པ་ས་གནས་བོད་མི་དོན་གྲུབ་ལགས་ཀྱིས་གསར་འགོད་པའི་དྲི་བར་ལན་འདེབས་སྐབས། “བོད་ནང་ད་བར་བོད་མི་ ༩༠ ཙམ་གྱིས་རང་ལུས་མེར་བསྲེགས་བཏང་ཡོད། ཁོང་ཚོའི་མངོན་འདོད་གཙོ་བོ་ནི་༧གོང་ས་མཆོག་བོད་དུ་ཕེབས་འཇུག་རྒྱུ་དང་། རང་གི་རིག་གཞུང་སྲུང་སྐྱོབ་དང་སྐད་ཡིག་སློབ་གཉེར་བྱེད་རྒྱུའི་རང་དབང་དགོས་པ་དེ་རེད། དེ་དག་འགྲོ་བ་མིའི་གཞི་རྩའི་ཐོབ་ཐང་ཡིན་སྟབས། ང་ཚོ་བོད་མིར་ཡང་ངེས་པར་དགོས་པ་རེད། དེ་ལ་ཨ་རི་དང་མཉམ་འབྲེལ་རྒྱལ་ཚོགས་སོགས་ཀྱིས་དོན་ཕན་ལྡན་པའི་རྒྱབ་སྐྱོར་ཞིག་རག་ཐབས་སུ་དེ་རིང་གི་ལས་འགུལ་འདི་སྤེལ་བ་ཡིན” ཞེས་བརྗོད་བྱུང་།
ས་གནས་གསར་འགོད་པ། སངས་རྒྱས་བཀྲ་ཤིས།
