དཔལ་ས་སྐྱའི་སྨོན་ལམ་ཆེན་མོ།

འདི་ལོའི་དཔལ་ས་སྐྱའི་སྨོན་ལམ་ཆེན་མོ་ཐེངས་ཉེར་གཅིག་པ་དེ་ཟླ་སྔོན་མའི་ཕྱི་ཚེས་ ༢༢ ནས་ཟླ་འདིའི་ཚེས་ ༡ བར་ གནས་མཆོག་ལུམ་བྷའི་ཚལ་དུ་ཚོགས་ཡོད་འདུག

ཐུབ་བསྟན་རྒྱལ་མཚན་ལགས་ཀྱིས་གནས་ཆུལ་བཏང་འབྱོར་ལ། ཟླ་སྔོན་མའི་ཕྱི་ཚེས་ ༢༢ ནས་ཟླ་འདིའི་ཚེས་ ༡ བར་གྱི་ཉིན་གྲངས་ ༡༠ རིང་གནས་མཆོག་ལུམ་བྷའི་ཚལ་དུ། སྔར་རྒྱུན་བཞིན་ས་སྐྱའི་སྨོན་ལམ་ཆེན་མོ་ཐེངས་ ༢༡ པ་དེ་ཚོགས་གནང་ཡོད་འདུག འདི་ལོའི་སྨོན་ལམ་ཆེན་མོ་ཚོགས་མགོན་དུ་དཔལ་ས་སྐྱའི་ཁྲི་ཐོག་ཞེ་གཅིག་པ་ཆེན་པོ་སྐྱབས་མགོན་༸གོང་མ་བདག་ཁྲི་རིན་པོ་ཆེ་མཆོག་དང་ཕོ་བྲང་རྣམ་གཉིས་ཀྱི་གདུང་སྲས་རྣམ་པ་གཙོས་པའི་གཞན་ཡང་བླ་སྤྲུལ་དགེ་བཙུན་དབུས་པའི་འདུས་པ་ ༣༦༠༠ ཙམ་ལྷན་ཞུགས་ཀྱིས་འཕགས་པའི་བཟང་པོ་སྤྱོད་པའི་སྨོན་ལམ་དང་མཚན་བརྗོད་སོགས་གསུང་ཡོད་འདུག 

ཁ་སང་ཉིན་མཐའ་མར་ས་སྐྱ་གོང་མ་རིན་པོ་ཆེ་གིས་བལ་ཡུལ་གནས་སྡོད་བོད་པ་དང་ཧི་མ་ལ་ཡའི་མི་རིགས་གཙོ་བོ་གྱུར་པའི་ཆོས་ཞུ་ ༤༠༠༠ བརྒལ་བར་ཚེ་དབང་གནང་བ་དང་སྦྲགས། བོད་བསྟན་སྲིད་མི་རིགས་ཀྱི་ཆེད་མི་གྲངས་བརྒྱ་ལ་ཉེ་བས་སྐུ་སྲོག་མཆོད་མེར་ཕུལ་ཡོད་པས་དེ་དག་ལ་གདུང་སེམས་མཉམ་སྐྱེད་ཞུ་རྒྱུ་དང་། དེ་དག་གི་ཆེད་ཚང་མས་ཐུགས་སྨོན་སོགས་རྒྱ་མི་ཆུང་གནང་རོགས་ཞེས་འབོད་སྐུལ་གནང་ཡོད་འདུག  

ས་སྐྱ་སྨོན་ལམ་ཆེན་མོ་དེ་ ༡༩༩༢ ལོ་ནས་དབུ་འཛུགས་ཀྱིས་ད་བར་ལོ་ལྟར་གནས་མཆོག་ལུམ་བྷའི་ཚལ་དུ་ས་སྐྱའི་གདན་ས་ཁག་གི་རེ་མོས་ཀྱིས་གོ་སྒྲིག་འོག་ཚོགས་བཞིན་ཡོད་འདུག