དམར་གསོད་ཀྱི་ཚགས་ཡིག་ཀློག་དགོས།

མིག་མི་འཛུམ།

ཏག་ཏག་དུས་ཚོད་འདི་ལ་ང་ཚོའི་གཞོན་སྐྱེས་ཚོས་རང་རེའི་མེས་པོ་དག་གི་ལོ་རྒྱུས་ལ་ཕྱིར་མིག་ཅིག་ངེས་པར་དུ་བལྟ་དགོས་པར་མཐོང༌། ཐག་རིང་བོའི་གནའ་གཏམ་མི་བཤད། བདག་གིས་དགྲ་བོ་རྒྱ་དམར་བོད་དུ་བཙན་འཛུལ་བྱས་པ་ནས་ད་ལྟ་ལ་ཐུག་གི་བར་གྱི་ཁྲག་གི་རྦ་རླབས་འཁུར་ནས་བུད་སོང་བའི་རྣམ་ཤེས་ཀྱི་སྐོར་ནས་གླེང་འདོད་སྐྱེས་སོང༌། དོན་དངོས་ཀྱིས་བཤད་ན། ཡོངས་སུ་གྲགས་པའི་དམར་གསོད་དེ། མདོ་སྨད་ཁུལ་གྱི་ “སྐྱ་མོའི་དམར་གསོད་” ཆེན་མོ་དང་ “ ཁེ་སིན་དམར་གསོད་” ཆེན་མོ། “བཅུད་པར་དམར་གསོད” ཆེན་མོ། དབུས་གཙང་ཁུལ་དུ་ “གསུམ་བཅུའི་དམར་གསོད་” ཆེན་མོ་སོགས་དང༌། ཡང་ཁམས་ཆབ་མདོ་དང་སྡེ་དགེ་སོགས་ནས་ཀྱང་ཉི་མ་རེར་མི་གྲངས་སྟོང་ཕྲག་མང་བོ་བསད་པའི་ལོ་རྒྱུས་ཀྱི་ཡིག་ཚགས་ང་ཚོའི་མཐོང་ལམ་དུ་ཡོད་པ་ལྟར་ལགས་ན། ངས་འདི་ནས་བཤུ་འབྲི་བྱ་དགོས་དོན་མེད་པར་ཚང་མས་དུས་ཚོད་ཐུང་ཐུང་རེ་བཏང་ནས་ཀློག་དགོས་པའི་དུས་ལ་བབ་ཡོད། ངས་རང་གིས་མཐོང་ཚད་ཀྱི་ཡིག་ཚགས་ཁག་བསྡོམས་ནས་བོད་ཀྱི་ས་ཁུལ་ཁ་ཤས་ནས་བོད་མི་ ཅི་ཙམ་དམར་གསོད་བཏང་ཡོད་མེད་རོབ་ཙམ་གླེང་བར་བྱ།

ཀུན་གཟིགས་ྋཔཎ་ཆེན་རིན་པོ་ཆེའི་《ཡིག་འབྲུ་ཁྲི་བདུན་གྱི་སྙན་ཞུ》དང་། ཨ་ལགས་ཙ་ཡུས་ཀྱི་《ངའི་ཕ་ཡུལ་གྱི་ཡ་ང་བའི་ལོ་རྒྱུས》། དེ་མིན་བོད་གཞུང་ཕྱི་དྲིལ་གྱི་《བོད་དུ་ལག་བསྟར་བྱས་པའི་རྒྱ་དམར་གྱི་སྲིད་ཇུས་དང་བྱ་ཐབས》། ཡང་མི་སྒེར་ཁག་ཅིག་གི་མཛད་རྣམ་ལོ་རྒྱུས་སོགས་ནས་རྙེད་པའི་ལག་ལ་གང་ཐེབས་ཀྱི་ཟིན་བྲིས་མདོར་བསྡུས་ཤིག་ཀློག་མཁན་ཚོའི་སྤྱན་ལམ་དུ་ཕུལ་ནས་དམར་གསོད་ཀྱི་ཚགས་ཡིག་ངེས་པར་དུ་ཀློག་དགོས་པའི་རེ་འདུན་འདོན་རྒྱུ་ཡིན།

དཔེར་ན། སྤྱི་ལོ་ ༡༩༨༩ ལོར་པེ་ཅིང་ནས་དཔར་སྐྲུན་བྱས་པའི་《ཀྲུང་གོའི་མི་འབོར》ཞེས་པའི་བརྟག་དཔྱད་ སྙན་ཐོའི་ནང་དུ་འཁོད་པར་གཞིགས་ན། སྤྱི་ལོ་ ༡༩༦༣ ལོའི་མགོ་ལོག་ཁུལ་གྱི་མི་འབོར་དེ་སྤྱི་ལོ་ ༡༩༥༣ ལོའི་མི་འབོར་དང་བསྡུར་ན་བརྒྱ་ཆ་ ༧༨%༩༦ མར་ཆག་ཡོད་པ་དང༌། ཡུལ་ཤུལ་ས་ཁུལ་དུ་མི་འབོར་བརྒྱ་ཆ་ ༢༣%༨༩ མར་ཆག་ཡོད་ཚུལ་གསལ་བོར་བཀོད་ཡོད། ཡང་ཡིག་ཆ་དེའི་ནང་དུ་སྤྱི་ལོ་ ༡༩༥༧ ལོར་མགོ་ལོག་ཁུལ་དུ་བོད་མི་ ༦༤༡༩༡ ཡོད་པ་དང༌། ཡུལ་ཤུལ་ཁུལ་དུ་བོད་མི་ ༡༤༩༨༢༩ ཡོད་ཚུལ་བཤད་ཡོད་པའི་ཐོག་ནས་དབྱེ་ཞིབ་བྱས་ན་སྤྱི་ལོ་ ༡༩༥༣ ལོ་ནས་སྤྱི་ལོ་ ༡༩༦༤ ལོ་བར་མགོ་ལོག་ཁུལ་དུ་བོད་མི་ ༥༡༥༦༨ དང༌། ཡུལ་ཤུལ་ཁུལ་དུ་བོད་མི་ ༩༤༨༡༩ བཅས་ཁྱོན་བསྡོམས་ས་ཁུལ་དེ་གཉིས་ཀྱི་ནང་བོད་མི་ ༩༤༨༡༩ དམར་གསོད་བཏང་ཡོད་པ་ར་འཕྲོད་ཡོད།

ཡང་རྒྱ་གཞུང་གི་《མི་དམངས་བཅིངས་འགྲོལ་དམག་རྐང་དམག་ཧྲི་ཤོག་བཅུ་གཅིག་པའི་དམག་འཐབ་ལོ་རྒྱུས》 ནང་སྤྱི་ལོ་ ༡༩༥༨ ལོའི་ཟླ་བརྒྱད་ཀྱི་རིང་ཀན་ལྷོ་ཁུལ་གཅིག་བུ་ནས་བོད་མི་ ༢༡༡༤༡ རྩ་མེད་དུ་བཏང་ཡོད་ཅེས་དང༌། ཡང་ཀན་ལྷོ་དང་མགོ་ལོག རྔ་པ། རྨ་ལྷོ། མཆོ་ལྷོ། མཚོ་བྱང༌། མཚོ་ནུབ་སོགས་རང་སྐྱོང་ཁུལ་བདུན་གྱི་ཁོངས་སུ་བོད་མི ༨༨༠༩༠ རྩ་མེད་བཏང་ཡོད་པ་ར་འཕྲོད་ཡོད། དེ་དང་ཆ་མཚུངས་པར་སྤྱི་ལོ་ ༡༩༥༩ ལོ་ཟླ་ ༣ ཚེས་ ༡༠ ཉིན་ལྷ་སའི་རང་དབང་སྒེར་ལང་ཆེན་མོའི་བོད་མི་ ༡༥༠༠༠ ལྷག་དམར་གསོད་བཏང་ཡོད་པ་སོགས་ཐོག་དང་བོར་རྒྱ་དམག་སིམ་འཛུལ་བྱེད་སྐབས་དཔེ་མཚོན་དུ་དྲངས་ན་ས་ཁུལ་ཉུང་ཤོས་ཤིག་ནས་དེ་འདྲའི་མི་འབོར་མང་བོ་དམར་གསོད་བཏང་ཡོད་པའི་མི་ཚད། དེའི་གཞུག་ནས་ཡོངས་སུ་བཅིངས་འགྲོལ་ཐོབ་པར་བསྙད་པའི་དུས་རིམ་ནང་བཙོན་འཇུག་མནར་གཅོད་བཏང་ནས་ལྟོགས་ཤི་དང་གྲང་ཤི བརྡུང་བརྡེག་མནར་གཅོད་ཀྱི་འོག་ཤི་བའི་གྲངས་ཀ་ནི་ཁྱོན་ཡོངས་ནས་བསྡོམས་ན་ས་ཡ་ གཅིག་དང་འབུམ་གཉིས་ལ་སླེབས་པ་ཡོངས་གྲགས་ཡིན། དམར་གསོད་བཏང་ཟིན་པའི་མི་འབོར་དེ་འདྲ་ཡིན་པ་དང་དེའི་རྗེས་ན་ད་དུང་ནང་མི་བུ་ཕྲུག་ལུས་ཡོད་པ་དག་གི་སྡུག་བསྔལ་བའི་ལོ་རྒྱུས་ལ་ང་ཚོས་ད་ལྟ་བསམ་བློ་ཞིག་བཏང་ན་གང་འདྲ་ཡིན་མིན་བཤད་མི་དགོས་པར་ཤེས་ནུས་པ་ཞིག་མ་རེད་དམ།

དེ་ལྟ་བུའི་དྲག་སྤྱོད་ཀྱི་ཉམ་ཉེ་ཕོག་པའི་བོད་མི་རིགས་ཀྱི་སེམས་གཏིང་ན། དགྲ་བོ་ལ་སྙིང་ཉེ་ཞིང་བློ་དཀར་བའི་སེམས་བྱུང་གི་ཆ་ཅི་ཙམ་ལྷག་ཡོད་དམ། དེའི་ཁར་སྤྱི་ལོ་ ༡༩༨༧ ནས་ ༡༩༨༨ དང་ ༡༩༨༩ ལོ་རེའི་ཞི་རྒོལ་སྐབས་ཀྱི་དམར་གསོད་དང་བཙོན་འཇུག་མནར་གཅོད་ཀྱི་སྐོར་ཆབ་སྲིད་བཙོན་པའི་ཚིག་ཟིན་ལོ་རྒྱུས་བཙན་བྱོལ་ཁྲོད་མང་དུ་བྱུང་ཡོད་པར་གསལ་བ་དང༌། ཡང་དེའི་རྗེས་ནས་སྤྱི་ལོ་ ༢༠༠༨ ལོའི་དམར་གསོད་དང་བཙོན་འཇུག་མནར་གཅོད་ས་ཁུལ་རེ་རེའི་སྙན་ཐོའི་ནང་གསལ་བ་ལྟར་ཡིན། 

དེ་ལྟ་བུའི་དམར་གསོད་ཀྱི་རིམ་པ་མཐའ་ཡས་པ་བྱུང་བའི་རྗེས་ཀྱི་ད་ལོར། དེ་བས་ཀྱང་འཛམ་གླིང་གི་ལོ་རྒྱུས་ནང་བྱུང་མྱོང་མེད་པའི་བོད་མི་རིགས་ཀྱི་མགོ་ ལ་སྡུག་བསྔལ་ཞིག་བྱུང་ཡོད་པ་བོད་མི་རེ་རེའི་སེམས་ན་ཡོད་པ་ལྟར་ན། ད་དུང་ཁོང་ཁྲོ་བྱེད་མི་འོས་ཚུལ་དང༌། ད་དུང་དགྲ་ཡི་འདུ་ཤེས་འཛིན་མི་རུང་བར་བརྗོད་པའི་བོད་པ་ཆོས་བརྫུ་བ་དག་གི་སྡར་གཤིས་དེར་ང་ཡི་ག་གཏིང་ནས་ལོག་སོང༌། ད་ནི་དགྲ་བོའི་ངོས་ནས་ཆོག་ཤེས་ཀྱི་བསམ་བློ་ཞིག་མེད་ཚེ། འུ་ཅག་གི་ངོས་ནས་ཕར་དེ་ལྟར་བསྟུན་པ་ནི་དགོད་བྲོ་ཞིང་ངུ་སློང་བ་ཞིག་ལས་མ་འདས་སོ།།

ཡ་རབས་བྱེད་རྒྱུར་དགའ་ཞིང་བཟོད་སྒོམ་གནང་རྒྱུར་དགའ་བའི་འུ་ཅག་གི་མི་རིགས་འདི་སྡུག་མྱོང་མཁན་ཁོ་ནར་སུས་ཀྱང་བཀོད་སྒྲིག་བྱས་མེད་པ་ཤེས་དགོས་ཤིང༌། དེ་ཤེས་མཁན་ཡང་འུ་ཅག་རང་ཉིད་ཡིན་དགོས། གཞན་པས་ཚུར་སྡུག་པོ་བཏང་ནའང་དེ་ལས་འབྲས་དང་སྔོན་བསགས་ཁོ་ནར་བསམ་ནས་སྨོན་ལམ་རེ་བཏབ་ནས་སྡུག་སྒོམ་བྱེད་པའི་ཚོགས་གསོག་ཚུལ་དེར་ང་གཏན་ནས་མི་འཐད། ངས་ཆོས་ལུགས་ལ་ཟུར་ཟ་བྱེད་ཀྱི་མེད། ངས་ཚོགས་བསགས་སྒྲུབ་སྦྱོང་ལའང་ཟུར་ཟ་བྱེད་ཀྱི་མེད། ངས་གོ་འཛོལ་ཐེབས་པའི་རང་ཅག་གི་འདུ་ཤེས་འཛིན་སྟངས་ལ་རྒོལ་གྱི་ཡོད།

ང་ཚོ་བོད་ནས་འོང་ཞིང་རྒྱ་ནག་གི་སློབ་གྲྭར་སྐྱོད་མྱོང་མཁན་ཚང་མར་རྒྱུས་མངའ་ཡོད་པ་བཞིན། ཉི་ཧོང་བས་རྒྱ་ནག་བསད་པའི་ “ནན་ཅིང་དམར་གསོད་ཆེན་མོ་” བྱིས་པའི་སློབ་དེབ་ཏུ་བཀོད་ནས་བུ་རབས་ཚ་རྒྱུད་ཚང་མའི་སེམས་ལ་སྙིང་ནད་ལྕི་མོ་ཞིག་འཇོག་པར་འབད་ཀྱིན་ཡོད། དེ་ནི་རྒྱལ་ཁབ་ཅིག་གི་ངོས་ནས་བཤད་ན་ངེས་པར་དུ་མཁོ་བའི་རྒྱལ་གཅེས་ཀྱི་སློབ་གསོ་ཞིག་མ་རེད་དམ། 

ང་ཚོས་དུས་གཏན་ཏུ་བརྗེད་མི་ཉན་པ་ཞིག་ནི་རང་ཉིད་ཀྱི་མེས་པོ་གོང་མ་དག་དགྲ་བོས་ཇི་ལྟར་དམར་གསོད་བཏང་བ་དེ་ཡིན་ལ། དེ་བས་ཀྱང་ཀུན་གཟིགས་ྋཔཎ་ཆེན་རིན་པོ་ཆེ་དང་ཁྲི་ཆེན་གུང་ཐང་བསྟན་པའི་དབང་ཕྱུག་མཆོག མཁན་ཆེན་འཇིགས་མེད་ཕུན་ཚོགས་མཆོག་སོགས་མི་རིགས་འདི་འགྱེལ་ས་ནས་སློང་མཁན་གྱི་སྐྱེས་ཆེན་དམ་པ་ཅི་ཙམ་དགྲ་བོས་བསད་པ་དེ་དག་དྲན་འོས།

༣༠༡༢ །༡༢ །༣ ལ་བྲིས།