གཟའ་ཟླ་བའི་ཉིན་རྒྱལ་གཅེས་དཔའ་བོ་བློ་བཟང་དགེ་འདུན་ལགས་ཀྱི་རང་ལུས་མེར་བསྲེགས་དང་འབྲེལ་བ་ཡོད་པའི་དོགས་གཞིའི་འོག་ཝ་ཤུལ་རྡོ་བྲུག་འཇུ་བཟུང་བྱས་འདུག
ཕྱི་ཚེས་ ༣ ཉིན་མདོ་སྨད་མགོ་ལོག་པདྨ་རྫོང་ནས་རྒྱལ་གཅེས་དཔའ་བོ་བློ་བཟང་དགེ་འདུན་ལགས་ཀྱིས་རང་ལུས་མེར་བསྲེགས་བཏང་སྟེ་སྐུ་གྲོངས་ཡོད་པ་ལྟར། ཉིན་དེའི་མཚན་མོར་རྫོང་ཐོག་ཏུ་ཡོད་པའི་ཝ་ཤུལ་རྡོར་བྲུག་ལགས་དོན་རྐྱེན་དེ་དང་འབྲེལ་བ་ཡོད་པའི་དོགས་གཞིའི་འོག་འཛིན་བཟུང་བྱས་ཡོད་པ་དང་། ད་ལྟའི་ཆར་གསལ་ཅི་ཞིག་བྱུང་ཡོད་མེད་གསལ་ཁ་གང་ཡང་བྱུང་མི་འདུག
ཝ་ཤུལ་རྡོར་བྲུག་ནི་པདྨ་རྫོང་ལྡི་མདའ་ནས་ཡིན་ལ། དེང་སྐབས་པདྨ་རྫོང་ཐོག་ཏུ་རྒྱུན་སྡོད་བྱེད་བཞིན་ཡོད་པ་དང་། པདྨ་རྫོང་གི་མངའ་ཁོངས་ནང་ཁུལ་འཁོན་འཛིང་རིགས་བྱུང་སྐབས་གཟུ་བཤད་མཁན་གྱི་མི་སྣ་གལ་ཆེན་ཞིག་ཡིན་པ་དང་། ༢༠༠༨ ལོའི་བོད་མིའི་ཞི་རྒོལ་སྐབས་སུ་ཡང་ཁོང་ལ་ཞི་རྒོལ་གྱི་སྣེ་ཁྲིད་པའི་ཉེས་མིང་འོག་འཇུ་བཟུང་བཀག་ཉར་བྱས་མྱོང་ཡོད་འདུག
གཞན་ཡང་། ཚངས་དབྱངས་རྒྱ་མཚོ་ལགས་ཀྱིས་འདི་གར་གནས་ཚུལ་བཏང་འབྱོར་བྱུང་བ་ལྟར་ན། རྒྱལ་གཅེས་དཔའ་བོ་བློ་བཟང་དགེ་འདུན་ལགས་ཀྱིས་རང་ལུས་མེར་བསྲེགས་མ་གནང་བའི་སྔོན་དེར། སོ་སོའི་དགོན་པའི་གནད་ཡོད་དགེ་འདུན་པ་ཞིག་ལ་ཁ་པར་བཏང་སྟེ། “ངས་ད་སྐབས་རང་ལུས་མེར་བསྲེགས་གཏོང་རྒྱུར་གྲ་སྒྲིག་བྱེད་བཞིན་ཡོད། ལུས་ལ་ས་སྣུམ་བླུགས་ཟིན་པ་ཡིན། ད་གློག་ཆུ་ཞིག་འཐུང་རྒྱུ་ཡོད། དེ་འཐུང་ནས་མེར་སྒྲོན་རྒྱུ་ཡིན། སྤྱིར་ངས་ཡི་གེ་ཞིག་འབྲི་དགོས་བསམ་སོང་མོད། འོན་ཀྱང་། ང་ལ་ཡིག་གཟུགས་ཡག་པོ་མེད་པས་བྱུང་མ་སོང་། དེ་ནས་ཁྱེད་ལ་ཁ་པར་བཏང་བ་ཡིན། ང་ལ་རེ་བ་ཞིག་ཡོད་པ་ནི་བོད་ཆོལ་ཁ་གསུམ་གྱི་བོད་རིགས་ཡོངས་རྫོགས་མཐུན་སྒྲིལ་རྡོག་རྩ་ཆིག་སྒྲིལ་བྱ་རྒྱུ་དང་། ནང་འཛིང་མི་བྱེད་རྒྱུ་ངའི་རེ་བ་ཡིན། དེ་ལྟར་བྱེད་ཐུབ་པ་ཡིན་ན་ང་ཚོའི་རེ་བ་འགྲུབ་ཀྱི་རེད།”ཞེས་གསུངས་འདུག
ཁ་སང་པད་ནག་སྡེ་བ་རང་ནས་ཡིན་པའི་མང་ཚོགས་དང་གྲྭ་བ་རྣམས་ཀྱིས་ཁོང་གི་སྐུ་ཕུང་ལ་ཁ་བཏགས་བསྒྲོན་པ་དང་། ཤུལ་ལུས་ནང་མིར་སེམས་གསོ་དང་གདུང་སེམས་མཉམ་སྐྱེད་ཆེད། མཆོད་མེའི་ཞལ་འདེབས་དང་བསྔོ་བ་སྨོན་ལམ་བཅས་གནང་གཞིན་ཡོད་པ་མ་ཟད། རྒྱལ་གཅེས་དཔའ་བོ་ཁོང་གི་ཁ་ཆེམས་ལག་ལེན་བསྟར་རྒྱུ་ཡིན་པའི་དམ་བཅའ་བཞག་སྟེ། ད་ལྟའི་ཆར་བོད་མི་ཆིག་སྟོང་ཙམ་གྱིས་དམ་བཅའ་ཕུལ་ཟིན་ཡོད་པ་དང་། དེ་བཞིན་ས་གནས་གཞན་གྱི་དགོན་སྡེ་སོ་སོའི་བླ་གྲྭ་ཁག་དང་། མང་ཚོགས་བཅས་མི་མང་པོ་ཞིག་པད་ནག་དགོན་པར་སྐྱོད་ཡོད་ཀྱང་། ཕྱོགས་སོ་སོ་ནས་ཉེན་རྟོག་པ་དང་དམག་མིས་བཀག་འགོག་བྱས་ཏེ་རྒྱལ་གཅེས་དཔའ་བོ་བློ་བཟང་དགེ་འདུན་གྱི་སྐུ་ཕུང་ཡོད་སར་སྐྱོད་ཐུབ་མེད་པ་རེད།
རྒྱལ་གཅེས་དཔའ་བོ་བློ་བཟང་དགེ་འདུན་ལགས་ཀྱི་སྐུ་ཕུང་ཟླ་འདིའི་ཕྱི་ཚེས་ ༥ ཉིན་ཞུགས་འབུལ་གནང་གཏན་ཁེལ་ཡོད་པ་དང་། ཁོང་གི་སྐུ་ཕུང་ཞུགས་འབུལ་སར་ས་གནས་མང་པོ་ནས་བོད་མི་རྣམས་གདུང་སེམས་མཉམ་སྐྱེད་ཆེད་སྐྱོད་འཆར་ཡོད་སྟབས། སྐབས་དེར་ཉེན་རྟོག་པ་དང་དམག་མིའི་དམ་དྲག་བཀག་འགོག་ལ་བརྟེན་ནས། ཉིིན་དེར་འཁྲུག་ཟིང་འབྱུང་ཉེན་ཐད་རྒྱལ་གཅེས་དཔའ་བོ་ཁོང་གི་ནང་མིས་སེམས་ཁྲལ་བྱེད་བཞིན་ཡོད་འདུག
ད་སྐབས་མགོ་ལོག་པདྨ་རྫོང་དུ་རྒྱ་གཞུང་གིས་དམག་མི་ཕོན་ཆེན་བཏང་སྟེ་ཁྲོམ་སྲང་དང་ལམ་མདོ་ཁག དེ་བཞིན། པད་ནག་དགོན་གྱི་ཕྱོགས་སོ་སོ་བཅས་སུ་དམ་དྲགས་བྱས་ཡོད་ལ། ཁ་སང་ནས་བཟུང་སྐད་འཕྲིན་གྱི་གཙོས་ཁ་པར་དྲ་ལམ་དང་། གློག་ཀླད་དྲ་ལམ་སོགས་ཀྱང་བཀག་འགོག་བྱས་ཡོད་འདུག
པད་ནག་དགོན་ཀ་དག་སྤྲོས་བྲལ་གླིང་ནི་མགོ་ལོག་པདྨ་རྫོང་གི་ཁོངས་རྟོགས་སུ་དགོན་སྡེ་ ༢༣ ཡོད་པའི་ཡ་གྱལ་ཞིག་ཡིན་པ་དང་། ཆོས་ལུགས་རྙིང་མ་ཡིན་འདུག ཕྱི་ལོ་ ༡༨༦༠ ཡས་སུ་སངས་སངས་གྲྭ་གྲྭ་པདྨ་འགྲོ་འདུལ་རྡོ་རྗེས་ཕྱག་བཏབ་པ་དང་། དེ་ནས་རིམ་པས་སྦྲ་ནག་བླ་མ་བསྟན་པ་དང་། པད་ནག་དབོན་པོ་རིག་ལོ་སོགས་ཀྱིས་བསྐྱངས་ཏེ། ད་སྐབས་དགོན་བདག་བླ་མ་མཆོག་སྤྲུལ་བསྟན་པའི་ཉི་མ་ཡིན་ལ། དགོན་དེར་གྲྭ་བ་ ༡༠༠ མ་ཟིན་ཡོད་པ་དང་། པདྨ་རྫོང་ནས་སྤྱི་ལེ་ ༧ ཙམ་གྱི་སར་ཆགས་ཡོད་པ་རེད།
གསར་འགོད་པ། ཚེ་རིང་རྒྱལ།
