ཉེ་ཆར་རྒྱ་གཞུང་གིས་བོད་མདོ་སྨན་མཚོ་ལྷོ་ཁུལ་གསེར་ཆེན་རྫོང་ཨིར་རྟི་ཞང་འཁྱམས་རུ་དགོན་པའི་དགེ་འདུན་པ་གསུམ་འཇུ་བཟུང་བྱས་འདུག
ཉེ་སྔོན་མཚོ་ཁུལ་གྱི་སློབ་མའི་ཡར་ལངས་ཁྲོམ་སྐོར་གྱི་གནས་ཚུལ་དང་པར་རིས་ཕྱིར་བསྒྲགས་བྱས་པའི་ཉེས་མིང་འོག ཁུལ་དེའི་གསེར་ཆེན་རྫོང་ཨིར་རྟི་ཞང་འཁྱམས་རུ་དགོན་པའི་དགེ་འདུན་པ་གསུང་རབ་རྒྱ་མཚོ་དང་གྲགས་བཟང་། ཡེ་ཤེས་བཟང་བཟང་བོ་གསུམ་སྔ་ཕྱིར་འཇུ་བཟུང་བཙན་འཁྲིད་བྱས་ཡོད་པ་མ་ཟད། དམག་མིས་རླངས་འཁོར་ཆེ་བ་བཅུ་དང་འཇེབ་འཁོར་ཆུང་ཁ་ཤས་བཅས་དགོན་པའི་ཉེ་འདབས་སུ་འོང་སྟེ་རྔམས་རྫིག་འཇིགས་སྐུལ་བྱས་ཡོད་འདུག
གྲྭ་རྒྱ་མཚོ་ལགས་ཀྱིས་འདི་གར་གནས་ཚུལ་བརྗོད་དོན། ཟླ་འདིའི་ཕྱི་ཚེས་ ༡ ཉིན་གྲྭ་གསུང་རབ་རྒྱ་མཚོ་ལགས་མཚོ་ལྷོ་ཁུལ་གྱི་སྲིད་འཛིན་ལྟེ་གནས་གྲོང་ཁྱེར་ཆབ་ཆ་ནས་ཉེན་རྟོག་དམག་མིས་འཇུ་བཟུང་བཙན་ཁྲིད་ཡོད་པ་དང་། ཕྱི་ཚེས་ ༢ ཉིན་གྱི་དགོང་མོ་དྲག་ཆས་ཉེན་རྟོག་དམག་མི་གསང་སྟབས་ཀྱིས་འཁྱམས་རུ་དགོན་པའི་ནང་འོངས་ཏེ། དགོན་པའི་དཀོན་གཉེར་གྲྭ་གྲགས་བཟང་ལགས་ལྐོག་ནས་འཇུ་བཟུང་བཙན་འཁྲིད་བྱ་རྩིས་བྱས་ཀྱང་། དགོན་པའི་དགེ་འདུན་པ་ཁ་ཤས་ཞོགས་ཚོགས་ལ་བསྐྱོད་སྐབས་དམག་མི་དགོན་པའི་འདུ་ཁང་གི་ཉེ་འདབས་སུ་སྦས་སྐུང་བྱས་ཡོད་པ་མཐོང་བར་བརྟེན་ནས། མཚན་མོ་དེར་དཀོན་གཉེར་གྲྭ་གྲགས་བཟང་གསང་ཁྲིད་བྱེད་ཐུབ་མེད་པ་རེད། ཡིན་ནའང་། ཕྱི་ཚེས་ ༣ ཉིན་ཉེན་རྟོག་དམག་མི་དགོན་པར་འབྱོར་སྟེ་གྲྭ་བཟང་གྲགས་དང་ཡེ་ཤེས་བཟང་པོ་གཉིས་འཇུ་བཟུང་བཙན་ཁྲིད་བྱས་ཡོད་འདུག
དེ་བཞིན། ཉིན་དེར་དྲག་ཆས་ཉེན་རྟོག་དམག་མི་རླངས་འཁོར་ཆེ་བ་བཅུ་དང་འཇེབ་འཁོར་ཆུང་བ་ཁ་ཤས་བཅས་དགོན་པའི་ཉེ་འདབས་ཀྱི་རྡོ་ལམ་ཁ་སྟེ། དེ་སྔའི་ ༨༧༨༢ གསང་བའི་དམག་ཁུལ་གྱི་གནམ་ཐང་དུ་སླེབས་ཏེ་རྔམས་རྫིག་འཇིགས་སྐུལ་གྱི་རྣམ་འགྱུར་བསྟན་ཡོད་པ་མ་ཟད། དགོན་པའི་གྲྭ་བཙུན་དེ་དག་གནད་ཡོད་ཚུལ་དང་། ཡིད་འཐད་མེད་ཚེ་ཞིང་ཆེན་གྲོང་ཁྱེར་དུ་ཞུ་གཏུགས་བྱེད་དུ་སོང་ཞེས་ངར་ངར་རྫིག་རྫིག་བྱས་སྟབས། དགོན་པའི་གྲྭ་བཙུན་བརྒྱ་ཕྲག་ཅིག་འདུ་འཛོམས་ཐོག་དགོན་པ་ནས་ཕྱིར་ཐོན་ཏེ་རྒྱ་གཞུང་གི་གོམ་རིམ་སྡེ་ཁག་ལ་ཞུ་གཏུགས་བྱེད་དུ་བསྐྱོད་ཡོད་ཀྱང་། ལམ་བར་ནས་ས་གནས་ཀྱི་ཆུ་རྔ་དང་གཡང་རོང་སྡེ་བའི་མང་ཚོགས་ཀྱིས་ཞུ་འབོད་བྱས་པར་བརྟེན་ནས། དགེ་འདུན་པ་རྣམས་ཕྱིར་དགོན་པའི་ནང་ལོག་ཡོད་འདུག
ཉེ་ཆར་མཚོ་ལྷོ་ཁུལ་ཏུ་སློབ་མའི་ཡར་ལངས་ཁྲོམ་སྐོར་བྱུང་རྗེས་རྒྱ་གཞུང་གིས་ལས་འགུལ་སྣེ་ཁྲིད་བྱེད་མཁན་གྱི་དོགས་ཡོད་ཉེས་མིང་འོག་སློབ་ཕྲུག་ ༧ འཇུ་བཟུང་བཙན་ཁྲིད་བྱས་ཡོད་པ་རྣམས། ད་ལྟའི་ཆར་ག་ཡོད་གང་ཁྲིད་ཀྱི་གནས་སྟངས་གང་ཡང་ཤེས་ཐུབ་ཀྱི་མེད་འདུག
གསར་འགོད་པ། ཚེ་རིང་རྒྱལ།
![Changpa nomads walk on a rugged path in Ladakh's Chushul valley [Tarushi Aswani/Al Jazeera]](https://tibettimes.net/wp-content/uploads/2026/10/Screen-Shot-2026-10-16-at-2.29.07-PM-360x180.png)
《བོད་ཡུལ་བཙོན་རྭར་བསྒྱུར་ཚུལ་ནི།》
མི་འབོར་སྟོང་ཕྲག་མང་པོ་ཟོག་ལུག་བཞིན་བཙོན་ལ་བསྡུས་པ་སྟེ། ཉེས་མེད་ཀྱི་མི་རྣམས་རྩྭ་འབྲེག་འབྲེག་དང་ཤོག་སྒྲིལ་སྒྲིལ། པགས་པ་མཉེད་མཉེད་ཀྱིས་ཁྲི་མུན་བཙོན་ལ་མདའ་གསེབ་གསེབ་ཏུ་བརྫངས་ཤིང་། ལག་སྒྲོག་དང་རྐང་སྒྲོག་རྫོགས་པ་ན་རྣོ་སྐུད་དང་ལྕགས་སྐུད་ཀྱིས་ཚབ་བྱས་ཏེ་བསྒགས། རྐང་གི་ལྷམ་འབོབ་ཕྲོགས། སྐེད་ཀྱི་སྐ་རགས་ཕྲོགས། རས་ལྷབ་ནག་པོས་མཐོང་བསྒྲིབས་རྗེས། ཤིང་དབྱུག་དང་ལྕགས་དབྱུག གློག་དང་འཕྲུལ་གྱི་ཁྲིམས་ཆས་སྤྱད་དེ་དམྱལ་བ་མནར་བ་མནར་མེད་མ་གཏོགས་དེ་འདྲའི་སྡུག་བསྔལ་ཡོད་མི་སྲིད་པའི་ཚད་དུ་སྦྱོར་ཞིང་། ཀན་རྐྱལ་དུ་ནམ་ལངས་པ་ལྟ་བུ་དང་ཁ་སྦུབ་ཏུ་ས་རུབ་པ་ལྟ་བུའི་རྡུང་རྡེག་ནི་ཅི་ཡང་མ་ཡིན་ཏེ།
རྒྱུད་ཕྱི་མ་སྐྱེད་མཁན་གྱི་གྲོང་པ་དག་གི་འདོམས་ལ་གཟས་ནས་བསྣུམ་པའི་ཞེ་གནག་ཁོག་བཅངས་ཆེ་བར་མ་ཟད། “…..མེ་མདའ་འདི་ཁྱོད་ཚོ་བོད་པ་ཚོ་གསོད་པར་ཆེད་དུ་བཟོས་པ་རེད། ཁྱོད་གོམ་པ་གང་བྲོས་ན་ངས་མེ་མདའ་བརྒྱབ་ནས་གསོད་ངེས་ཡིན། ཁྱོད་བསད་པའི་རྗེས་སུ་རོ་གད་སྙིགས་ཁྲོད་དུ་གཡུག་རྒྱུ་ཡིན།…..” (1) ཟེར་ཞིང་གཤིན་རྗེའི་ལས་མཁན་གྱི་འཇིགས་སྐུལ་ཁྲག་སྐྱུག་རྣག་སྐྱུག་བྱེད། མགོ་དང་སུག་པའི་གོ་ལྡོག་སྟེ་གནམ་ལ་དཔྱངས་ཤིང་ཐོད་དང་དཔྲལ་བར་རྐང་པས་བཅགས་ཏེ་རྩིས་ཐང་འཇོམས་ཞེས་རྒྱལ་གཅེས་རྟོག་སད་པ་རྩོམ་པ་པོ་ཞོགས་དུང་གིས་《གནམ་ས་གོ་འབྱེད།》ལས་དྲངས།
(1) བོད་མདོ་སྨད་བླ་བྲང་བཀྲ་ཤིས་འཁྱིལ་གྱི་འཇིགས་མེད་མགོ་རིལ་ལགས་ཀྱི་གསུང་བཤད་ཅིག་སྟེ་ཨ་རིའི་རླུང་འཕྲིན་ཁང་གི་བོད་སྐད་དྲ་བ་ལས་དྲངས།