བདེན་པར་ལུས་སྦྱིན་གནང་པའི་ལེའུ།

སྤོ་རང་དབང་རྒྱལ་མཚན།

ཐོག་མར་ཚང་མས་རང་སྲེག་ཅེས་བྱེད་པ་པོའི་ལས་ཀྱི་ཕྱིའི་རྣམ་པ་ཁོ་ན་ལ་དམིགས་པ་ལས། བྱེད་པ་པོའི་ནང་སེམས་ཀྱི་ཀུན་སློང་དང་། བགྱིས་པའི་བྱ་བ་དེའི་ཆེས་རླབས་ཆེན་གྱི་བདེན་པ་འཐབ་རྩོད་ཀྱི་དགེ་བའི་རང་བཞིན་ནམ། དེས་བོད་ཀྱི་སྲིད་ཆོས་གཉིས་ཀྱི་རང་དབང་སླར་གསོའི་ལས་འགུལ་དེ། ཤུགས་ཆེར་མདུན་སྐྱོད་བྱེད་པར་ཕན་ནུས་གཞལ་ཐབས་དང་བྲལ་བ་ཐོན་ཡོད་པ་སོགས་མི་སྟོན་པའི་ཚིག་བཏང་སྙོམས་ཅན་འདི་ཡིག་ངག་གཉིས་ཐད་ནས་བེད་སྤྱོད་མི་བྱེད་པར། དེའི་ཚབ་ལ་བོད་ཀྱི་དཔའ་བོ་དཔའ་མོའི་རླབས་ཆེན་གྱི་བདེན་པར་ལུས་སྦྱིན་ཞེས་འབོད་པའི་དྲན་གསོ་དང་འབོད་སྐུལ་སེམས་ཤེས་ཡོངས་ལ་ཞུ་བཞིན་ཡོད།

དཔའ་བོ་དཔའ་མོ་ཚོའི་རླབས་ཆེན་གྱི་བདེན་པར་ལུས་སྦྱིན་ནི་བོད་ཀྱི་རང་དབང་སླར་གསོའི་ཆབ་སྲིད་ལོ་རྒྱུས་ཡོངས་ཀྱི་ནང་གི་ཆེས་རླབས་ཆེན་གྱི་ལེའུ་གསར་བ་ཞིག་རེད། དེ་ལ་རྒྱུ་མཚན་གཙོ་བོ་ལྔ་ཙམ་འདྲེན་གྱི་ཡོད།

དང་པོ། དཔའ་བོ་དཔའ་མོའི་རླབས་ཆེན་གྱི་བདེན་པར་ལུས་སྦྱིན་གྱིས། ཆོལ་གསུམ་བོད་མིའི་ཆིག་སྒྲིལ་གྱི་མངོན་འདོད་དང་སེམས་ཚོར། གོ་རྟོགས་དེ་སྔར་ལས་ཇེ་སྲ་ཇེ་བརྟན་དུ་བཏང་སོང་།

གཉིས་པ། དཔའ་བོ་དཔའ་མོའི་རླབས་ཆེན་གྱི་བདེན་པར་ལུས་སྦྱིན་གྱིས། བོད་ཀྱི་འཆི་ཁར་ཕྱོགས་པའི་དཔའ་བོའི་འདུ་ཤེས་དེ་ཧྲིག་ཙམ་གསོས་ཐུབ་ཡོད་པ་མ་ཟད། བོད་ཀྱི་མི་རིགས་དཔའ་བོ་དང་དཔའ་མོ་ཞེས་པའི་ཐ་སྙད་དེ་ལ་དུས་རབས་ཀྱི་གོ་དོན་གསར་བ་ཞིག་ཀྱང་ཁ་སྣོན་བྱས་སོང་།

གསུམ་པ། དཔའ་བོ་དཔའ་མོའི་རླབས་ཆེན་གྱི་བདེན་པར་ལུས་སྦྱིན་གྱིས། ལག་ཏུ་མ་ཎི་འདྲེན་བྱེད་ཀྱི་ཕྲེང་བ་ལས་མེད་པའི་མི་རིགས་ཆེས་གཉོམ་ཆུང་ཞིག་གིས་རྡུལ་ཕྲན་མཚོན་ཆའི་ལྟེ་གནས་གཅིག་པུ་མང་པོ་ཡོད་པའི་རྒྱ་ནག་སྟོབས་ཆེན་རྒྱལ་ཁབ་དེའི་རྐུབ་རྩ་གློད་བཅུག་སོང་།

བཞི་བ།   དཔའ་བོ་དཔའ་མོའི་རླབས་ཆེན་གྱི་བདེན་པར་ལུས་སྦྱིན་གྱིས། སའི་གོ་ལ་ཧྲིལ་བོར། ང་ཚོ་བོད་མི་རྣམས་ཇི་ཙམ་འུ་ཐུག་ཐབས་ཟད་ཀྱང་སོ་སོའི་ཆོས་སྲིད་ཀྱི་རང་དབང་སྐྱོབ་བྱེད་ཀྱི་དྲང་བདེན་དེ་དང་། མི་རིགས་རང་གི་བུ་རབས་ཚ་རྒྱུད་ཀྱི་ཁེ་ཕན་སྲུང་བྱེད་ཀྱི་གནས་ལུགས་དམ་པ་དེ་ཉིད། མིག་སྔར་གྱི་ཁ་རྒྱབ་ཙམ་གྱི་ཁེ་བཟང་ལ་བརྗེ་ཚོང་གཏན་ནས་རྒྱག་གི་མེད་ཅེས་གསལ་བསྒྲགས་གནང་སོང་།

ལྔ་བ། དཔའ་བོ་དཔའ་མོའི་རླབས་ཆེན་གྱི་བདེན་པར་ལུས་སྦྱིན་གྱིས། གནའ་བོའི་རྒྱ་གར་དུ་སྟག་མོར་ལུས་སྦྱིན་ཞེས་རང་ཡལ་བར་དོར་ནས་གཞན་གཅེས་པར་འཛིན་པའི་རྒྱལ་སྲས་སེམས་དཔའ་ཆེན་པོའི་རླབས་ཆེན་གྱི་མཛད་པ་དེ། དུས་རབས་ཉེར་གཅིག་པའི་འཛམ་གླིང་ནང་ལག་བསྟར་བྱ་དགོངས་ན། བྱེད་སྟངས་གཅིག་ནི་འདི་ལྟར་ཡིན་ནོ་ཞེས་མངོན་སུམ་གྱིས་མིག་དཔེ་ཆེས་གསལ་བོ་ཞིག་བསྟན་སོང་།

དྲུག་པ།  དཔའ་བོ་དཔའ་མོའི་རླབས་ཆེན་གྱི་བདེན་པར་ལུས་སྦྱིན་གྱིས། འགྲོ་བ་མིའི་ལོ་རྒྱུས་འབྲི་མཁན་རྣམས་ལ་བོད་ཟེར་མཁན་གྱི་མི་རིགས་འདིའི་སྙིང་སྟོབས་དང་བློ་ཁོག་དེ་དཔེར་འཇོག་སའི་དངོས་པོ་ཞིག་རྩ་ནས་རྙེད་ཀྱི་མེད་ཅིང་། དེས་རང་གི་ཆེ་མཐོང་འཛིན་པའི་ཆོད་སེམས་དེ་འབྲི་བྱེད་ཀྱི་སྨྱུ་གུ་ཞིག་ད་ལྟའི་ཆར་འཇིག་རྟེན་མི་ཡུལ་དུ་ད་དུང་གཞི་མ་གྲུབ་བོ་ཞེས་ཁས་ལེན་དགོས་སོང་།

བདུན་པ། དཔའ་བོ་དཔའ་མོའི་རླབས་ཆེན་གྱི་བདེན་པར་ལུས་སྦྱིན་གྱིས། འཇིག་རྟེན་མི་ཡུལ་ལ་མི་རིགས་ཆེས་ཆུང་ངུའམ་གྲངས་ཉུང་ཞིག་གིས། རང་ལས་མི་གྲངས་དང་དམག་དཔུང་སོགས་དངོས་པོའི་ནུས་ཤུགས་ཆེས་ཆེན་པོ་ཡིན་ཞིང་། དབང་ཤེད་སྨྱོ་ཧམ་ཁོ་ནས་དབང་བསྒྱུར་བྱེད་མཁན་གྱི་རྒྱལ་ཁབ་དེའི་ལག་ནས་རང་དབང་བསྐྱར་གསོ་བྱེད་སྐབས། བཙན་དབང་དེ་དང་ཇི་ལྟར་འཐབ་དགོས་པའི་ཐབས་ལམ་དང་འཐབ་རྩལ་སྟོབས་ཅན་ཞིག་གསར་གཏོད་གནང་སོང་།

བརྒྱད་པ། དཔའ་བོ་དཔའ་མོའི་རླབས་ཆེན་གྱི་བདེན་པར་ལུས་སྦྱིན་གྱིས། སྤྱིར་གངས་ཅན་པ་རྣམས་ལ་རང་ས་རང་ལ་མི་དབང་ཐོག ༼༡༽ད་ཆར་བོད་ལ་མ་འོངས་པའི་ཆབ་སྲིད་ཀྱི་མདུན་ལམ་ཡོད་པའི་རེ་བ་དེ་ཞེ་དྲག་ཇེ་ཆུང་དུ་ཕྱིན་ཏེ་གཏན་མེད་དུ་འགྲོ་སྲིད་པའི་ཉེན་ཁ་དེ་ག་ཚོད་ཙམ་ཡོད་པ་དང་། ༼༢༽དེང་རབས་ཅན་གྱི་མི་སེར་སྤེལ་ཡུལ་གྱི་རྒྱ་ནག་སྲིད་གཞུང་གི་དབང་བསྒྱུར་འོག་ཏུ་བོད་མི་རིགས་ཀྱི་ངོ་བོ་བདག་སྐྱོང་བྱེད་སའི་ཁོར་ཡུག་དེ་ག་ཚོད་ཙམ་ཇེ་དོག་ཏུ་འགྲོ་བཞིན་ཡོད་པ་དང་། ༼༣༽བོད་ཀྱི་སྐད་ཡིག་གི་བླ་ན་མེད་པའི་རིན་ཐང་དང་ཕན་ནུས་དེ་ག་ཚོད་ཙམ་ཞིག་མགྱོགས་པོར་ཉམས་དམས་སུ་འགྲོ་མུར་ཡོད་པ་སོགས་ཀྱི་ཛ་དྲག་གི་གནས་སྟངས་དེ་མིག་ལྡན་སྐྱེ་བོ་ཀུན་ལ་ཉེན་བརྡ་མཐའ་མ་དེ་བརྒྱབ་སོང་།

དགུ་པ།  དཔའ་བོ་དཔའ་མོའི་རླབས་ཆེན་གྱི་བདེན་པར་ལུས་སྦྱིན་གྱིས། བོད་གངས་ལྗོངས་ཀྱི་སྲིད་དབང་ཁོ་ན་རྩོད་མཁན་གྱི་དབུ་ཁྲིད་སྙིང་རུས་ཅན་ཁ་ཤས་ཡོད་ན། ང་ཤི་རྒྱུ་ལ་ཁྱོན་ནས་མི་སྐྲག་པའི་མི་དམངས་ནི་རྒན་གཞོན་ཕོ་མོ་སྐྱ་སེར་སོགས་ཀྱི་དབྱེ་བ་མེད་པར་བརྩེགས་ནས་ཡོད་དོ་ཞེས་གངས་ཅན་སྐྱིད་གཤོངས་ལ་བརྡ་ཡིག་ཡང་ཡང་བསྐུར་སོང་།

བཅུ་པ།   དཔའ་བོ་དཔའ་མོའི་རླབས་ཆེན་གྱི་བདེན་པར་ལུས་སྦྱིན་གྱིས། ༧གོང་ས་སྐྱབས་མགོན་ཆེན་པོས་ལོ་ངོ་དྲུག་ཅུ་ཙམ་ལ་དར་སྤེལ་གནང་བའི་འཚེ་མེད་ཞི་རྒོལ་གྱི་ལྟ་བའི་དགོངས་དོན་དེ་ཉིད། བློ་གྲོས་དང་ལྡན་པའི་དཔའ་བོ་དཔའ་མོ་རྣམས་ཀྱིས་ཚུལ་བཞིན་རྟོགས་ཏེ། རྒྱལ་སྤྱིའི་ནང་ལ་བོད་པ་ནི་སྙིང་རྗེ་ཆེན་པོ་དང་ལྡན་པའི་མི་རིགས་ཤིག་ཡིན་པ་མ་ཟད། ཆབ་སྲིད་འཐབ་རྩོད་ཀྱི་གནད་ལ་ཤིན་ཏུ་མཁས་པའི་མི་རིགས་ཤེས་རབ་ཅན་ཞིག་ཀྱང་ཡིན་པའི་ངོ་སྤྲོད་ཡང་བསྐྱར་གཙང་མ་ཞིག་གནང་སོང་།

བཅུ་གཅིག་པ། དཔའ་བོ་དཔའ་མོའི་རླབས་ཆེན་གྱི་བདེན་པར་ལུས་སྦྱིན་གྱིས། བོད་ཕྱི་ནང་གི་བདེན་པའི་འཐབ་མོ་བ་རྣམས་ལ་དཔའ་ངར་གྱི་མེ་སྟག་འཚེར་བའི་མི་འཇིགས་པའི་སྙིང་རུས་གསར་བ་ཞིག་སྐྱེ་བཅུག་སོང་།

བཅུ་གཉིས་པ། དཔའ་བོ་དཔའ་མོའི་རླབས་ཆེན་གྱི་བདེན་པར་ལུས་སྦྱིན་གྱིས། རྒྱ་ནག་སྲིད་དབང་སྒེར་གཅོད་ཀྱི་གཞུང་གཡོ་སྒྱུ་ཁྲེལ་མེད་ཅན་དེའི་ཚེ་ཐག་ཤིན་ཏུ་ཇེ་ཐུང་དུ་བཏང་སོང་།

བཅུ་གསུམ་པ། དཔའ་བོ་དཔའ་མོའི་རླབས་ཆེན་གྱི་བདེན་པར་ལུས་སྦྱིན་གྱིས། རྒྱ་ནག་ཧམ་སེམས་ཅན་གྱི་རྒྱ་རིགས་ཕུལ་བྱུང་ངམ་ཆེན་པོའི་ལྟ་བ་འཛིན་མཁན་གྱི་དབང་ཡོད་མི་སྣ་དེ་ཚོ་དང་། དེའི་མི་སེར་སྤེལ་ཡུལ་གྱི་ལམ་ལུགས་ལ་རྗེས་སུ་ཡི་རངས་བྱེད་མཁན་གྱི་ཤེས་ཡོན་ཅན་ཁོག་ནག་དེ་ཚོར། ངྷ་རམ་ས་ལར་མགོ་སྐོར་བསླུ་བྲིད་གཏོང་རྒྱུའི་གོ་སྐབས་སྔར་ལས་ཀྱང་ཆེས་དཀའ་བར་བཟོས་སོང་།

བཅུ་བཞི་བ། དཔའ་བོ་དཔའ་མོའི་རླབས་ཆེན་གྱི་བདེན་པར་ལུས་སྦྱིན་གྱིས། འཛམ་གླིང་ནང་གི་བདེན་པ་དང་དྲང་བདེན་ལ་དགའ་ཞིང་མོས་པའི་གཞུང་དམངས་གཉིས་ནས་བོད་ལ་རྒྱབ་སྐྱོར་བྱ་རྒྱུ་སྔོན་ལས་ཇེ་བདེ་དང་། མཐའ་ན་ད་བར་དུ་མ་མཐོང་མ་གོ་མདོག་མདོག་བྱས་ཏེ་བསྡད་པའི་གཞུང་སྒེར་གཉིས་ནས་ད་ལྟ་རྒྱ་ནག་གཞུང་ལ་གནོན་ཤུགས་མི་སྤྲོད་རང་སྤྲོད་བྱ་དགོས་བྱུང་སོང་ངོ་།།

བཅོ་ལྔ་པ། དཔའ་མོ་དཔའ་བོའི་རླབས་ཆེན་གྱི་བདེན་བར་ལུས་སྦྱིན་གྱིས། ཕྱི་ནང་དང་མཐོ་དམན་ཤེས་འཇོན་ཆེ་ཆུང་གི་དབྱེ་བ་མེད་པར་བོད་མི་ཚང་མས་རང་ཉིད་བོད་པ་ཡིན་པའི་ལུང་ཞེན་དང་རིག་གནས་ལེགས་བྱང་གི་ཁྱབ་གཏོགས་ཀྱི་སེམས་ཚོར་དེ་ཇེ་རྣོ་རུ་ཕྱིན་ཏེ་སོ་སོར་བོད་དང་འབྲེལ་བ་ཡོད་པའི་འོས་འགན་དང་ལ་རྒྱ་དེ་མ་སྐུལ་དང་བླང་ཐོག་བསམ་བློ་གཏོང་དགོས་བྱུང་སོང་ངོ་།།

མཇུག་གི་འཕྲོས་བཤད།

བོད་ཀྱི་ནང་བསྟན་རིན་པོ་ཆེ་ནི་བོད་མི་རིགས་ལ་བརྟེན་ཅིང་གནས་ཡོད། བོད་མི་རིགས་ནི་བོད་ཀྱི་ཐུན་མོང་མ་ཡིན་པའི་རིག་གནས་ལེགས་བྱང་ལ་བརྟེན་ཅིང་གནས་ཡོད། བོད་ཀྱི་ཐུན་མོང་མ་ཡིན་པའི་རིག་གནས་ལེགས་བྱང་ནི་བོད་ཀྱི་སྐད་དང་ཡི་གེ་གཉིས་ལ་བརྟེན་ཅིང་གནས་ཡོད། བོད་ཀྱི་སྐད་དང་ཡི་གེ་དེ་ནི་ཁ་བ་གངས་ཅན་གྱི་ཡུལ་ཞེས་གྲགས་པའི་བོད་དེ་ལ་བརྟེན་ཅིང་གནས་ཡོད། བོད་ཟེར་ས་དེའི་ཤི་གསོན་ནི་བོད་མིའི་ཆབ་སྲིད་ཀྱི་རང་དབང་གི་ཤི་གསོན་དང་ཡོད་ཁྱབ་མཉམ་དང་མེད་ཁྱབ་མཉམ་ཡིན་པ་བླུན་པོ་ང་འདྲ་ཞིག་གིས་ཀྱང་མགྲིན་པ་གཟེངས་སུ་བསྟོད་དེ་སྨྲ་བར་སྤོབས་སོ།། བོད་རྒྱལ་གྱུར་ཅིག