བཀའ་ཟུར་རྗེ་བཙུན་པདྨར་མཁས་པའི་ཕྱག་འཁྱེར་ཐོབ།

ཟླ་འདིའི་ཕྱི་ཚེས་ ༡༤ ཉིན་ཨ་རིའི་སེན་ཧྥུ་རན་སེ་ཁོ་ (University of San Francisco)གྲོང་ཁྱེར་གཙུག་ལག་སློབ་གྲྭའི་ངོས་ནས། ད་ལོའི་གཙུག་ལག་སློབ་གྲྭ་དེའི་ལོ་འཁོར་སློབ་ཐོན་མཛད་སྒོ་དང་སྟབས་བསྟུན་ཏེ། བོད་ཁྱིམ་སྤྱི་ཁྱབ་དབུ་འཛིན་ཟུར་པ་དང་སྐུའི་གཅུང་མོ་བཀའ་ཟུར་རྗེ་བཙུན་པདྨ་མཆོག་ལ། གཙུག་ལག་སློབ་གྲྭ་དེའི་མཁས་པའི་ཕྱག་འཁྱེར་ཞིག་འབུལ་བཞེས་གནང་ཡོད་འདུག

སློབ་ཐོན་མཛད་སྒོའི་ཐོག་གཙུག་ལག་སློབ་གྲྭ་དེའི་འགན་འཛིན་སྐུ་ཞབས་སི་ཊི་ཕན་ཨེ་པིར་ཝེ་ཐི་(Stephen A. Privett S.J)ལཊ་ཀྱིས། སློབ་གྲྭ་དེའི་ངོས་ནས་སྐུའི་གཅུང་མོ་རྗེ་བཙུན་པདྨ་མཆོག་ལ་མཁས་པའི་ཕྱག་འཁྱེར་འབུལ་བཞེས་གནང་དོན་གཙོ་བོ། སྐུའི་གཅུང་མོ་རྗེ་བཙུན་པདྨ་མཆོག་གིས་འདས་པའི་མི་ལོ་ ༤༠ ལྷག་གི་རིང་བཙན་བྱོལ་བོད་མིའི་སློབ་ཕྲུག་ཚོའི་ཤེས་ཡོན་ཐོག་ཞབས་ཞུ་གང་ལེགས་བསྒྲུབས་ཡོད་ཚུལ་དང་། སེན་ཧྥུ་རན་སེ་ཁོ་གཙུག་ལག་སློབ་གྲྭས་རྗེ་བཙུན་པདྨ་མཆོག་གིས་བྱིས་པ་ཚོར་གཅེས་སྐྱོང་བྱས་ཏེ་ཞི་བདེ་གོང་འཕེལ་བཏང་བའི་བྱས་རྗེས་ལ་ཆེ་མཐོང་ཞུ་རྒྱུ་དང་། ཁོང་ནི་རང་ལས་གཞན་གཅེས་པར་འཛིན་པའི་ཡེ་ཤུའི་ལྟ་གྲུབ་ནང་མིག་དཔེ་འོས་པའི་བུད་མེད་ཅིག་ཆགས་ཡོད་སྐོར་བརྗོད་ཡོད་འདུག