གཟའ་ལྷག་པའི་ཉིན་གྱི་ལྷོ་ཀོ་རེ་ཡའི་སྲིད་འཛིན་འོས་བསྡུའི་ཁྲོད། ལྷོ་ཀོ་རེ་ཡའི་མཁྲེགས་འཛིན་ཚོགས་པའི་སྲིད་འཛིན་འོས་མི་ལྕམ་པཱར་ཀི་ལ་རྒྱལ་ཁ་ཐོབ་ཡོད་པ་ནི་རྒྱལ་ཁབ་དེའི་བུད་མེད་སྲིད་འཛིན་དང་པོ་ཡིན་འདུག
ཁ་སང་ཕྱི་ཚེས་ ༡༩ ཉིན་གྱི་ལྷོ་ཀོ་རེ་ཡའི་སྲིད་འཛིན་འོས་བསྡུའི་ཁྲོད། ལྷོ་ཀོ་རེ་ཡའི་མཁྲེགས་འཛིན་ཆབ་སྲིད་ཚོགས་པའི་ (Conservative political party) འོས་མི་ལྕམ་པཱར་ཀི་(Park Geun-hye) ལ་འོས་ཤོག་བརྒྱ་ཆ་ ༥༡། ༦ དང་། ཁོང་གི་ཁ་གཏད་འོས་མི་མོན་ཇའེ་ཨིན་ (Moon Jae-in) ལ་བརྒྱ་ཆ་ ༤༨ བཅས་ཐོབ་སྟེ། ལྕམ་པཱར་ཀི་ལྷོ་ཀོ་རེ་ཡའི་བུད་མེད་སྲིད་འཛིན་དང་པོ་དེ་ཆགས་ཡོད་པ་དང་། ལོ་རྗེས་མའི་ཕྱི་ཟླ་ ༢ ནང་ད་ལྟའི་ལས་ཐོག་སྲིད་འཛིན་ལའེ་ (Lee Myun-bal) ཡི་དུས་ཡུན་རྫོགས་རྗེས་ལྕམ་པཱར་ཀི་སྐབས་རྗེས་མའི་སྲིད་འཛིན་གྱི་ལས་ཁུར་ཞུ་རྒྱུ་ཡིན་འདུག
ལྕམ་པཱར་ཀི་ལ་འོས་བསྡུའི་རྒྱལ་ཁ་ཐོབ་ཡོད་པ་ཕྱིར་བསྒྲགས་བྱས་འཕྲལ་ཁོ་མོ་རང་ཉིད་ཀྱི་ཨ་ཕ་ཚུད་པའི་ལྷོ་ཀོ་རེ་ཡའི་སྲིད་འཛིན་རིམ་པའི་བང་སོའི་མདུན་དུ་མཆོད་འབུལ་ལ་ཕྱིན་ཏེ། རང་ཉིད་ཀྱི་མི་ཚེ་ཧྲིལ་བོ་སོ་སོའི་རྒྱལ་ཁབ་དང་མི་མང་གི་ཆེད་དུ་བློས་གཏོང་བྱ་རྒྱུའི་དམ་བཅའ་དང་། ཁོ་མོའི་སྲིད་འཛིན་ལས་ཐོག་སྐབས་མི་མང་གི་ཆིག་སྒྲིལ་དང་རྒྱལ་ཁོངས་བདེ་འཇགས་ཐད་དམིགས་བསལ་ཤུགས་གནོན་རྒྱག་རྒྱུའི་ཁས་ལེན་བྱས་ཡོད་པ་མ་ཟད། ཀོ་རེ་ཡ་ལྷོ་བྱང་བར་གྱི་དཀའ་རྙོག་སེལ་པའི་ཁོར་ཡུག་བསྐྲུན་ཐབས་བྱ་རྒྱུ་ཡིན་སྐོར་བསྒྲགས་འདུག
རང་ལོ་ ༦༠ ཡིན་པའི་ལྕམ་པཱར་ཀི་ལ་སྲིད་འཛིན་འོས་བསྡུའི་རྒྱལ་ཁ་ཐོབ་འཕྲལ། ཨ་རིའི་སྲིད་འཛིན་ཨོ་བྷ་མས་ཁོ་མོར་འཚམས་འཕྲིན་བསྐུར་ཏེ། ལྕམ་པཱར་ཀི་དང་མཉམ་ལས་བྱ་རྒྱུར་རེ་ལྟོས་ཡོད་སྐོར་དང་། ལྷོ་ཀོ་རེ་ཡ་ནི་ཨེ་ཤ་ཡའི་བདེ་འཇགས་ཀྱི་རྨང་རྡོ་ཞིག་ཡིན་ཚུལ། ཨ་ཀོ་གཉིས་ནི་རྒྱལ་སྤྱིའི་ཚོང་འབྲེལ་དང་བདེ་འཇགས་ཐད་ཀྱི་མཐུན་གྲོགས་དང་། ཕྱོགས་གཉིས་ཀྱི་མི་མང་གི་འབྲེལ་བ་དམ་པོ་ཡིན་སྐོར་དང་། ད་ལྟའི་སྲིད་འཛིན་ལས་ཐོག་པ་ལའེ་ཡིས་ཨ་ཀོ་གཉིས་ཀྱི་འབྲེལ་ལམ་སྲ་བརྟན་ཐད་ནུས་པ་བཏོན་ཡོད་པར་ཐུགས་རྗེ་ཆེ་ཞུས་ཡོད་འདུག
ལྕམ་པཱར་ཀི་ནི་དེ་སྔའི་ལྷོ་ཀོ་རེ་ཡའི་སྲིད་འཛིན་པཱར་ཀི་ཆཱང་(Park Chung-hee) གི་བུ་མོ་ཡིན་ཞིང་། པཱར་ཀི་ཆཱང་ ༡༩༧༩ ལོར་ཁོའི་ལག་འོག་གི་གསང་བའི་མགོ་ཁྲིད་ཀྱིས་དམར་གསོད་མ་བཏང་བའི་བར་གྱི་ལོ་ ༡༨ རིང་ལྷོ་ཀོ་རེ་ཡའི་སྲིད་འཛིན་དུ་བསྡད་ཡོད། ཐེངས་འདིར་ལྕམ་པཱར་ཀིར་འོས་ཤོག་བླུགས་མཁན་མང་ཤོས་རྒན་རབས་པ་ཡིན་འདུག་ལ། ཁོ་ཚོས་ལྕམ་པཱར་ཀི་ཡིས་མོ་རང་གི་ཨ་ཕ་ནང་བཞིན་རྒྱལ་ཁབ་སྲ་བརྟན་འཕེལ་རྒྱས་སུ་གཏོང་བའི་རེ་བ་བྱེད་ཀྱི་ཡོད་འདུག
ལྕམ་པཱར་ཀི་རང་ལོ་ ༢༢ སྟེང་ཕ་རྒན་དམར་གསོད་བཏང་ཡོད་པ་དང་། དེས་རྐྱེན་པས་ཁོ་མོའི་ཨ་མ་ཡང་ལོ་དེར་གྲོངས་ཡོད་ཀྱང་། མོས་ཕ་རྒན་གྱི་ལངས་ཕྱོགས་རྒྱུན་འཁྱོངས་གནང་སྟེ་རང་དོན་བློས་གཏོང་གིས་ལྷོ་ཀོ་རེ་ཡའི་རྒྱལ་གཅེས་བུད་མེད་ཅིག་གི་སྣང་བརྙན་བཞག་ཡོད། ཁོ་མོས་གཉེན་སྒྲིག་ཀྱང་མ་བྱས་པར་མི་ཚེ་ཧྲིལ་བོ་རྒྱལ་ཁབ་དང་མི་མང་གི་ཆེད་དུ་བཏང་སྟེ། ཕོ་ཡི་དབང་སྒྱུར་ཤུགས་ཆེ་བའི་ཁྲིམས་བཟོ་ལྷན་ཁང་དུ་སླེབས་ཡོད་འདུག
གསར་འགོད་པ། བནྡེ་སྐྱབས།
