གྲྭ་པ་གཉིས་བོར་བརླག

རྒྱ་ནག་གིས་ ༢༠༠༨ ལོར་ལྷ་སའི་འབྲས་སྤུངས་དགོན་པའི་གྲྭ་པ་གཉིས་ལ་བཙོན་འཇུག་ཁྲིམས་ཐག་བཅད་རྗེས། ད་ཆར་གར་ཡོད་ཅི་བྱུང་གི་གནས་ཚུལ་ཅི་ཡང་མ་ཤེས་པར་ལྷག་ཡོད་འདུག

རྒྱ་གཞུང་གིས་ ༢༠༠༨ ལོའི་ཕྱི་ཟླ་ ༣ ཚེས་ ༡༠ ཉིན་འབྲས་སྤུངས་དགོན་པའི་གྲྭ་པ་ཚོས་ཞི་བའི་སྐད་འབོད་བྱས་པར་རྐྱེན་བྱས་ཏེ། སྐབས་དེར་དམག་མི་འགྲེམས་འཇོག་གིས་ནང་མི་ཕྱི་དང་ཕྱི་མི་ནང་དུ་མ་བཏང་བར་གྲྭ་བ་ཚོར་བཀག་སྡོམ་དང་། དགེ་འདུན་པ་རྣམས་གང་བྱུང་འཛིན་བཟུང་གཅར་རྡུང་། ཁམས་དང་ཨ་མདོའི་ཕྱོགས་ཀྱི་གྲྭ་བ་ཚོ་ཕྱིར་ཕུད། ཁག་ཅིག་ལ་དུས་བཀག་བཙོན་འཇུག་གི་ཁྲིམས་ཐག་བཅད་དེ་གཞིས་རྩེ་ཉ་རི་དང་ལྷ་སའི་ཆུ་ཤུར་བཙོན་ཁང་དུ་བཅུག་ཡོད་པ་ལྟར། སྐྱེས་ཡུལ་ལྷ་ས་གྲོང་ཁྱེར་འཕན་པོ་ལྷུན་གྲུབ་རྫོང་མཚོ་སྟོད་ཤང་ནས་ཡིན་ཞིང་། རང་ལོ་ ༥༨ ཡིན་པའི་འབྲས་སྤུངས་བློ་གསལ་གླིང་གི་དགེ་བསྐོས་འཇམ་དཔལ་དབང་ཕྱུག་ལགས། རྒྱ་གཞུང་གིས་ ༣༡༤ དོན་རྐྱེན་གྱི་མི་སྣ་གཙོ་བོ་ཡིན་ཚུལ་གྱི་དཔང་རྟགས་ཅི་ཡང་མེད་པའི་ཐོག་ཚེ་བཙོན་གྱི་ཁྲིམས་ཐག་བཅད་དེ་བཙན་ཁྲིད་བྱས་རྗེས། ནང་མི་ཉེ་འབྲེལ་དང་གྲྭ་བ་ཚོས་བརྩད་གཅོད་བྱས་ཀྱང་གར་ཡོད་ཅི་བྱུང་གི་གནས་ཚུལ་མ་ཤེས་པར་ལྷག་ཡོད་འདུག

དེ་བཞིན།  འབྲས་སྤུངས་དགོན་པའི་དཔེ་ཁྲིད་དགེ་རྒན་སི་ཁྲོན་རྔ་བ་མཛོ་དགེ་རྗོང་ཐེ་བུ་ནས་ཡིན་ཞིང་། རང་ལོ་ ༤༤ ཡིན་པའི་གྲྭ་དཀོན་མཆོག་ཉི་མ་ལགས། རྒྱ་གཞུང་གིས་ ༣༡༤ དོན་རྐྱེན་གྱི་གཏེ་བོ་ཡིན་པའི་ཉེས་འཛུཊ་འོག ལོ་༢༠བཙོན་འཇུག་ཁྲིམས་ཐག་དང་ལོ་ ༥ ཆབ་སྲིད་དབང་ཆ་འཕྲོག་ཡོད་པའི་གསལ་བསྒྲགས་དང་འཛིན་བཟུང་བཙན་ཁྲིད་བྱས་རྗེས། ད་ལྟ་ཆར་ཡང་ཁོང་བཙོན་ཁང་གང་དུ་བཀག་ཉར་བྱས་ཡོད་མེད་དང་གཟུགས་པོའི་གནས་སྟངས་སོགས་ཞིབ་ཕྲའི་གནས་ཚུལ་ཅི་ཡང་མ་ཤེས་པར་ལྷག་ཡོད་འདུག

སྐབས་དེར་གྲྭ་པ་ཁོང་གཉིས་དང་ཉིན་གཅིག་དུས་གཅིག་ལ་དོན་རྐྱེན་དེར་ཁ་གཡར་ཏེ་འཛིན་བཟུང་བྱས་པའི་སྐྱེས་་ཡུལ་ལྷ་ས་ཤ་སར་ཟུར་ནས་ཡིན་པ་དང་། རང་ལོ་ ༤༢ ཡིན་པའི་འབྲས་སྤུངས་སྔགས་པ་གྲྭ་ཚང་གི་དཔེ་ཁྲིད་དགེ་རྒན་ངག་དབང་ཆོས་ཉིད་ལགས་ལ། དུས་ཡུན་ལོ་ ༧ ཁྲིམས་ཐག་བཅད་རྗེས་གར་ཡོད་ཅི་བྱུང་གི་གནས་ཚུལ་ཤེས་མེད་ཀྱང་། ཉེ་སྔོན་ཁོང་ཆུ་ཤུར་རྫོང་སྙེ་ཐང་བཙོན་ཁང་དུ་བཙོན་འཇུག་བྱས་ཡོད་པ་དང་། ཁོང་དང་མཉམ་དུ་འབྲས་སྤུངས་དགོན་པའི་གྲྭ་བུ་ཆུང་དང་ཆོས་འཕེལ། ཟླ་གྲགས་བཅས་བཙོན་འཇུག་བྱས་ཡོད་སྐོར་བོད་ནས་འབྲེལ་ཡོད་ཅིག་གིས་གསར་ལམ་དུ་བརྗོད་ཡོད།  

གསར་འགོད་པ། དོན་གོ