བཀྲུས་ཀྱང་མི་དག་པའི་བོད་མི་ཞིག་ཡིན་པ་གཏིང་ཟབ་པོས་ངོ་འཕྲོད་པ་བྱོས།

བོད་ཀྱི་གྲོས་ཚོགས་དང་སྲིད་བྱུས་ཉམས་ཞིབ་ཁང་གི་གོ་སྒྲིག་འོག བཙན་བྱོལ་གྱི་འཛིན་རིམ་བཅུ་གཅིག་གི་སློབ་མ་ཚོར་བཙན་བྱོལ་བོད་མིའི་དམངས་གཙོ་དང་བོད་ནང་གི་གནས་སྟངས་སྐོར་ལ་ཟབ་སྦྱོང་ཞིག་ངྷ་སར་མགོ་འཛུགས་གནང་སོང་།

དེ་རིང་ཕྱི་ཚེས་ ༢༥ ཉིན་གྱི་ཞོགས་པ་ཆུ་ཚོད་ ༡༡ དང་ཕྱེད་ཀའི་སྟེང་ངྷ་ཤོད་བོད་ཁྱིམ་སློབ་གྲྭའི་ཚོགས་ཁང་དུ་བོད་ཀྱི་གྲོས་ཚོགས་དང་སྲིད་བྱུས་ཉམས་ཞིབ་ཁང་གི་གོ་སྒྲིག་འོག རྒྱ་གར་དང་བལ་ཡུལ་ནང་གི་བོད་པའི་སློབ་གྲྭ་ཁག་ ༢༡ གི་འཛིན་རིམ་བཅུ་གཅིག་གི་སློབ་མ་ ༡༠༥ ལ། ཉིན་དགུའི་རིང་༼ བཙན་བྱོལ་བོད་མིའི་མང་གཙོ་དང་བོད་ནང་གི་དངོས་ཡོད་གནས་སྟངས ༽ཞེས་པའི་ཐད་ཟབ་སྦྱོང་ཐེངས་དགུ་བ་མགོ་འཛུགས་གནང་ཡོད་ཅིང་། ཟབ་སྦྱོང་དབུ་འབྱེད་ཀྱི་སྐུ་མགྲོན་དུ་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་ཕེབས་འདུག 

ཟབ་སྦྱོང་དབུ་འབྱེད་ཀྱི་ཐོག་མར་བོད་ཀྱི་གྲོས་ཚོགས་དང་སྲིད་བྱུས་ཉམས་ཞིབ་ཁང་གི་ལས་འཆར་འགན་འཛིན་སྤྱི་འཐུས་ཨཅརྱ་ཡེ་ཤེས་ཕུན་ཚོགས་ལགས་ཀྱིས་ཟབ་སྦྱོང་ངོ་སྤྲོད་གནང་པ་ལྟར་ན། བོད་ཀྱི་གྲོས་ཚོགས་དང་སྲིད་བྱུས་ཉམས་ཞིབ་ཁང་ནི་འཇར་མན་གྱི་རོགས་ཚོགས་ཤིག་གི་རྒྱབ་སྐྱོར་འོག བོད་ཀྱི་འཐབ་རྩོད་དང་དམངས་གཙོའི་ལྟ་གྲུབ་དར་སྤེལ་ཆེད་ལས་གཞི་སྣ་ཚོགས་སྤེལ་བཞིན་ཡོད་པའི་ཁྲོད། ༢༠༠༤ ཙམ་ནས་དགུན་ཁའི་གུང་སེང་དང་བསྟུན་རྒྱ་གར་དང་བལ་ཡུལ་ནང་གི་བོད་པའི་སློབ་གྲྭ་ཁག་གི་འཛིན་རིམ་བཅུ་གཅིག་གི་སློབ་མ་དང་། དབྱར་ཁའི་གུང་སེང་སྐབས་མཐོ་སློབ་ཀྱི་སློབ་མ་ཚོ་བཅས་ལ་ལོ་ལྟར་བཙན་བྱོལ་བོད་མིའི་དམངས་གཙོ་དང་བོད་ནང་གི་དངོས་ཡོད་གནས་སྟངས་ཐད་ཟབ་སྦྱོང་སྤྲོད་ཀྱི་ཡོད་པ་དང་། ཐེངས་འདིའི་ཟབ་སྦྱོང་ནང་སློབ་གྲྭ་ཁག་ ༢༡ ནས་སློབ་ཕྲུག་ ༡༠༥ དང་། དགེ་རྒན་ ༡༨ བཅས་མཉམ་ཞུགས་བྱུང་ཡོད་འདུག

དེའི་རྗེས་སྤྱི་འཐུས་ཚོགས་གཙོ་མཆོག་གིས་སློབ་ཕྲུག་ཚོར་མ་འོངས་པར་སོ་སོའི་ཤེས་ནུས་དང་འབྲེལ་བོད་ཀྱི་རྩ་དོན་ལ་འགན་འཁུར་དང་མགོ་ཁྲིད་གནང་ཕྱོགས་ཐད་གསུང་བཤད་གནང་སྐབས། ཐོག་མ་༧གོང་ས་མཆོག་གཙོས་བོད་མི་མང་པོ་བཙན་བྱོལ་དུ་ཡོང་དགོས་ཆགས་པ་དང་། བཙན་བྱོལ་དུ་བསླེབས་རྗེས་དཀའ་ངལ་གང་འདྲ་འཕྲད་ཡོད་པ། སྐབས་དེའི་བོད་མི་ཚོས་ཕྱིར་བོད་དུ་ལོག་རྒྱུར་རེ་བ་བཟུང་སྟེ་ཡོང་ཡོད་ཅིང་། མི་རབས་རྒན་པ་ཚོའི་འགན་དེ་ད་ཆར་མི་རབས་གསུམ་པ་དང་བཞི་བའི་སྟེང་བབ་ཡོང་གི་ཡོད་སྟབས། ཇི་སྲིད་བཙན་བྱོལ་བོད་མི་ཚོ་ཕྱིར་བོད་དུ་ལོག་རྒྱུ་མ་བྱུང་པར་དུ་བཙན་བྱོལ་བོད་མི་ཚོས་མི་རབས་རིམ་བརྒྱུད་ཀྱིས་རྩ་དོན་ལ་འགན་འཁུར་དགོས་པས། སློབ་ཕྲུག་ཚོས་ཐེངས་འདིའི་ཟབ་སྦྱོང་བརྒྱུད་བཙན་བྱོལ་བོད་མིའི་སྒྲིག་འཛུགས་དང་དེའི་ལས་ཁུངས་ཁག ལས་དོན་བྱེད་ཕྱོགས་སོགས་ལ་རྒྱུས་ལོན་གཏིང་ཟབ་བྱས་ཏེ་མ་འོངས་པར་སོ་སོས་ལས་དོན་གང་འདྲ་ཞིག་གི་ཐད་ནས་བོད་ཀྱི་རྩ་དོན་ལ་འགན་འཁུར་དགོས་པའི་ཁ་ཕྱོགས་འཛིན་ཐུབ་པ་བྱ་དགོས་པ་བཅས་ཀྱི་ལམ་སྟོན་གནང་སོང་།

ཡང་ཁོང་གིས། བོད་ཀྱི་བདེན་མཐའ་མ་སེལ་པར་དུ་བཙན་བྱོལ་བོད་མིའི་སྒྲིག་འཛུགས་འདི་ཉིད་སྲ་བརྟན་གནས་རྒྱུ་ཧ་ཅང་གལ་ཆེན་ཡིན་པ་དང་། དེང་སྐབས་རྒྱལ་སྤྱིའི་ནང་བོད་དང་བོད་ཀྱི་དཀའ་རྙོག་ཅེས་པ་ཞིག་ཡོད་པ་ཚང་མས་ཤེས་ཀྱི་ཡོད་པའི་གནས་སྟངས་ཤིག་ཆགས་ཡོད་སྐོར་སོགས་གསུངས་ཏེ། སློབ་ཕྲུག་ཚོས་ཨང་དང་པོ་སོ་སོ་སུ་ཡིན་པ་ངོ་འཕྲོད་རྒྱུ་གལ་ཆེན་པོ་ཡིན་ཞིང་། རང་ཉིད་བཀྲུས་ཀྱང་མི་དག་པའི་བོད་མི་ཞིག་ཡིན་པ་གཏིང་ཟབ་པོས་ངོ་འཕྲོད་པར་བྱས་ཏེ། སོ་སོའི་ཕ་མ་ནང་མའི་གནས་སྟངས་དང་བོད་ཀྱི་གནས་བབ་ལ་ཤེས་རྟོགས་ཐུབ་པའི་སྟེང་། ཆུང་ས་ནས་ཕ་མ་ནང་མི་དང་ཆེ་ས་ནས་བོད་ཀྱི་རྩ་དོན་ལ་འགན་འཁུར་མཁན་རེ་ཡོང་དགོས་པ། རྒྱ་གཞུང་གིས་མི་རིགས་མཉམ་སྲེ་དང་བོད་མིའི་ངོ་བོ་རྩ་མེད་གཏོང་པའི་སྲིད་ཇུས་འོག རང་ལུས་མེར་བསྲེགས་ཀྱིས་མཚོན་བོད་ནང་གི་གནས་བབ་ཧ་ཅང་ཛ་དགྲ་ཆགས་ཡོད་པའི་སྐབས་འདིར་བོད་ཕྱི་ནང་གཉིས་མཉམ་རུབ་ཐོག་དཀའ་ལས་རྒྱག་དགོས་སྐོར། ད་སྔ་རྒྱལ་སྤྱིའི་སྟེང་གྲོས་ཚོགས་འཐུས་མི་དང་ཆབ་སྲིད་མི་སྣ། རང་དབང་ཅན་གྱི་ཚོགས་སྡེ་དང་མི་སྒེར་བཅས་ནས་བོད་ཀྱི་གནད་དོན་ཐད་རྒྱབ་སྐྱོར་ཡོང་གི་ཡོད་ཀྱང་། ཨ་རིའི་སྲིད་འཛིན་ཨོ་བྷ་མ་དང་དབྱིན་ཇིའི་སྲིད་བློན་ཌ་ཝེ་ཌི་སོགས་གཞུང་གི་མགོ་ཁྲིད་ཁྲོད་བོད་ཀྱི་གནད་དོན་ལ་སྐད་ཆ་བཤད་མཁན་ཡོང་གི་མེད་སྐོར་སོགས་གསུངས་ཡོད།

གཞན་ཁོང་གིས་ལས་འགུལ་ཟེར་པ་དེ་གཞུང་ལམ་སྟེང་ཐོན་ཏེ་སྐད་འབོད་ཁྲོམ་སྐོར་བྱེད་རྒྱུ་ཙམ་མ་ཡིན་པར། ཕྱོགས་དང་ཟུར་སྣ་ཚོགས་ནས་ཤུགས་རྐྱེན་དང་ནུས་པ་ཐོན་ཐབས་བྱ་དགོས་པ་དང་། སློབ་ཕྲུག་ཚོས་ད་ལྟའི་སློབ་སྦྱོང་གི་མཐུན་རྐྱེན་བེད་སྤྱོད་ཡག་པོ་བཏང་སྟེ་མ་འོངས་པར་སོ་སོ་ནུས་པ་ལྡན་པའི་བོད་མི་རེ་བྱ་དགོས་པའི་སྐུལ་འདེད་གནང་སོང་།

གསར་འགོད་པས་ཟབ་སྦྱོང་ནང་མཉམ་ཞུགས་བྱེད་མཁན་བལ་ཡུལ་རྣམ་རྒྱལ་མཐོ་སློབ་འཛིན་རིམ་བཅུ་གཅིག་གི་སློབ་མ་ཀརྨ་བསྟན་འཛིན་ལགས་སུ་ཐེངས་འདིའི་ཟབ་སྦྱོང་ལ་རེ་བ་གང་འདྲ་ཞིག་བཟུང་ཡོད་མེད་དྲིས་པར། རང་ཉིད་ཀྱིས་བོད་ནང་ཛ་དྲག་ཆགས་ཡོད་པ་རེད་ཟེར་པ་ཙམ་དང་། བཙན་བྱོལ་བོད་མིའི་སྒྲིག་འཛུགས་ངྷ་སར་ཡོད་པ་ཙམ་ལས་ཤེས་ཀྱི་མེད་སྟབས། ཐེངས་འདིར་བོད་ནང་གི་དངོས་ཡོད་གནས་སྟངས་དང་བཙན་བྱོལ་བོད་མིའི་སྒྲིག་འཛུགས་སོགས་ལ་ཤེས་རྟོགས་ཡག་པོ་ཞིག་ཡོང་གི་རེད་དྲན་ཚུལ་བརྗོད་བྱུང་།

ཡང་ཐེངས་གཉིས་ཙམ་སློབ་མ་ཚོ་ཁྲིད་དེ་ཟབ་སྦྱོང་ལ་ཡོང་མཁན་ཧ་པཱ་པུར་སློབ་གྲྭའི་བོད་དགེ་དགེ་བཤེས་བློ་ལྡན་ལགས་ལ། ཐེངས་སྔོན་མ་དག་གི་ཉམས་མྱོང་ཐད་ནས་ཟབ་སྦྱོང་འདིས་སློབ་ཕྲུག་ཚོར་ཕན་ཐོགས་ཡོང་གི་ཡོད་མེད་དྲིས་པར་ཁོང་གིས། ཐེངས་སྔོན་མར་མཚོན་ན་ཟབ་སྦྱོང་རྗེས་སུ་ཕྱིར་སློབ་གྲྭར་ལོག་རྗེས་ཟབ་སྦྱོང་ལ་ཡོང་མཁན་སློབ་ཕྲུག་ཚོའི་ཉམས་མྱོང་དང་གང་ཤེས་པ་དག་སློབ་གྲྭའི་ནང་བཤད་བཅུག་ཡོད་ཀྱང་། འཕྲལ་དུ་ཕན་ཐོགས་འདི་འདྲ་ཡོང་གི་འདུག་ཅེས་བཤད་རྒྱུ་ཁག་པོ་ཡིན་ཚུལ་དང་། དེང་སྐབས་ཧ་པཱ་པུར་སློབ་གྲྭ་མཚོན་པའི་བོད་པའི་སློབ་གྲྭ་མང་པོ་ཞིག་གི་ནང་བོད་པ་ལས་རྒྱ་གར་སློབ་ཕྲུག་མང་པ་ཆགས་ཡོད་པ་དང་། དགེ་རྒན་ཡང་ཕལ་ཆེ་བ་རྒྱ་གར་བ་ཡིན་སྟབས། བོད་པའི་སློབ་ཕྲུག་ཚོའི་བསམ་བློའི་འཁྱེར་ཕྱོགས་དང་བྱ་སྤྱོད་འཛིན་ཕྱོགས་ཤུགས་རྐྱེན་ཆེན་པོ་ཐེབས་ཏེ། བོད་པ་རང་གི་འདུ་ཤེས་དང་མི་རིགས་ཀྱི་ལ་རྒྱ། སྐད་ཡིག་གི་རིན་ཐང་སོགས་ཡལ་བཞིན་པའི་གནས་སྟངས་ཤིག་ཆགས་ཡོད་ཚུལ་བརྗོད་བྱུང་།

ཐེངས་འདིའི་ཉིན་དགུའི་རིང་གི་ཟབ་སྦྱོང་སྐབས་སློབ་ཕྲུག་རྣམས་བཙན་བྱོལ་བོད་མིའི་སྒྲིག་འཛུགས་ཀྱི་ལས་ཁུངས་ཁག་དང་། གཞུང་འབྲེལ་མ་ཡིན་པའི་ཚོགས་པ་ཁག་བཅས་ལ་ལྟ་སྐོར་དང་། གནད་ཡོད་མི་སྣ་ ༣༥ ཙམ་གྱིས་བཙན་བྱོལ་བོད་མིའི་སྒྲིག་འཛུགས་དང་དམངས་གཙོ། བོད་ནང་གི་དངོས་ཡོད་གནས་སྟངས་སོགས་བརྗོད་གཞི་མ་འདྲ་བ་ ༢༢ ཙམ་གྱི་ཐད་གསུང་བཤད་དང་དྲི་བ་དྲིས་ལན་གནང་རྒྱུ་ཡིན་འདུག

གསར་འགོད་པ། བནྡེ་སྐྱབས།