༧གོང་ས་མཆོག་བོད་མིའི་ལུག་རྫི་བཟང་པོ་ཞིག་ཡིན།

མེ་ལྕེའི་ཀློང་གི་སྟག་གཟིག་སྲམ་ལྤགས་དང་མི་ལྤགས།

ནུས་ཤུགས་ཆེ་བའི་བཀའ་སློབ་ཚིག་གཅིག

ཀླུ་སྨྱོན་ཧེ་རུ་ཀ

བོད་མི་རིགས་འདི་ནི་ཆོས་ལུགས་དང་གཏམ་རྒྱུད་གང་གི་ངོས་ནས་བལྟས་ཀྱང་འཁོར་བ་མུན་ནག་གི་རྩྭ་ཐང་ཆེན་པོ་འདིའི་སྟེང་དུ་རྨོངས་ཤིང་འཁྱམས་པའི་གཡང་དཀར་ལུག་གི་ཁྱུ་ཞིག་ཡིན་ལ། སྤྱན་རས་གཟིགས་ཀྱི་རྣམ་སྤྲུལ་༧གོང་ས་མཆོག་ནི་ཉིན་མཚན་ཀུན་ཏུ་ལུག་ཁྱུ་འདིར་སྤྱན་གྱི་ཆ་ཤས་རེ་རེ་ནས་གཟིགས་པའི་རྫི་བོ་བཟང་པོ་ཞིག་ཡིན་ཞིང་། རྫི་བོ་འདིས་ཇི་སྲིད་ལུག་ཁྱུ་འདི་སྐྱོན་མེད་བདེ་སྐྱིད་ངང་ཡིད་དུ་འོང་བའི་ལུག་རྭ་དྲོན་མོ་དེར་མ་བཅུག་དེ་སྲིད་དུ་རང་ཉིད་ཀྱིས་ལུག་ཁྱུ་འདི་ཁྱི་སྤྱང་སོགས་གཟན་གཅན་གདུག་པ་ཅན་གྱི་ལོངས་སྤྱོད་བྱར་བཞག་ནས་རང་ཉིད་གཅིག་བུ་བཟའ་བཏུང་ཉི་ཚེ་བའི་ཆེད་དུ་ནང་ལ་མི་ལོག་པའི་དམ་བཅའ་རླབས་པོ་ཆེ་ཞིག་བཞག་ཟིན་ཡོད་པས། སེམས་སྐྱེད་ཁྱད་པར་ཅན་གྱི་རྫི་བོ་འདི་དང་ལས་སྐལ་དམན་པའི་ལུག་ཁྱུ་འདི་གཉིས་བར་གྱི་འབྲེལ་བ་ཟབ་མོ་འདི་གཞི་ལ་བཞག་སྟེ། ཁོ་བོས་རང་ཉིད་ལ་གཞན་གྱིས་ཁ་རྡུང་གཏོང་བ་དང་འགྲམ་ལྕག་གཞུ་བ། སྲོག་ལ་རྒོལ་བ་སོགས་ཀྱི་བྱ་སྤྱོད་ལ་ཅི་མི་སྙམ་པར་འཆི་མ་སྔ་བའི་བོད་མི་རེ་རེ་བཞིན་འཆི་བདག་གི་མཆེ་བ་ལྟ་བུའི་མེ་ལྕེ་དམར་པོའི་ཀློང་དུ་མི་མཆོངས་པའི་དགོས་པ་ཁྱད་པར་ཅན་དུ་མ་ཞིག་ལ་དམིགས་ནས། གཤམ་གསལ་རྩོམ་ཐུང་འདི་འབྲི་བའི་ངལ་བ་བསྟེན་པར་བྱའོ།།

འདས་པོ་ཐུབ་བསྟན་དངོས་གྲུབ་ནས་བརྩིས་ན་ཁ་སང་གི་བར་དུ་བོད་མི་བརྒྱ་དང་གཅིག་གིས་རང་ལུས་མེར་བསྲེགས་བཏང་ཡོད་ཅིང་། མེར་བསྲེགས་ས་གནས་ནི་ལྡི་ལི་དང་ལྷ་ས། རྔ་པ་དང་བླ་བྲང་། རེབ་གོང་དང་མགོ་ལོག ནག་ཆུ་དང་ཡུལ་ཤུལ་སོགས་ཡིན་ལ། མི་སྣ་མང་ཆེ་བ་ཨ་མདོ་དང་དེ་འཕྲོས་ཉུང་ཤོས་ཤིག་ཁམས་དང་ས་ཁུལ་གཞན་དག་ནས་ཡིན། ཁོ་ཚོའི་དམིགས་ཡུལ་ནི་བོད་ལ་རང་བཙན་དང་རང་སྲིད་རང་སྐྱོང་། ཆོས་ལུགས་དང་རིག་གཞུང་སྲུང་སྐྱོབ། ༧གོང་ས་ཏྰ་ལའི་བླ་མ་མཆོག་བོད་དུ་གདན་འདྲེན་ཞུ་དགོས་པ་སོགས་ཡིན། ཐོབ་ཐང་ངམ་ལས་རིགས་ནི་མི་སྣ་མང་ཤོས་བླ་སྤྲུལ་གྲྭ་བཙུན་དང་དེ་འཕྲོས་ཞིང་འབྲོག་མང་ཚོགས་དང་སློབ་མ་སོགས་མི་སྐྱ་རེད། མི་འདི་ཚོའི་ཁྲོད་ཀྱི་ལོ་ན་རྒན་ཤོས་དྲུག་ཅུ་ནས་གཞོན་ཤོས་བཅུ་དྲུག་ཙམ་ལ་བསླེབས་ཡོད། དམིགས་བསལ་མེར་བསྲེགས་ས་གནས་ནི་ལྡི་ལི་དང་ཇོ་ཁང་མདུན་ཐང་། རྔ་པ་རྫོང་ཐོག་དང་དགོན་པའི་ཐང་ཆེན། འབྲོག་པའི་རྩྭ་ཐང་དང་གཞུང་ལམ་གྱི་འཁྲིས་སོགས་ཡིན།

ཐོག་མར་ཐུབ་བསྟན་དངོས་གྲུབ་ཀྱིས་ལྡི་ལི་ནས་རང་ལུས་མེ་བསྲེགས་བྱས་དུས་༧གོང་ས་མཆོག་གིས་རང་ལུས་མེར་བསྲེགས་འདི་ཡང་འཚེ་བའི་བྱ་སྤྱོད་ཅིག་རེད་ཅེས་ཡོངས་གྲགས་སུ་གསུངས་ཡོད་ཅིང་། དེ་ནས་བཟུང་ལོ་ངོ་དུ་མའི་རིང་བྱ་སྤྱོད་འདི་རིགས་སྤེལ་མཁན་གཅིག་ཀྱང་མ་བྱུང་ཡང་། འཐབ་རྩོད་ཀྱི་ལམ་ཁ་གཞན་དང་གཞན་ནས་བོད་དོན་གྱི་ལས་འགུལ་སྤེལ་མཚམས་ཉི་མ་གཅིག་ལ་ཡང་བཞག་མྱོང་མེད། དེ་ནི་གཅིག་བྱས་ན་མི་མང་པོས་ལོ་རབས་དྲུག་ཅུ་བའི་སྐབས་ཀྱི་ཝི་ཐི་ནམ་གྱི་མེར་བསྲེགས་ལས་འགུལ་དང་མི་འདྲ་བར་བོད་པའི་མེར་བསྲེགས་ལས་འགུལ་དེས་ཀྱང་རྒྱ་གཞུང་དང་རྒྱལ་སྤྱིས་བོད་ལ་འཛིན་པའི་རྣམ་འགྱུར་ཐད་འགྱུར་ལྡོག་སྤུ་ཙམ་ཡང་མ་བྱུང་བར་ཡིད་ཆད་སྐྱེས་པ་ཡང་ཡིན་སྲིད།

ཐུབ་བསྟན་དངོས་གྲུབ་ཀྱི་རྗེས་སུ་བོད་ཕྱི་ནང་གང་དུ་ཡང་རང་ལུས་མེར་བསྲེགས་ཀྱི་ལས་འགུལ་མ་སྤེལ་བར་རྒྱུན་རིང་ཕྱིན་པ་བདེན་ན་ཡང་། ཕྱོགས་གཞན་ཞིག་ནས་༧གོང་ས་ཏྰ་ལའི་བཀའ་གསུང་ཚིག་གཅིག་གིས་དྲག་ཏུ་སྦར་བའི་མེ་ལྕེ་ཞིག་བོད་ཁམས་ཡོངས་སུ་མཆེད་པ་དང་། དེས་བོད་མིའི་རྡོག་རྩ་གཅིག་སྒྲིལ་ལ་མི་ལོ་ལྔ་བཅུའི་རིང་མ་ཐོན་པའི་རྦ་རླབས་གསར་པ་ཞིག་འཕྱུར་དུ་བཅུག དེ་ནི་བོད་མི་ཚོས་སྲམ་སྲེག་ལས་འགུལ་ཟེར་བ་དེ་རེད་ལ། དེའི་ནུས་པ་ཡིས་གདུག་རྩུབ་ཀྱི་གཉིད་དུ་ཡུར་བའི་རྒྱ་གཞུང་དང་དེའི་དབང་འཛིན་པ་ཚོ་ཁྱི་རྒན་ལ་མགོ་ལྕག་གཞུས་པ་བཞིན་འཇིགས་སྣང་ཚབས་ཆེན་སྐྱེས་སུ་བཅུག་ཅིང་། ཁོ་ཚོས་བྲེལ་བྲེལ་འཚུབ་འཚུབ་ཀྱིས་ལམ་སེང་རྩ་ཆེའི་སྲོག་ཆགས་སྲུང་སྐྱོབ་ཀྱི་ཁ་གཡང་དེ་གཏིང་བརྗེད་དུ་གྱུར་པ་བཞིན། སྲམ་ལྤགས་གྱོན། སྟག་ལྤགས་ཉོས། གཟིག་ལྤགས་ཚོངས། ཞེས་ཁྱི་སྨྱོན་བཞིན་ཟུག་སྐད་ཚོད་མེད་ཅིག་རྒྱག་དགོས་བྱུང་བ་རེད་ལ། ཟུག་སྐད་དེར་ཉན་འཇོག་བྱེད་མཁན་མེད་པ་ཤེས་རྗེས་ད་དུང་སྲམ་ལྤགས་མི་གྱོན་ན་གླ་ཕོགས་གཅོག་གི་ཡིན། སྟག་ལྤགས་མི་ཉོ་ན་གོ་གནས་འཕབ་ཀི་ཡིན། གཟིག་ལྤགས་མི་འཚོང་ན་ཐེམ་ཐོ་འཕྲོག་གི་ཡིན་ཞེས་སོགས་སྡུག་སྐད་རབ་དང་རིམ་པ་ཞིག་བརྒྱབ་པ་རེད། ཡིན་ཡང་། དམར་པོའི་སྲིད་གཞུང་ཡིད་སྐྱོ་དགོས་པ་ཞིག་ལ་བོད་མི་བརྒྱ་ཆ་དགུ་བཅུ་གོ་དགུ་ཡན་ཆད་ཀྱིས་༧གོང་ས་མཆོག་གི་བཀའ་སློབ་ཚིག་གཅིག་གིས་རང་རང་གི་རྒྱབ་ནས་བཤུས་པའི་སྲམ་སྟག་གཟིག་གསུམ་གྱི་པགས་པ་ཡོད་ཚད་ཕྱོགས་གཅིག་ཏུ་སྤུངས་ནས་དྲག་ཏུ་འབར་བའི་མེ་ལྕེའི་ཀློང་དུ་བསྟིམས་པ་རེད། གཞི་རྩའི་ཆ་ནས་བཤད་ན་སྟག་གཟིག་སྲམ་གསུམ་གྱི་པགས་པ་ནི་མི་ལོ་སྟོང་གི་ཡར་སྔོན་ནས་བོད་མི་རིགས་འདིའི་ཆ་ལུགས་དང་ཆས་གོས་སུ་གྱུར་ནས་དུས་རབས་ཉེར་གཅིག་པ་བར་དུ་ཡོང་བ་ཞིག་ཡིན་མོད། བླ་མའི་ཅི་གསུངས་ཆོས་དང་མཛུབ་མོས་གར་བསྟན་ཤར་དུ་ལྟ་བའི་བོད་མི་རིགས་འདི་ལ་མཚོན་ན། ལོ་རྒྱུས་ལྡན་ཞིང་མིག་ལ་རྫིག་པ། རིན་ཐང་ཆེ་ཞིང་གཟི་འོད་འཁྱུག་པའི་སྟག་གཟིག་སྲམ་གྱི་པགས་རིགས་ཁྲི་འབུམ་དེ་དག་ལས་༧གོང་ས་མཆོག་གི་བཀའ་སློབ་ཚིག་གཅིག་གི་རིན་ཐང་དེ་གཞལ་དུ་མེད་ཅིང་བསྒྲུབ་ཏུ་འོས་པ་ཞིག་ཡིན་པའི་ངེས་ཤེས་བླ་ལྷག་ཏུ་རྙེད་པ་རེད་ལ། བཀའ་སློབ་དེ་ལག་ལེན་དུ་བསྟར་བའི་ཕྱི་ནང་གསང་གསུམ་གྱི་འགོག་རྐྱེན་ཇི་རྙེད་ཅིག་ཡོད་ཀྱང་ཚང་མ་རྡོག་པས་བརྫིས་ཏེ། མཐའ་མར་བོད་ཁམས་ཡོངས་སུ་སྟག་གཟིག་སྲམ་ལྤགས་མེར་སྲེག་གི་གསར་བརྗེའི་མེ་ལྕེ་དྲག་པོ་ཞིག་འབར་བ་རེད།

དེའི་རྗེས་བོད་མིའི་མེར་བསྲེགས་ལས་འགུལ་འདི་ཐོག་དང་པོར་ལྡི་ལིར་བྱུང་བའི་སྐབས་དང་། དེ་རྗེས་རྔ་པ་ནས་བྱུང་བའི་སྐབས་སུ་བོད་མི་ཚོར་སེམས་ཚོར་དྲག་པོ་བྱུང་སྟེ་དྲན་མེད་དུ་བརྒྱལ་པ་དང་རང་ལུས་ལ་གྲི་བཙུགས་པ་སོགས་བྱུང་ཡོད་ལ། བོད་རིགས་འདུས་སྡོད་ཀྱི་ས་གནས་ཚང་མར་སྨོན་ལམ་མཆོད་འབུལ་ཁྲོམ་སྐོར་སོགས་བྱེད་སྒོ་སྣ་ཚོགས་ཤིག་ཚ་ཚ་འུར་འུར་དུ་སྤེལ་ཡོད་པ་དང་། འཛམ་གླིང་མི་དམངས་ཀྱིས་ཀྱང་དོ་སྣང་ཆེན་པོ་ཞིག་བྱུང་ཡོད་ཀྱང་། མེར་བསྲེགས་ལས་འགུལ་འདི་བཅུ་དང་ཉི་ཤུ་དང་དེ་ནས་བདུན་ཅུ་བརྒྱད་ཅུར་བསླེབས་དུས། བོད་མི་ཚོས་ཀྱང་ཁ་སང་གཅིག་བསྲེགས་འདུག་ལ་དེ་རིང་ཡང་གཉིས་བསྲེགས་འདུག་ཟེར་བ་ཙམ་ལ། དེ་ལ་རང་གི་རིགས་གཅིག་སྤུན་ཟླ་ཞིག་གི་རྩ་ཆེ་བའི་ཚེ་སྲོག་མེ་དམར་པོའི་ནང་དུ་བསྟིམས་སོང་བའི་ཚོར་བ་ཏོག་ཙམ་ཡང་མེད་པ་དང་། ཐ་ན་དེའི་སྐོར་གླེང་ན་སུན་སྣང་གི་རྣམ་འགྱུར་སྟོན་མཁན་ཡང་ཇེ་མང་རེད་ལ། འཛམ་གླིང་མི་དམངས་ཀྱིས་ཀྱང་དེ་ནི་བོད་པ་ཚོའི་འཐབ་རྩོད་བྱེད་སྟངས་རྒྱུན་ལྡན་པ་ཞིག་ཏུ་རྩི་བཞིན་མི་འདུག་གམ།

དེང་གི་མེ་བསྲེགས་ལས་འགུལ་ལ་མཚོན་ན་འདིའི་རྒྱབ་ལྗོངས་ཀྱི་བཙན་གནོན་དང་དཀའ་སྡུག་གཉིས་ལ་འཛམ་གླིང་གི་རྒྱལ་ཁབ་དང་མི་དམངས་ཀྱིས་བསམ་ཤེས་ཐུབ་པ་ཞིག་ཡིན་མོད། དམར་པོའི་སྲིད་གཞུང་གི་དཔལ་འབྱོར་དང་དམག་དོན་སྟོབས་ཤུགས་ལ་འཇིགས་ཏེ་ཆེ་བ་ཨ་རི་ནས་ཆུང་བ་བལ་བོའི་བར་གྱི་རྒྱལ་ཁབ་སུ་གཅིག་གིས་ཀྱང་བོད་མི་ཚོར་གནད་དུ་སྨིན་པའི་རོགས་རམ་ཞིག་བྱེད་ཐུབ་ཀྱི་མེད་པ་རེད། ཡིན་ཡང་ཉིན་རེ་ནས་ཉིན་རེ་བཞིན་བོད་མི་ཚོས་རང་ལུས་མེར་བསྲེགས་ཀྱི་གྲ་སྒྲིག་བྱེད་བཞིན་ཡོད་ལ། བདུན་ཕྲག་རེ་ཟུང་སྔོན་ནས་བཟུང་དམར་པོའི་སྲིད་གཞུང་ཨ་ཆད་ཨུ་ཐུག་ཏུ་གྱུར་ནས་མེར་བསྲེགས་མཁན་དེ་ཁྲིམས་འགལ་བར་བརྩིས་པའི་མི་ཚད། མེར་བསྲེགས་ལས་འགུལ་ལ་ལྟ་མཁན་དང་དེ་ལ་ཉན་མཁན། ཐ་ན་མེར་བསྲེགས་པའི་ནང་མིར་སེམས་གསོ་བྱེད་མཁན་དང་མེར་བསྲེགས་པའི་ཆེད་དུ་སྨོན་ལམ་རྒྱག་མཁན་ཡན་ཆད་ཁྲིམས་འགལ་ཡིན་པའི་ཁྲིམས་གཞི་གསར་པ་སྔ་ན་མེད་པ་ཞིག་གསར་བཟོ་མི་བྱེད་ཀ་མེད་དུ་གྱུར་པ་དང་། ས་གནས་མི་དམངས་ཁྲིམས་ཁང་དག་གིས་ཀྱང་མེར་བསྲེགས་ལས་འགུལ་དང་འབྲེལ་བ་ཡོད་པ་ཚང་མར་དྲག་རྡུང་བྱེད་དགོས་པ་དང་། མེར་བསྲེགས་ལས་འགུལ་བ་དང་དེའི་རྒྱབ་སྐྱོར་བ་ཚོ་དམར་གཞུང་ལ་རྩིས་སྤྲོད་བྱས་ན་བྱ་དགའ་འདི་འདྲ་དང་དེ་འདྲ་ཡོད་ཅེས་མངོན་སུམ་འཛེམ་མེད་དུ་ཁྱབ་བསྒྲགས་བྱས་དང་བྱེད་བཞིན་འདུག

མེར་བསྲེགས་ལས་འགུལ་འདིའི་སྐོར་ལ་༧གོང་ས་མཆོག་གི་ངོས་ནས་བཀའ་སློབ་མང་ཆེ་བ་ཕྱི་རྒྱལ་གསར་འགོད་པས་དྲི་བ་ཞུས་པའི་སྐབས་ཁོ་ན་ཡིན་པ་དང་། དེ་ཡང་དེར་འཛིན་པའི་ཁོང་སྐུ་སྒེར་གྱི་ལྟ་བ་ཞིག་ཕལ་ཆེར་ཞལ་གསལ་ནས་གསུངས་མེད་ལ། མེར་བསྲེགས་ལས་འགུལ་དེ་འབྱུང་རྐྱེན་ཚང་མ་རྒྱ་ནག་གཞུང་ལ་ཡོད་པའི་སྐོར་གསུང་བཞིན་འདུག་ཅིང་། དེ་མཚམས་འཇོག་དང་མི་འཇོག་གི་འགན་ཁུར་ཚང་མ་ཡང་རྒྱ་ནག་གཞུང་ལ་ཡོད་ཅེས་ཡང་དང་བསྐྱར་དུ་གསུང་གིན་འདུག དེ་བཞིན་ཁོང་གི་བཀའ་སློབ་ལས་གནད་དོན་གཉིས་སྟོན་པ་སྟེ། གལ་སྲིད་ཁོང་གིས་མེར་བསྲེགས་ལས་འགུལ་འདི་སྡུག་པོ་རེད་ཅེས་གསུངས་ན་མེར་བསྲེགས་པའི་ནང་མི་ཚོ་བློ་ཕམ་འབྱུང་རྒྱུ་དང་། དེ་ཡག་པོ་རེད་གསུངས་ན་དམར་པོའི་གཞུང་གིས་ཁོང་མེར་བསྲེགས་རྒྱུད་སྐུལ་མཁན་དུ་ངོས་འཛིན་བྱེད་རྒྱུ་ཡིན་པ་དེ་གཉིས་རེད། བོད་མི་བརྒྱ་ཕྲག་བརྒལ་བས་རང་ལུས་མེར་བསྲེགས་བྱེད་ཐེངས་རེ་རེར་དམར་པོའི་གཞུང་གིས་དེའི་རྒྱབ་ལོགས་ན་༧གོང་ས་མཆོག་ཡོད་ལུགས་བསྙོན་འཛུགས་བར་མེད་དུ་བྱས་ཡོད་ལ། དེ་ནི་མེར་བསྲེགས་ལས་འགུལ་གཅིག་པོ་མ་ཡིན་པར་ཨོ་ལིམ་ལུས་རྩེད་བར་ཆད་དང་ཐིག་བརྒྱད་བོད་ནང་དོན་རྐྱེན་སོགས་བོད་དོན་ལས་འགུལ་ག་རེ་ཡིན་ན་ཡང་དེའི་རྒྱབ་ལོགས་སུ་༧གོང་ས་མཆོག་ཡོད་ལུགས་ཀྱི་སྡུག་སྐད་ཟམ་མི་ཆད་པར་བརྒྱབ་དང་རྒྱག་བཞིན་པ་རེད། གལ་སྲིད་༧གོང་ས་མཆོག་གིས་མེར་བསྲེགས་མཚམས་འཇོག་བྱེད་རོགས་ཞེས་མི་གསུང་བའི་གནད་འགག་འདི་ཐུག་ས་གཙོ་བོ་སྟེ། ༧གོང་ས་མཆོག་གིས་གལ་སྲིད་དེ་ལྟར་གསུངས་ནས་བོད་མི་མེར་བསྲེགས་མཚམས་བཞག་པ་ཡིན་ན། དམར་པོའི་གཞུང་གིས་ཚ་ཚ་འུར་འུར་ངང་འཛམ་གླིང་ལ་ཁ་གཏད་ནས། ཏྰ་ལའི་བླ་མའི་སྐད་ཆ་ཚིག་གཅིག་གིས་མེར་བསྲེགས་ལས་འགུལ་མཚམས་བཞག་སོང་བས་གནས་སྟངས་འདིས་ཁོ་ནི་མེར་བསྲེགས་ལས་འགུལ་རྒྱུད་སྐུལ་བྱེད་མཁན་ཡིན་པ་དེ་ར་འཕྲོད་ཐུབ་ཅེས་ཟེར་རྒྱུ་རེད་དགོངས་པ་ཡིན་ན། བོད་མིའི་ཚེ་སྲོག་མེར་བསྲེགས་ཀྱི་ལས་འགུལ་རྔམས་པོ་ཆེ་འདི་མཚམས་འཇོག་ཐུབ་པ་ཡིན་ན། དམར་པོའི་གཞུང་གིས་༧གོང་ས་མཆོག་ལ་མཚན་སྨོད་ཞུ་རྒྱུ་དེ་ཚབས་ག་ཚོད་ཆེ་རུ་སོང་ཡང་དྲང་བདེན་དང་ཞི་བདེར་དགའ་བའི་འཛམ་གླིང་མི་དམངས་སུས་ཀྱང་༧གོང་ས་མཆོག་ལ་འཛིན་པའི་ཡིད་ཆེས་ཆེ་རུ་མ་གཏོགས་ཆུང་དུ་འགྲོ་མི་སྲིད་ལ། དེ་ལ་བརྟེན་ནས་རྒྱ་དམར་སྲིད་གཞུང་ཡང་ངོ་ཚ་ཁ་སྐྱེངས་སྔོན་ཆད་མ་བྱུང་བ་ཞིག་འབྱུང་རྒྱུ་ཡིན་པ་ཡང་སྔོན་དཔག་བྱེད་ཐུབ་པ་ཞིག་ཡིན་པ་སྟེ། གདུག་རྩུབ་ཅན་གྱི་སྲིད་གཞུང་འདིས་མི་རྒྱུ་མཚོན་གསུམ་གྱི་འགྲོ་སོང་ཕངས་མེད་དུ་བཏང་ནས་ཚབས་ཆེ་རུ་སོང་བའི་བོད་མིའི་མེར་བསྲེགས་ལས་འགུལ་དེ་༧གོང་ས་མཆོག་གི་ཞལ་གསུང་དྲོན་མོ་གཅིག་གིས་མཚམས་འཇོག་བྱས་པས་སོ།།

མི་རིང་བའི་སྔོན་བཀའ་ཁྲི་དང་ཀརྨ་པ་གཉིས་ཀྱིས་མེར་བསྲེགས་ལས་འགུལ་འདི་མཚམས་འཇོག་དགོས་པའི་བཀའ་སློབ་གནང་ལུགས་ཐོས་བྱུང་ལ། ཨ་མདོ་རེབ་ཀོང་གི་བླ་ཆེན་མི་ཆེན་སྐོར་ཞིག་གིས་ཀྱང་ཡི་གེའི་ལམ་ནས་མང་ཚོགས་ལ་མེར་བསྲེགས་ལས་འགུལ་འདི་མཚམས་འཇོག་དགོས་པའི་བསླབ་བྱ་ཞིག་བྱས་འདུག ཡིན་ན་ཡང་ད་དུང་བོད་ནང་མུ་མཐུད་དེ་མེར་བསྲེགས་ལས་འགུལ་འདི་རྒྱུན་སྐྱོང་བཞིན་ཡོད་ཅིང་། མེར་བསྲེགས་ལས་འགུལ་སྤེལ་མཁན་མང་ཤོས་ནི་ཆབ་སྲིད་ཐད་མིག་རྒྱང་རིང་པོ་མེད་པའི་ཞིང་འབྲོག་མང་ཚོགས་དང་གྲྭ་བཙུན་དག་རེད། མི་འདི་དག་གིས་གནས་སྐབས་ཀྱི་ཚོར་བའི་ངར་ཤུགས་ཀྱི་དབང་གིས་རང་ལུས་མེར་བསྲེགས་གཏོང་གི་ཡོད་ཅིང་། འགྲན་ཟླ་བྲལ་བའི་སྙིང་སྟོབས་དེ་དག་གལ་སྲིད་གསོན་པོའི་ལམ་ནས་བོད་ཀྱི་སྣོད་བཅུད་སྲུང་སྐྱོབ་ཀྱི་ཆེད་དུ་བཏང་བ་ཡིན་ན། མེར་བསྲེགས་ལས་འགུལ་ལས་ལྷག་པའི་ནུས་པ་ལྡབས་འགྱུར་གྱིས་ཐོན་རྒྱུ་ཡིན་མོད། ཡིད་ཧ་ཅང་ཕངས་པ་ཞིག་ལ་ཁོང་རྣམ་པའི་རྩ་ཆེ་བའི་ཚེ་སྲོག་རེ་རེ་བཞིན་སྙིང་རྗེ་མེད་པའི་མེ་ལྕེ་དམར་པོས་ཁྱུར་མིད་དུ་བཏང་ནས་ནམ་ཡང་ཕྱིར་ལོག་ཡོད་པ་མ་རེད། ཀྱེ་མ་ཀྱེ་ཧུད། ངའི་རིགས་གཅིག་སྤུན་ཟླ་ཚོ།

བོད་མི་རང་བཙན་པ་ཚོར་མཚོན་ན་རང་རེའི་ཕ་དང་མེས་པོ་བསད་པའི་བཤན་ལག་སྟེང་གི་ཁྲག་དམར་ད་དུང་སྐམ་མེད་པའི་རྒྱ་ནག་དམར་པོའི་སྲིད་གཞུང་ནི་ས་སྟེང་གི་དགྲ་བོ་ཉག་གཅིག་དེ་ཡིན་པས། དགྲ་བོའི་ངོས་ནས་ཚུར་ང་ཚོར་སྙིང་རྗེ་དང་གུ་ཡངས་སྤྲོད་པའི་རེ་བ་བརྒྱབ་པ་དེ་ནི་ལུ་གུས་སྤྱང་ཀིའི་འོ་མར་རེ་བ་བརྒྱབ་པ་དང་གཅིག་མཚུངས་ཡིན་པ་མ་ཟད། དེ་ནི་དགྲ་བོའི་མདུན་ནས་ཉོས་པའི་ངོ་ཚ་ཆེན་པོ་ཞིག་ཀྱང་ཡིན་པ་རེད། དེ་བས་ཁོ་ཚོས་ནམ་ཡང་དགྲ་བོའི་ཕྱོགས་ནས་ཚུར་བསམ་ཤེས་དང་བྱམས་སྐྱོང་ཞིག་ཐོབ་རྒྱུ་མེད་པ་དེ་ལོ་ངོ་ལྔ་བཅུའི་སྔོན་ནས་ཤེས་རྟོགས་བྱུང་ཡོད་པ་རེད། རྒྱུ་མཚན་འདིའི་དབང་གིས་བོད་ཀྱི་མེར་བསྲེགས་ལས་འགུལ་འདི་མཚམས་འཇོག་དང་མི་འཇོག་དེ་རྒྱ་ནག་གཞུང་གིས་ཚུར་ཐག་གཅོད་བྱེད་རྒྱུ་ཞིག་མ་ཡིན་པར། བོད་མི་རང་ཉིད་ཀྱིས་རང་གི་འཐབ་རྩོད་ཀྱི་ཁ་ཕྱོགས་གང་ཞིག་ཏུ་བསྒྱུར་མིན་ལ་རག་ཡོད་པ་ཞིག་རེད། གནད་དོན་འདིའི་སྟེང་ནས་བལྟས་པ་ཡིན་ན། ༧གོང་ས་མཆོག་གིས་ཆབ་སྲིད་ཀྱི་ཐུགས་འགན་བཞེས་མཚམས་བཞག་ཡོད་མིན་ལ་མ་ལྟོས་པར། ཁོང་ཉིད་བོད་མི་ཞིག་ཡིན་པའི་ཆ་ནས་བོད་དོན་འཐབ་རྩོད་འདིའི་ཕྱོགས་སུ་ནམ་ཡང་འདོར་དུ་མེད་པའི་འོས་འགན་ཞིག་ཡོད་པ་དང་། འཛམ་གླིང་གི་བྱམས་བརྩེའི་དབུ་ཁྲིད་ཅིག་ཡིན་པའི་ཆ་ནས་ས་སྟེང་འདིའི་མིའི་རིགས་ཀྱི་ཚོགས་སྡེ་གང་ཡང་རུང་བ་ཞིག་གིས་རང་གི་འགྲོ་བ་མིའི་ཐོབ་ཐང་དང་ཆོས་རིག་ཡུལ་གསུམ་སྲུང་སྐྱོབ་ཆེད་འཐབ་རྩོད་ཀྱི་ལས་འགུལ་ཡ་ང་ཞིང་སྐྱི་བ་གཡའ་བ་གང་ཡང་རུང་བ་ཞིག་སྤེལ་སྐབས་དེའི་གནོད་ཚབས་དང་ཕན་འབྲས་ལ་གཟིགས་པའི་ལམ་སྟོན་གནང་རྒྱུ་དེ་ནི་ཁོང་གི་ཐུགས་འགན་ཡང་ལོས་ཡིན། གཉིས་པ་དེ་ལ་བོད་མི་མེར་བསྲེགས་པ་རེ་རེའི་འཆི་ཁའི་འབོད་སྒྲའི་ཀློང་ན་རྒྱལ་བ་རིན་པོ་རེ་བོད་ལ་གདན་འདྲེན་ཞུ་དགོས་པའི་ཚིག་འདི་ཐེངས་གཅིག་ཀྱང་མ་ཆད་པར་ཡོད་པ་འདི་ནི་ཁོང་གིས་སྙན་གྱིས་གསན་ཅིང་ཐུགས་སུ་བསྣམས་ཡོད་པར་ཐེ་ཚོམ་ཕྲ་མོ་ཙམ་ཡང་མེད་པས། མི་གསོན་པོའི་ལུས་སྟེང་གི་ཤ་དང་རྒྱུས་པ་མེ་དམར་པོས་འཚིག་བཞིན་པའི་སྐབས་ཀྱི་འབོད་སྒྲ་འདི་ཚོའི་ཀློང་ན་བཞུགས་པའི་བྱམས་བརྩེའི་མངའ་བདག་ཁོང་གིས། ངའི་བརྩེ་བའི་མགོ་ནག་བོད་པ་ཚོ། ང་རང་བོད་ལ་བསླེབས་པའི་ཆེད་དུ་དམིགས་ནས་ཁྱེད་ཚོས་རང་ལུས་མེར་བསྲེགས་མ་གཏོང་རོགས། མེར་བསྲེགས་མ་ཡིན་པའི་འཐབ་རྩོད་ཀྱི་ལམ་ཁ་གཞན་ཞིག་འཚོལ་རོགས་ཞེས་བཀའ་སློབ་ལམ་སྟོན་ཚར་གཅིག་གནང་བ་ཡིན་ན། ཆོལ་ཁ་གསུམ་གྱི་ས་ཆེན་པོ་དེའི་སྟེང་དུ་ཁོང་གི་བཀའ་སློབ་ལ་མི་བརྩི་མཁན་གྱི་བོད་རིགས་རྣམ་དཔྱོད་དང་ལྡན་པ་སུ་གཅིག་ཀྱང་མེད་པས། ཉི་མ་དེ་ནས་བཟུང་སྟེ་ཆེས་འཇིགས་སུ་རུང་བའི་མེར་བསྲེགས་ལས་འགུལ་འདི་མཚམས་ཆད་པར་གྱུར་ཏེ། བོད་མི་ཚོས་བོད་དོན་འཐབ་རྩོད་ཀྱི་ལམ་ཁ་གཞན་ཞིག་ངེས་པར་དུ་འདེམ་སྲིད་ཅིང་། དེ་ནི་བོད་མིའི་རྩ་ཆེའི་ཚེ་སྲོག་མེ་ནང་དུ་འདེབ་དགོས་པ་ཞིག་མ་ཡིན་པར་གསོན་པོར་གནས་བཞིན་དུ་རང་གི་ཐོབ་ཐང་རྩོད་པའི་ལས་འགུལ་ཞིག་ཡིན། དེ་མ་གཏོགས་དགྲ་དམར་པོའི་གཞུང་གི་ངོས་ནས་བོད་མི་སྤྱི་དང་ཁྱད་པར་དུ་བོད་དོན་ཐད་རང་གི་ཚེ་སྲོག་འབུལ་ཐུབ་མཁན་གྱི་བོད་མི་བརྒྱ་སྟོང་ཁྲི་འབུམ་ག་ཚོད་ཅིག་ཤི་ན་ཡང་དེ་ནི་ཁོ་ཚོའི་ཕྱོགས་ཀྱི་འགྲོ་སོང་མདེའུ་རྐང་གཅིག་ཀྱང་གཏོང་མ་དགོས་པའི་རྒྱལ་ཁའི་འབྲས་བཟང་གཡུར་དུ་ཟ་བ་ཞིག་ཡིན་པས། ང་ཚོར་དེ་ཕྱོགས་ནས་ཚེ་སྲོག་གི་འགྲོ་སོང་མ་གཏོགས་སྐྱག་པ་སྐམ་པོ་ཞིག་ཀྱང་ཚུར་ནི་འཐོབ་རྒྱུ་ཡོད་པ་མ་རེད། བོད་མི་རེ་རེས་རང་གི་རྩ་ཆེ་བའི་ཚེ་སྲོག་དང་ལུས་པོ་གཉིས་མེ་དམར་པོའི་ཀློང་དུ་འབུལ་ཐེངས་རེ་རེར། པེ་ཅིན་ཀྲུང་ནན་ཧེ་རུ་དམར་པོའི་གཞུང་གི་དཔོན་རིགས་ཚོས་གསོལ་སྟོན་རྒྱ་ཆེན་པོ་རེ་བཤམས་ནས་དེ་རིང་ཡང་བོད་མི་ཁ་བྲལ་བ་ཞིག་ང་ཚོས་ལག་འགུལ་མ་དགོས་པར་རང་ཤི་བརྒྱབ་འདུག་ཟེར་བཞིན་དགའ་སྤྲོའི་ཐལ་སྒྲའི་ཀློང་ན་ཆང་དང་ཐ་མག་གིས་བཟི་བསྡད་ཡོད་ཀྱི་རེད། བོད་དོན་ལ་འབྲས་བུ་མེད་པ་འདི་ནི་ཕྱོགས་གཅིག་ནས་དགྲ་ཁ་གཏད་དེ་སྟོབས་ཆེ་དྲགས་པས་རེད་ལ། ཕྱོགས་གཅིག་ནས་ང་ཚོའི་ཆབ་སྲིད་ཀྱི་དབུ་ཁྲིད་ཚོས་བོད་མི་དམངས་ལ་འཐབ་རྩོད་ཀྱི་ལམ་ཁ་ཁྱད་དུ་འཕགས་པ་ཞིག་སྟོན་མ་ཐུབ་པས་ཀྱང་རེད། ལམ་དབུ་མ་དང་རང་བཙན་གཙང་མ་གཉིས་ནི་ཆབ་སྲིད་ཀྱི་ལྟ་བ་མི་འདྲ་བ་གཉིས་རེད་མ་གཏོགས་ཆབ་སྲིད་ཀྱི་འཐབ་རྩོད་བྱེད་སྟངས་ཤིག་མིན་ན་ཡང་། ང་ཚོའི་ཆབ་སྲིད་ཀྱི་དབུ་ཁྲིད་ཚོས་ཀྱང་ཆབ་སྲིད་ཀྱི་ལྟ་བ་གསལ་བསྒྲགས་བྱས་རྗེས་དེ་ལག་ལེན་དུ་འགེལ་ཕྱོགས་ཁ་གསལ་མ་བརྗོད་པར་མི་ལོ་ལྔ་བཅུ་བསྐྱལ་ཚར་བ་རེད་ལ། བོད་མི་ཕལ་མོ་ཆེ་ཞིག་གིས་ཆབ་སྲིད་ཀྱི་ལྟ་བ་དང་སྤྱོད་པ་གཉིས་མཉམ་དུ་བསྲེས་ནས་ཉི་མ་སྐྱེལ་ཐབས་བྱེད་བཞིན་པ་འདི་ནི་ངོ་མ་མི་རིགས་འདིའི་སྐྱོ་གར་ཆེན་པོ་ཞིག་རེད།

གོང་གསལ་རྩོམ་ཐུང་འདིས་མེ་བསྲེགས་ལས་འགུལ་འདི་མཚམས་མི་འཇོག་པའི་རྒྱུ་རྐྱེན་༧གོང་ས་མཆོག་ལ་འགེལ་གིན་མེད་པར་༧གོང་ས་མཆོག་གི་བཀའ་སློབ་ལམ་སྟོན་ཚིག་གཅིག་ནི་བོད་མིའི་ལུས་སྟེང་དུ་འབར་བའི་མེ་ལྕེ་འདི་དག་གཞིལ་ཐུབ་པའི་བདུད་རྩིའི་ཆར་རྒྱུན་བསིལ་མ་དེ་ཡིན་པ་ངོ་སྤྲོད་བྱས་པ་ཡིན་ནོ།། བོད་མི་ནི་ལུག་ཁྱུ་དང་༧གོང་ས་མཆོག་ནི་ལུག་རྫི། ཁོང་གི་བྱམས་བརྩེའི་བཀའ་སློབ་ནི་ལུག་རྫིའི་ཀི་སྒྲ་ཡིན།