ཉེ་ཆར་ཡུས་ཀྲིན་ཧྲན་ཁམས་དར་རྩེ་མདོ་བསླེབས་ཏེ། ཏཱ་ལའི་ཤོག་ཁག་ལ་ཁ་གཏད་གཅོག་དགོས་སྐོར་བསྒྲགས་འདུག
ཟླ་འདིའི་ཕྱི་ཚེས་ ༦ ཉིན་རྒྱ་གཞུང་དབུས་ཆབ་སྲིད་ལྷན་ཁང་གི་རྒྱུན་ལས་ཡུས་ཀྲིན་ཧྲན་དཀར་མཛེས་ས་ཁུལ་དར་རྩེ་མདོ་རྫོང་སློབ་འབྲིང་དང་། རྫོང་ཉེ་འཁོར་གྱི་སྡེ་གྲོང་ཁ་ཤས་ནང་ཕྱིན་ཏེ་གཞི་རིམ་གྲོང་སྡེ་ནང་ཏང་ཡཱོན་དཔུང་ཁག་དང་ཏང་གི་རྩ་འཛུགས་ཡར་རྒྱས་ཐད་ལྟ་སྐོར་བྱས་ཡོད་འདུག
དེ་རིང་ཕྱི་ཚེས་ ༨ ཉིན་རྒྱ་གཞུང་ཤིན་ཧྭ་གསར་ཁང་གིས་གནས་ཚུལ་སྤེལ་བའི་ནང་། ཡུས་ཀྲིན་ཧྲན་དཀར་མཛེས་ཁུལ་དུ་ཕྱིན་ཏེ་ས་གནས་ཁུལ་དང་རྫོང་གི་མགོ་ཁྲིད་ཚོ་དང་མཉམ་དུ་ཚོགས་འདུ་བསྐངས་ཏེ། བོད་ཁུལ་དུ་ཆུ་དང་གློག ལམ། བརྡ་འཕྲིན། རླུང་འཕྲིན་དང་བརྙན་འཕྲིན་བཅས་རྨང་གཞིའི་འཛུགས་སྐྲུན་ཁག་ལྔ་སྲ་བརྟན་གཏོང་དགོས་པ་དང་། བོད་རིགས་གཞོན་སྐྱེས་ཚོ་རྒྱའི་ནང་ལོག་དུ་ལས་ཞུགས་གོ་སྐབས་མང་དུ་སྤྲད་དེ། ཕྱོགས་ཡོངས་ནས་སྤྱི་ཚོགས་བདེ་འཇགས་ཐད་གྲུབ་འབྲས་ལེན་དགོས་པ་མ་ཟད། ཏང་གི་མི་དམངས་ཕྱུག་བསྒྱུར་གྱི་སྲིད་ཇུས་དང་ཁྲིམས་ལུགས་དྲིལ་སྒྲོག་བྱས་ཏེ། མུ་མཐུད་ནས་ཏཱ་ལའི་ཤོག་ཁག་ལ་འཐབ་རྩོད་ཀྱི་ནུས་ཤུགས་ཆེ་རུ་བཏང་སྟེ། སྤྱི་ཚོགས་ལ་ཆབ་སྲིད་ཁོར་ཡུག་ལེགས་པོ་སྐྲུན་དགོས་སྐོར་བརྗོད་ཡོད་འདུག
དེ་བཞིན། ཡུས་ཀྲིན་ཧྲན་གྱིས་ལྟ་སྐོར་སྐབས་ས་གནས་བོད་རྒྱུད་ནང་བསྟན་གྱི་བླ་གྲྭ་ཁག་ཅིག་ལ་ཚོགས་འདུ་བསྐངས་ཏེ། རྒྱལ་གཅེས་རིང་ལུགས་ཀྱི་སྲོལ་རྒྱུན་དར་སྤེལ་དང་། རྒྱ་ནག་མེས་རྒྱལ་གཅིག་གྱུར་སྟོབས་ལྡན་དུ་གྱུར་ཚེ། ད་གཟོད་བོད་ཁུལ་འཕེལ་རྒྱས་བརྟན་ལྷིང་ཡོང་ཐུབ་ལ། རིགས་སོ་སོའི་མང་ཚོགས་ཀྱི་འཚོ་བ་སྔར་བས་བདེ་སྐྱིད་ལྡན་པ། བོད་རྒྱུད་ནང་བསྟན་ལ་སྔར་བའི་འོད་སྟོང་འབར་བའི་མདུན་ལམ་སྐྲུན་ཐུབ་ཚུལ་བསྒྲགས་ཏེ། རྒྱ་གཞུང་གིས་དགོན་པར་དོ་དམ་བྱེད་པའི་སྲིད་ཇུས་ལ་གྲྭ་བཙུན་ཚོས་རྒྱབ་སྐོར་བྱེད་དགོས་པ་དང་། སྲིད་གཞུང་གིས་དགོན་པའི་དོ་དམ་ལ་ཤུགས་སྣོན་པ་དང་
དུས་མཉམ་དུ། དགོན་པར་གཞི་རིམ་མཐུན་རྐྱེན་སྦྱར་ཏེ་བོད་བརྒྱུད་ནང་བསྟན་དང་སྤྱི་ཚོགས་རིང་ལུགས་གཉིས་མཉམ་གནས་མཐུན་སྦྱོར་བྱ་དགོས་སྐོར་བརྗོད་ཡོད་པ་རེད།
དེ་སྔོན་ཡུས་ཀྲིན་ཧྲན་ནི་རྒྱ་ནག་ཧྲང་ཧེ་གྲོང་ཁྱེར་གྱི་དམར་ཤོག་དྲུང་ཆེ་ཡིན་ལ། དམར་ཤོག་ཚོགས་ཆེན་ ༡༨ ཐོག་རྒྱ་གཞུང་ཆབ་སྲིད་ལྷན་ཁང་གི་རྒྱུན་ལས་མི་བདུན་གྱི་གྲས་སུ་འདེམས་སྒྲིག་བྱས་ཡོད་ལ། འདི་ལོའི་ཕྱི་ཟླ་ ༣ རྒྱ་ནག་མི་དམངས་འཐུས་མིའི་ཚོགས་ཆེན་སྐབས། བོད་ཀྱི་ལས་དོན་དང་ཐད་ཀར་འབྲེལ་བ་ཆགས་ཡོད་པའི་རྒྱ་ནག་དབུས་སྲིད་གྲོས་ལྷན་ཚོགས་ཀྱི་མགོ་གཙོའི་འགན་འཁྱེར་རྒྱུ་ཡིན་པ་རེད།
དར་མདོོ་རྫོང་ནི་ཁམས་མི་ཉག་གི་ལྕགས་ལ་རྒྱལ་པོའི་རྒྱལ་ས་རེད།
བོད་རྒྱ་གཉིས་ཀྱི་ས་མཚམས་ཤིག་ལ་ཆགས་ཡོད།དུས་རབས་གཅིག་གི་གོང་ནས་ས་ཆ་དེར་བོད་དང་རྒྱའི་ཚོང་པ་སྟོང་ཕྲག་མང་པོ་མཉམ་འཛོམས་ཀྱིས་ཕན་ཚུན་ཚོང་རྒྱག་སའི་ས་ཆ་གཞི་རེད།སྐབས་དེ་དུས་ནས་རྒྱ་མི་ཇེ་མང་དུ་སོང་ནས་ད་ལྟ་བར་ཇེ་མང་ཇེ་མང་དུ་འགྲོ་བཞིན་ཡོད་པ་དང་ད་ཆར་བོད་པ་ལས་རྒྱ་མི་མང་བ་དང་བོད་སྐད་རྒྱག་མཁན་ལས་རྒྱ་སྐད་རྒྱག་མཁན་མང་བ་ཆགས་ཡོད།
མི་རྣམས་ཀྱི་འཚོ་བ་སྐྱེལ་སྟངས་དང་སྐད་ཆ་ཤོད་སྟངས་།ཆས་གོས་ལུགས་སྲོལ་ལ་བལྟས་ན་རྒྱའི་གྲོང་འཁྱེར་ཞིག་ཆགས་ཡོད་མོད།སྟབས་ལེགས་པ་ཞིག་ལ་ལོ་༡༠་ཙམ་རིང་ལ་རྫོང་དཔོན་བོད་རིགས་ཤིག་གིས་བོད་པའི་སྲོལ་རྒྱུན་གྱི་ཁང་པ་དང་ལྕགས་རི་ཟམ་པ་སོགས་མང་པོ་སྐྱར་གསོ་དང་གསར་བསྐྲུན་གནང་ཡོད་པས་ད་ཆར་བོད་ལུགས་ཀྱི་གྲོང་འཁྱེར་གཟི་བརྗིད་ལྡན་པ་ཞིག་ཏུ་གྱུར་ཡོད།་ཡིན་ན་ཡང་ཕྱི་ཚུལ་ཙམ་དུ་དེ་འདྲ་རེད།
་་་་་ ཡུས་ཀྲིན་ཧྲན་གྱིས་ལྟ་སྐོར་སྐབས་ས་གནས་བོད་རྒྱུད་ནང་བསྟན་གྱི་བླ་གྲྭ་ཁག་ཅིག་ལ་ཚོགས་འདུ་བསྐངས་ཏེ། རྒྱལ་གཅེས་རིང་ལུགས་ཀྱི་སྲོལ་རྒྱུན་དར་སྤེལ་དང་། རྒྱ་ནག་མེས་རྒྱལ་གཅིག་གྱུར་སྟོབས་ལྡན་དུ་གྱུར་ཚེ། ད་གཟོད་བོད་ཁུལ་འཕེལ་རྒྱས་བརྟན་ལྷིང་ཡོང་ཐུབ་ལ། ་་་་་ཟེར།