བོད་མི་མང་སྤྱི་འཐུས་ལྷན་ཚོགས་ཀྱིས་སྣེ་འཁྲིད་པའི་བོད་དོན་ཞུ་གཏུག་གི་ལས་འགུལ་སྡེ་ར་ལྡུན་དང་ཧི་མ་ཅལ་མངའ་སྡེ་ཁུལ་སིམ་ལ་བཅས་སུ་སྤེལ་ཡོད་འདུག
ཟླ་འདིའི་ཕྱི་ཚེས་ ༡ ཉིན་ནས་བཟུང་བོད་མི་མང་སྤྱི་འཐུས་ལྷན་ཚོགས་ཀྱིས་རྒྱ་གར་གྱི་ས་ཕྱོགས་གང་སར་བོད་དོན་ཞུ་གཏུག་གི་ལས་འགུལ་ཞིག་སྤེལ་གྱིན་པ་ལྟར། ཕྱི་ཚེས་ ༣ ཉིན་རྒྱ་གར་བྱང་ཕྱོགས་ཞུ་གཏུག་ལས་འགུལ་ཚོགས་ཆུང་གི་ཚོགས་མི་སྤྱི་འཐུས་ཟླ་བ་ཚེ་རིང་ལགས་དང་དགེ་བཤེས་སྐལ་བཟང་དགྲ་འདུལ། རྨོག་རུ་བསྟན་པ། གངས་ལྷ་མོ་བཅས་ཀྱིས་ཇཱ་མུ་ཀ་ཤི་མུར་མངའ་སྡེའི་ཞུ་གཏུག་ལས་འགུལ་མཇུག་སྒྲིལ་ཏེ། ཕྱི་ཚེས་ ༣ ཉིན་ཧི་མ་ཅལ་མངའ་སྡེའི་རྒྱལ་ས་སིམ་ལར་མངའ་སྡེའི་སྤྱི་ཁྱབ་བློན་ཆེན་རྒྱལ་སྲས་ཝིར་བྷ་རྡར་ སིངྒ་ (Virbhadra Singh) མཆོག་དང་། མངའ་སྡེའི་ཡོང་འབབ་ཁྲལ་བསྡུ་ལས་ཁུངས་ཀྱི་བློན་ཆེན་བཅས་གནད་ཡོད་མི་སྣར་ཐུག་འཕྲད་ཀྱིས་བོད་དོན་ཞུ་གཏུག་དང་དགེ་འདུན་ཁག་གསལ་བཤད་གནང་ཡོད་པ་མ་ཟད། ཕྱི་ཚེས་ ༤ ཉིན་གསར་འགོད་པ་ ༤༠ ལྷག་བསྡུ་སྐོང་གིས་རང་ལུས་མེར་བསྲེཊ་གཙོས་པའི་བོད་ནང་གི་ཛ་དྲག་གི་གནས་སྟངས་དང་། རང་བྱུང་ཁོར་ཡུག་གི་གནས་སྟངས་བཅས་ཀྱི་ཐོག་གསར་འགོད་གསལ་བསྒྲགས་དང་དྲི་བ་དྲི་ལན་གནང་ཡོད།
ཉིན་རྒྱབ་ཆུ་ཚོད་ ༤།༠༠ ཐོག་སིམ་ལ་ས་གནས་འགོ་འཛིན་ལས་ཁུངས་ཀྱིས་གོ་སྒྲིག་འོག་མར་མེ་ཁྲོམ་སྐོར་ཞིག་གོ་སྒྲིག་གནང་བ་དང་། སྐབས་དེར་ཧི་མ་ཅལ་མངའ་སྡེའི་གཙུག་ལག་སློབ་གཉེར་ཁང་གི་སློབ་དཔོན་ཆེན་མོ་བེ་ངྷེ་ཡ་ས་གྷར་ནེ་ཀཱེ་ལགས་ཀྱིས་རྒྱ་གར་དང་བོད་པའི་རིག་གཞུང་གི་འབྲེལ་བའི་སྐོར་ནས་གསུང་བཤད་དང་། སྤྱི་འཐུས་ཟླ་བ་ཚེ་རིང་ལགས་དང་བུ་མོ་བསྟན་འཛིན། དགེ་བཤེས་སྐལ་བཟང་དགྲ་འདུལ་བཅས་རིམ་པའི་བོད་སྐད་དང་ཧིན་རྡུའི་སྐད་ཡིག་ཐོག་གསུང་བཤད་གནང་ཡོད་འདུག་ལ། ཕྱི་ཚེས་ ༧ ཉིན་སྡེ་ར་ལྡུན་ཁུལ་དུ་རྒྱ་གར་གྱི་དཔོན་ རིགས་ཁག་ལ་མཇལ་འཕྲད་གནང་ཡོད་པ་མ་ཟད། རྒྱ་གར་ཡུལ་མི་དང་བོད་མི་ ༡༠༠༠ ལྷག་འདུ་འཛོམས་ཀྱིས་བོད་ནང་གི་བོད་མི་ཚོར་གདུང་སེམས་མཉམ་སྐྱེད་ཆེད་ཁ་ལ་རས་ནག་པོ་དཀྲིས་ཏེ་སྡེ་ར་ལྡུན་རྒྱལ་སར་ཞི་བའི་ཁྲོམ་སྐོར་ཞིག་ཀྱང་གོ་སྒྲིག་གནང་འདུག
གསར་འགོད་པ། དོན་གོ
