ཟླ་སྔོན་མའི་ནང་ཆོས་རྗེ་དོན་གྲུབ་རིན་ཆེན་གྱི་གསུང་འབུམ་པར་སྐྲུན་འགྲེམ་སྤེལ་དང་བོད་རིག་པའི་གཞུང་བརྒྱའི་བགྲོ་གླེང་ཚོགས་ཆེན་ཐེངས་གཉིས་པ་མཚོ་སྔོན་ཞིང་ཆེན་ཟི་ལིང་གྲོང་ཁྱེར་དུ་བསྡུས་ཡོད་འདུག་ལ། ཚོགས་འདུའི་ཐོག་ཕུའུ་བུན་ཁྲིན་དང་གཡང་མོ་རྒྱལ་སོགས་མཚོ་སྔོན་ཞིང་ཆེན་གྱི་རྒན་རབས་མགོ་ཁྲིད་པ་དང་། བོད་མདོ་དབུས་ཁམས་གསུམ་གྱི་དགོན་སྡེ་ཆེ་ཆུང་ཁག་གི་བླ་སྤྲུལ་དང་གྲྭ་བཙུན་གྱི་འཐུས་མི། མཚོ་སྔོན་དགེ་ཐོན་སློབ་ཆེན་དང་མཚོ་སྔོན་མི་རིགས་སློབ་ཆེན། མཚོ་སྔོན་སློབ་ཆེན་བོད་ལུགས་གསོ་རིག་སློབ་གླིང་། བོད་ལྗོངས་སློབ་གྲྭ་ཆེན་མོ་བཅས་ཀྱི་དགེ་སློབ་ཀྱི་འཐུས་མི་དང་གསར་འགོད་པ་བཅས་མི་ ༢༠༠ ཙམ་འདུ་འཛོམས་བྱུང་འདུག
ཐེངས་འདིའི་བགྲོ་གླེང་ཚོགས་འདུ་དེ་ནི། རྗེ་ཙོང་ཁ་བ་ཆེན་མོ་སྐུ་མྱ་ངན་ལས་འདས་པའི་རྗེས་དྲན་ཉིན་མོར་འཁེལ་བར་བྱས་ཏེ་ཚོགས་པ་ཞིག་ཡིན་འདུག་ལ། ཚོགས་འདུའི་ཐོག་བྱ་ཁྱུང་དགོན་པའི་སྐུ་ཕྱོགས་དགེ་བཤེས་ཀྱིས་མ་དངུལ་གྱི་མཐུན་འགྱུར་དང་། རྗེ་ཙོང་ཁ་བ་རིག་གནས་སྒྱུ་རྩལ་ཞིབ་འཇུག་ཚོགས་པས་འགན་ལེན་འོག་པར་བསྐྲུན་བྱས་པའི་ཡོངས་འཛིན་༼ ཆོས་རྗེ་དོན་གྲུབ་རིན་ཆེན་གྱི་གསུང་འབུམ༽པར་སྐྲུན་འགྲེམ་སྤེལ་བྱས་ཡོད་པ་མ་ཟད། སྲོང་བཙན་མི་རིགས་རིག་གནས་དར་སྤེལ་ཚད་ཡོད་ཀུང་ཟིས། བོད་ཀྱི་རིག་གནས་འཛིན་སྐྱོང་སྤེལ་གསུམ་ཐད་གཟེངས་སུ་ཐོན་པའི་མི་སྣ་མཁན་པོ་བསོད་ནམས་དར་རྒྱས་གཙོས་མི་སྒེར་ ༡༤ དང་། མཚོ་སྔོན་རྒྱང་སྒྲོག་བརྙན་འཕྲིན་ཁང་དང་མཚོ་སྔོན་སློབ་ཆེན་བོད་ལུགས་གསོ་རིག་སློབ་གླིང་བཅས་ལས་ཁུངས་ ༢ ལ་སྲོང་བཙན་རིག་པའི་བྱ་དགའ་གནང་ཡོད་འདུག
ཉིན་གཉིས་རིང་གི་བགྲོ་གླེང་ཐོག མཁན་པོ་བསོད་ནམས་དར་རྒྱས་ལགས་དང་ཀྲུང་གོའི་སྤྱི་ཚོགས་ཚན་རིག་གླིང་གི་འབུམ་རམས་པའི་མཛུབ་སྟོན་དགེ་རྒན་འཇམ་དཔལ་རྒྱ་མཚོ། མཚོ་སྔོན་དགེ་ཐོན་སློབ་ཆེན་གྱི་དགེ་རྒན་ཆེན་མོ་རྒྱ་ཡེ་བཀྲ་བྷོ་དང་ལྕགས་ཐར་རྒྱལ། བོད་ལྗོངས་སློབ་གྲྭ་ཆེན་མོའི་དགེ་རྒན་ཆེན་མོ་བློ་བཟང་བཅས་བོད་ཀྱི་རིག་གནས་ལས་དོན་ལ་འབད་བརྩོན་ལྷོད་མེད་གནང་བཞིན་པའི་བླ་ཆེན་མཁས་ཆེན་དག་གིས། ཕྱོགས་དང་ཟུར་མི་འདྲ་བ་ནས་བོད་ཀྱི་རིག་གནས་ཀྱི་ད་ལྟའི་གནས་བབ་དང་མ་འོངས་པའི་འཕེལ་རྒྱས་ཀྱི་ཁ་ཕྱོགས་ཐད་ནས་གྲོས་བསྡུར་ཟབ་མོ་བྱས་པར་མ་ཟད། དངོས་ཡོད་དང་མཐུན་པའི་དགོངས་འཆར་བཏོན་ཡོད་འདུག
སྲོང་བཙན་རིག་པའི་བྱ་དགའ་དེ་ནི། གཞུང་བརྒྱའི་བགྲོ་གླེང་དུས་དེབ་རྩོམ་སྒྲིག་ཁང་དང་སྲོང་བཙན་མི་རིགས་རིག་གནས་དར་སྤེལ་ཚད་ཡོད་ཀུང་ཟི་མཉམ་འབྲེལ་ཐོག་སྤྲོད་ཀྱིན་པའི་བྱ་དགའི་རིགས་ཤིག་ཡིན་འདུག་ལ། དམིགས་ཡུལ་གཙོ་བོ་བོད་ཀྱི་རིག་གནས་ཀྱི་འཛིན་སྐྱོང་སྤེལ་གསུམ་ཐད་བྱས་རྗེས་ཆེ་བའི་མི་སྣ་དང་ལས་ཁུངས་ཀྱི་བྱ་བཞག་ལ་ཁས་ལེན་དང་གོང་བཀུར། རིག་གནས་ཀྱི་འཕེལ་རྒྱས་ལ་སྐུལ་འདེད་གཏོང་ཆེད། ལོ་གསུམ་རེའི་བོད་རིག་པའི་གཞུང་བརྒྱའི་བགྲོ་གླེང་ཚོགས་ཆེན་སྟེང་སྤྲོད་ཀྱིན་པ་ཞིག་ཡིན་འདུག
