རྒྱ་གར་བྱང་ཤར་ཁུལ་གྱི་སྤྱི་འཐུས་ལས་འགུལ་ཚོགས་ཆུང་གིས་ནུབ་བྷེང་གྷལ་མངའ་སྡེ་བློན་ཆེན་གཙོས་གནད་ཡོད་མི་སྣར་ཐུག་འཕྲད་ཀྱིས་བོད་དོན་ཞུ་གཏུག་གི་ལས་འགུལ་ སྤེལ་ཡོད་འདུག
ཟླ་འདིའི་ཕྱི་ཚེས་ ༡ ཉིན་ནས་བཟུང་བོད་མི་མང་སྤྱི་འཐུས་ལྷན་ཚོགས་ཀྱིས་རྒྱ་གར་གྱི་མངའ་སྡེ་ཁག་ཏུ་བོད་དོན་ཞུ་གཏུག་གི་ལས་འགུལ་ཞིག་སྤེལ་བཞིན་པ་ལྟར། ཕྱི་ཚེས་ ༦ ཉིན་བྱང་ཤར་ཁུལ་གྱི་བོད་དོན་ཞུ་གཏུག་ལས་འགུལ་ཚོགས་ཆུང་གི་ཚོགས་མི་སྤྱི་འཐུས་པདྨ་འབྱུང་གནས་དང་སྤྱི་འཐུས་གསེར་རྟ་ཚུལ་ཁྲིམས། སྤྱི་འཐུས་ཟླ་སྒྲོན་ཤར་གླིང་། སྤྱི་འཐུས་དབྱངས་ཅན་སྒྲོལ་དཀར་བཅས་ནུབ་བྷེང་གྷལ་མངའ་སྡེའི་རྒྱལ་ས་ཀོལ་ཀ་ཏ་རུ་འབྱོར་ཏེ། མངའ་སྡེའི་སྲིད་སྐྱོང་སྐུ་ཞབས་ཨེམ་ཀེ་ནཱ་ར་ཡ་ནན་ (Shri M.K Narayanan) མཆོག་དང་མཇལ་འཕྲད་ཀྱིས་ཡིག་ངག་གཉིས་ཐོག་ནས་བོད་ནང་གི་ཛ་དྲག་གནས་སྟངས་ཐོག་རྒྱབ་སྐྱོར་ཡོང་བའི་འབོད་སྐུལ་ཞུས་པར། བློན་ཆེན་མཆོག་གིས་རྒྱ་གར་གྱི་བོད་དོན་རྒྱབ་སྐྱོར་དེ་རྒྱལ་ཁབ་གཞན་གྱི་རྒྱབ་སྐྱོར་དང་མི་འདྲ་བར་ཧ་ཅང་བརྟན་པོ་ཡིན་པ་དང། ཁོང་སྐུ་སྒེར་ལ་མཚོན་ནའང་བོད་པ་ཐོག་མ་བཙན་བྱོལ་དུ་འབྱོར་བའི་སྐབས་ནས་འབྲེལ་བ་ཆགས་བསྡད་པ་ཞིག་ཡིན་ཚུལ། ཁོང་གི་ངོས་ནས་བོད་དོན་ལ་རྒྱབ་སྐྱོར་ཡོད་པ་ལྟར། བོད་པ་ཚོའི་ངོས་ནས་བོད་དོན་ཐག་གཅོད་ཀྱི་ཐབས་ལམ་དེ་གོམ་པ་མདུན་སྤོས་ཐུབ་པ་ཞིག་དགོས་ཚུལ་སོགས་གསུངས་འདུག
དེ་བཞིན། མངའ་སྡེའི་གྲོས་ཚོགས་ཀྱི་ཚོགས་གཙོ་དང་རྒྱ་གར་དབུས་གཞུང་གི་གྲོང་ཁྱེར་ཡར་རྒྱས་བློན་ཆེན་ལྕམ་སྐུ་དྷི་པ་དྷ་སི་མོན་ཤི་ (Smt Deepa Das Munshi) ལགས ། རྒྱ་གར་དབུས་གཞུང་གི་གྲོས་ཚོགས་གོང་མའི་འཐུས་མི་དང། མངའ་སྡེའི་ཀོང་རེ་སི་ཚོགས་པའི་ཚོགས་གཙོ་གཅིག་ལྕོགས་སྐུ་ཞབས་པར་དིབ་བྷར་ཊ་ཅ་རི་ཡ་ (Pradip Bhattachariya) ལགས། ནུབ་བྷེང་གྷལ་མངའ་སྡེའི་འཆར་འགོད་བློན་ཆེན་སྐུ་ཞབས་རཅ་པཱལ་སིངྒ་ (Shri.Rachhpal Singh) ལགས། མངའ་སྡེ་དེའི་གྲོས་ཚོགས་འཐུས་མི་འབུམ་རམས་པ་ར་མེན་དྷ་ར་ནཱ་ཐཱ་བི་ཤི་ཝ་ཤ་ (Dr.Ramendranath Biswas) ལགས། ནུབ་བྷེང་གྷལ་མངའ་སྡེའི་གྲོས་ཚོགས་འཐུས་མི་སྐུ་ཞབས་ས་མ་རི་ཤ་དཱས་ (Samares Das) ལགས། སྐུ་ཞབས་ཨ་བྷོ་ནི་ཇོར་རྡར་(shri.Aboni Joardar) ལགས། སྐུ་ཞབས་སུག་བི་ལན་བར་མ་(shri.Sukhbilan Barma ལགས། མངའ་སྡེའི་གཞུང་འཛིན་རྒྱ་གར་རྒྱལ་ཡོངས་ཏྲི་མུལ་ཀོང་རེ་སི་ཚོགས་པའི་སྤྱི་ཁྱབ་ཚོགས་གཞོན་སྐུ་ཞབས་བྷ་ནི་སིངྒ་རོ་ཝེ་(shri.Bani Singh Roy) ལགས་བཅས་གནད་ཡོད་མི་སྣ་ཁག་གི་མདུན་དུ་ཆེད་བཅར་ཀྱིས་བོད་ནང་གི་ཛ་དྲག་གནས་སྟངས་ངོ་སྤྲོད་དང་། ཡིག་ངག་གཉིས་ཀྱི་ཐོག་བོད་དོན་རྒྱབ་འབོད་སྐུལ་ཞུས་ཡོད་འདུག་ལ། ཁོང་རྣམ་པའི་ངོས་ནས་ཀྱང་ད་ལྟའི་བར་བོད་དོན་ལ་རྒྱབ་སྐྱོར་ཡོད་པ་དང། མ་འོངས་པར་མུ་མཐུད་རྒྱབ་སྐྱོར་གནང་རྒྱུའི་ཞལ་བཞེས་གནང་ཡོད་འདུག
གསར་འགོད་པ། དོན་གོ
ད་རེས་བོད་མི་མང་སྤྱི་འཐུས་ལྷན་འཚོགས་ཀྱི་ལས་འགུལ་འདི་ནི་དུས་ལ་བབ་པ་དང་དོན་སྙིང་གིས་ཕྱུག་པ། གྲུབ་འབྲས་ལ་ཚོད་དཔག་མི་དམན་པ་བྱེད་ཆོག་པའི་བྱ་འགུལ་རྗེས་སུ་ཡི་རངས་བྱ་ཆོག་ཆོག་ཅིག་རེད།
མ་ཟད་ཕར་ཚུར་བསྐྱོད་ཐེངས་རེར་གཞུང་འགྲོན་ག་ཚོད་ཙམ་འགྲོ་ཀྱི་ཡོད་དམ། བདེན་པའི་མེ་ལྕེར་འགྲོ་མགྲོན་སྒོར་འབུམ་དྲུག་བཅུའི་གསལ་བསྒྲགས་བྱས་པ་ལྟར་ད་ཐེངས་ཀྱིས་ལས་འགུལ་དེ་ཚོར་ག་ཚོད་འགྲོ་མིན་བརྗོད་དཀའ།
དེ་ཚོ་ནི་ཞུ་གཏུགས་བྱ་མཁན་ཡིན་ཁུལ་བརྗོད་རུང་དོན་གནད་ཁ་གསལ་མེད་ལ། མི་དགོས་པའི་ཁོ་ཚོའི་དྲིལ་བསྒྲགས་ཆེད་དཔོན་རིགས་ཚོ་ཐུགས་འཕྲད་ནམ་བྱུང་སྐབས་ཀྱིས་འདྲ་དཔར་དེ་ཚོས་བོད་པའི་རྩ་དོན་ལ་ཕན་ཐོག་ཡོད་དམ།