གཟའ་ལྷག་པའི་ཉིན་བོད་མི་མང་སྤྱི་འཐུས་ལྷན་ཚོགས་ཆབ་སྲིད་སྡེ་ཚན་གྱི་སྤྱི་འཐུས་དགེ་བཤེས་རོང་བོ་བློ་བཟང་སྙན་གྲགས་དང་སྤྱི་འཐུས་སྒྲོལ་མ་ཚེ་རང་ལགས། སྤྱི་འཐུས་འབའ་པ་སྐལ་བཟང་རྒྱལ་མཚན་ལགས་གསུམ་ཧི་མ་ཅཱལ་མངའ་སྡེའི་དགུན་ཁའི་གྲོས་ཚོགས་འཚོགས་བཞིན་པའི་གོ་སྐབས་དང་བསྟུན་ཏེ། གསར་དུ་བདམས་ཐོན་བྱུང་བའི་ཧི་མ་ཅལ་མངའ་སྡེའི་སྤྱི་ཁྱབ་བློན་ཆེན་ཝིར་བྷ་ཌི་ར་སིང་ (Virbhadra Singh)མཆོག་ལ་འཚམས་འདྲིར་བཅར་ཡོད་འདུག
ཉིན་དེའི་ཉིན་རྒྱབ་ངྷ་རམ་ས་ལའི་རྫོང་དཔོན་ལས་ཁུངས་ཀྱི་དམིགས་བསལ་མཇལ་འཕྲད་ཁང་དུ་ཐུག་འཕྲད་ཞུས་ཏེ། བློན་ཆེན་མཆོག་དང་ཁོང་གི་ཚོགས་པར་འོས་བསྡུའི་ཁྲོད་རྒྱལ་ཁ་ཆེན་པོ་ཐོབ་པར་དགའ་བསུའི་བཀྲ་ཤིས་བདེ་ལེགས་དང་། མ་འོངས་པར་ཁོང་གི་དབུ་ཁྲིད་འོག་ཧི་མ་ཅལ་མངའ་སྡེ་འདི་ཉིད་ཡར་རྒྱས་ཡོང་བའི་སྨོན་འདུན་དང་། བློན་ཆེན་ཁོང་གིས་དུས་རྒྱུན་བོད་དོན་ཐོག་ཐུགས་འཁུར་རྒྱབ་སྐྱོར་གནང་བར་ཐུགས་རྗེ་ཆེ་ཞུས་པ་མ་ཟད། མ་འོངས་པར་མུ་མཐུད་མཐུན་འགྱུར་ཡོང་བའི་འབོད་སྐུལ་ཞུས་ཡོད་འདུག དེ་བཞིན་རྒྱ་གཞུང་གི་དྲག་རྩུབ་འོག་བོད་ནང་རང་ལུས་མེར་བསྲེགས་གཏོང་བཞིན་པར་མངའ་སྡེའི་གཞུང་དང་གྲོས་ཚོགས་ཀྱིས་རྒྱབ་སྐྱོར་ཡོང་བའི་འབོད་སྐུལ་ལ་བློན་ཆེན་མཆོག་གིས་ཞལ་བཞེས་གནང་ཡོད་འདུག
གསར་འགོད་པ། དོན་འགྲུབ་བཀྲ་ཤིས།
