བོད་དགོན་བཤད་སྒྲུབ་འདོད་རྒུ་འཁྱིལ་ཁྲིམས་མཐུན་མཚན་རྟཊ་བཀོད།

གཟའ་པ་སངས་ཉིན་༧གོང་ས་མཆོག་ཝ་ར་ཎ་སིའི་བོད་དགོན་བཤད་སྒྲུབ་འདོད་རྒུ་འཁྱིལ་དུ་ཆིབས་བསྒྱུར་བསྐྱངས་ཏེ། བོད་དགོན་དེ་ཉིད་ས་ཆ་དང་བཅས་བདག་ཐོབ་ཡོད་པའི་ཁྲིམས་མཐུན་མཚན་རྟགས་བཀོད་པ་དང་། ལྷ་ལྡན་ཆོ་འཕྲུལ་སྨོན་ལམ་ཆེན་མོའི་དགེ་རྩ་དབུ་འབྱེད་བཅས་གནང་ཡོད་འདུག

ཟླ་འདིའི་ཕྱི་ཚེས་ ༡༡ ཉིན་༧གོང་ས་མཆོག་ཝར་ཎ་བོད་དགོན་བཤད་སྒྲུབ་འདོད་རྒུལ་འཁྱིམ་དུ་ཆིབས་བསྒྱུར་བསྐྱངས་ཏེ། ཆོས་རིག་བཀའ་བློན་པདྨ་ཆོས་འབྱོར་དང་ནང་སྲིད་བཀའ་བློན་རྒྱ་རི་སྒྲོལ་མ་མཆོག དེ་བཞིན་ས་གནས་ཀྱི་འབྲེལ་ཡོད་དཔོན་རིགས་དང་ཁྲིམས་ཞིབ་པ་བཅས་ལྷན་བཞུགས་ཐོག བོད་དགོན་དེ་ཉིད་ས་ཆ་དང་བཅས་ཁྲིམས་མཐུན་བདག་དབང་ཡོད་པའི་མཚན་རྟགས་བསྐྱོན་ཡོད་འདུག
་པ་དེ་ནི་བོད་རང་བཙན་མ་ཤོར་གོང་གི་ཕྱི་ལོ་ ༡༩༥༥ ལོར་དགེ་སློང་ཐུབ་བསྟན་འབྱུང་གནས་མཆོག་གིས་གསར་བཞེངས་མཛད་པ་ཞིག་ཡིན་ཞིང་། ཕྱིས་སུ་ ༢༠༠༤ ལོར་༧གོང་ས་མཆོག་ལ་ཕུལ་ཡོད་འདུག ༢༠༠༦ ལོར་ཆོས་རིག་ལས་ཁུངས་བརྒྱུད་ལྷ་ལྡན་སྨོན་ལམ་ཆེན་མོའི་འཛིན་སྐྱོང་བསྟི་གནས་སུ་ཞུས་པ་ལྟར་གསོལ་བསྩལ་གནང་ཡོད་ཅིང་། ས་ཆའི་ཁྲིམས་མཐུན་བདག་ཐོབ་ཡོང་ཆེད་འབད་བརྩོན་ཡུན་རིང་བྱས་པ་བརྒྱུད། ད་རེབ་༧གོང་ས་མཆོག་གི་མཚན་ཐོག་ཏུ་ཁྲིམས་མཐུན་བདག་ཐོབ་དང་ལྷ་ལྡན་སྨོན་ལམ་ཆེན་མོའི་མིང་བསྒྱུར་མཚན་རྟགས་བཅས་བཀོད་ཡོད་འདུག

གོང་གསལ་གནས་ཚུལ་སྐོར་ཨ་རིག་དགེ་མཐོང་ལགས་ཀྱིས་གནས་ཚུལ་ཞིབ་ཕྲ་བཏང་འབྱོར་བྱུང་བའི་ནང་། དགོན་པ་འདི་ཉིད་ཡོངས་གྲགས་ལ་༼རྒན་མགོ་སེར་༽རམ་མཚན་གཞན་དུ་དགེ་སློང་ཐུབ་བསྟན་འབྱུང་གནས་མཆོག་གིས་སྐུ་ངལ་འཛེམ་མེད་ཀྱིས་ ༡༩༥༥ ལོར་ཕྱག་བཏབས་ཤིང་། ༡༩༥༦ ལོར་སངས་རྒྱས་སྐུ་མྱ་ངན་ལས་འདས་ནས་ལོ་ངོ་ ༢༥༠༠ འཁོར་བའི་དུས་དྲན་ཐོག རྒྱ་གར་གཞུང་གིས་གདན་ཞུ་གནང་བ་ལྟར་༧གོང་ས་མཆོག་དང་ཀུན་གཟིགས་པཎ་ཆེན་རིན་པོ་ཆེ་རྣམ་གཉིས་ཞབས་ཀྱིས་བཅགས་ཤིང་བྱིན་གྱིས་རླབས་ཡོད་འདུག ༢༠༠༤ ལོར་དགོན་བདག་ཉིད་ཀྱིས་ས་ཆ་དང་བཅས་པ་༸གོང་ས་མཆོག་ལ་ཕུལ་རྗེས་ཆོས་རིག་གིས་འགན་བཞེས་ཡོད་འདུག

ཕྱི་ལོ་ ༢༠༠༦ ལོར་ཆོས་རིག་བརྒྱུད་ལྷ་ལྡན་ཆོ་འཕྲུལ་སྨོན་ལམ་ཆེན་མོའི་འཛིན་སྐྱོང་བསྟི་གནས་སུ་གསོལ་རས་ཞུས་པ་ལྟར་གསོལ་བསྩལ་གནང་བ་རེད། དགོན་པ་འདི་ཉིད་ས་ཆ་དང་བཅས་པ་༸གོང་ས་མཆོག་གི་མཚན་ཐོག་ཏུ་འགྱུར་གལ་ལ་གཙོ་བོ་ནང་སྲིད་བཀའ་བློན་ལྕམ་སྐུ་རྒྱ་རི་སྒྲོལ་མ་མཆོག་དང་། ལ་དྭགས་པ་སྐུ་ཞབས་བློ་བཟང་མཐུ་སྟོབས་ལགས། ཁོང་གི་བུ་རྫོང་དཔོན་སྐུ་ཞབས་རིག་འཛིན་བསམ་འཕེལ་ལགས་སོགས་ཀྱི་ཐུགས་འཁུར་ཆེར་བཞེས་འོག་༸གོང་ས་མཆོག་གི་མཚན་ཐོག་ཏུ་ཁྲིམས་མཐུན་ལེགས་གྲུབ་དང་། ལྷ་ལྡན་ཆོ་འཕྲུལ་སྨོན་ལམ་ཆེན་མོའི་དགེ་རྩ་ཡང་ཁྲིམས་མཐུན་དེབ་སྐྱེལ་གནང་སྟེ། ད་རེབ་འདུ་ཁང་དབུ་འབྱེད་ཉིན་༸གོང་ས་མཆོག་དང་ས་གནས་རྒྱ་གར་ཁྲིམས་ཀྱི་དཔོན་པོ་ཚོས་མཚན་རྟགས་དངོས་སུ་བཀོད་རྒྱུའི་དུས་བཟང་ཤར།

་རིག་བཀའ་བློན་པདྨ་ཆོས་འབྱོར་མཆོག་ནས་བཀའ་སློབ་གསུངས་སྙིང་བསྡུས་གནང་བའི་ནང་དུ། ཆོས་རིག་ནས་རིས་མེད་ཀྱི་སྨོན་ལམ་འཚོགས་རྒྱུ་དང་། འཇང་དགུན་ཆོས། བགྲོ་གླེང་སོགས་འཚོགས་རྒྱུའི་མཛད་འཆར་ཡོད་ལ། དེ་ལ་དགོན་པ་འདིས་ཞབས་འདེགས་ཞུས་ན་ལེགས་པའི་སྐོར་གསུངས་སོང་། དེ་ནས་༸གོང་ས་མཆོག་གིས་བཀའ་སློབ་གནང་བ་དང་། རྒན་མགོ་སེར་དང་དགོན་པ་འདིའི་ཐོག་མར་གནས་སྟངས་དང་བཅས་པར་བཀའ་གནང་བ་མ་ཟད་རྒན་མགོ་སེར་ཐོག་པའི་རྒྱུ་མཚན། སྔོན་མ་ཡོངས་འཛིན་ཁྲི་བྱང་རིན་པོ་ཆེ་འདིར་ཕེབས་པའི་སྐོར། ད་ནི་དགོན་པ་འདི་ཞབས་བརྟན་སྒྲུབ་ས་གཅིག་བུ་མི་བྱེད་པར་རྒྱ་བོད་ཀྱི་གནས་སྟངས་སོགས་དེབ་གཟུགས་སུ་བཀོད་དེ་ངོ་སྤྲོད་བྱེད་ཐུབ་ན་དགེ་མཚན་འདུག་ཅེས་དང་། གཞན། མཚམས་མཚམས་སུ་དུས་ཚོད་གཏན་འཁེལ་གྱིས་ནང་ཆོས་ངོ་སྤྲོད་གནང་ཐུབ་ན་རབ་ཅེས་བཀའ་ སློབ་བསྩལ་གནང་བ་དང་།མཇུག་ཏུ་བྱང་རྩེ་ཆོས་རྗེ་མཆོག་ནས་ཐུགས་རྗེ་ཆེ་ཞུའི་གསུང་བཤད་གནང་རྗེས་མཛད་སྒོ་ཡོངས་སུ་གྲོལ་ཡོད་འདུག

ཨ་རིག་དགེ་མཐོང་ལགས་ཀྱིས་མུ་མཐུད་དུ་ལྷ་ལྡན་སྨོན་ལམ་ཆེན་མོའི་བྱུང་རབས་སྐོར་ངོ་སྤྲོད་གནང་དོན། ལྷ་ལྡན་ཆོ་འཕྲུལ་སྨོན་ལམ་ཆེན་མོ་ཞེས་ཡོངས་སུ་གྲགས་པ་འདི་ཉིད་སྔོན་སྟོན་པ་མཉམ་མེད་ཤཱཀྱའི་རྒྱལ་པོས་འཕགས་ཡུལ་དུ་གྲོང་ཁྱེར་ཆེན་པོ་དྲུག་ཏུ་གྲགས་པའི་གནང་ཚན་མཉན་ཡོད་དུ་ཕྱི་ལོའི་སྔོན་གྱི་ལོ་ ༥༡༡ ལོ་སྟེ་མི་འབྲུག་ཟླ་བ་ ༡ ཚེས་ ༡ ནས་ ༡༥ བར་མུ་སྟེགས་སྟོན་པ་དྲུག་འཁོར་དང་བཅས་པ་འཁོར་ཚོགས་རྒྱ་མཚོ་ལྟ་བུའི་དབུས་སུ་རྫུ་འཕྲུལ་གྱིས་ཚར་བཅད་དེ་སྐྱེ་འགྲོ་གྲངས་མེད་རྗེས་སུ་བཟུང་ཞིང་ཐར་པ་དང་ཐམས་ཅད་མཁྱེན་པའི་ས་ལ་འགོད་པར་མཛད་པའི་དུས་བཟང་དེ་ཉིད་དྲན་གསོ་ཞུ་སླད་འཕགས་ཡུལ་དུ་ཆོ་འཕྲུལ་མཆོད་པའི་དུས་སྟོན་ཆེན་མོ་བྱ་སྲོལ་ཡོད་པ་ལྟར། འཇམ་མགོན་བླ་མ་ཙོང་ཁ་པ་ཆེན་པོས་སྔོན་བྱོན་སྟོན་པའི་རྣམ་ཐར། རྗེས་འཇུག་གདུལ་བྱའི་ཉམས་ལེན་གྱི་སླད་དུ་ལྷ་སར་ཕྱི་ལོ་ ༡༤༠༩ ལོར་སྲོལ་བཏོད་མཛད་དེ། ལོ་ངོ་ ༦༠༠ ལྷག་གི་ལོ་རྒྱུས་ཀྱི་དོན་སྙིང་ལྡན་པ་གང་དག་སྤྱི་སྒོས་སྐྱེ་འགྲོའི་བསོད་ནམས་ཀྱི་བགོ་སྐལ་དུ་གངས་ལྗོངས་ལྷ་ལྡན་དུ་ ༡༩༥༩ ལོ་སྟེ་དུས་འགྱུར་མ་བྱུང་བར་རྒྱུན་འཛིན་ཐུབ་པ་ལྟ་བུ་བྱུང་།

དེའི་རྗེས་འཕགས་ཡུལ་དུའང་གདན་ས་ཁག་དང་བཞུགས་སྒར་སོ་སོར་ལྷ་ལྡན་ཆོ་འཕྲུལ་སྨོན་ལམ་ཆེན་མོ་མི་ཉམས་རྒྱུན་འཛིན་གནང་ཡོད་ཀྱང་། གནས་གཅིག་ཏུ་མཉམ་ཚོགས་ཐུབ་རེ་བྱེད་པའི་སྐབས་༸གོང་ས་མཆོག་ནས་འཆར་ལོ་དུས་ འཁོར་བཀའ་དང་དང་སྟབས་བསྟུན་ལྷ་ལྡན་ཆོ་འཕྲུལ་སྨོན་ལམ་ཆེན་མོ་མཉམ་ཚོགས་ཐུབ་དགེ་སོགས་ཀྱི་ལམ་སྟོན་བཀའ་དྲིན་ལ་བརྟེན། ཕྱི་ལོ་ ༢༠༠༡ དང་ ༢༠༠༢ ལོར་གནས་མཆོག་རྡོ་རྗེ་གདན་དུ་དུས་འཁོར་དབང་ཆེན་དང་བསྟུན་ཏེ། ལྷ་ལྡན་ཆོ་འཕྲུལ་སྨོན་ལམ་ཆེན་མོ་འཕར་མ་འཚོགས་པ་དང་། སྐབས་དེའི་ཆོས་རིག་བཀའ་བློན་ཐུབ་བསྟན་ལུང་རིགས་མཆོག་དབུ་བཞུགས་ཀྱིས་དུས་འཁོར་དབང་ཆེན་སྦྱིན་བདག་ཚང་འཛོམས་ནས་ཕྱི་ལོ་ ༢༠༠༡ ལོར་དུས་འཁོར་དབང་ཆེན་གྱི་ཞལ་འདེབས་ཧིན་སྒོར་འབུམ་ ༧༤ སྨོན་ལམ་གྱི་མ་རྩར་དམིགས་འཇོག་གནང་བ་སོགས་ལ་བརྟེན། ལྷ་ལྡན་ཆོ་འཕྲུལ་སྨོན་ལམ་ཆེན་མོའི་འཛིན་སྐྱོང་ཁང་གི་ཚོགས་གཙོ་དགའ་ལྡན་ཁྲི་རིན་པོ་ཆེ་མཆོག་དང་། ཚོགས་གཞོན་ཤར་བྱང་གི་ཆོས་རྗེ་རྣམ་གཉིས། ཚོགས་མི་གདན་ས་གསུམ་གྱི་གྲྭ་ཚང་དྲུག་གི་མཁན་རིན་པོ་ཆེ་རྣམས་དང་། རྒྱུན་ལས་གྲྭ་ཚང་དྲུག་གི་འཐུས་མི་རེ་བཅས་ལས་གྲུབ་པ་ཆེད་བཙུགས་ཞུས། ཞེས་བཀོད་འདུག

གསར་འགོད་པ། དོན་འགྲུབ་བཀྲ་ཤིས།