རྟ་ར་བ་བསྟན་འཛིན་ཆོས་ཉིད་སྐུ་གཤེཊ།

དེ་རིང་ཕྱི་ཚེས་ ༡༤ ཉིན་གྱི་སྔ་དྲོའི་ཆུ་ཚོད་ ༡༡།༡༣ སྟེང་། སྐུ་སྒེར་དྲུང་ཆེ་ཟུར་བ་རྟ་ར་བ་བསྟན་འཛིན་ཆོས་ཉིད་མཆོག་དགུང་ལོའི་བབ་དང་བར་ལམ་ནས་སྐུ་སྙུང་བཞེས་བཞིན་ཡོད་པ་བཅས་ལ་བརྟེན་ཏེ། ངྷ་རམ་ས་ལའི་ཉེ་འཁྲིས་ནོར་གླིང་དུ་སྐུ་གཤེགས་ཡོད་འདུག སྐུ་གཤེགས་དམ་པ་ཁོང་ད་ལོ་དགུང་གྲངས་ ༩༣ བཞེས་པའི་ཐོག་སྐུ་ཚེའི་འཕེན་པ་རྫོགས་ཡོད།

གནས་ཚུལ་དེ་བྱུང་མ་ཐག་དབུས་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་འདས་པོ་དམ་པའི་སྐུ་ཕུང་ལ་མཇད་དར་སྒྲོན་པར་ཕེབས་ཡོད་པ་དང་། དེ་རིང་ཉིན་རྒྱབ་གངས་སྐྱིད་ཁུལ་གྱི་ལས་ཁུངས་ཁག་སྒོ་བརྒྱབ་སྟེ། དམངས་གཙོའི་ཀ་བ་གསུམ་གྱི་མཛད་གཙོ་རྣམ་པས་དབུས་པའི་ལས་བྱེད་ཆེ་ཕྲ་ཡོངས་གངས་སྐྱིད་གསོལ་ཐབ་ཚོགས་ཁང་དུ་འཛོམས་ཏེ། སྐུ་གཤེགས་དམ་པར་སྨོན་ལམ་གསུང་འདོན་དང་མྱ་ངན་གུས་འདུད་ཞུ་བཞིན་ཡོད་པ་རེད།  

 རྟ་ར་བ་བསྟན་འཛིན་ཆོས་ཉིད་མཆོག་ནི་ཕྱི་ལོ་ ༡༩༢༠ ལོར་མྱང་སྟོད་རྒྱལ་རྩེ་རྫོང་ཁོངས་མཁར་ཁ་གཞིས་སུ་ཡབ་སྐལ་བཟང་ཆོས་འབྱོར་དང་ཡུམ་བདེ་སྐྱིད་མཚོ་མོ་གཉིས་ཀྱི་སྲས་སུ་སྐུ་འཁྲུངས་ཤིང་། སྔར་ལམ་ཡིག་རྩིས་རིག་ནས་སློབ་གཉེར་དང་། གཞུང་སྲོལ་ཕྱག་བྲིས་ཀྱི་ལས་དོན་སྤྱན་ལྟོས་མྱོང་གསོག་ལེགས་འགྲུབ་ཀྱིས་ཕྱི་ལོ་ ༡༩༢༠ ལོར་དགུང་གྲངས་ ༢༢ ཐོག་གཞུང་ཞབས་རྩེ་དྲུང་གི་གསར་མཇལ་ཞུས་ཏེ་ཐོག་མ་རྩྭ་གཉེར་དང་། རིམ་པར་ལྷ་བུ་གཞིས་སྡོད། བཀྲ་ཤིས་ལྷུན་ཛ་བླའི་ལས་བྱ། རྒྱ་ནག་དོན་གཅོད་ཐའི་མཁན་སྦྲེལ་པོའི་ལས་བྱ་རྩེ་མགྲོན། བོད་ལྗོངས་ཚོགས་འདུ་ཧྲག་བསྡུས་ནང་རྩེ་མགྲོན་གྱི་འཐུས་མིར་བདམས་ཐོན་ཚོགས་ཞུགས། མཁན་ཆུང་གི་མཚན་གནས་ཐོག་ནོར་གླིང་ནང་མ་ཁང་དུ་ཕྱག་བྲིས་ཞབས་ཞུའི་འགན་བཞེས།

རྒྱ་དཀར་ནག་གིས་མཚོན་ཕྱི་ནང་ཆིབས་སྒྱུར་གར་གནང་ལ་༸རྒྱལ་བའི་ཆིབས་ཞབས་ལྷན་བཅར་དང་། ལྷག་པར་ཕྱི་ལོ་ ༡༩༥༩ ལོར་ལྷ་སར་རྒྱ་མིས་ཟིང་བསླངས་དྲག་མནོན་སྐབས་སེར་སྐྱ་མང་ཚོགས་ཀྱིས། བསྟན་སྲུང་དང་བླང་སྒྲིག་འཛུགས་ཀྱི་ཇུས་འགོད་བཀའ་བཀོད་ཁང་གི་དབུ་འཁྲིད་ཁོངས་སུ་མང་མོས་འོས་འདེམས་ལྟར། ཕྱི་ནང་གསང་གསུམ་གྱིས་སྐུ་ཕྱྭའི་སྲུང་སྐྱོབ་དང་རྒྱ་གར་དུ་གདན་ཞུའི་ཐབས་སྐུལ་ཐུགས་བརྩོན་དང་། ཟིང་འཁྲུག་ནང་དགྲ་བོར་གདོང་གཏུགས་མེ་ལན་སློག་རྒྱུར་ཐུགས་འགྱོད་མེད་པ་གནང་མཐར་བཙན་བྱོལ་དུ་ཕེབས་ཏེ་སྐུ་ཚེ་མཐའ་འཁྱོངས་སྐུ་སྒེར་དྲུང་ཆེའི་ཐུགས་འགན་རྐང་བཞེས་ཡོད། དམ་པ་ཁོང་གིས་༧གོང་ས་མཆོག་བཀའ་སློབ་སྔ་ཕྱི་གླེགས་བམ་ཕྱོགས་བསྒྲིགས་དང་སྐུ་ཚེའི་ལོ་རྒྱུས་ཕྱག་དེབ་ཅིག་ཀྱང་བྲིས་གནང་མཛད་ཡོད་འདུག 

གསར་འགོད་པ། དོན་འགྲུབ་བཀྲ་ཤིས།