ཧུའུ་ཅིན་ཐའོ་ཡི་ཕ་ཡུལ་དུ་ཨ་རིའི་རྒྱལ་དར་འཕྱར་ཏེ་རྒྱ་གཞུང་ལ་ངོ་རྒོལ་བྱས་འདུག
ཕྱི་ཚེས་ ༡༣ ཉིན་དྲ་མིང་ལ་ཝང་ཆིན་ཧི་ཟེར་མཁན་ཞིག་གིས་ཞིན་ལཱང་ཝེ་པའོ་དྲ་བའི་སྟེང་། ད་ལྟའི་རྒྱ་དམར་རྒྱལ་ཁབ་ཀྱི་སྲིད་འཛིན་ཧུའུ་ཅིན་ཐའོ་ཡི་ཕ་ཡུལ་ཅང་སུའུ་ཐའེ་ཀྲིག་ཏུ། གྲོང་གསེབ་ཡུལ་མི་ཚོས་སོ་སོའི་ཁང་ཁྱིམ་གྱི་སྟེང་དུ་ཨ་རིའི་རྒྱལ་དར་འཕྱར་ཏེ། རྒྱ་གཞུང་གིས་མང་ཚོགས་ཀྱི་ཁང་ཁྱིམ་དང་ས་ཞིང་བཙན་འཕྲོག་གིས་གནས་སྤོར་བྱེད་ཀྱིན་པར་ངོ་རྒོལ་བྱས་ཡོད་པའི་གནས་ཚུལ་སྤེལ་ཡོད་པ་དང་། དེ་བཞིན། དྲ་མིང་ལ་ཐེན་པའོ་པའོ་ཟེར་མཁན་ཞིག་གིས་ཀྱང་ཝེ་པའོ་དྲ་བའི་སྟེང་། གནས་ཚུལ་དེའི་སྐོར་གྱི་པར་རིས་བཀྲམས་ཡོད་པ་རེད།
ཝང་ཆིན་ཧི་ཡིས་གནས་འཕྲིན་དྲ་བའི་སྟེང་སྤེལ་བའི་གནས་ཚུལ་ནང་། རྒྱ་ནག་ས་ཁུལ་སོ་སོའི་ནང་རྒྱ་གཞུང་གིས་བཙན་དབང་འོག་ཡུལ་མི་གནས་སྤོ་བྱེད་བཅུག་པར་བརྟེན། ཁྱིམ་ཚང་མང་པོ་གནས་ས་འཆག་ས་མེད་པའི་དཀའ་སྡུག་གནས་སྟངས་འོག་ལྷུང་ཡོད་པ་མ་ཟད། རྒྱ་ནག་གི་གཞི་རིམ་སྤྱི་ཚོགས་ཁྲོད་ཡིད་སྐྱོའི་དོན་རྐྱེན་སྣ་ཚོགས་སྔ་རྗེས་འབྱུང་བཞིན་ཡོད་དེ། མང་ཚོགས་ཀྱིས་གོང་རིམ་ལ་ཡིག་ངག་གཉིས་ཐོག་ནས་ཞུ་གཏུགས་དང་། རྒྱ་སྲང་དུ་མགོ་བོ་ས་ལ་བརྡབས་ཏེ་ཕྱག་འཚལ་ཞུ་འབུལ་བྱེད་པ། སོ་སོའི་ཁང་ཁྱིམ་གྱི་སྟེང་རྒྱ་དམར་རྒྱལ་དར་བཙུགས་པ་དང་ངོ་རྒོལ་འཕྲེད་དར་འཕྱར་བ། ཐ་ན། རང་ལུས་མེར་བསྲེགས་དང་ལྕེབས་ཤི་རྒྱག་པ། རྡོ་སྣུམ་འཐུང་སྟེ་རང་ཤི་རྒྱག་པ། འགལ་རྫས་གཏོར་ཏེ་མི་ཁྱིམ་གཉིས་ཀ་ཤུལ་མེད་བཟོ་བ། རྒྱ་གཞུང་གི་དཔོན་རིགས་ཚོར་ཆེད་དུ་དགྲ་ཤ་ལེན་པ་སོགས་རྣམ་པ་འདྲ་མིན་གྱི་ངོ་རྒོལ་རིམ་པར་བྱུང་ཡོད་ཀྱང་། རྒྱ་གཞུང་གིས་སྣང་མེད་དུ་གཡུགས་ཏེ་མུ་མཐུད་བཙན་གནོན་བྱས་པར་བརྟེན། ཉེ་ཆར་རྒྱ་གཞུང་སྲིད་འཛིན་ཧུའུ་ཡི་ཕ་ཡུལ་ཅཱང་སུའུ་ཐའེ་ཀྲིག་ཏུ་ས་གནས་ཡུལ་མིས་སོ་སོའི་ཁང་ཁྱིམ་ཡང་སྟེང་དུ་ཨ་རིའི་རྒྱལ་དར་འཕྱར་ཏེ་རྒྱ་གཞུང་ལ་ངོ་རྒོལ་བྱས་ཡོད་ལ། དེ་ནི་རྒྱ་གཞུང་གི་དབང་སྒྱུར་འོག་མི་དམངས་མང་ཚོགས་ལ་བདེ་ཐབས་ཀྱི་ལམ་ཁ་གང་ལྷག་མེད་སྟབས། ཨ་རིའི་རྒྱལ་དར་འཕྱར་ཏེ་ཨ་རིར་སྐྱབས་འཇུག་ཡིད་རྟོན་མི་ཞུ་ཐུ་མེད་ཆགས་པ་མཚོན་ཚུལ་བརྗོད་ཡོད་པ་རེད།
ཨ་རིའི་རྒྱལ་དར་འཕྱར་དེ་རྒྱ་གཞུང་ལ་ངོ་རྒོལ་བྱས་པའི་གནས་ཚུལ་དེ་བྱུང་རྗེས། དྲ་དམངས་ཀྱིས་བརྒྱུད་འགོད་བྱས་ཏེ་དུས་ཐུང་ནང་གནས་འཕྲིན་དྲ་རྒྱའི་སྟེང་དོ་སྣང་དང་གླེང་སློང་ཤུགས་ཆེན་པོ་བསླེབས་ཡོད་ལ། དྲ་གྲོགས་ཤིག་གིས་ ཝེ་པའོ་གནས་འཕྲིན་དྲ་བའི་སྟེང་ “གལ་སྲིད་ང་རང་རྒྱལ་ཁབ་ཀྱི་མགོ་ཁྲིད་ཅིག་ཡིན་ཚེ་སེམས་པ་ཧ་ཅང་སྐྱོ་ངེས་རེད། རྒྱ་ནག་མི་དམངས་ཀྱིས་སོ་སོའི་ལུང་པར་སྐྱིད་སྡུག་ཞུ་ས་མ་རྙེད་པར་ཐབས་ཟད་འུ་ཐུག་གི་གནས་སུ་གྱར་ཏེ། ཨ་རིའི་རྒྱལ་ཁབ་ཀྱིས་སོ་སོར་དྲང་བདེན་དཔུང་རོགས་ཡོང་བའི་ཞུ་འབུལ་གནང་བཞིན་པ་འདིས། མང་ཚོགས་ཀྱི་སེམས་ནང་གི་རེ་བ་རྒྱག་ས་དང་སྐྱབས་འཇུག་ཞུ་ཡུལ་ནི་ཨ་རི་ཆགས་ཡོད་པ་མངོན་ཡོད།” ཅེས་བརྗོད་འདུག
གསར་འགོད་པ། ཚེ་རིང་རྒྱལ།
