གཞུང་འབྲེལ་མཆོད་འབུལ།

ཀྱེ་མ་ཕྱོགས་བཅུའི་རྒྱལ་དང་དེ་སྲས་ཚོགས ། ། 
ཁྱད་པར་གངས་རིའི་མགོན་པོ་པད་དཀར་འཆང་། ། 
བཀའ་དྲིན་མཚུངས་མེད་ཨོ་རྒྱན་སྤྲུལ་བའི་སྐུ ། ། 
བདག་ཅག་ཆོས་ལྡན་སྐྱེ་བོའི་གདུང་འབོད་གསོན ། ། 

འདི་ན་སྤྱི་མཐུན་དཀར་མིན་ལས་དབང་དང་། ། 
ནག་ཕྱོགས་སྨོན་ལམ་ལོག་པའི་སྦྱོར་བ་ཡིས ། ། 
དམྱལ་བའི་འཇིག་རྟེན་དངོས་སུ་བསྟར་འདྲ་བའི ། ། 
བཟོད་མེད་དུཿཁའི་གླིང་ཕྲན་གཟིགས་ལགས་སམ ། ། 

རྩ་ཆེན་གཏེར་དང་ཤིང་ནགས་ངོམས་མེད་དྲངས ། ། 
དྲིན་ཆེན་ཕྱུགས་དང་རི་དྭགས་ཚད་མེད་བསད ། ། 
རིན་ཆེན་ལུས་དང་ལོངས་སྤྱོད་བརྩེ་མེད་བཅོམ ། ། 
གལ་ཆེན་ཆོས་དང་རིག་གཞུང་རྩིས་མེད་བརླགས ། ། 

རང་གི་རྩ་བའི་བླ་མར་མཇལ་དབང་མེད ། ། 
ཕྱག་ན་པད་མོར་གསོལ་བ་འདེབས་དབང་མེད ། ། 
སྐུ་བརྙན་དད་པའི་རྟེན་ལ་འཆང་དབང་མེད ། ། 
མདོར་ན་བོད་ལ་ཆོས་དད་རང་དབང་མེད ། ། 

སྔོན་བྱོན་བཙན་པོའི་རྒྱལ་རབས་གླེང་དབང་མེད ། ། 
མ་འོངས་འཚོ་བའི་ཐབས་ལམ་བཤད་དབང་མེད ། ། 
ད་ལྟའི་བདེན་པའི་སྡུག་ཡུས་བརྗོད་དབང་མེད ། ། 
མདོར་ན་བོད་ལ་སྨྲ་བརྗོད་རང་དབང་མེད ། ། 

སྡེ་དང་ཚོ་བའི་བར་ལ་འགྲོ་དབང་མེད ། ། 
སྲིད་དང་ཆོས་གཉིས་མ་བསྲེས་འདུག་དབང་མེད ། ། 
གནས་མཇལ་ཡུལ་སྐོར་ཕྱོགས་སུ་སྐྱོད་དབང་མེད ། ། 
མདོར་ན་བོད་ལ་འགྲོ་སྡོད་རང་དབང་མེད ། ། 

བདག་མེད་གནས་ལུགས་སྒོམ་པའི་བྱ་བཏང་བཟུང་། ། 
འཚེ་མེད་ཆོས་ལ་སྤྱོད་པའི་གྲྭ་བཙུན་བཀྲོངས ། ། 
ཉེས་མེད་རང་ཁ་གསོ་བའི་ཁྱིམ་པ་བསད ། ། 
དོན་མེད་བོད་ཡུལ་མི་ཡི་བཤས་རར་བསྒྱུར ། ། 

བསིལ་ལྡན་གངས་རིའི་ལྗོངས་ཆེན་འཇིག་ལ་ཐུག ། 
ཆོས་ལྡན་བོད་ཀྱི་མི་རྒྱུད་ཆད་ལ་ཉེ ། ། 
བྱམས་ལྡན་ཁ་བའི་ལེའུ་རྫོགས་ལ་མྱུར ། ། 
བརྩེ་ལྡན་ལྷ་དང་སྲུང་མས་གཟིགས་ལ་རན ། ། 

སྔོན་ཚེ་ཐུབ་པའི་དབང་བོས་ཡང་དང་ཡང་། ། 
ལུང་གིས་བསྔགས་པར་མཛད་པ་ཅི་བཞིན་དུ ། ། 
ཆོས་རྒྱལ་མེས་དབོན་སྤྲུལ་བའི་ལོ་པཎ་ཚོས ། ། 
བསྟན་པ་ཡོངས་རྫོགས་བོད་དུ་བཞད་པར་བྱས ། ། 

དེས་ན་སངས་རྒྱས་བསྟན་པའི་སྲོག་མཁར་དང་། ། 
འགྲོ་དྲུག་ཕན་དང་བདེ་བའི་རྩ་ལག་བཅས ། ། 
བོད་ཁམས་གནས་དང་འཇིག་ལ་ཆེར་རག་པས ། ། 
གངས་ལྗོངས་སྣོད་བཅུད་ཀུན་ནས་སྐྱོབས་པར་རེམ ། ། 

དེང་འདིར་གཞན་ཕན་ཁོ་ནའི་སྙིང་སྟོབས་ཀྱིས ། ། 
ལུས་སྲོག་ཡལ་བར་འདོར་མཛད་དཔའ་བོའི་དཔུང་། ། 
མེ་མཚོན་འཇིགས་པའི་ཁྲིམས་ལ་མི་འཛེམས་པར ། ། 
འཚེ་མེད་ཞི་བའི་རུ་འཕྲེང་བར་མེད་བསྒྲིགས ། ། 

གཞན་གནོད་བསམ་པས་ཀུན་ནས་མ་བསླངས་ཤིང་། ། 
དྲག་པོའི་མཚོན་ཆ་ཕྱག་དུ་མི་འཛིན་པའི ། ། 
བྱང་སེམས་མར་དཀར་སྤུང་བའི་རི་བོ་དག ། 
གདུག་པའི་མུན་ནག་སེལ་བའི་གཉེན་པོར་སྒྲོན ། །

བདེན་པ་མཆོག་གསུམ་ལྷ་ལ་བདར་བ་དང་། ། 
གནས་ལུགས་མི་ཡི་འགྲོ་བར་བགྲང་སླད་དུ ། ། 
གཅེས་པའི་རང་ལུས་མེ་རུ་སྦར་བའི་མདངས ། ། 
མཁའ་ལ་འཚམས་སྤྲིན་ཟོལ་གྱིས་བརྟན་པོར་ཆགས ། ། 

ཤེས་བྲལ་གནམ་གྱི་རྒྱལ་མོས་མ་བཟོད་པར ། ། 
སྤྱན་ཆབ་ཁ་ཆར་དུས་སུ་འཇོ་བྱས་ནས ། ། 
དཔའ་བོའི་ལུས་མེ་གསོད་པའི་ཐབས་འབད་ན ། ། 
སེམས་དང་ལྡན་པ་སུ་ཞིག་ཅི་མི་སྙམ ། ། 

གསོང་པོར་སྨྲ་དང་གཟུ་བོར་གནས་སོ་ཞེས ། ། 
ཁེངས་པ་སྲིད་ན་མཐོ་བའི་སྐྱེ་བོ་དག ། 
བདེན་དོན་མངོན་སུམ་འཆར་བའི་མེ་ལོང་ལ ། ། 
གཟིགས་ན་ཁས་སུ་འཆེ་བ་རྗེད་མ་བགྱི ། ། 

རང་ལུས་ནད་ཀྱིས་གདུང་བ་བཅོས་སླད་དུ ། ། 
འཚོ་བྱེད་མེ་བཙའི་དཔྱད་ཙམ་མི་བཟོད་པར ། ། 
གཡས་འཇུ་གཡོན་བསྐྱོར་ཨམ་གཙིགས་བསྡམས་པ་དང་། ། 
མིག་བཙུམས་སྐད་ངན་ཤོར་སོགས་མྱོང་བས་གྲུབ། ། 

དེ་ལྟ་བས་ན་སྡར་མ་བདག་འདྲ་དང་། ། 
བསྟན་འགྲོའི་སླད་དུ་རང་ལུས་མེ་སྦྱིན་ལ ། ། 
དགྱེས་བཞིན་ཕུལ་བའི་དཔའ་བོ་དཔའ་མོ་ཚོའི ། ། 
བར་ཐག་གནམ་ས་ལས་ཀྱང་ཆེས་ཆེར་རིང་། ། 

སྟོབས་ལྡན་སྟག་དང་འབྲུག་གིས་རྩལ་འགྲན་ནས ། ། 
འཛམ་གླིང་ཤར་ནུབ་སྐྱོམ་པའི་དུས་ཀྱི་ཚེ ། ། 
གངས་སེང་གཡུ་ཡི་རལ་བ་བསིག་རན་ཞེས ། ། 
ཚད་མའི་གཏེར་ལུང་དེང་འདིར་ཤིན་ཏུ་གཙིགས ། ། 

མཐར་༧གོང་ས་རྒྱལ་བའི་དབང་པོའི་སྐུ་ཚེ་བསྐལ་བརྒྱར་བརྟན་ཞིང་ཐུགས་ཀྱི་བཞེད་དོན་ཐམས་ཅད་གེགས་མེད་ཡིད་བཞིན་དུ་འགྲུབ་པའི་སྨོན་འདུན་གྲངས་མེད་ཞུ་རྒྱུ་དང་།སྐུ་སྒེར་དགའ་ལྡན་ཕོ་བྲང་གི་མཛད་ཞབས་པ་རྣམ་པ། སྲིད་སྐྱོང་མཁས་དབང་བློ་བཟང་སེང་གེ་མཆོག་གི་དབུས་དཔལ་ལྡན་རང་གཞུང་གི་དམངས་གཙོའི་ཀ་བ་གསུམ་གྱི་དབུ་ཁྲིད་དང་ལས་སྣེ་བ་ཡོངས །གཞུང་འབྲེལ་མ་ཡིན་པའི་བོད་དོན་འཐབ་རྩོད་ལ་འབད་མཁན་ཚོགས་པ་ཁག་དང་སྒེར་བ་དག  སྒར་དང་དགོན་སྡེ་སོ་སོའི་གྲྭ་བཙུན་སྔགས་གསུམ། འཛམ་གླིང་ཡུལ་གྲུ་སོ་སོའི་བོད་དོན་རྒྱབ་སྐྱོར་བ་རྣམ་པ།ཁྱད་པར་དུ་ལུས་སྲོག་ལོངས་སྤྱོད་སོགས་ཉེན་ཁར་ཐུག་ཡོད་པའི་གཞིས་ལུས་སྤུན་ཟླ་ཕུ་ནུ་མིང་སྲིང་ཡོངས་བཅས་ལ། བོད་མིའི་ཆེས་ཚད་མཐོ་ཞིང་གཟི་བརྗིད་ལྡན་པའི་རང་་དབང་འཐབ་རྩོད་ཀྱི་དགེ་མཚན་དང་།སྤུན་ཟླ༨༣ གྱིས་རང་སྲོག་བློས་བཏང་ལ་གདུང་སེམས་སོགས་ཁུར་ཆེན་དཀར་ནག་གཉིས་ཁྱེར་བའི༢༠༡༢ ལོ་ཕར་བསྐྱལ་ནས་ཕུགས་འདུན་དང་སྤོབས་པ་བརྩེགས་པའི༢༠༡༣ལོ་འདི་ལ་བསམ་དོན་མཐའ་དག་ལྷུན་གྱིས་གྲུབ་པ་དང་བོད་དོན་བདེན་མཐའ་མྱུར་དུ་གསལ་བའི་སྨོན་འདུན་གྲངས་མེད་ཞུ་ཞུ།ལྷ་རྒྱལ་ལོ།བོད་རྒྱལ་ལོ།།