གཟའ་མིག་དམར་ཉིན་སེ་རི་ཡའི་སློབ་ཆེན་ཞིག་གི་ནང་འབར་རྫས་གཏོར་ཏེ་མི་ ༨༠ ལྷག་རྐྱེན་ལམ་བཏང་ཡོད་ཀྱང་། དོན་རྐྱེན་དེའི་རྒྱབ་ཏུ་སུ་ཡོད་མེད་རྩོད་རྙོག་ཅིག་ཆགས་ཡོད་འདུག
ཕྱི་ཚེས་ ༡༥ ཉིན་སེ་རི་ཡའི་ཨ་ལེ་པོ་(Aleppo) གྲོང་ཁྱེར་གྱི་གཙུག་ལག་སློབ་གྲྭ་ཆེན་མོའི་ནང་སྔ་རྗེས་སུ་འབར་རྫས་ཐེངས་གཉིས་འགད་གཏོར་བྱུང་སྟེ། མི་ ༨༠ ལྷག་རྐྱེན་ལམ་དུ་བཏང་ཡོད་ཅིང་མི་ ༡༥༠ ལྷག་ལ་རྨས་སྐྱོན་ཚབས་ཆེན་བཟོས་ཡོད་པ་དང་། འབར་རྫས་འགད་གཏོར་ནི་ཏག་ཏག་སློབ་ཆེན་གྱི་ལོ་ཕྱེད་ཡིག་རྒྱུགས་མགོ་འཛུགས་ཀྱི་ཉིན་དང་པོར་འཁེལ་ཡོད་སྟབས། ཐེངས་འདིར་རྐྱེན་འདས་དང་རྨས་སྐྱོན་ཕོག་མཁན་ཕལ་ཆེ་བ་སློབ་ཕྲུག་དང་། ཟིང་འཁྲུག་གི་རྐྱེན་པས་སློབ་ཆེན་ནང་གནས་གཡོལ་བྱེད་སྡོད་མཁན་རིགས་ཡིན་འདུག
དོན་རྐྱེན་དེ་བྱུང་རྗེས་སེ་རི་ཡའི་གཞུང་འབྲེལ་གསར་ཁང་གིས་དོན་རྐྱེན་དེ་གྱེན་ལངས་ཤོག་ཁག་གིས་བསྒྲུབས་ཡོད་ཚུལ་དང་། གྱེན་ལངས་ཤོག་གིས་གཞུང་ལ་ངོ་རྒོལ་དང་མི་མང་ལ་ཁོང་ཁྲོང་སློང་ཆེད། སློབ་ཆེན་ནང་སྒྱོགས་མདེལ་ཐེངས་གཉིས་བརྒྱབ་སྟེ་དོན་རྐྱེན་དེ་བཟོས་ཡོད་པའི་སྐྱོན་བརྗོད་བྱེད་ཀྱི་ཡོད་ཀྱང་། གྱེན་ལངས་ཤོག་ཁག་གིས་དེ་ནི་གཞུང་གིས་བསྒྲུབས་ཡོད་པར་སྐྱོན་འཛུགས་བྱེད་ཀྱི་ཡོད་འདུག
དོན་རྐྱེན་དེའི་ཐད་དབྱིན་ཡུལ་དུ་རྟེན་གཞི་བྱས་པའི་སེ་རི་ཡའི་འགྲོ་བ་མིའི་ཐོབ་ཐང་ལྟ་ཞིབ་ཚོགས་པས་བརྗོད་པ་ལྟར་ན། ཐེངས་འདིའི་དོན་རྐྱེན་ཁྲོད་མི་ ༨༣ དམར་གསོད་ཐེབས་ཡོད་པ་ཙམ་ལས། དོན་རྐྱེན་དེ་གཞུང་དང་གྱེན་ལངས་ཤོག་ཁག་གང་གིས་བསྒྲུབས་ཡོད་མེད་ཤེས་རྟོགས་བྱ་དཀའ་ཚུལ་དང་། དེ་ནི་སེ་རི་ཡའི་ནང་ཕྱི་ཕྱོགས་ཀྱི་གསར་འགོད་པ་ཡོང་འཇུག་གི་མེད་སྟབས། ཤོག་ཁག་སོ་སོས་ཕན་ཚུན་སྐྱོན་འཛུགས་རེས་བྱེད་ཀྱིན་པ་ལས་དོན་དངོས་ཤེས་རྟོགས་བྱ་རྒྱུ་ཁག་ཆགས་ཡོད་འདུག
སེ་རི་ཡའི་ཟིང་འཁྲུང་ ༢༠༡༡ ཕྱི་ཟླ་ ༣ ནང་བྱུང་ཡོད་པ་དང་། མཉམ་འབྲེལ་རྒྱལ་ཚོགས་ཀྱིས་གནས་ཚུལ་སྤེལ་པ་ལྟར་ན་འདས་པའི་ཟིང་འཁྲུག་ཁྲོད་མི་ ༦༠༠༠༠ ལྷག་རྐྱེན་ལམ་དུ་ཤོར་ཡོད་འདུག
གསར་འགོད་པ། བནྡེ་སྐྱབས།
