བོད་
ཁ་ཉིན་ང་གངས་སྐྱིད་དུ་སྐྱོད་སྐབས་སྐུ་སྒེར་དྲུང་ཆེ་ཟུར་པ་རྟ་ར་བ་མཆོག་སྐུ་གཤེགས་པའི་གནས་ཚུལ་དེ་ཐོས་བྱུང་། བོད་མིའི་སྒྲིག་འཛུགས་ཀྱི་ལས་བྱེད་འགའ་ཡང་ཡར་རྒྱུག་མར་རྒྱུག་གིས་ཁོང་གི་ལོ་རྒྱུས་འཚོལ་བཞིན་འདུག ངས་ཀྱང་དེ་མ་ཐག་དུས་བབ་ཀློག་པ་པོ་ཚོར་སྙན་གསེང་ཞུ་ཆེད་གསར་འགྱུར་འབྲི་བར་སྟ་གོན་བྱས་པ་ཡིན། ཡར་སྔོག་མར་སྔོག་ཇི་ལྟར་བྱས་ཀྱང་ང་ལ་གསར་འགྱུར་འཐུས་སྒོ་ཚང་བ་ཞིག་རག་མ་སོང་། གྷོ་གྷིལ་དཀོན་མཆོག་ཡིན་(Google is God)ཟེར་བ་བཞིན། ངས་དཀོན་མཆོག་བཞི་བ་དེ་ལ་སྐྱབས་སུ་མཆི་བ་ཡིན། མ་མཐར་ཡང་རྟ་ར་བ་མཆོག་གི་སྐུ་པར་ཞིག་གི་དངོས་གྲུབ་འཐོབ་རེ་བྱས་པ་ཡིན། བོད་རྒྱ་དབྱིན་གསུམ་ཁ་གཅིག་གྲག་ཐོག་གྷོ་གྷིལ་གྱིས་ཀྱང་མི་འདི་འདྲ་ཞིག་ངོ་མི་ཤེས་ཟེར། བོད་པའི་སྤྱི་ཚོགས་འདི་ད་དུང་བརྡ་འཕྲིན་བརྒྱུད་ལམ་ཁྲོམ་རྭའི་ལྟག་རྒྱབ་ན་ལྷག་འདུག འཛམ་གླིང་གི་གསར་འགོད་པ་ཚོས་ཀྱང་བོད་པའི་སྤྱི་ཚོགས་འདི་རྩ་བ་ནས་རྙེད་མི་འདུག
བོད་མིའི་ལུས་ནས་མེ་འབར་ཏེ་དུ་བའི་ནང་ནས་ཀི་བཏབས་ཀྱང་རྒྱལ་སྤྱིའི་སྤྱི་ཚོགས་ཀྱིས་མ་ཐོས་མ་མཐོང་ཐལ་ཟེར་ནས་ང་ཚོས་སྡུག་སྐད་བརྒྱབ་པ་རེད། འདི་ལ་ཕྱི་རྐྱེན་དང་ནང་རྐྱེན་གཉིས་ཀ་འཛོམས་ཡོད་པ་ངོས་ལེན་བྱེད་དགོས་ཀྱི་འདུག བོད་པའི་སྤྱི་ཚོགས་ཆུང་དྲགས་པ་དང་འཛམ་གླིང་ཆེ་དྲགས་པའི་ཁར་རིག་ཚན་མང་པོ་ཞིག་གི་ཐོག་བོད་མི་ཚོ་རྗེས་ལུས་ཐེབས་ཡོད་པ་འདི་ཕྱི་རྐྱེན་རེད། དེང་གི་བརྡ་འཕྲིན་བརྒྱུད་ལམ་གྱི་རྒྱ་སྒོ་བརྒྱངས་ནས་བཞག་ཡོད་ཀྱང་བོད་མི་ཚོས་གནའ་ནས་དཀོན་མཆོག་གསུམ་མ་གཏོགས། དེང་གི་དཀོན་མཆོག་བཞི་བ་ཞིག་རྩད་ནས་ཁས་མི་ལེན་པའི་ཞེ་གྱོང་གི་གཤིས་ཀ་འདི་ནང་རྐྱེན་རེད། སྨྲ་བརྗོད་རང་དབང་དང་གསར་འགོད་རང་དབང་། དམངས་གཙོ་དང་འགྲོ་བ་མིའི་ཐོབ་ཐང་གླེང་བཞིན་གངས་ཅན་སྐྱིད་གཤོངས་ན་གང་འདོད་དུ་བརྡ་འཕྲིན་བརྒྱུད་ལམ་ལ་འབྲེལ་འདྲིས་བྱས་མི་ཆོག་པའི་སྒྲིག་གཞི་དམ་པོ་ཞིག་ཀྱང་བག་ལ་ཞ་བའི་ཚུལ་དུ་གནས་ཡོད།
ངྷ་རམ་ས་ལའི་སྒྲིག་འཛུགས་འདི་ཡང་རྒྱལ་ཁབ་ཅིག་གི་ཚབ་མཚོན་བྱེད་དགོས། རྒྱལ་ཁབ་ཅིག་ལ་ཅི་ཞིག་ཚང་དགོས་པ་དང་རྒྱལ་ཁབ་ཅིག་གིས་ཅི་ཞིག་བསྒྲུབ་དགོས་པ་དེར་ངྷ་རམ་ས་ལའི་སྒྲིག་འཛུགས་འདིས་ཀྱང་འབད་བརྩོན་བྱེད་ཀྱིན་ཡོད། འདས་པའི་ཟླ་ངོ་བཅོ་ལྔའི་ནང་ཚུད་དུ་བཀའ་བློན་ཁྲི་ཟུར་འཇུ་ཆེན་ཐུབ་བསྟན་རྣམ་རྒྱལ་མཆོག་དང་ཨ་ལགས་འཇིགས་མེད་ལྷུན་འགྲུབ་རིན་པོ་ཆེ་མཆོག རྟ་ར་བ་བསྟན་འཛིན་ཆོས་ཉིད་མཆོག་གསུམ་སྔ་རྗེས་སུ་སྐུ་གཤེགས་སོང་། ཁོང་རྣམ་པ་བོད་པའི་འཐབ་རྩོད་ཀྱི་བདེན་པའི་མཐའ་ལ་རེ་བའི་འཕྱང་ཐག་ཆད་སོང་བ་མིན་ཡང་། མི་ལོ་ལྔ་བཅུའི་རིང་དཀའ་ལས་བརྒྱབ་སྟེ་སྐུ་ཐང་ཆད་སོང་བ་རེད། ལྷུན་པོ་ལྟ་བུ་ཁོང་རྣམ་པ་གློ་བུར་གློ་བུར་དུ་བཞུད་སྟངས་དེས་ཉི་མ་ལྟ་བུའི་སྐྱེས་ཆེན་གཞན་ཞིག་གི་བཞུད་ལམ་ཡང་བོད་པ་ཚོ་དང་བར་ཐག་ཇེ་ཉེ་ནས་ཇེ་ཉེ་རུ་འགྲོ་བཞིན་ཡོད།
བོད་མི་ཚོས་འདོད་ཀྱང་རུང་ལ་མ་འདོད་ཀྱང་རུང་རང་བཞིན་ཆོས་ཉིད་ཀྱི་བདེན་པ་ལ་ཕྱོགས་རིས་མེད་སྟབས། སྐྱེས་ཆེན་ཁོང་བཞུད་པའི་ཉི་མ་ནག་པོ་དེར་ད་ལྟ་ནས་བོད་མི་ཚོའི་བསམ་བློའི་ནང་དུ་གྲ་སྒྲིག་ཅིག་ཡོད་དགོས། གོ་ཐོས་ལ་བྷེ་བྷེ་སེ་དང་སི་ཨན་ཨན་སོགས་རྒྱལ་སྤྱིའི་གསར་ལམ་ཆེ་ཁག་གིས་བོད་པའི་སྐྱེ་ཆེན་ཁོང་བཞུད་སྟངས་ཀྱི་གསར་འགྱུར་སྒྲོམ་གཞི་སྔ་མོ་ནས་བཟོས་ཚར་ཡོད་རབས་འདུག ས་བྱི་ཞི་རྒོལ་དང་ལྕགས་ཡོས་མེ་རྒོལ་ལས་ལྷག་པའི་གནས་ཚུལ་ཆེན་པོ་ཞིག་ལ་རེ་སྒུག་བྱས་ཡོད་རབས་འདུག དུས་ཚོད་ཀྱི་སྔ་ཕྱི་ཙམ་རྩོད་པར་ཁེ་ལས་པ་འདི་ཚོར་དེ་འདྲའི་བྲེལ་འཚུབ་རྔམ་སྐྲག་ཡོད་ན། བོད་རྒྱལ་ཁབ་དང་མི་རིགས་ཀྱི་ཆག་འཇིག་ལ་མཐུད་ནས་ཡོད་པའི་བོད་པ་ཚོར་ཅིའི་ཕྱིར་ཤ་འགུལ་ཙམ་ཡང་མེད་སོང་བ་ཡིན་ནམ།
