ལྷ་སར་གནས་མཇལ་དུ་སྐྱོད་པར་ཡིག་ཆ་བཞི་དགོས་ཀྱི་འདུག

ངྷ་རམ་ས་ལའི་དབུས་སྣེ་ལེན་ཁང་ལ་གསར་བོད་ནས་གསར་དུ་འབྱོར་བའི་ཕ་ཡུལ་ཨ་མདོ་རྔ་པ་ནས་ཡིན་པའི་མིང་བརྗོད་འདོད་མེད་མཁན་ཞིག་གིས་འདི་གའི་གསར་འགོད་པར་བོད་ནང་གི་མཐོང་ཐོས་འགའ་བརྗོད་པ་ལྟར་ན། དེང་སྐབས་མདོ་སྨད་ནས་ལྷ་སར་གནས་མཇལ་དུ་འགྲོ་མཁན་ཞིག་ཡིན་ན། སོ་སོའི་ས་གནས་གྲོང་སྡེ་ཨུ་ཡོན་ལྷན་ཁང་གི་རྒྱབ་གཉེར་ཡི་གེ་དང་ཞང་སྤྱི་བདེ་ཉེན་རྟོག་ལས་ཁུངས་ཀྱི་རྒྱབ་གཉེར་ཡི་གེ རྫོང་སྤྱི་བདེ་ཉེན་རྟོག་ལས་ཁུངས་ཀྱི་ཡིག་ཆ། རྒྱལ་ཁབ་བདེ་འཇགས་ལས་ཁུངས་ཀྱི་ཡིག་ཆ་བཅས་དགོས་ཀྱི་ཡོད་འདུག

ལྷག་པར་དུ་སྔར་ལོ་ལྷ་སའི་ཇོ་ཁང་མདུན་དུ་རང་ལུས་མེར་བསྲེཊ་ཀྱི་གནས་ཚུལ་བྱུང་རྗེས། མདོ་སྨད་ནས་ལྷ་སར་གནས་མཇལ་དུ་འགྲོ་མཁན་ཡིན་ན། ལྷ་སར་བརྟན་འཇགས་སུ་སྡོད་ཆོག་པའི་ཁྲིམས་མཐུན་ཡིག་ཆ་ཡོད་མཁན་ཞིག་གིས་བདེ་འཇགས་འགན་ལེན་མེད་ན། གཉེན་འབྲེལ་གྲོགས་པོ་སུ་གང་གིས་ཀྱང་སྣེ་ལེན་བྱས་མི་ཆོག་པ་མ་ཟད། ཐ་ན་གླ་ཁང་དང་མགྲོན་ཁང་སོགས་སུའང་སྡོད་མི་ཆོང་ཅིང་། ཕྱོགས་ཡོང་གནས་མཇལ་བ་སུ་ཞིག་ཡིན་ཡང་ལྷ་སར་འབྱོར་མ་ཐག་གནས་སྡོད་ལག་འཁྱེར་བཟོ་དགོས་ཤིང་། གལ་སྲིད་ལག་འཁྱེར་མེད་ན། ཇོ་ཁང་མདུན་དང་བར་སྐོར་གཡས་གཡོན་ཀྱི་ཉེན་རྟོག་པས་གང་བྱུང་འཛིན་བཟུང་དང་། ཕྱིར་རང་ཡུལ་དུ་བཙན་འཕུད་གཏོང་བ་སོགས་བྱེད་ཀྱི་ཡོད་འདུག

ཁོང་གིས་ལྷ་ས་དང་འགྲམ་ནས་ཕྱིར་རང་ཡུལ་དུ་ལོག་མཁན་ཚོའི་སྐོར་བརྗོད་པར། བོད་མི་སུ་ཞིག་ཡིན་ཡང་ས་གནས་ནས་འགྲོ་ལུགས་བསྒྲུབ་མེད་ཚེ་ལམ་བར་དུ་སྔོག་བཤེར་དང་འདྲི་རྩད་བྱེད་ཀྱི་ཡོད་སྟབས། ཆ་རྐྱེན་ཡག་པོ་ཡོད་རིགས་ཚོ་གནམ་གྲུ་ལས་སྐྱོད་ཀྱི་ཡོད་ཀྱང་འབྱོར་བ་མེད་མཁན་དག་ལ་དཀའ་ངལ་ཆེན་པོ་འཕྲད་ཀྱི་ཡོད་འདུག སྔོན་ཆད་འགྲམ་དང་ལྷ་སའི་བར་གླ་འཁོར་གཏོང་མཁན་ཚོར་ཟླ་རེའི་འགྲུལ་སྐྱོད་ལག་འཁྱེར་དང་། གནས་སྡོད་བོད་མི་ཚོར་ཟླ་གསུམ་རེའི་གནས་སྡོད་ལག་འཁྱེར་སྤྲོད་ཀྱི་ཡོད་ཀྱང་། ལྷ་སའི་མེར་བསྲེཊ་རྗེས་སུ་ས་གནས་གླ་འཁོར་གཏོང་མཁན་ཚོར་ཟླ་ ༡ དང་། ཁམས་དང་ཨ་མདོའི་ཁ་ལོ་བ་ཚོར་ཉིན་ ༡༥ ཡས་མས་ཀྱི་ལག་འཁྱེར་ལས་སྤྲོད་ཀྱི་མེད་པ་དང་། ཉེ་ལམ་ཞིག་ནས་ཉིན་ ༣ ལས་སྤྲོད་ཀྱི་མི་འདུག་ཟེར།

འགྲམ་དུ་སྡོད་མཁན་ཚོས་གནས་སྡོད་ལག་འཁྱེར་ངེས་པར་དུ་ལེན་དགོས་པ་དང་། ལག་འཁྱེར་དེ་རྒྱ་ནག་གི་ལས་ཁུངས་ཁག་ ༥ ཙམ་བརྒྱུད་དེ། མཐའ་མར་ཟླ་ཤས་ཀྱི་དུས་ཡུན་ལས་མེད་པའི་ལག་འཁྱེར་ཞིག་སྤྲོད་ཀྱི་ཡོད་འདུག་ལ། ཁྱིམ་ཚང་མང་ཆེ་བར་ “ལྐོག་མིག” ཟེར་བ་དེ་བཞག་སྟེ་བོད་མི་ཕན་ཚུན་བར་གྱི་ཁ་པར་ལ་ལྐོག་ཉན་དང་། འདུ་འཛོམས་བྱེད་པར་དམ་དྲག་ཤུགས་ཆེན་བྱེད་ཀྱི་ཡོད་སྟབས་ཚོང་པ་ཚོས་རྒྱ་གཞུང་གི་བྱེད་ཐབས་དེ་ནི་བོད་པའི་ཚོང་པ་ཚོ་སྡོད་ཐབས་མེད་པ་བཟོ་བཞིན་ཡོད་པར་ངོས་འཛིན་བྱེད་ཀྱི་ཡོད་འདུག  

ཁོང་གི་ཕ་ཡུལ་རྔ་པ་ཕྱོགས་ཀྱི་གནས་སྟངས་སྐོར་གླེང་མོལ་བྱས་སྐབས་ཁོས་འདི་ལྟར་བརྗོད་བྱུང་“ ཕྱི་ལོ་ ༢༠༠༩ ལོ་ནས་བོད་མདོ་སྨད་རྔ་པ་ཁུལ་དུ་སྐྱ་སེར་མང་པོས་རང་ལུས་མེར་བསྲེཊ་ཀྱིས་རྒྱ་གཞུང་ལ་ངོ་རྒོལ་བྱུང་རྗེས། ལྷ་ས་དང་འགྲམ་དུ་ཡོད་པའི་རྔ་པའི་བོད་མི་ཚོར་དམིགས་བསལ་ལྟ་རྟོག་དམ་དྲག་བྱེད་ཀྱི་འདུག རྔ་པའི་ཕྱོགས་ཀྱི་མི་ཞིག་ཡིན་ཚེ་ལྷ་ས་ནས་འགྲམ་དང་། ལྷ་ས་ནས་རྔ་པར་འགྲོ་སྐབས་ཞིབ་འཇུག་ནན་མོ་བྱེད་ཀྱི་འདུག སྔ་ལོའི་ལོ་མཇུག་ལ་ང་རང་ཁྱིམ་དུ་ཐེངས་གཅིག་སོང་བ་ཡིན། རྔ་པ་ཀིརྟི་དགོན་པ་དང་གྲོང་རྡལ་ཚང་མ་དམག་གིས་བསྐོར་འདུག གོ་ཐོས་སུ་མི་ཁྲི་གཅིག་ཙམ་ཡོད་པ་རེད་ཟེར། དེའི་ནང་རྒྱ་མི་དང་བོད་མི་གཉིས་ཀ་འདུག ཁོང་ཚོར་ཉིན་རེར་རྒྱ་སྒོར་ ༡༠༠ རེའི་གླ་ཆར་སྤྲད་དེ་གསང་ཉུལ་སྐོར་སྲུང་གི་ལས་ཀ་བྱེད་ཀྱི་ཡོད་པ་རེད་ཟེར། གློ་བུར་དུ་རང་ལུས་མེར་བསྲེགས་དེ་འདྲ་བྱུང་ཚེ་གཅར་རྡུང་དང་འཛིན་བཟུང་གི་དབང་ཆའང་ཡོད་པ་རེད་ཟེར། སྐད་ཆ་འདི་དག་རྒྱ་མི་ཞིག་གིས་ང་ལ་ལབ་སོང་། མི་རེ་གཉིས་འཛོམས་ཏེ་མེར་བསྲེཊ་དང་བོད་དོན་གནས་ཚུལ་བཤད་ཚེ་ལམ་སེང་འཇུ་བཟུང་བྱེད་ཀྱི་འདུག” ཅེས་བརྗོད་བྱུང་།

མཇུག་ཏུ་ཁོང་ལ་བོད་མིའི་རང་ལུས་མེར་བསྲེགས་སྐོར་ལ་གླེང་སློང་བྱས་སྐབས་ “ རྒྱ་གཞུང་གིས་དམ་དྲག་ཅི་ཙམ་བྱས་ཀྱང་། ས་གནས་ཁག་གི་མེར་བསྲེཊ་གནས་ཚུལ་དེ་གོ་ཡོང་གི་འདུག མེར་བསྲེཊ་རེ་རེ་བྱུང་སྐབས་མཆོད་མེ་བསྒྲོན་ཏེ་༸གོང་ས་མཆོག་ལ་སྐྱབས་མཇུག་དང་མ་ཎི་བགྲང་རྒྱུ་ལས་དམིགས་བསལ་གང་ཡང་ལས་རྒྱུ་མི་འདུག ཁོང་རྣམ་པས་ལམ་ཁ་དེ་འདྲ་ཞིག་བདམས་དགོས་པ་དེ་ཡང་བོད་མི་རིགས་དང་རྒྱལ་ཁབ་ཀྱི་ཆེད་རེད། ཁོང་ཅག་གི་ནང་ལ་མྱ་ངན་དུ་འགྲོ་རྒྱུ་དང་ནང་མི་ཚོར་ཡོང་ཚོད་ཐུབ་ཚོད་ཀྱིས་རོགས་རམ་བྱེད་རྒྱུ་དེ་ཚང་མས་ལས་འགན་ཞིག་ཏུ་བརྩི་བཞིན་འདུག བོད་ནང་ལ་མཚོན་ན་ད་ལྟའི་ཆར་བཟའ་འཐུང་དང་དངོས་པོའི་ཆ་རྐྱེན་གྱི་ཕྱོགས་ནས་དམིགས་བསལ་དཀའ་ངལ་ཡོད་པ་མ་རེད། དཀའ་ངལ་གཙོ་བོ་རང་དབང་མེད་པ་དང་དམ་དྲག་ཆེན་པོ་བྱེད་པ་དེ་རེད། ད་དུང་བོད་རིགས་ལས་བྱེད་ནང་ཁུལ་དུ་དཀྲུག་ཤིང་དང་། དགོན་པ་དང་སློབ་གྲྭ ཐ་ན་གྲོང་སྡེ་བཅས་སུའང་བོད་པ་ནང་ཁུལ་དཀྲུག་ཤིང་བཟོ་བཞིན་འདུག ང་རང་གི་བསམ་པར་ཕྱི་ལོགས་ཀྱི་བོད་པ་ཚོས་༧རྒྱལ་བ་རིན་པོ་ཆེ་བོད་ལ་གདན་འདྲེན་ཞུ་རྒྱུ་ཐོག་ཤུགས་རྒྱག་དགོས་ཀྱི་འདུག གང་ཡིན་ཟེར་ན་བོད་ནང་གི་བོད་བོད་མི་ཚོའི་རེ་བ་ཉག་གཅིག་དེ་༧རྒྱལ་བ་རིན་པོ་ཆེ་མཆོག་གི་ཞལ་མཇལ་རྒྱུ་དང་གསུང་ཐོས་རྒྱུ་དེ་ཁོ་ན་ཆགས་འདུག”ཅེས་བརྗོད་བྱུང་།

གསར་འགོད་པ། དོན་གོ

༼བོད་ཀྱི་དུས་བབ་ཚགས་པར་ལས་འདིར་བཀོད། ༽