བཀའ་སྤྱི་གཉིས་ཀྱི་ལྡི་ལིའི་མི་མང་ལས་འགུལ་ཆེན་མོ་མགོ་འཛུཊ་གནང་།

དེ་རིང་གཟའ་མིག་དམར་ཉིན་གྱི་ཕྱི་དྲོ་སྲིད་སྐྱོང་མཆོག་དང་སྤྱི་འཐུས་ཚོགས་གཙོ་རྣམ་གཉིས་ཀྱིས་བོད་མིའི་གདུང་སེམས་མཉམ་སྐྱེད་ཀྱི་ལས་འགུལ་དང་འབྲེལ་བའི་གསར་འགོད་ལྷན་ཚོགས་བསྐངས་ཏེ། ལས་འགུལ་དང་འབྲེལ་བའི་གསལ་བསྒྲགས་དང་དྲི་བར་ལན་འདེབས་བཅས་གནང་སོང་།

དེ་རིང་ཕྱི་ཚེས་ ༢༩ ཉིན་གྱི་ཕྱི་དྲོའི་ཆུ་ཚོད་ ༣།༣༠ ཡས་མས་སུ་རྒྱལ་ས་ལྡི་ལིར་ཡོད་པའི་ (Press Club of India Conference Hall) ཞེས་པའི་ཚོགས་ཁང་དུ་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དང་། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་སྤེན་པ་ཚེ་རིང་རྣམ་གཉིས་ཀྱིས། སང་ཉིན་ནས་མགོ་འཛུགས་གནང་འཆར་ཡོད་པའི་༼བོད་མིའི་གདུང་སེམས་མཉམ་སྐྱེད་ལས་འགུལ༽སྐོར་གྱི་གསར་འགོད་གསལ་བསྒྲགས་ཤིག་གནང་སོང་ལ། དེར་རྒྱལ་སྤྱི་དང་རྒྱ་གར། བོད་པ་བཅས་ཀྱི་གསར་འགོད་པ་ ༡༠༠ ལ་ཉེ་བ་འདུ་འཛོམས་བྱུང་སོང་།

ད་རེབ་བཀའ་སྤྱི་ཐུན་མོང་གི་ལས་འགུལ་སྤྱི་ཁྱབ་བཀོད་འདོམ་པ་དག་ནི། སྤྱི་འཐུས་ཚོགས་གཙོ་སྤེན་པ་ཆེ་རིང་མཆོག་དང་ཚོགས་གཞོན་མཁན་པོ་བསོད་ནམས་བསྟན་འཕེལ། ཆོས་རིག་བཀའ་བློན་པདྨ་ཆོས་འབྱོར། ནང་སྲིད་བཀའ་བློན་རྒྱ་རི་སྒྲོལ་མ། འཕྲོད་བསྟེན་བཀའ་བློན་ཚེ་རིང་དབང་ཕྱུག སྤྱི་འཐུས་ཀརྨ་ཆོས་འཕེལ་ལགས་དང་ཀརྨ་ཡེ་ཤེས། འཇམས་དབྱངས་བཟོད་པ་བཅས་ཡིན་འདུག་ལ། སྐུ་མགྲོན་གདན་ཞུའི་ཚོགས་ཆུང་དང་ཕྱི་རྒྱལ་གཞུང་ཚབ་མཇད་འཕྲད་ཚོགས་ཆུང་། མི་མང་བཞུགས་གནས་གོ་སྒྲིག་ཚོགས་ཆུང་། དེ་བཞིན་གསར་འགོད་དང་། བདེ་འཇགས། འཕྲོད་བསྟེན། ཆུ་དང་གསོལ་ཇ་གོ་སྒྲིག་ཚོགས་ཆུང་བཅས་ལས་བགོས་གནང་ཡོད་འདུག སང་ཉིན་ཕྱི་ཚེས་ ༣༠ ཉིན་ནས་བཟུང་ཕྱོགས་མཐའ་ཁག་ནས་ཕེབས་པའི་མི་མང་ཕོན་ཆེན་མཉམ་ཞུགས་ཐོག་ཞི་བའི་ཁྲོམ་སྐོར་སོགས་ཀྱི་ལས་འགུལ་སྤེལ་རྒྱུ་རེད།

དེ་རིང་གསར་འགོད་ལྷན་ཚོགས་ཀྱི་བསྒྲགས་གཏམ་ནང་། “བོད་མིའི་སྒྲིག་འཛུགས་བཀའ་ཤག་དང་སྤྱི་འཐུས་ལྷན་ཚོགས་ཐུན་མོང་ནས་བོད་མིའི་གདུང་སེམས་མཉམ་སྐྱེད་ལས་འགུལ་འདི་ཕྱི་ལོ་ ༢༠༡༣ ཟླ་ ༡ ཚེས་ ༣༠ ནས་ཟླ་ ༢ པའི་ཚེས་ ༢ བར་རྒྱ་གར་རྒྱལ་ས་ལྡི་ལིར་གོ་སྒྲིག་བྱེད་བཞིན་ཡོད།  ང་ཚོས་ལས་འགུལ་འདི་སྤེལ་དགོས་པའི་དམིགས་ཡུལ་གཙོ་བོ་ནི། བོད་ནང་གི་བོད་མི་ཚོར་གདུང་སེམས་མཉམ་སྐྱེད་མཚོན་བྱེད་དང་། རྒྱལ་སྤྱིའི་ཐོག་ནས་ད་ལྟའི་བོད་ནང་གི་ཆེས་ཛ་དྲག་དང་ཡིད་སྐྱོ་དགོས་པའི་གནས་སྟངས་མཁྱེན་རྟོགས་དང་རྒྱབ་སྐྱོར་ཐོབ་ཆེད་དུ་ཡིན” ཞེས་དང་། “བོད་མིའི་སྒྲིག་འཛུགས་ཀྱི་ངོས་ནས་བོད་ནང་གི་བོད་མི་ཚོར་ཡང་ཡང་འབོད་སྐུལ་ཞུས་ཀྱང་། བོད་ནང་དུ་སྤྱི་སྲོལ་ལྟར་ཞི་རྒོལ་བྱེད་པའི་ཁོར་ཡུག་ཡེ་ནས་མེད་སྟབས། ལོ་རྒྱུས་ནང་བྱུང་མྱོང་མེད་པའི་རང་ལུས་མེར་བསྲེགས་ཀྱི་ཚ་རླབས་ཆེན་པོ་འཕྱུར་བཞིན་ཡོད་པ་རེད། ཕྱི་ལོ་ ༢༠༠༩ ནས་ཉེ་ལམ་ཕྱི་ལོ་ ༢༠༡༣ ཟླ་ ༡ ཚེས་ ༢༢ ཉིན་དཀོན་མཆོག་སྐྱབས་ལགས་ཀྱི་བར་བོད་ནང་ཁྱོན་བོད་མི་ ༩༩ ཡིས་རྒྱ་གཞུང་གིས་བོད་ནང་ལག་བསྟར་བྱེད་པའི་གདུག་རྩུབ་སྲིད་ཇུས་ལ་ཞི་བའི་ངོ་རྒོལ་གྱིས་རང་ལུས་མེར་བསྲེགས་བཏང་ཡོད” ཞེས་བཀོད་འདུག 

གསར་འགོད་བསྒྲགས་གཏམ་ནང་མུ་མཐུད་དུ་རྒྱ་གཞུང་གིས་བོད་ནང་རང་ལུས་མེར་བསྲེགས་བཏང་བའི་གནས་ཚུལ་དེར་གདོང་ལེན་བྱེད་སྟངས་ནི་སྔར་བས་གདུག་རྩུབ་ཆེ་བའི་སྲིད་ཇུས་ལག་བསྟར་བྱས་ཏེ། རང་ལུས་མེར་བསྲེགས་བྱུང་ཡུལ་ཁག་ཏུ་དམག་མི་དང་།དྲག་ཆས་ཉེན་རྟོག་པ་ཕོན་ཆེ་འགྲེམས་གཏོང་བྱེད་ཀྱི་ཡོད་པ་སོགས་ལ་བལྟས་ན། པེ་ཅིན་ནས་བོད་མི་ཚོའི་ཞི་རྒོལ་གྱི་ལམ་ཁ་འགོག་ཆེད་ཤིན་ཏུ་གདུག་རྩུབ་ཆེ་བའི་ཐབས་བྱུས་སྤེལ་བཞིན་པ་གསལ་བོ་ཡིན་པ་དང་། ཁོ་ཚོས་རང་ལུས་མེར་བསྲེགས་གཏོང་མཁན་གྱི་ནང་མི་དང་གྲོགས་པོ་དོགས་ཡོད་ཡོངས་ལ་ནག་ཉེས་ཀྱི་ཁྲིམས་གཅོད་གཏོང་གི་ཡོད་པ། བོད་མིའི་སྒྲིག་འཛུགས་ཀྱི་ངོས་ནས་མཉམ་འབྲེལ་རྒྱལ་ཚོགས་གཙོས་པའི་འཛམ་གླིང་རྒྱལ་ཁབ་སོ་སོའི་གཞུང་གིས་བོད་ཀྱི་གནད་དོན་ཐོག་སེམས་འཚབ་ཡོད་པའི་བསྒྲགས་གཏམ་སྤེལ་བར་ཡི་རངས་ཞུ་བཞིན་ཡོད་ཀྱང་། ད་དུང་དེ་བས་མང་བ་བྱེད་དགོས་པ་ཞིག་ནི་རྒྱ་ནག་གཞུང་ལ་བོད་ཀྱི་གནད་དོན་དེ་༸གོང་ས་མཆོག་གི་སྐུ་ཚབ་མཉམ་ཞི་མོལ་བྱས་ཏེ་ཕན་ཚུན་གཉིས་ཕན་དབུ་མའི་ལམ་ནས་སེལ་དགོས་པའི་འབོད་བསྐུལ་གནང་དགོས་པ་དེ་ཡིན་སྐོར་སོགས་བཀོད་འདུག

ཐེངས་འདིར་བཀའ་སྤྱི་གཉིས་ནས་རྒྱ་གར་དང་རྒྱལ་སྤྱིའི་ཐོག་འབོད་སྐུལ་དོན་ཚན་ ༣ ཞུས་ཡོད་པ་དག་ནི། དང་པོ། གསར་འགྱུར་བརྒྱུད་ལམ་ཁག་དང་མཉམ་འབྲེལ་རྒྱལ་ཚོགས། རྒྱལ་སྤྱིའི་རྟོག་ཞིབ་ཚོགས་པ་ཁག་བཀག་སྡོམ་མེད་པར་བོད་དུ་སྐྱོད་བཅུག་སྟེ་བོད་ནང་རང་ལུས་མེར་བསྲེགས་གཏོང་དགོས་པའི་དངོས་ཡོད་རྒྱུ་རྐྱེན་གང་ཡིན་རྟོག་ཞིབ་ཀྱིས་སྙན་ཐོ་འདོན་ཐུབ་པ་གནང་དགོས་པ།  གཉིས་པ། བོད་ནང་གི་དངོས་ཡོད་གནས་སྟངས་མཁྱེན་རྟོགས་ཆེད་རྒྱལ་ཁབ་ཁག་གི་གཞུང་དང་གྲོས་ཚོགས། གཞུང་ཚབ་ཁག་གི་སྐུ་ཚབ་བཅས་བོད་ནང་ལ་ཕེབས་ཐུབ་པ་གནང་དགོས་པ། གསུམ་པ། རྒྱ་ནག་གིས་བོད་ཐོག་འཛིན་པའི་མཁྲེགས་འཛིན་གྱི་སྲིད་བྱུས་ལ་བསྐྱར་ཞིབ་དང་། བོད་མིའི་དངོས་ཡོད་དཀའ་སྡུག་ལ་བསམ་གཞིགས་བྱས་ཏེ་བོད་ཀྱི་གནད་དོན་ཞི་མོལ་གྱི་ལམ་ནས་སེལ་དགོས་བཅས་རེད། 

གསར་འགོད་པས་སྲིད་སྐྱོང་བློ་བཟང་སེང་གེ་མཆོག་ལ་ད་རེབ་ཀྱི་ལས་འགུལ་ཐོག་ཐུགས་རེ་གང་འདྲ་གནང་གི་ཡོད་མེད་བཀའ་འདྲི་ཞུས་པའི་ལན་དུ། “ ད་ལྟའི་བར་བོད་ནང་རང་ལུས་མེར་བསྲེཊ་གནང་མཁན་བོད་མི་ ༩༩ ཆགས་ཡོད་སྟབས། ད་རེབ་བཀའ་སྤྱི་ཐུན་མོང་ཐོག་བོད་དང་བོད་མིར་གདུང་སེམས་མཉམ་སྐྱེད་ཆེད་ལས་འགུལ་སྤེལ་གྱི་ཡོད་ལ། ལས་འགུལ་འདི་བཙན་བྱོལ་གྱི་ལོ་རྒྱུས་ནང་བཀའ་སྤྱི་ཐུན་མོང་གིས་ལས་འགུལ་སྤེལ་ཐེངས་ཐོག་མ་ཆགས་ཡོད།  གཙོ་བོ་བོད་ནང་ཛ་དྲག་གི་གནས་སྟངས་ཐད་ང་ཚོས་ག་རེ་ཡིན་ཡང་བྱེད་དགོས་སྟབས། ཐེངས་འདིར་ལྡི་ལིར་བཅར་ཏེ་གཙོ་བོ་རྒྱལ་སྤྱིའི་སྤྱི་ཚོགས་ལ་བོད་ནང་གི་ཛ་དྲག་གནས་སྟངས་ཐོག་ཁ་ཡོད་ལག་ཡོད་ཀྱི་ཐུགས་སྣང་རྒྱབ་སྐྱོར་དང་བོད་དོན་གྲོས་མོལ་གྱི་ལམ་ནས་སེལ་ཐབས་ལ་འབད་བརྩོན་བྱ་ཆེད་ལས་འགུལ་འདི་སྤེལ་གྱིན་ཡོད” ཅེས་གསུངས་བྱུང་།

སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་ལ་བཅར་འདྲི་ཞུས་པར་ཁོང་གིས “ ད་རེབ་ཐེངས་དང་པོ་བཀའ་ཤག་དང་སྤྱི་འཐུས་ཐུན་མོང་གིས་གོ་སྒྲིག་གནང་བཞིན་ཡོད་པ་རེད། རྩ་བའི་བོད་ཀྱི་གནད་དོན་རྒྱལ་སྤྱིའི་ཁྱོན་དུ་ཁྱབ་རྒྱུ་གནད་འགག་ཆེན་པོ་རེད། ང་ཚོའི་བཙན་བྱོལ་བོད་མིའི་སྒྲིག་འཛུགས་རྒྱ་གར་ནང་རྟེན་གཞི་བྱས་ཡོད་པ་དང་། རྒྱ་གར་སྟོབས་ཆེན་རྒྱལ་ཁབ་ཅིག་ཆགས་ཡོད་པ། རྒྱལ་སྤྱིའི་གསར་འགྱུར་བརྒྱུད་ལམ་ཆེ་ཁག་མང་པོ་ཞིག་འདིར་གནས་ཡོད་སྟབས། ད་རེབ་སྲིད་སྐྱོང་དབུས་པའི་བཀའ་བློན་རྣམ་པ་དང་སྤྱི་འཐུས་ཚོགས་གཙོ་གཞོན་དབུས་པའི་སྤྱི་འཐུས་རྣམ་པ། རྒྱལ་བལ་འབྲུག་གསུམ་གྱི་གཞིས་ཆགས་ཁག་ཚང་མའི་བོད་མིའི་སྐུ་ཚབ་ཡོང་ཡོད་པ་རེད། མངོན་འདོད་གཙོ་བོ་རྒྱ་ནག་མགོ་ཁྲིད་ཚོས་བོད་མིའི་གདུང་འབོད་གོ་སྟེ་བོད་ནང་ཡ་ང་བའི་གནས་ཚུལ་ཆགས་ཡོད་པ་དེ་རྒྱུ་རྐྱེན་གང་ལ་ཐུག་ཡོད་མེད་དང་དེ་མི་ཡོང་བར་ག་རེ་བྱེད་དགོས་མིན། ཕུགས་རྒྱང་རིང་པོའི་ཐོག་ནས་བཤད་པ་ཡིན་ན་བོད་རྒྱའི་དཀའ་རྙོག་གཉིས་ཕན་གྱི་ཐོག་ནས་ཇི་ལྟར་སེལ་དགོས་མིན་ཐོག་རྒྱ་ནག་གི་མགོ་ཁྲིད་ཚོར་གོ་བརྡ་སྤྲོད་རྒྱུ་གལ་ཆེ་ཤོས་ཆགས་ཡོད། རྩ་བའི་རྒྱལ་ཁབ་སོ་སོའི་ཁེ་ཕན་གཙོ་བོ་ཡིན་ཡང་འགྲོ་བ་མིའི་ཐོབ་ཐང་ཞེས་པ་དེ་འགྲོ་བ་མི་ཐམས་ཅད་ལ་དགོས་ཀྱི་ཡོད་པ་རེད། བོད་མི་ཚོ་ཡང་འགྲོ་བ་མི་ཡིན་པ་ལས་སེམས་ཅན་མིན་སྟབས། སེམས་ཅན་དུད་འགྲོ་ལྟ་བུའི་སྡུག་སྦྱོང་མི་གཏོང་བར་མི་ནང་བཞིན་བརྩི་བཀུར་དང་ཆེ་མཐོང་སྤྲོད་ཆེད། རྒྱལ་སྤྱིའི་སྤྱི་ཚོགས་ཀྱིས་ཕུགས་རྒྱང་རིང་པོའི་ཐོག་ནས་བོད་པའི་དཀའ་རྙོག་སེལ་དགོས་པའི་རེ་འདུན་ཞུ་ཆེད་ཡིན། ” ཞེས་གསུངས་བྱུང་།

ལས་འགུལ་འདིའི་ཐད་དེ་སྔོན་བོད་མི་མང་སྤྱི་འཐུས་འཇམས་དབྱངས་བཟོད་པ་ལགས་སུ་བཅར་འདྲི་ཞུས་སྐབས་ཁོང་གིས་ཐེངས་འདིར་ཕྱོགས་མཐའ་ཁག་གི་མི་མང་ ༤༠༠༠ ལྷག་འཛོམ་རྒྱུར་ཚོད་དཔག་བྱེད་ཀྱི་ཡོད་སྐོར་བརྗོད་ཡོད།

 གསར་འགོད་པ་དོན་གོས་རྒྱལ་ས་ལྡི་ལི་ནས་སྤེལ།