བསོད་ནམས་ལགས་ཀྱིས་འདི་གར་གནས་ཚུལ་མཁོ་སྤྲོད་བྱས་པ་ལྟར་ན། ཟླ་འདིའི་ཕྱི་ཚེས་ ༢ ཉིན་གྱི་སྔ་དྲོ་རྒྱ་ནག་གཞུང་གིས་བོད་མདོ་སྨད་རྨ་ལྷོ་རེབ་གོང་གཡེར་གཤོང་དགོན་པའི་རང་ལོ་ ༤༢ ཡིན་པའི་གྲྭ་ཡར་འཕེལ་ལགས་དང་། གྲྭ་སྒྲ་དབྱངས་གཉིས་ས་གནས་ཀྱི་མངགས་གཏོང་ཁང་དུ་འབོད་འགུག་གིས་འདྲི་བརྩད་བྱས་ཡོད་པ་མ་ཟད། ཉེ་ལམ་གྲྭ་སྒྲ་དབྱངས་ལགས་ནད་པ་ཡིན་པའི་དབང་གིས་ཀློད་གྲོལ་བཏང་ཡོད་ཀྱང་། གྲྭ་ཡར་འཕེལ་ནག་ཉེས་ལ་གཞིགས་ཏེ་ཁྲིམས་ཐག་གཅོད་རྒྱུ་ཡིན་ཚུལ་བཤད་དེ། ད་ཆར་རེབ་གོང་གྲོག་དམར་ཁ་འོག་ཏུ་ཡོད་པའི་བཙོན་ཁང་ཞིག་ཏུ་བཙོན་འཇུག་བཀག་ཉར་བྱས་ཡོད་འདུག
ཁོང་གཉིས་འཛིན་བཟུང་བྱས་དོན་ནི། ལོ་སྔོན་མའི་ཕྱི་ཟླ་ ༡༡ པའི་ཚེས་ ༤ ཉིན་རེབ་གོང་ཆུ་མ་ཀློག་གཤོང་སྡེ་བའི་རང་ལོ་ ༢༥ ཡིན་པའི་རྒྱལ་གཅེས་དཔའ་བོ་རྡོ་རྗེ་ལྷུན་འགྲུབ་ལགས་ཀྱི་གདུང་ཐལ་རོང་བོ་དགོན་པའི་རྒྱབ་ངོས་གདོང་རྒྱ་གླད་ནས་ཀློག་གཤོང་སྡེ་བའི་རང་ཁྱིམ་དུ་གདན་འདྲེན་ཞུས་སྐབས། གྲྭ་ཡར་འཕེལ་ལགས་ཀྱི་རྒྱལ་གཅེས་པ་ཁོང་གི་སྐུ་པར་བཟུང་བ་དང་། གྲྭ་སྒྲ་དབྱངས་ལགས་ཀྱི་༧གོང་ས་མཆོག་གི་སྐུ་པར་བཟུང་སྟེ་སྐུ་ཐལ་གདན་འདྲེན་ཞུས་པས་ཉེས་འཛུགས་འོག་འཛིན་བཟུང་བཀག་ཉར་བྱས་པ་ཞིག་ཡིན་འདུག
གྲྭ་ཡར་འཕེལ་ལགས་ཀྱི་ཕ་མིང་ལ་ཀླུ་འབུམ་རྒྱལ་འབོད་ཀྱི་ཡོད་པ་དང་། ཁོང་རྒྱལ་གཅེས་དཔའ་བོ་རྡོ་རྗེ་ལྷུན་འགྲུབ་ལགས་ཀྱི་ཨ་ཞང་ཡིན་འདུག ཉེ་ཆར་ཁོང་གཉིས་འཛིན་བྱས་རྗེས་ས་གནས་མི་མང་དང་ནང་མི་ཉེ་འབྲེལ་ཚོས་བློ་འཚབ་བྱེད་ཀྱི་ཡོད་འདུག་ལ། ད་ཆར་རྒྱ་གཞུང་གིས་ཡང་རྨ་ལྷོ་རེབ་གོང་དུ་དམག་མི་འགྲེམས་འཇོག་གིས་དམ་དྲག་དང་སུན་གཙེར་རབས་དང་རིམ་པ་བཟོ་བཞིན་པ་མ་ཟད། བོད་མི་ཚོ་གང་བྱུང་འཛིན་བཟུང་བཙོན་འཇུག་བྱེད་ཀྱི་ཡོད་འདུག
གསར་འགོད་པ། དོན་གོ
