༼བོད་ཀྱི་གསང་བ༽གློག་བརྙན་འདི་ལ་མཐའ་གཅིག་ཏུ་ངོ་རྒོལ་རྒྱག་དགོས།

ཉེ་ལམ་རྒྱ་རིགས་དགེ་རྒན་ཆེན་མོ་ཞིག་གིས་༼བོད་ཀྱི་གསང་བ༽ཞེས་པའི་མུ་འབྲེལ་གློག་བརྙན་ཞིག་བཟོས་ཏེ། རྒྱ་ནག་དབུས་བརྙན་འཕྲིན་བརྒྱུད་མང་ཚོགས་ལ་སྟོན་མགོ་ཚུགས་ཡོད་ཅིང་། གློག་བརྙན་དེར་བོད་མི་རིགས་དང་རིག་གཞུང་། སྤྱི་ཚོགས། ཆོས་སྲིད་ཟུང་འབྲེལ་སོགས་ལ་དམའ་འབེབས་ཚད་མེད་བྱས་ཡོད་པར། བོད་ཕྱི་ནང་གཉིས་སུ་གློག་བརྙན་དེའི་འཁྲབ་ཁྲིད་པ་དང་འཁྲབ་སྟོན་པ་སོགས་ལ་ངོ་རྒོལ་ཤུགས་ཆེན་འབྱུང་བཞིན་ཡོད།

༼བོད་ཀྱི་གསང་བ་(西藏秘密)༽ཞེས་པའི་ལེའུ་ ༤༨ ཅན་གྱི་མུ་འབྲེལ་གློག་བརྙན་དེའི་འཁྲབ་གཞུང་རྩོམ་པ་པོ་དང་འཁྲབ་ཁྲིད་པ་ནི། རྒྱ་ནག་པེ་ཅིན་གློག་བརྙན་སློབ་ཆེན་གྱི་དགེ་རྒན་ཆེན་མོ་རྒྱ་རིགས་ལིས་ཏིག་ཕིན་(刘德濒)ཡིན་ཞིང་། གློག་བརྙན་དེ་ད་ལོའི་ཕྱི་ཟླ་དང་པོའི་ཚེས་ ༩ ཉིན་ནས་མགོ་འཛུགས་ཀྱིས་རྒྱ་ནག་དབུས་བརྙན་འཕྲིན་ཚན་པ་ ༨ པའི་སྟེང་། ཉིན་ལྟར་དགོང་མོའི་ཆུ་ཚོད་ ༧ དང་ཕྱེད་ཀའི་ཐོག་རྒྱ་ནག་རྒྱལ་ཡོངས་ལ་སྟོན་མགོ་ཚུགས་ཡོད་འདུག གློག་བརྙན་དེ་ནི་ ༢༠༡༡ ལོའི་ཕྱི་ཟླ་ ༨ པ་ནས་འཁྲབ་མགོ་བཙུགས་ཏེ་ ༢༠༡༣ ཕྱི་ཟླ་དང་པོའི་ཚེས་མགོར་ཡོངས་སུ་གྲུབ་ཡོད་ཅིང་། གློག་བརྙན་དེའི་འཁྲབ་སྟོན་པའི་གྲས་སུ་བོད་ནང་གི་སྐར་ཆེན་དུ་གྲགས་པའི་ཕུར་བ་སྐྱབས་དང་ཚེ་རིང་དོན་གྲུབ། ཨ་ཅག་ཚན་སྡེབ། རྡོ་བུ་སྐྱིད། ཆོས་ཉིད་ཚེ་རིང་། བསམ་ཁོ་སོགས་རིགས་གཞས་པ་གཞས་མ་དང་འཁྲབ་སྟོན་པ་འགའ་ཡང་མཉམ་ཞུགས་བྱས་འདུག

གློག་བརྙན་དེའི་བརྗོད་བྱ་གཙོ་བོ་ནི། དུས་རབས་ཉི་ཤུའི་ལོ་རབས་སུམ་ཅུ་ནས་ལོ་རབས་ལྔ་བཅུ་སྟེ། ༸གོང་ས་སྐུ་ཕྲེང་བཅུ་གསུམ་པ་ཆེན་པོ་སྐུ་གཤེགས་པ་ནས་རིག་གནས་གསར་བརྗེ་བར་གྱི་བོད་ཀྱི་ཉེ་རབས་ལོ་རྒྱུས་བརྗོད་གཞིར་བཟུང་ཐོག བཀྲ་ཤིས་ཞུ་བའི་བོད་རིགས་གྲྭ་བ་ཞིག་གིས་མི་ཚེ་ཧྲིལ་པོར་བོད་ཀྱི་བཀས་བཀོད་རྒྱུད་འཛིན་ཞིང་བྲན་ལམ་ལུགས་མགོ་རྟིང་སློག་པར་འབད་པ་བྱས་ཡོད་ཅིང་། གློག་བརྙན་དེའི་མགོ་མཇུག་བར་གསུམ་དུ་དངོས་ཤུཊ་བརྒྱུད་གསུམ་ཐོག་བོད་སྤྱི་ཚོགས་རྙིང་པ་ནི་ཆེས་རྗེས་ལུས་དང་ཆེས་ཀླ་ཀློ། ཆེས་མུན་ནག་གི་སྤྱི་ཚོགས་ཤིག་ཡིན་པ་དང་། བོད་པའི་སྐུ་དྲག་ཚོས་དངུལ་སྒོར་བཞི་ལྔ་རེས་བྲན་གཡོག་ཉོ་འཚོང་བྱས་ཏེ། སྤྱི་ཚོགས་དབྱེ་འབྱེད་ཤུགས་ཆེ་ཞིང་། ལྷག་པར་དུ་བྲན་གཡོག་ཚོར་ཉེས་རྡུང་སྡིགས་མོ་མི་སྤྱོད་ལས་འདས་པ་གཏོང་བ་སོགས་བསྟན་འདུག

ད་དུང་། སྐབས་དེའི་བོད་པའི་བླ་སྤྲུལ་གཙོ་བྱས་པའི་མི་མང་བྱིངས་ཧ་ཅང་རྨོངས་དད་ཆེ་བ་དང་། སྐུ་དྲག་ཚོའི་ཁྱིམ་དུ་དགེ་འདུན་པ་ཆོས་གསུང་དུ་ཕེབས་ཏེ་ཆོས་ལུགས་ཆོ་གའི་ནང་མི་ལྤགས་དགོས་པ་བྱུང་ཚེ། སྦྱིན་བདག་གིས་བཙོན་པ་གསོན་བཟུང་གིས་པགས་པ་བཤུ་བ་དང་། དགོན་སྡེ་ཁག་གི་བླ་གྲྭ་ཚོར་འགྲོ་བ་མིའི་གཞི་རྩའི་ཀུན་སྤྱོད་མེད་ཁར། གདན་ས་གསུམ་གཙོས་པའི་བོད་ཀྱི་དགོན་སྡེ་ཁག་ནི་བཙོན་ཁང་ལྟ་བུ་ཞིག་དང་། དགོན་པའི་གྲྭ་པ་ཚོས་བཙོན་པར་མི་སྤྱོད་ལས་འདས་པའི་ཉེས་རྡུང་གཏོང་བ་དང་། བོད་ཁུལ་གྱི་བཙུན་དགོན་ཁག་ནི་གཞང་བཙོང་ཁང་གི་ངོ་བོར་གནས་ཡོད་པའི་ཐོག བོད་ཀྱི་བླ་སྤྲུལ་དགེ་བཤེས་ཚོ་གཞང་ཁང་དུ་དུས་ངེས་མེད་ཐོག་ཉུལ་བཞིན་ཡོད་པ། ཐ་ན་བོད་པའི་མི་རིགས་ཙམ་དུ་མ་ཟད། ནང་པའི་ཆོས་ཀྱི་བྱེད་སྒོ་དང་བོད་པའི་རིག་གནས་དག་ཀྱང་རྗེས་ལུས་དང་གཏུམ་དྲག་ཆེ་ཚུལ། སྐབས་དེའི་བོད་པའི་ཆོས་སྲིད་ཟུང་འབྲེལ་ལམ་ལུགས་དེ་ཆེས་གདུག་རྩུབ་དང་ངན་གཡོས་ཁེངས་ཡོད་པ་སོགས་ཀྱི་ཟུར་ཟ་དང་དམའ་འབེབས་བྱས་འདུག

གློག་བརྙན་དེ་འགྲེམས་སྤེལ་བྱས་ཏེ་བདུན་ཕྲག་གཅིག་ཙམ་རྗེས། རྒྱ་ནག་ཝེ་པོ་དྲ་རྒྱ་དང་བོད་ནང་གི་བོད་ཡིག་དྲ་རྒྱ་ཁག་ཏུ། བོད་རིགས་ཤེས་ཡོན་ཅན་དང་དགེ་རྒན། སློབ་ཕྲུག གྲྭ་བ། མང་ཚོགས་བཅས་ཀྱིས་གློག་བརྙན་དེ་དང་དེའི་འཁྲབ་ཁྲིད་པ་ལིས་ཏིག་ཕན་སོགས་མི་འདོད་པའི་རྣམ་འགྱུར་ཤུགས་ཆེན་ཡོང་བཞིན་པ་དང་། རྒྱ་རིགས་ལིས་ཏིག་ཕོན་ཟེར་བ་དེས་བོད་ཀྱི་རིག་གཞུང་མ་ཤེས་པར་རིག་གཞུང་ལ་འཁྱོག་བཤད་དང་། མི་རིགས་ལ་དམའ་འབེབས་བྱས་པར་སྐྱོན་བརྗོད་དང་འབྲེལ། གློིག་བརྙན་དེ་གང་མགྱོགས་གཏོང་མཚམས་འཇོག་དགོས་པའི་འབོད་སྐུལ་ཞུས་ཡོད།

གློག་བརྙན་དེར་ངོ་རྒོལ་མཚོན་ཆེད། ཉེ་ལམ་བོད་ནང་གི་ ‘རིལ་མ་རོལ་དབྱངས་ཚོགས་པ’ ཞེས་པས་རྒྱ་སྐད་ཀྱི་ལམ་ནས་༼རེ་བ༽ཞེས་པའི་གཟུགས་ལྡན་གླུ་དབྱངས་ཞིག་ཆེད་བསྒྲིགས་བྱས་ཏེ། ཡའུ་ཊོབ་གཙོས་བོད་ནང་གི་དྲ་རྒྱ་ཁག་ཏུ་ཕྱིར་བསྒྲགས་བྱས་ཡོད་ཅིང་། ཁོང་ཚོའི་གླུ་གཞས་ཆེད་བསྒྲིགས་དེའི་ནང་གཙོ་བོ་ང་ཚོས་བོད་རང་བཙན་རྩོད་ཀྱི་མེད། ཁ་བྲལ་ལས་འགུལ་སྤེལ་གྱི་མེད། ང་ཚོར་ངེས་པར་དུ་བརྩི་བཀུར་དགོས་ཀྱི་ཡོད་སོགས་བརྗོད་ཡོད་པ་དང་། ཕྱི་རྒྱལ་ཁག་གི་བོད་མི་དང་བོད་དོན་རྒྱབ་སྐྱོར་ཚོགས་པ་ཚོས་གློག་བརྙན་དེར་མཐའ་གཅིག་ཏུ་ངོ་རྒོལ་རྒྱག་དགོས་ཚུལ་རྗོད་ཀྱི་ཡོད་ལ། བརྒྱུད་ལམ་ཁག་ཏུ་རྒྱ་རིགས་མང་པོ་ཞིག་གིས་ཀྱང་གློག་བརྙན་དེའི་ནང་བོད་མི་རིགས་དང་བོད་པའི་རིག་གཞུང་སོགས་ལ་དམའ་འབེབས་བྱས་ཡོད་པ་ཙམ་དུ་མ་ཟད། ཆབ་སྲིད་ཀྱི་དམིགས་ཡུལ་བཟུང་ཡོད་པའི་གློག་བརྙན་ཞིག་ཡིན་པའི་གླེང་སློང་འབྱུང་བཞིན་ཡོད།

གློག་བརྙན་དེ་གཏོང་མགོ་ཚུགས་མ་ཐག གློག་བརྙན་དེའི་ནང་གི་བོད་རིགས་འཁྲབ་སྟོན་པ་ཚོར་ཡང་སྐྱོན་བརྗོད་བྱས་ཏེ་བོད་རིགས་མང་ཚོགས་ལ་དགོངས་སེལ་ཞུ་དགོས་པའི་བསམ་ཚུལ་ཤུགས་ཆེན་བྱུང་ཡོད་ཅིང་། གནས་སྟངས་དེའི་རྐྱེན་པས་ཕྱི་ཟླ་ ༡ ཚེས་ ༢༨ ཉིན་ཐེངས་འདིའི་གློག་བརྙན་འཁྲབ་སྟོན་ནང་ཞུཊ་མཁན་གཞས་པ་བསམ་ཁོ་ལཊ་ཀྱིས། སང་རྡོར་དྲ་བའི་སྟེང་བོད་རིགས་མང་ཚོགས་ལ་གནད་དོན་དེའི་ཐད་ཡིག་ཐོག་ནས་དགོངས་སེལ་ཞུས་འདུག

བསམ་ཁོ་ལཊ་ཀྱི་དགོངས་སེལ་ཞུ་ཡིག་ནང་། “ཉེ་ཆར་དྲ་ཐོག་ཏུ་༼བོད་ཀྱི་གསང་བ༽ཟེར་བའི་མུ་འབྲེལ་བརྙན་འཕྲིན་ལ་བསྟོད་སྨད་ཀྱི་དཔྱད་གཏམ་ཅི་རིཊ་ཤིག་སྤེལ་བཞིན་འདུག་ལ། ལྷག་པར་དུ་ཉིན་འདི་ཚོའི་རིང་ལ་ཕྲན་ཆུང་དང་འབྲེལ་བའི་དཔྱད་གཏམ་ཡང་ཇེ་མང་ནས་ཇེ་མང་རེད” ཅེས་དང་། “ ངས་རང་ངོས་ནས་བོད་ཀྱི་གསང་བ་ཞེས་པའི་བརྙན་འཕྲིན་འདིའི་སྐོར་ལ་དཀར་འདོན་དང་དག་སེལ་ཞིག་བྱ་བར་འདོད། དང་པོ། ཁོ་བོ་འཁྲབ་ཞུཊ་བྱས་པ་ནི་དམིཊ་ཡུལ་དང་སེམས་སྐྱེད་གཙང་མ་ངོ་མ་ཞིག་གི་ཆེད་དུ་ཡིན་ཏེ། བོད་ལྗོངས་ཀྱིས་བརྗོད་གཞི་བྱས་པའི་གློག་བརྙན་སྒྱུ་རྩལ་དར་སྤེལ་དང་མི་རིཊ་རིག་གནས་ཁྱབ་སྒྲོག་ལ་རང་ནུས་ཅི་ལྕོཊ་ཀྱི་ནུས་པ་རེ་འདོན་བསམ་པ་ལས་གཞན་ཅི་ཡང་མིན། ངས་བསམ་ན་བོད་རིཊ་ཀྱི་འཁྲབ་སྟོན་པ་གཞན་དག་ཀྱང་ང་དང་འདྲ་བའི་སེམས་བྱུང་ཅན་རྐྱང་རྐྱང་ཡིན་སྲིད། ད་དུང་ཁ་གསལ་སྒོས་ཞུ་འདོད་པ་ཞིག་ལ། ཁོ་བོའི་འཁྲབ་ཚན་གྱི་དུས་ཚོད་ནི་ཤིན་ཏུ་ཐུང་བས། སྒོར་མོ་ཡི་ཡོང་སྒོའི་ཆེད་དུའང་རྩ་བ་ནས་མིན།

གཉིས་པ། དྲང་མོར་བཤད་ན། འཁྲབ་སྟོན་པ་ཞིག་ལ་མཚོན་ན། འཁྲབ་གཞུང་གི་ནང་དོན་དང་འཁྲབ་ཆས་ལ་རེ་རེ་ནས་བལྟས་ཤིང་བདམས་དགོས་ན་ཤིན་ཏུ་ཁག་པོ་ཞིག་རེད། བརྙན་འཕྲིན་དེ་བསྒྲཊ་གཏོང་བྱས་རྗེས་མི་ཁ་ཤས་ཀྱིས་གནས་ཚུལ་ལ་ལ་ཞིག་བོད་ཀྱི་སྲོལ་རྒྱུན་རིག་གནས་དང་འཚམས་མི་འདུག་གསུང་གི་འདུག སྤྱིར་དགག་གཞག་བྱ་ཡུལ་དག་ཁོ་བོ་དང་ཐད་འབྲེལ་མེད་རུང་། བརྙན་འཕྲིན་དེར་འཁྲབ་ཞུཊ་བྱས་པའི་ཆ་ནས་ཁོ་བོས་འདིར་གཟིཊ་མཁན་དང་དྲ་གྲོགས་སྤུན་ཟླ་ཡོངས་ལ་ལྷག་བསམ་རྣམ་པར་དག་པའི་སྒོས་ནས་དགོངས་དག་ཞུས་པ་ཡིན། གསུམ་པ། ངའི་རེ་བ་ཡིན་ན་དྲ་ཐོག་གི་བསྟོད་སྨད་སྣ་མང་གི་དཔྱད་གཏམ་སྤེལ་བ་ཡོད་ཚད་དམིཊ་ཡུལ་གཅིག་གི་དོན་ཡིན་པར་སྨོན་ཏེ། ཡོད་ཚད་རང་མི་རིགས་ཀྱི་རིག་གནས་ལ་དགའ་ཞེན་དང་། རང་མི་རིགས་ཀྱི་སྲོལ་རྒྱུན་རིག་གནས་དར་སྤེལ། རང་མི་རིགས་ཀྱི་བརྙན་འཕྲིན་སྒྱུ་རྩལ་གོང་འཕེལ་གཏོང་བ་བཅས་ཀྱི་ཆེད་ཡིན་པར་སྨོན ”ཞེས་འཁོད་འདུག 

གློག་བརྙན་དེར་སྐྱོན་བརྗོད་སླེབས་པ་དང་བསྟུན་ཏེ། གློག་བརྙན་འཁྲབ་ཁྲིད་པ་ལིས་ཏིག་ཕིན་གྱིས་ཁོང་གི་ཝེ་པོ་ཟིན་བྲིས་ནང་ལན་འདེབས་ཤིག་སྤེལ་ཡོད་པའི་ནང་། “ངའི་གློག་བརྙན་འདི་ལ་མང་ཚོགས་ནང་དགའ་བསུ་དང་ཕུལ་དུ་བྱུང་བའི་མཚན་སྙན་ཐོབ་ཡོད། འདི་ལ་ལྡོག་ཕྱོགས་ནས་གླེང་ཕྱོགས་བཟོ་མཁན་ཚོ་ཕྱི་རྒྱལ་གྱི་ཁ་བྲལ་བ་ཁག་ཅིག་རེད། ” ཅེས་དང་། ཁོས་ད་དུང་ “ངས་མ་འོངས་པར་ད་དུང་བོད་ཀྱི་དངོས་ཡོད་གནས་ཚུལ་མཚོན་པའི་གློག་བརྙན་བཟོ་རྒྱུ་ཡིན། མེས་རྒྱལ་ཁ་བྲལ་གཏོང་མཁན་ཚོར་ནམ་ཡང་སྦས་སྐུང་བྱེད་ས་མེད་པ་ཞིག་བཟོ་རྒྱུ་ཡིན ”ཞེས་སོགས་ང་རྒྱལ་དང་བཅས་བརྗོད་འདུག

གསར་འགོད་པས་འབྲེལ་བ་ལས་ཁུངས་ཀྱི་འགན་འཛིན་གཞོན་པ་ཚེ་རིང་བསོད་ནམས་ལགས་སུ་གློག་བརྙན་དེར་བལྟས་རྗེས་མྱོང་ཚོར་དྲིས་པར། “ངས་གློག་བརྙན་དེར་ཕྱོགས་གཉིས་ནས་བལྟས་པ་ཡིན། རྒྱ་གཞུང་གི་ཕུགས་ཀྱི་དམིགས་ཡུལ་དེ་བོད་ཀྱི་ཆོས་དང་རིག་གཞུང་། མི་རིགས་བཅས་ལ་དམའ་འབེབས་བྱ་རྒྱུ་བཅས་རེད། ཕྱོཊ་གཞན་ཞིག་ནས་གློག་བརྙན་དེའི་ནང་པར་རིས་མང་པོ་ཞིག་བསྟན་ཡོང་གི་འདུག པར་དེ་དག་བརྒྱ་ཆ་བརྒྱ་རྫུན་མ་རེད་ཅེས་མཐའ་གཅིག་ཏུ་བཤད་ཐུབ་ཀྱི་མི་འདུག དེའི་སྟབས་ཀྱིས་སྐབས་དེའི་བོད་ཀྱི་སྤྱི་ཚོཊ་ནང་དུའང་སྐྱོན་ཆ་ཏན་ཏན་ཡོད་ཀྱི་རེད་དྲན་སོང་། རྒྱ་གཞུང་གིས་འཁྱོག་བཤད་བྱས་མིན་མ་ལྟོས་པར་གློག་བརྙན་ནང་བོད་ཀྱི་སྒོར་མོ་དང་སྦྲགས་ཁང་། བོད་དམག བོད་དར་སོཊ་མཐོང་རྒྱུ་ཡོད་པ་དེའི་ཐོག་ནས་དེ་སྔོན་བོད་དོན་སྐོར་གང་ཡང་ཤེས་རྟོཊ་མེད་མཁན་ཡིན་རུང་། བསམ་བློ་གཏོང་ཤེས་མཁན་ཞིག་ཡིན་ན་བོད་ཟེར་དུས་གནས་བབ་གཞན་མི་འདྲ་བ་ཞིག་ཡིན་པ་རང་བཞིན་གྱིས་དྲི་བ་དང་དོཊ་པ་སླེབས་ཡོང་གི་འདུག གློག་བརྙན་དེའི་ནང་བོད་ཀྱི་ཆོས་ལུགས་ཧ་ཅང་རྨོངས་དད་པ་ཡིན་པ་དང་བྲན་གཡོག་ཚོར་མིའི་འདུ་ཤེས་མེད་པ། བོད་སྤྱི་ཚོགས་རྙིང་པའི་མི་རྣམས་གཏུམ་དྲག་ཆེ་ཚུལ་བཤད་པ་དེ་དངོས་ཡོད་སྤྱི་ཚོགས་དང་གཏན་ནས་མཐུན་གྱི་མི་འདུག”ཟེར།

ངྷ་སར་གནས་སྡོད་བོད་གནས་ཉམས་ཞིབ་པ་ཚེ་རིང་རྡོ་རྗེ་ལགས་སུ་དྲིས་པར། “གློག་བརྙན་དེའི་དམིགས་ཡུལ་གཙོ་བོ་ནི་ ༢༠༠༨ ལོར་བོད་ནང་ཞི་རྒོལ་ཆེན་མོ་བྱུང་བ་དང་། ལྷག་པར་དུ་ ༢༠༠༩ ལོ་ནས་བོད་ནང་རང་ལུས་མེར་བསྲེཊ་མཚམས་མ་ཆད་པར་འབྱུང་བཞིན་པ་དེའི་ཐོག་ནས་བོད་རིགས་ནང་ཁུལ་དུ་སྔར་ལས་མཐུན་སྒྲིལ་ཤུཊ་ཆེ་རུ་སོང་སྟེ། བོད་པ་ཚོས་སོ་སོའི་མདུན་ལམ་དང་གོ་རྟོགས་སྤེལ་རྒྱུའི་ཐོག་གཉིད་ལས་སེལ་ཡོང་བའི་སྐབས་ལ། རྒྱ་གཞུང་གིས་ལོ་ ༥༠ རིང་བོད་པ་ཚོར་སྐྱག་རྫུན་དང་འཇིགས་སྐུལ་རིམ་པར་བྱས་པ་རྣམས་རྐུབ་བརྡོལ་ཏེ་ཁུངས་འཁྱོལ་གྱི་ཡོད་པ་མ་རེད། ད་ཆར་བོད་ཙམ་མིན་པར་རྒྱ་རིགས་དང་རྒྱལ་སྤྱིའི་ཐོག་བོད་ཀྱི་བདེན་པ་ངོས་འཛིན་བྱས་ཏེ་རྒྱབ་སྐྱོར་བྱེད་མཁན་མང་དུ་འགྲོ་བཞིན་ཡོད་སྟབས། ད་ཐེངས་རྒྱ་གཞུང་གིས་ཆེད་དུ་བོད་ནང་ལོ་བདུན་ཞེས་པའི་གློག་བརྙན་དེར་འཁྱོག་བཤད་བྱས་པའི་ཐོག བོད་ཀྱི་སྤྱི་ཚོགས་རྙིང་པར་ཁ་གཡར་ཏེ་བོད་དེ་ནག་པོ་ཞིག་ཏུ་བསྒྱུར་ཐབས་བྱེད་པ་དང་། རྒྱ་ནག་མང་ཚོགས་ལ་བོད་པའི་དངོས་ཡོད་གནས་ཚུལ་མགོ་སྐོར་གཏོང་ཆེད་དུ་ཡིན་པ་རེད ” ཅེས་བརྗོད།

གསར་འགོད་པ། དཔལ་ལྡན།