དྲ་ཐོག་གསང་ཉུལ་རྐུ་འཁྱེར།

ཁ་སང་ཨ་རིར་རྟེན་གཞི་བྱས་པའི་དྲ་ཐོག་བདེ་འཇགས་ལྟེ་གནས་ཁང་ཞིག་གིས་འཛམ་གླིང་གི་དྲ་ཐོག་གསང་ཉུལ་རྐུ་འཁྱེར་གྱི་སྡེ་ཚན་ཆེ་ཤོས་རྒྱ་ནག་ཏུ་ཡོད་ཚུལ་བསྒྲགས་འདུག

ཟླ་འདིའི་ཕྱི་ཚེས་ ༡༨ ཉིན་ཨ་རིར་རྟེན་གཞི་བྱས་པའི་དྲ་ཐོག་བདེ་འཇགས་ལྟེ་གནས་ཁང་མན་ཌེ་ཡན་ (Madiant)  གྱིས་སྙན་ཐོ་ཞིག་ཕྱིར་བསྒྲགས་ཏེ། འཛམ་གླིང་ནང་གི་དྲ་ཐོག་གསང་ཉུལ་རྐུ་འཁྱེར་བྱེད་མཁན་གྱི་སྡེ་ཚན་ཤུགས་ཆེ་ཤོས་རྒྱ་ནག་ནང་ཡོད་པ་དང་། དེ་ནི་རྒྱ་ནག་གི་དམག་དོན་གསང་ཉུལ་ཁང་གི་གཙོ་འགན་དང་རྒྱ་ནག་གཞུང་གིས་མཐུན་འགྱུར་བྱེད་བཞིན་པའི་དྲ་ཐོག་གསང་ཉུལ་རྐུ་འཁྱེར་སྡེ་ཚན་ཞིག་ཡིན་ཚུལ་བསྒྲགས་འདུག

དེ་སྔོན་ཨ་རིའི་ཕོ་བྲང་དཀར་པོ་དང་རྒྱ་གར་གྱི་བདེ་སྲུང་ལས་ཁུངས་སོགས་རྒྱལ་སྤྱིའི་སྟེང་གི་གཞུང་འབྲེལ་ལས་ཁུངས་མང་པོ་ཞིག་དང་། གཞན་ཨ་རིའི་ནེའུ་ཡོག་དུས་བབ་སོགས་གསར་ཁང་ཁག་མང་པོ་ཞིག་གི་ལས་ཁུངས་ཀྱི་གློག་ཀླད་དུ་རྒྱ་ནག་གི་དྲ་ཐོག་གསང་ཉུལ་པའི་འཇབ་རྒོལ་ཐེབས་ཏེ། གསང་པའི་གནས་ཚུལ་རིགས་རྐུ་འཁྱེར་བྱས་པའི་གནས་ཚུལ་རིམ་པར་བྱུང་བ་ལྟར།གོང་གི་ལྟེ་གནས་ཁང་དེས་ ༢༠༠༤ ནས་རྒྱ་ནག་གི་དྲ་ཐོག་གསང་ཉུལ་པའི་མཐིལ་བརྟོལ་བར་ཞིབ་འཇུག་བྱས་ཡོད་འདུག

ཐེངས་འདིའི་སྙན་ཐོའི་ནང་རྒྱ་ནག་གི་དྲ་ཐོག་གསང་ཉུལ་རྐུ་འཁྱེར་སྡེ་ཚན་དེ་རྒྱ་ནག་ཧྲང་ཧེ་གྲོང་ཁྱེར་པུ་ཌོང་ (Pudong) ས་ཁུལ་གྱི་ཁང་རྩེག་ ༡༢ ཅན་ཞིག་ཏུ་ཡོད་པ་མ་ཟད། དེ་ནི་རྒྱ་ནག་བཅིངས་གྲོལ་དམག་ཨང་སྡེ་ ༦༡༣༩༨ ཅན་གྱི་རྟེན་གཞི་ས་ཁུལ་དང་གཅིག་མཚུངས་ཆགས་ཡོད་ཚུལ་དང་།  སྡེ་ཚན་དེ་འབྲེལ་ཡོད་རྒྱག་ནག་དམག་དོན་ཁང་གི་གཙོ་གཉེར་འོག་དབུས་གཞུང་གིས་མཐུན་འགྱུར་བྱེད་ཀྱི་ཡོད་ཚུལ། སྡེ་ཚན་དེར་སྐད་ཡིག་འདྲ་མིན་དང་གློག་ཀླད་ཆེད་མཁས་པ། དྲ་ཐོག་གསང་ཉུལ་དང་གཞན་གྱི་གནས་ཚུལ་རྐུ་འཁྱེར་ཁྱད་ལས་པ་སོགས་ལས་བྱེད་སྟོང་ཕྲག་ལྷག་ཡོད་པའི་ཚོད་དཔག་བྱས་ཡོད་འདུག་ལ། ད་ལྟའི་བར་འཛམ་གླིང་གི་གཞུང་དང་ཚོགས་པ།ཁེ་ལས་སྡེ་ཚན་ ༡༤༡ ཙམ་གྱི་གནས་ཚུལ་རྐུ་འཁྱེར་བྱས་ཡོད་སྐོར་བཀོད་འདུག