དེ་རིང་ནས་ཉིན་གཉིས་རིང་བོད་མིའི་སྒྲིག་འཛུཊ་འཕྲོད་བསྟེན་ལས་ཁུངས་ཀྱིས་ཊེ་སྦེ་གྲངས་ཐོ་ཕྱོགས་བསྡུས་དང་སྨན་བཅོས་སོགས་ཀྱི་ཐད་ཟབ་སྦྱོང་ཞིག་གོ་སྒྲིག་གནང་འདུག
དེ་རིང་ཕྱི་ཚེས་ ༤ ཉིན་གྱི་ཞོགས་པའི་ཆུ་ཚོད་ ༩།༣༠ ཐོག་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་གོ་སྒྲིག་འོག གངས་སྐྱིད་སྤྱི་འཐབ་ཡང་སྟེང་ཚོགས་ཁང་དུ་ ༼ཊེ་སྦེ་གྲངས་ཐོ་ཕྱོགབས་བསྡུའི་སྦྱོང་བརྡར༽ ཞེས་པའི་ཟབ་སྦྱོང་ཞིག་མགོ་འཛུགས་གནང་སོང་ལ། དེར་བོད་མིའི་སྒྲིག་འཛུགས་འཕྲོད་བསྟེན་བཀའ་བློན་ཚེ་རིང་དབང་ཕྱུག་མཆོག་དང་། འཕྲོད་བསྟན་དྲུང་ཆེ་ཤོ་ཟུར་བསོད་ནམས་ཆོས་འཕེལ་དྲུང་འཕར་ཚེ་རྒྱལ་ལགས། འཕྲོད་བསྟེན་ལས་ཁུངས་སྤྱི་ཚོགས་འཕྲོད་བསྟེན་སྡེ་ཚན་གྱི་འགན་འཛིན་འཕྲིན་ལས་དཔལ་མོ་བཅས་དང་། དེ་བཞིན། ཕྱོགས་མཐའི་ས་གནས་ཁག་ ༡༥ ནས་ཕེབས་པའི་སྨན་པ་བཅས་འདུ་འཛོམས་བྱུང་འདུག
སྐབས་དེར་འཕྲོད་བསྟེན་ལས་ཁུངས་ཀྱི་ལས་བྱེད་མིག་དམར་བཀྲ་ཤིས་ལགས་ཀྱི་ངོ་སྤྲོད་གནང་བ་ལྟར་ན། ཐེངས་འདིའི་ཉིན་གྲངས་གཉིས་རིང་གི་ཊེ་སྦེ་གྲངས་ཐོ་ཕྱོགས་བསྡུའི་སྦྱོང་བརྡར་ཐོག མོན་གྷོ་དང་ཀོ་ལི་གྷལ། སྦེལ་ཀོལ། ཧོན་སུར། མན་སྤར། བདེ་སྐྱིད་གླིང་། མེའོ། སོ་ཎ་ཌ། ར་ཝང་ལ། ལྡི་ལི། སྦིར། ལ་དྭགས། ངྷ་ས། སྦན་ད་རཱ། ཏེ་ཛོ་བཅས་ས་གནས་ཁག་ ༡༥ ལྷག་གི་ཊེ་སྦེ་སྨན་པ་ ༡༧ ལྷག་བཅས་ཚོགས་ཞུགས་གནང་འདུག ཟབ་སྦྱོང་འདིའི་དམིགས་ཡུལ་གཙོ་བོ། ༢༠༡༢ལོའི་ཕྱི་ཟླ་ ༤ པ་ནས་བཟུང་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱིས། ལྷོ་ཕྱོགས་ས་གནས་ཁག་གི་སྨན་ཁང་ ༤ དང་། བདེ་སྐྱིད་གླིང་དང་མན་སྦར། བདེ་ལེགས་སྨན་ཁང་བཅས་ཁྱོན་སྨན་ཁག་ ༧ ནང་གྲངས་ཐོ་བསྡུ་བའི་ལས་གཞི་མགོ་འཛུགས་བྱས་ཡོད་ཀྱང་། ངེས་གཏན་གྱི་གྲངས་འབོར་ཞིག་ཡོང་ཐུབ་ཀྱི་མེད་སྟབས། མ་འོངས་པར་སྨན་ཁང་ཁག་ཏུ་ཡོང་བའི་ནད་པ་གཅིག་པུ་མིན་པར། གཞིས་ཆགས་ཁག་གི་ཁྱབ་ཁོངས་སུ་ན་ཚ་དེའི་རིགས་ཡོད་མཁན་དང་དྲག་སྐྱེད་བྱུང་མཁན་གྱི་རིཊ། ནད་གཞི་གསར་བའི་རིཊ་གང་དང་གང་ཡོང་གི་ཡོད་མེད། ལོ་ཚོད་དང་ཕོ་མོ་བཅས་ཀྱི་གྲངས་ཀ་ཚད་ལྡན་ཞིག་བཟོས་ཏེ། བོད་པའི་སྤྱི་ཚོགས་ཀྱི་ཊེ་སྦེ་ལས་གཞི་ཐོག་སྔར་ལས་ལྷག་པའི་ལས་འཆར་གསད་གཏོད་དང་དཀའ་ངལ་སེལ་ཐབས་བཅས་ལ་དམིགས་ཏེ་གོ་སྒྲིག་གནང་བ་ཡིན་འདུག
ཟབ་སྦྱོང་ཐོག་འཕྲོད་བསྟེན་བཀའ་བློན་ཚེ་རིང་དབང་ཕྱུག་མཆོག་གིས་དེར་ཡོད་ཚོགས་ཞུགས་སྨན་པ་རྣམས་ལ། བོད་གཞུང་འཕྲོད་བསྟེན་ལས་ཁུངས་ཀྱིས་༡༩༨༡ ལོ་ནས་བཟུང་། བཙན་བྱོལ་བོད་མིའིོ་སྤྱི་ཚོགས་ཀྱི་འཕྲོད་བསྟེན་ལྟ་སྐྱོང་གི་ལས་གཞི་ཁག་ལ་འབད་པ་བྱེད་བཞིན་པའི་ཁྲོད། ཊེ་སྦེ་གྲངས་ཐོ་ཕྱོགས་བསྡུས་ཀྱི་ལས་གཞི་དེ་ཧ་ཅང་གལ་ཆེན་པོར་བརྩི་བཞིན་ཡོད་སྐོར་གསུངས་ཏེ། ལས་གཞི་འདི་བརྒྱུད་མ་འོངས་ཊེ་སྦི་ནད་གཞི་སྔོན་འགོག་ཐད་ཁོང་གིས། “ སྤྱིར་བཏང་ཊེ་སྦེ་ན་ཚ་དེ་སྔོན་འགོག་དང་བཅོས་ཐབས་ཡོད་པའི་ན་ཚ་ཞིག་ཆགས་བསྡད་ཡོད་ཀྱང་། ང་ཚོའི་སྤྱི་ཚོགས་ནང་ན་ཚ་འདི་དཀའ་ངལ་ཆེ་ཤོས་ཤིག་དང་མང་ཤོས་ཤིག་ཆགས་བསྡད་ཡོད་སྟབས། འཕྲོད་བསྟེན་ལས་ཁུངས་ཀྱིས་འབད་པ་བྱས་ཏེ། མ་འོངས་པར་ན་ཚ་འདིའི་མིང་གླེང་དུས་བོད་པ་དང་འབྲེལ་བ་མེད་པ་ཞིག་བཟོ་རྒྱུའི་འབད་པ་བྱེད་ཀྱི་ཡོད། ད་ལྟའི་ཆར་ན་ཚ་གསར་བ་མང་པོ་ཞིག་ཡོང་བསྡད་ཀྱིན་འདུག་ལ། ན་ཚ་འདིའི་རིགས་ཡོད་མཁན་མང་ཆེ་བ་གཞོན་སྐྱེས་ཆགས་ཡོད་པའི་དབང་གིས། སྔོན་འགོག་དང་གོ་རྟོགས་ཀྱི་ལས་འགུལ་སྤེལ་རྒྱུ་ཡིན། ད་ཆར་རྒྱ་གར་གྱི་ཡན་ལག་སྨན་ཁང་༥༥ དང་། བལ་ཡུལ་ནང་ ༡༢ ནང་ཊེ་སྦེ་སྨན་པ་ ༥ མ་གཏོགས་མེད་ཀྱང་། ད་ལྟའི་བར་རྒྱ་གར་གཞུང་གི་ངོས་ནས་མཐུན་འགྱུར་རོགས་རམ་གནང་བཞིན་པ་ལྟར། མ་འོངས་པར་ཊེ་སྦེ་གྲངས་ཐོ་ཞིབ་བཤེར་དང་མཉམ་དུ་བརྟག་དཔྱད་དང་སྨན་བཅོས་ཐོག་འབད་པ་བྱ་རྒྱུ་ཡིན། ”ཞེས་གསུངས་བྱུང་།
ཐེངས་འདིའི་ཉིན་གཉིས་རིང་གི་༼ཊེ་སྦེ་གྲངས་ཐོ་ཕྱོགས་བསྡུའི་སྦྱོང་བརྡར༽ཟབ་སྦྱོང་ཐོག་འཕྲོད་བསྟེན་ལས་ཁུངས་ཀྱི་ཆེས་ལས་སྨན་པ་ཊོག་ཊར་བློ་བཟང་ཚེ་རིང་ལགས་དང་། བོད་གཞུང་བདེ་ལེགས་སྨན་ཁང་གི་སྨན་ཞབས་པ་ཚེ་རིང་དཔལ་སྒྲོན། འཕྲོད་བསྟེན་ལས་ཁུངས་ཀྱི་སྤྱི་ཚོགས་འཕྲོད་བསྟེན་སྡེ་ཚན་འགན་འཛིན་འཕྲིན་ལས་དཔལ་མོ་ལགས། བདེ་ལེགས་སྨན་ཁང་གི་སྨན་པ་དཀོན་མཆོག་ལགས་བཅས་ཀྱིས་གྲངས་ཐོ་ཕྱོགས་བསྡུའི་སྐོར་དང་། ཊེ་སྦེ་ནད་གཞིའི་སྨན་བཅོས་བྱེད་སྟངས་སོགས་ཀྱི་ཐོག་ཟབ་སྦྱོང་སྤྲོད་རྒྱུ་ཡིན་འདུག
གསར་འགོད་པ། དོན་གོ
ངས་ཁྱེད་རྣམ་པ་ཚོ་ལ་བཀའ་དྲིན་ཆེ་ཞུ།