ལྟག་མཚེར་རིན་པོ་ཆེའི་སྲས་འབྲིང་བ་ཀུན་དགའ་ནོར་བུ་དང་། རྔ་བ་རབ་བརྟན་རྒྱ་མཚོ། དེ་བཞིན་ཏྲེ་ཧོར་བློ་དགའ། ཀླུ་ཆུ་ཟམ་ཚའི་་དར་རྒྱས་བཅས་གོམ་བགྲོད་པ་བཞི་ཡིས་ལོ་འདིའི་སུམ་ཅུའི་དུས་དྲན་ཉིན་མགོ་འཛུགས་ཀྱིས་ཨ་རིའི་རྒྱལ་ས་ཝ་ཤིན་ཊོན་ཌི་སི་ནས་ནིའུ་ཡོག་གྲོང་ཁྱེར་བར་དུ་བོད་རང་བཙན་གོམ་བགྲོད་གནང་རྒྱུ་ཡིན་འདུག
རྔ་བ་རབ་བརྟན་རྒྱ་མཚོ་ལགས་ཀྱིས་འགྲེལ་བརྗོད་བྱས་པ་ལྟར་ན། སྐུའི་གཅེན་པོ་ལྟག་མཚེར་རིན་པོ་ཆེས་ཨ་རིའི་ནང་གི་མངའ་སྡེ་སྣ་ཚོགས་སུ་རང་བཙན་གོམ་བགྲོད་ཐེངས་མང་གནང་སྟེ། བོད་ཀྱི་བདག་པོ་བོད་མི་ཡིན་པ་དང་། བོད་རང་བཙན་ཡིན་པ་སོགས་བོད་བསྟན་པ་ཆབ་སྲིད་ཀྱི་ལས་འགུལ་གནང་ཡོད་པ་རེད་ལ། སྐུའི་གཅེན་པོ་དམ་པ་ཞིང་ལ་ཕེབས་རྗེས། སྲས་ཐ་ཆུང་འཇིགས་མེད་ལགས་ཀྱིས་ཀྱང་ཡབ་དམ་པའི་དགོངས་བཞེད་མཇུག་སྐྱོང་དང་། བོད་ཀྱི་རྩ་དོན་ལ་དམིགས་ནས་ཨ་རི་དང་ཐེ་ཝན་སོགས་སུ་ཁྱོན་བསྡོམས་མེལ་ལེ་ ༥༨༧༢ ཙམ་ལ་གོམ་བགྲོད་གནང་བའི་རྗེས་སུ་མཐར་རྐྱེན་ངན་གྱི་དབང་གིས་རླངས་འཁོར་བརྡབས་སྐྱོན་གྱིས་སྐུ་ཚེ་མ་ཟིན་པ་རེད། ཁོང་འདས་ནས་ལོ་ངོ་གཉིས་པ་འགྲོ་བཞིན་པའི་སྐབས་འདིར་ཁོང་གི་ཇོ་ཇོ་ཀུན་དགའ་ནོར་བུ་ལགས་ཀྱིས་རང་གི་ཡབ་དང་སྤུན་ཆུང་གི་ཤུལ་བཞག་ལས་འགན་ཕྲག་ཏུ་ལེན་པའི་ཆ་ཤས་སུ་ཐེངས་འདིའི་གོམ་བགྲོད་འདི་མགོ་བཙུགས་པ་ཡིན་པ་དང་། ཁོང་དང་ལྷན་དུ་ད་དུང་ཨ་རིའི་མངའ་སྡེ་ཀེན་ཊར་ཁེ་ནས་ཕེབས་པའི་ཀླུ་ཆུ་ཟམ་ཚའི་དར་རྒྱས་ལགས། ནིའུ་ཡོག་ནས་ཕེབས་པའི་ཏྲེ་ཧོར་བློ་དགའ་ལགས་བཅས་མི་བཞི་ཡིས་ཉིན་རེར་མེལ་ལེ་༢༥ ཙམ་རེ་གོམ་བགྲོད་ཀྱིས་ནིའུ་ཡོག་ཏུ་ཕེབས་རྒྱུ་ཡིན་པ་རེད། ཁོང་ཚོར་རོགས་པ་བྱེད་མཁན་ནི་ཁོང་ཚོའི་གྲོགས་པོ་རྙིང་པ་ཝི་ཏི་ནམ་པ་ མཚན་ལ་མཐའ་ཡས་ཞུ་བ་ཞིག་ཡོད་པ་རེད་འདུག
འཆར་གཞི་ལྟར་ན། ཁོང་ཚོས་སུམ་ཅུའི་དུས་དྲན་ཉིན་རྒྱལ་ས་ཝ་ཤིན་ཊོན་དུ་ཡོད་པའི་རྒྱ་ནག་གི་གཞུང་ཚབ་ཁང་གི་མདུན་གཞོན་ནུ་ཚོགས་པ་དང་། བོད་རང་བཙན་སློབ་ཕྲུག་ཚོགས་པ། དེ་བཞིན་དེ་གའི་ཚོགས་པ་གཞན་ཁག་གི་རྒྱབ་སྐྱོར་དང་འབྲེལ་མགོ་འཛུགས་ཞུ་རྒྱུ་ཡིན་པ་དང་། ཉིན་བཅུ་ཡི་རྗེས་སུ་ནིའུ་ཡོག་ཏུ་ཡོད་པའི་རྒྱ་ནག་གཞུང་ཚབ་ཁང་གི་མདུན་དུ་མཇུག་སྡོམ་ཞུ་རྒྱུ་ཡིན་འདུག
རྔ་བ་རབ་བརྟན་ལགས་ཀྱིས་ནན་ཏན་དུ་འགྲེལ་བརྗོད་བྱས་དོན་ལ། ཐེངས་འདིའི་གོམ་བགྲོད་ཀྱི་དམིགས་ཡུལ་གལ་ཆེ་བ་གཅིག་ནི་སྤུན་ཟླ་ཕོ་མོ་༡༠༧ ཙམ་གྱིས་སྐུ་ལུས་ཞུགས་མེར་ཕུལ་ཏེ་བོད་དོན་འཐབ་རྩོད་གནང་བ་དེ་དག་ལ་རྗེས་དྲན་དང་དེ་དག་གི་དགོངས་བཞེད་སྒྲུབ་རྒྱུའི་ཆེད་དུ་ཡིན་ཞེས་གསུངས་སོང་།
ཐེངས་འདིའི་གོམ་བགྲོད་ཀྱི་གནས་ཚུལ་མཁྱེན་འདོད་ཡོད་ཚེ། ཁོང་ཚོས་བསྐྲུན་པའི་དྲ་རྒྱ་ www.rangzenwalk.wordpress.com ཞེས་པ་ལ་ཉིན་རེའི་ལས་དོན་སྙན་ཐོ་འགོད་རྒྱུ་ཡིན་པ་མ་ཟད། འབྲེལ་མཐུད་པ་རྔ་བ་རབ་བརྟན་རྒྱ་མཚོའི་ཁ་པར་ཨང་གྲངས་ 202-412-4104 བཅས་ཡིན་འདུག
