ནང་ཁུལ་ལ་བཤད་འདོད་པའི་སྐད་ཆ་ཁ་ཤས།

མིག་མི་འཛུམ།

ཁ་སང་གསུམ་ཅུའི་དུས་དྲན་གྱི་ཉིན་མོར། ཤར་ཕྱོགས་ཁུག་རྟ་ཟེར་བ་ཞིག་གིས་དགྲ་བོའི་དར་ཆ་འཁུར་སོང་བ་དང་དེ་སྔོན་གཞོན་ལྷན་གྱིས་དགྲ་བོའི་དར་ཆ་མེར་བསྲེགས་བཏང་བ་གཉིས་ཀར་ཧ་ལས་ཤིང་ཧོན་འཐོར་དགོས་དོན་ཅི་ཡང་མེད། དོན་དག་གི་ངོས་ནས་རྩོད་མི་དགོས་པའི་གནད་དོན་ཞིག་རེད། ང་ཚོས་ངེས་པར་དུ་འཐབ་རྩོད་བྱ་དགོས་པ་དེ་༸གོང་ས་མཆོག་བོད་དུ་གདན་འདྲེན་ཞུ་རྒྱུ་དང་བོད་མི་རིགས་ལ་རང་དབང་ཞིག་འཐོབ་དགོས་པ་དེ་ཡིན། དེའི་ཕྱིར་རྣམ་པ་འདྲ་མིན་གྱི་སྟེང་ནས་འཐབ་རྩོད་བྱ་དགོས་པའང་གནས་ལུགས་ཤིག་སུས་མ་རེད་ཟེར་ཕོད། ངས་བལྟས་ན་རང་རེའི་སྤྱི་ཚོགས་ནང་ད་ལྟའི་དུས་ཚོད་འདི་ལ་དགྲ་བོའི་ལས་འགན་འཁུར་མཁན་རེ་ཟུང་སིམ་འཛུལ་བྱས་མེད་དམ་སྙམ།

དེ་ནི་ལྟ་བ་དང་ལངས་ཕྱོགས་མི་མཐུན་པའི་ལས་འགུལ་འདི་གཉིས་ཀྱི་བར་དུ་ཤགས་འགྱེད་དང་རྩོད་གླེང་བྱེད་མཁན་དང་། ཆེད་དུ་མངགས་ནས་དེ་དག་གི་སྐོར་ནས་བསམ་ཚུལ་མི་མཐུན་པ་བཟོས་ནས་འུ་ཅག་གི་ཕྱོགས་སོ་སོའི་འཐབ་རྩོད་ཀྱི་སྟོབས་ཤུགས་ཆུང་དུ་གཏོང་མཁན་དེ་དག་རེད། ཁ་སང་དེ་རིང་དྲ་རྒྱ་དང་ངོ་དེབ་སོགས་སུ་བཟང་ངན་གྱི་བསམ་ཚུལ་བཤད་ཁུལ་གྱིས་སྤྱི་ཚོགས་དཀྲུགས་ནས་མི་མང་གི་སེམས་ལ་རྨ་ཁ་བཟོ་མཁན་ཉུང་ཉུང་མིན་པ་མཐོང་ནས་བདག་ལ་ལྡོག་ཕྱོགས་ཀྱི་བློ་འཚབ་འདི་སྐྱེས་སོང་བས་ན། ལས་འགུལ་བ་དང་འཐབ་རྩོད་པ་སུ་ཡིན་གར་བཞུགས་དག་གིས་དོན་མེད་ཀྱི་རྙོག་ཟིང་འདི་དག་ལ་ཅི་བས་ཀྱང་རྣ་བ་མ་གཡོར་རོགས་ཞུ་རྒྱུ་ཡིན།

ང་ཚོས་ཉན་དགོས་པ་དགྲ་བོའི་ཕྱོགས་དང་རྩོད་དགོས་པ་དགྲ་བོའི་ཕྱོགས་ན་ཡོད་ལ། ང་ཚོས་ཁ་རྩོད་དང་རྒྱལ་ཕམ་གྱི་གནད་དོན་ཞིག་ཐག་གཅོད་དགོས་ནའང་དགྲ་བོ་དང་ཉེ་བར་བཅར་དགོས། དེ་ལྟ་མ་ཡིན་པར་ནང་ཁུལ་གྱི་ཁབ་དང་སྐུད་པ་ལྟ་བུའི་ཤགས་འགྱེད་དང་རྩོད་གླེང་ནི་རང་གིས་རང་ཉིད་འཕོང་བར་བྱེད་པ་ལས་མ་འདས་པ་ཚང་མའི་སེམས་ལ་ཉར་རོགས། ང་ཚོའི་འཐབ་རྩོད་ཁ་དང་དགྲ་བོའི་འཐབ་རྩོད་ཁོག་ན་ཡོད་སྟབས། ངྷ་སའི་རི་གྲོང་འདིར་དགྲ་བོས་གསང་སྐུད་ཕྲ་མོ་ཞིག་འཐེན་ནས། དངུལ་དང་མིའི་ཡོ་ལང་ཤུགས་ཆེ་ཙམ་ཡོད་ངེས་ན། ཁོང་དག་གི་ཁ་ཤུགས་དབང་ཤུགས་ཀྱི་འོག་ཏུ་མི་འགྲོ་རྒྱུ་དེ་ང་ཚོའི་སྤྱི་ཡོངས་ཀྱིས་ཤེས་དགོས་པ་དང་། ང་ཚོའི་ངོས་ནས་རང་བཙན་དང་དབུ་མ་གང་ཡིན་རྩོད་གླེང་གིས་ཐག་གཅོད་བྱ་དགོས་པ་ཞིག་མིན།

མ་གཞི་གནད་དོན་འདིའི་ཡོང་ས་གཙོ་བོ་དེ་གླིང་ཚ་ཚེ་བརྟན་རྡོ་རྗེའི་འཐབ་རྩོད་ཀྱི་སྟེང་ནས་འོང་བ་ཞིག་ཡིན་ནའང་། ཁོས་འཁུར་བའི་དགྲ་བོའི་རྒྱལ་དར་དེར་དེ་འདྲའི་སྡང་དགོས་དོན་ཅི་ཡིན་བདག་གིས་ད་དུང་མ་ཤེས། བདག་གི་ངོས་ནས་གླིང་ཚ་བས་དགྲ་བོ་ལ་ཁ་གཏད་ནས་འགྲོ་ཡི་ཡོད་པ་དང་དགྲ་བོ་དང་ མཉམ་དུ་འུ་ཅག་ལ་དགོས་པ་དེ་རྩོད་ལེན་བྱེད་ཀྱི་ཡོད་སྟབས། དེ་ནི་མི་འོས་པ་ཞིག་མ་རེད་ཀྱང་འདོད་མོད། གལ་སྲིད་དེས་བོད་ཀྱི་རྩ་དོན་ལ་གནོད་ཀྱི་ཡོད་ན་མི་སྒེར་གཅིག་གིས་ནོར་བ་ཡིན་སྟབས། སྤྱི་ཚོགས་ནང་ཁུལ་ལ་འཕོང་དཀྲུག་འོང་གཞི་ལྟ་བུར་འགྱུར་དགོས་དོན་མེད། ཤར་ཁུག་ཀྱང་དེ་ལྟར་ཡིན།

ད་ལྟའི་དུས་ཚོད་འདི་ནི་ང་ཚོ་ཚང་མས་རིག་པ་བསྒྲིམ་དགོས་པའི་དུས་ཤིག་ཡིན། རྒྱུ་མཚན་ནི་གཞིས་ལུས་སྤུན་ཟླ་ཚོའི་སྙིང་སྟོབས་དར་བའི་སྒང་ཡིན་པ་དང་། ཁོང་ཚོའི་རེ་བ་དང་ཡིད་ཆེས་ཆ་ཚང་བོད་ཕྱི་ལོགས་ཡིན་སྟབས། འདི་ཕྱོགས་ནས་དོན་མེད་རྩོད་གླེང་གི་ནང་འཁྲུག་གིས་བགས་ཆགས་ངན་པ་ཐེབས་ཚེ། ཁོང་ཚོའི་སེམས་ཤུགས་ཆག་ངེས་ན་དེ་ནི་དགྲ་བོའི་ངོས་ནས་འབད་བརྩོན་བྱེད་ཀྱིན་པའི་རེ་བ་ཉག་གཅིག་བུ་དེ་ཡིན། དེའི་སྟབས་ཀྱིས་ལས་འགུལ་བ་དང་དཔྱད་བརྗོད་པ། ལྷག་པར་དུ་སྤྱི་ཚོགས་སྟེང་གི་མི་ཚང་མས་གཟབ་གཟབ་གནང་རྒྱུ་དེ་ཁ་ཚ་དགོས་གཏུགས་ཡིན། ༸གོང་ས་མཆོག་གིས་ཀྱང་བོད་མི་ཞིག་ཡིན་ཕྱིན་མི་རེའི་ངོ་རེ་ལ་འགན་རེ་ཡོད་སྟབས་བོད་སྤྱི་བའི་རྩ་དོན་ཐད་འགན་རེ་འཁུར་དགོས་པའི་བཀའ་སློབ་དེ་ཡང་དང་བསྐྱར་དུ་གནང་ཡོད་པ་བཞིན། ཆེ་བས་ཆེ་བ་དང་ཆུང་བས་ཆུང་བ་ལྟར་རང་རང་གིས་ལས་དོན་ཞིག་མི་འཁྱོངས་ནའང་བསམ་པ་དཀར་བོ་དང་། ནང་ཁུལ་རྡོག་རྩ་ཆིག་སྒྲིལ་ཡོང་ཐབས་ཤིག་ལ་ཅི་བས་འབད་བརྩོན་གནང་རོགས།

༢༠༡༣ ། ༣ ། ༡༡ ། ལ།