བྱམས་པ་ཕུན་ཚོཊ་གོ་གནས་འཕར།

ད་ལྟ་རང་གནས་ཚུལ་འབྱོར་གསལ་ལ། དེ་རིང་ཕྱི་ཟླ་ ༣ ཚེས་ ༡༤ ཉིན་གྱི་ཞོགས་པར། སྐབས་བཅུ་གཉིས་པའི་མི་དམངས་འཐུས་མིའི་ཚོགས་ཆེན་ཐོག བོད་རང་སྐྱོང་ལྗངས་དམར་ཤོག་ཚོགས་པའི་ཚོགས་གཞོན་བྱམས་པ་ཕུན་ཚོགས་ད་རེབ་རྒྱལ་ཡོངས་མི་དམངས་འཐུས་ཚོགས་ཀྱི་ཚོགས་གཙོ་གཞོན་པར་འདེམས་བསྐོ་བྱས་འདུག

རྒྱལ་ཡོངས་མི་དམངས་འཐུས་ཚོགས་ཀྱི་ཚོགས་གཙོ་གཞོན་པ་༼ཨུ་ཡོན་ཀྲང་གཞོན་པ༽ཞེས་པ་འདི་ནི། ད་ལྟའི་བོད་ནང་གི་བོད་རིགས་ཁྲོད་རྒྱ་གཞུང་གི་གོ་གནས་ཐོ་ཤོས་རག་མཁན་དེ་ཆགས་ཡོད། དེ་སྔོན་གོ་གནས་འདིའི་ཐོག་ང་ཕོད་ངག་དབང་འཇིགས་མེད་དང་ཀུན་གཟིགས་པཎ་ཆེན་རིན་པོ་ཆེ་མཆོག འཕགས་པ་ལྷ། རག་སྡིས་སོགས་བསྐོས་མྱོང་ཡོད་པ་རེད།

པེ་ཅིན་དུ་རྒྱལ་ཡོངས་མི་དམངས་འཐུས་མིའི་ཚོགས་ཆེན་འཚོགས་བཞིན་པའི་སྐབས་དང་བསྟུན་ཏེ། ཟླ་འདིའི་ཕྱི་ཚེས་ ༨ ཉིན་རྒྱལ་ཡོངས་མི་མང་འཐུས་ཚོགས་ཀྱི་བོད་ལྗོངས་འཐུས་ཚབ་ཚོགས་པའི་ཚོགས་འདུའི་སྟེང་། བྱམས་པ་ཕུན་ཚོགས་ཀྱིས་ “ བོད་ལྗོངས་མིག་སྔར་རྒྱུན་མཐུད་ངང་གཏན་འཇགས་ཡུན་གནས་ཀྱི་ཕྱོགས་སུ་འཕེལ་རྒྱས་འགྲོ་བཞིན་ཡོད། བོད་ལྗོངས་མི་རིགས་ཁག་སོ་སོའི་མང་ཚོགས་ཀྱིས་གཏན་འཇགས་དང་འཆམ་མཐུན་གྱི་ཁོར་ཡུག་ཁྲོད་འཚོ་བ་རོལ་འདོད་པ་རེད། མཐུན་སྒྲིལ་གཏན་འཇགས་ནི་བོད་ལྗོངས་ཀྱི་དགེ་ཡིན་ལ། ཁ་བྲལ་ཟང་བསླང་ནི་གོད་ཆག་ཡིན་པ་རིམ་བཞིན་དངོས་འཛིན་ཐོབ་བཞིན་ཡོད། ནུབ་ཕྱོགས་ནུས་པའི་གཏོར་བརླག་གིས་བོད་ལྗོངས་མང་ཚོགས་ཀྱི་གཏན་འཇགས་སྲུང་སྐྱོབ་བསམ་བློར་གནོད་པ་ཐེབས་ཡོད” ཅེས་བརྗོད་འདུག

ཕྱི་ལོ་ ༢༠༡༠ ཟླ་ ༡  ཚེས་ ༡༢ ཉིན་བོད་རང་སྐྱོང་ལྗོངས་མི་དམངས་འཐུས་ཚོགས་སྐབས་དགུ་བའི་ཚོགས་ཐེངས་གསུམ་པའི་ཐོག སྐབས་དེའི་བོད་རང་སྐྱོང་ལྗོངས་ཀྱི་སྲིད་འཛིན་བྱམས་པ་ཕུན་ཚོགས་དང་བོད་རང་སྐྱོང་ལྗོངས་མི་དམངས་འཐུས་མིའི་ཚོགས་ཆེན་གྱི་རྒྱུན་ལས་ཚོགས་གཙོ་ལེགས་མཆོག་གཉིས་ལས་ཁུར་རྩ་དགོངས་ཞུས་པའི་སྐོར་གྱི་གྲོས་འཆར་གཏན་འབེབས་བྱས་ཡོད་སྐོར་གྱི་གནས་ཚུལ་ཐོན་ཡོད།

སྐབས་དེའི་གནས་ཚུལ་རྒྱ་ནག་གཞུང་འབྲེལ་ཞིན་ཧྭ་གསར་ཁང་དང་བོད་ལྗོངས་ཉིན་རེའི་ཚགས་པར་གྱི་རྒྱ་ཡིག་པར་ངོས་སུ་ “དམངས་འཐུས་དང་སྲིད་གཞུང་གི་ཆེས་མཐོའི་དཔོན་རིགས་རྩ་དགོངས་སུ་བཏང་སྟེ་བོད་རང་སྐྱོང་ལྗོངས་ཀྱི་མི་སྣའི་ལས་གནས་བརྗེ་སྤོར་བྱས་པ་”  ཞེས་རྣོ་ངར་ཅན་གྱི་ཁ་བྱང་བཀོད་ཡོད་པ་མ་ཟད། ཁོ་གཉིས་ཀྱི་ལས་གནས་རིམ་འཕར་གྱི་མི་ཚེ་ལོ་རྒྱུས་དང་བཅས་པ་བཀོད་ཡོད། གཞན། བོད་རང་སྐྱོང་ལྗོངས་ཀྱི་བོད་ཡིག་གསར་ལམ་ཁག་ཏུ་“ལེགས་མཆོག་དང་བྱམས་པ་ཕུན་ཚོགས་རྣམ་གཉིས་ཀྱིས་ལས་ཁུར་རྩ་དགོངས་ཞུས་པ་” ཞེས་གུས་ཉམས་དོད་པའི་ཁ་བྱང་བཀོད་ཡོད།

བྱམས་པ་ཕུན་ཚོགས་ནི་ ༡༩༤༧ ལོར་ཆབ་མདོ་རུ་སྐྱེས་པ་དང་། ༡༩༧༤ ལོར་དམར་ཤོག་ཚོགས་པར་ཞུགས། ༢༠༠༨ ལོའི་ཟླ་ ༡ པའི་ཚེས་ ༢༢ ཉིན་བོད་རང་སྐྱོང་ལྗོངས་ས་གནས་སྲིད་གཞུང་གི་སྲིད་འཛིན་དུ་བསྐོས་ཡོད།

གསར་འགོད་པ། དོན་འགྲུབ་བཀྲ་ཤིས།