དེ་རིང་ཕྱི་དྲོར་སླར་ཡང་རྔ་པ་ཀིརྟི་དགོན་པའི་གྲྭ་བློ་བཟང་ཐོགས་མེད་ལགས་ཀྱིས་རྒྱ་གཞུང་ལ་ངོ་རྒོལ་གནང་སྟེ་རང་ལུས་མེར་བསྲེགས་ཀྱིས་སྐུ་གྲོངས་འདུག
བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་དང་ཀ་ཉག་ཚེ་རིང་གཉིས་ཀྱིས་གནས་ཚུལ་བཏང་འབྱོར་ལ། དེ་རིང་ཕྱི་དྲོའི་བོད་ནང་གི་ཆུ་ཚོད་ ༢ ། ༤༠ ཙམ་ལ་བོད་མདོ་སྨད་རྔ་པ་བོད་རིགས་རང་སྐྱོང་ཁུལ་རྔ་པ་རྫོང་ཁྲིན་ཀན་ཡུལ་ཚོའི་ཕྱུགས་ལས་གོང་མའི་རུ་ཆེན་གཉིས་པའི་རོགས་ཕྲུག་ཚང་གི་རྔ་པ་ཀིརྟི་དགོན་པའི་གྲྭ་བློ་བཟང་ཐོགས་མེད། རང་ལོ་ ༢༨ ཡིན་པ་ཁོང་གིས་རྒྱ་གཞུང་གིས་བོད་ཐོག་འཛིན་པའི་ནོར་འཁྲུལ་ཅན་གྱི་སྲིད་བྱུས་ལ་ཞུ་འབོད་ཆེད་རང་ལུས་མེ་བསྲེགས་གནང་སྟེ་སྐུ་གྲོངས་ཡོད་འདུག
དེ་ཡང་རྔ་པ་ཀིརྟི་དགོན་གྱི་གླིང་གི་ནུབ་ཕྱོགས་སུ་ཁོང་གི་བཞུགས་ཤག་ཡོད་པའི་སྒོ་ནས་ལུས་ལ་ས་སྣུམ་མང་བོ་བྱུག་ཤིང་ལག་ཏུ་ཆོས་དར་བཟུང་ནས་སྐུ་ལུས་མེ་རུ་བསྒྲོན་ཏེ་དགོན་པའི་ནུབ་སྒོའི་ཕྱོགས་སུ་རྒྱུག་ཡོད་པ་དང་། སྒོ་ཆེན་འགྲམ་དུ་མ་སླེབས་ཙམ་ལ་སར་འགྱེལ་ཡོད་ཅིང་། སྐབས་དེར་གྲྭ་པ་དང་མི་མང་བཅས་མང་བོ་འབྱོར་ནས་ཁོང་རྔ་པ་རྫོང་མི་དམངས་སྨན་ཁང་དུ་ཁྱེར་ཡོད་ཀྱང་། དུས་ཡུན་རིང་པོ་མ་འགོར་བར་སྐུ་གྲོངས་ཡོད་པ་དང་། ཁོང་གིས་རང་ལུས་མེར་བསྲེགས་གནང་སྐབས་སྐད་འབོད་ག་རེ་གནང་ཡོད་མེད་ཤེས་རྟོགས་བྱུང་མི་འདུག
སྨན་ཁང་དུ་འབྱོར་མཚམས་དམག་མི་དང་ཉེན་རྟོག་པ་འབོར་ཆེན་སླེབས་ནས་ཁོང་གི་སྐུ་ཕུང་བཙན་འཕྲོགས་ཀྱིས་འབར་ཁམས་སུ་ཁྱེར་ཡོད་འདུག ཁོང་གི་ཕ་མིང་ལ་རོགས་ཕྲུག་དང་། མ་མིང་ལ་དེ་པོ་ཟེར་ཞིང་དམ་པ་ཁོང་ཆུང་དུས་ནས་རྔ་པ་ཀིརྟི་དགོན་གྱི་ཆོས་སྒོར་ཞུགས་ཏེ་ད་སྐབས་ཕར་ཕྱིན་འཛིན་གྲྭར་སླེབས་ཡོད་པ་དང་། ནམ་རྒྱུན་ཀུན་སྤྱོད་ལེགས་ཤིང་སློབ་གཉེར་ལ་དོ་སྣང་ཆེན་པོ་ཡོད་མཁན་ཞིག་ཡིན་འདུག ཁོང་ལ་ཤུལ་དུ་ཕ་མ་གཅིག་པའི་སྲིང་མོ་གཅིག་དང་སྤུན་གསུམ་བཅས་ཁྱོན་ནང་མི་དྲུག་ཡོད།
དེ་རིང་སྟེ་ ༣།༡༦ ནི་ཕྱི་ལོ་ ༢༠༠༨ ལོར་བོད་ས་ཡོངས་སུ་ས་བྱི་ཞི་རྒོལ་ཆེན་མོ་བྱུང་སྐབས་རྔ་པ་ནས་བོད་མི་མང་པོ་ ཞིག་དམར་གསོད་བྱས་པའི་ཉིན་མོར་ཁེལ་ཡོད་པ་དང་། ལོ་དེ་ནས་བཟུང་ལོ་རྟག་པར་རྔ་པ་མི་མང་གིས་དུས་ཚེས་དེར་རྣམ་པ་འདྲ་མིན་གྱིས་སྒོ་ནས་རྗེས་དྲན་སྲུང་གཙི་བྱེད་བཞིན་ཡོད་འདུག
ལྷག་པར་དུ་ཕྱི་ལོ་ ༢༠༡༡ ཟླ་ ༣ ཚེས་ ༡༦ ཉིན་རྒྱལ་གཅེས་དཔའ་བོ་གྲྭ་བློ་བཟང་ཕུན་ཚོགས་ལགས་དང་། ཕྱི་ལོ་ ༢༠༡༢ ཟླ་ ༣ ཚེས་ ༡༦ ཉིན་རྒྱལ་གཅེས་དཔའ་བོ་གྲྭ་བློ་བཟང་ཚུལ་ཁྲིམས་ལགས་གཉིས་ཀྱིས་རང་ལུས་མེར་བསྲེགས་བཏང་སྟེ། ལོ་སོ་སོའི་གསུམ་པའི་བཅུ་དྲུག་གི་ཉིན་མོ་རྗེས་དྲན་གྱིས་རྒྱ་གཞུང་ལ་ངོ་རྒོལ་བྱས་ཡོད་འདུག
རང་དབང་གི་མཆོད་པ་ནི་མཆོད་པའི་མཆོག་གོ
རང་རེའི་ཆབ་སྲིད་རྩོད་ལེན་ཀྱིས་ཆེད་དུ་རང་ལུས་མེ་ལ་བསྲེག་རྒྱུ་དེ་ནི། དེ་བཞིན་གཤེགས་པ་དང་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་མཆོད་པའི་ལས་ཀྱི་ཕྱིར་བདག་གི་ལུས་ལ་མེ་འབར་བར་བྱས་པ་རེད་དམ།
མདོ་<<དམ་ཆོས་པད་དཀར་>>གྱི་ལེའུ་ཉི་ཤུ་རྩ་གཉིས་པ་<སྨན་གྱི་རྒྱལ་པོའི་སྔོན་གྱི་སྦྱོར་པ>ཞེས་པའི་ནང་། “དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བ་དེ་༌༌རང་གི་ལུས་ལྷའི་རས་ཀྱིས་ཀུན་ཏུ་དཀྲིས་ནས་འབྲུ་མར་གྱིས་ཞེན་པར་བྱས་ཏེ་༌༌དེ་བཞིན་གཤེགས་པ་དང་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་མཆོད་པའི་ལས་ཀྱི་ཕྱིར་བདག་གི་ལུས་ལ་མེ་འབར་པར་བྱས་སོ།། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བའི་ལུས་ཀྱི་མར་མེ་འབར་བ་དེའི་འོད་ཀྱིས། འཇིག་རྟེན་གྱི་ཁམས་གང་གཱའི་ཀླུང་བརྒྱད་ཅུའི་བྱེ་མ་སྙེད་ཁྱབ་པར་གྱུར་ཏེ། འཇིག་རྟེན་གྱི་ཁམས་དེ་དག་གི་སངས་རྒྱས་བཅོམ་ལྡན་འདས་གང་གཱའི་ཀླུང་བརྒྱད་ཅུའི་བྱེ་མ་སྙེད་ཐམས་ཅད་ཀྱིས་ལེགས་སོ་ཞེས་བྱ་བ་བྱིན་ཏེ། ལེགས་སོ་ལེགས་སོ། །རིགས་ཀྱི་བུ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་བརྩོན་འགྲུས་རྩོམ་པ་ཡང་དག་པའོ།། འདི་ནི་དེ་བཞིན་གཤེགས་པ་ལ་མཆོད་པ་དང་ཆོས་ལ་མཆོད་པ་ཡང་དག་པ་སྟེ། མེ་ཏོག་དང་། བདུག་པ་དང་། སྤོས་དང་། ཕྲེང་བ་དང་། བྱུག་པ་དང་། ཕྱེ་མ་དང་། ན་བཟའ་དང་། གདུགས་དང་། རྒྱལ་མཚན་དང་། ལྷའི་བ་དན་གྱིས་མཆོད་པ་དང་། ཟང་ཟིང་གིས་མཆོད་པ་དང་། ཙན་དན་སྦྲུལ་གྱི་སྙིང་པོས་མཆོད་པ་ནི་དེ་ལྟ་མ་ཡིན་ནོ། །རིགས་ཀྱི་བུ་སྦྱིན་པ་འདི་ནི་མཆོག་སྟེ། རྒྱལ་སྲིད་ཡོངས་སུ་གཏོང་པའི་སྦྱིན་པ་ནི་དེ་ལྟ་མ་ཡིན་ནོ།། བུ་དང་ཆུང་མ་ཕངས་པ་ཡོངས་སུ་གཏོང་བའི་སྦྱིན་པ་ཡང་དེ་ལྟ་མ་ཡིན་ནོ།། རིགས་ཀྱི་བུ་གང་བདག་གི་ལུས་གཏོང་བའི་ཆོས་ཀྱི་མཆོད་པ་འདི་ནི་མཆོད་པ་ཁྱད་པར་ཅན་ནོ། །དམ་པའོ། །མཆོག་གོ། །ཕུལ་ལོ། །གྱ་ནོམ་པའོ། །༌༌༌སངས་རྒྱས་བཅོམ་ལྡན་འདས་དེ་དག་གིས་ཚིག་དེ་སྐད་ཅེས་གསུངས་ནས་དེ་ནས་ཅང་མི་གསུར་པར་གྱུར་ཏོ།།”
ཨོཾ་མ་ཎི་པདྨེ་ཧཱུྃ། ཨོཾ་མ་ཎི་པདྨེ་ཧཱུྃ། ཨོཾ་མ་ཎི་པདྨེ་ཧཱུྃ། ༢༠༡༡ ནས་བཟུང་སྟེ་མུ་མཐུད་དུ་བོད་མདོ་ཁམས་ས་ཁུལ་དུ་རང་ལུས་མེར་བསྲེག་བཏང་སྟེ་རྒྱ་ནག་གི་སྲིད་གཞུང་ངོ་རྒོལ་དང་བོད་བསྟན་སྲིེད་ལ་ཕན་པའི་རེ་བ་བཅང་ཀྱིན་ཡོད། དམ་པའི་ཆོས་ཕྱོགས་ནས་བསམ་ན། རང་གིས་རང་ཉིད་བསད་ན་མི་གསོད་པའི་སྡིག་པ་ཡོད་ཚུལ་ཉན་ཐོས་ཐེགས་པ་ནས་བཟུང་སྟེ་རྡོ་རྗེ་ཐེགས་པ་ལ་མ་ཐུག་གི་བར་དུ་གསལ་བོར་གསུངས་ཡོད་པ་དེ་རེད། འཇིག་རྟེན་གྱི་ཕྱོགས་ནས་བཤད་ན། འདི་ནི་ཨུ་ཐུགས་ཐབས་སྡུག་གི་ལས་ག་ཞིག་ལས་དཔའ་མཛངས་ལྡན་པའི་མི་རིགས་ཞིག་གི་བྱ་བ་གཞི་ནས་མིན་ལ། གཞན་དོན་འབའ་ཞིག་གི་སྒོ་ནས་རང་སྲོག་དོར་ན་བྱང་སེམས་འཕགས་བའི་མཛད་སྤྱོད་དུ་འགྱུར་སྲིད་ནའང་། འདི་རྣམས་དེ་ལྟར་བསྒྲུབ་ཐུབ་རྒྱུ་དཀའ།
ང་ཚོའི་ཁ་གཏད་བྱེད་ཡུལ་དེ་ནི་ངོ་ཚ་དང་ཁྲེལ་མེད་པས་སྲིད་གཞུང་ཞིག་ཡིན་ན། འདིའི་ནི་བྱ་བ་འདི་ལ་གྲུབ་འབྲས་ལེགས་པོ་གང་ཡང་གནང་མི་སྲིད་ལ། ཡང་མི་འགའ་རེའི་གོང་ས་མཆོག་ཕ་ཡུལ་དུ་ཕེབས་ཐུབ་པ་ལ་རེ་སྨོན་ཞིག་གི་ཚུལ་དུ་རང་ལུས་མེ་བསྲེག་བཏང་ཡོད་ཚུལ་བཤད་པ་འདི་ནི། ཆེས་ནོར་འཁྲུལ་
ཚབ་ཆེན་ཞིག་རེད། བོད་མི་རྣམས་ཀྱིས་འདི་ལྟར་བྱས་ན། ཁོང་གིས་ཐུགས་བཞེད་མི་འགྲུབ་པ་དང་སྐུ་ཚེའི་བར་ཆད་དུ་འགྱུར་བའི་ཉེན་ཁ་ཡོད་པ་ལས་ཕན་ཐོག་གང་ཡང་མེད་ངེས། བཙན་གཤོལ་གཞུང་གིས་འདི་ལ་བསྟོད་བསྔགས་དང་བསྔོ་སྨོན་རེ་བྱེད་ཁུལ་བྱེད་རྒྱུ་འདི་ལ་ནི་དངོས་གནས་ན་བཤད་མི་སྒེར་དང་ཡང་
ཆབ་སྲིད་ཀྱི་ལྟ་བ་ཉི་འཚེ་བ་ལས་གང་མ་མཐོང་། ཁོང་ཚོ་ནི་རང་དབང་ལུང་པར་བསྡད་ནས་བོད་རང་གི་ཆོས་དང་རིགས་གནས་རྒྱུན་སྐྱོང་བྱེད་རྒྱུ་ཕར་ཞོག ཐ་ན་བོད་སྐད་དང་བོད་ཡིག་ཙམ་ལ་ཡང་དོན་གཉེར་མེད་པ་འདི་མཐོང་ཆོས་མངོན་གྱུར་རེད། ད་དུང་ཡང་ཁ་ནས་བོད་དོན་འབའ་ཞིག་མ་གཏོགས་མེད་ཁུལ་བྱེད་རྒྱུ་
འདི་ནི་རང་གི་རྐུབ་སྟེགས་མཐོར་འདེགས་ཀྱི་ཆེད་དུ་རེད།
དེས་ན་གཞི་ལུས་སྤུན་ཟླ་རྣམས་ཀྱིས་དལ་འབྱོར་གྱི་མི་ལུས་ཆུད་གཟོན་དུ་མི་གཏོང་བར་ཆོས་དང་བོད་ཀྱི་རིགས་གནས་ལ་ཧུར་བརྩོན་འོག མ་འོངས་པའི་མདུན་ལམ་བཙལ་རོགས་ཞེས་སྙིང་ནས་འབོད་བསྐུལ་ཞུས་པ་ཡིན།
ཨོཾ་མ་ཏྲི་མུ་ཡེ་ས་ལེ་འདུ། ཨོཾ་མ་ཏྲི་མུ་ཡེ་ས་ལེ་འདུ། ཨོཾ་མ་ཏྲི་མུ་ཡེ་ས་ལེ་འདུ། ཨོཾ་མ་ཏྲི་མུ་ཡེ་ས་ལེ་འདུ། ཨོཾ་མ་ཏྲི་མུ་ཡེ་ས་ལེ་འདུ། ཨོཾ་མ་ཏྲི་མུ་ཡེ་ས་ལེ་འདུ། ཨོཾ་མ་ཏྲི་མུ་ཡེ་ས་ལེ་འདུ། རྒྱལ་གཅེས་དཔའ་བོ་རྒྱལ་གྱུར་ཅིག