འབྲས་ལྗོངས་སྤྱི་ཡོངས་ཀྱི་ཆ་ནས་ནང་ཆོས་ཀྱི་ཤུཊ་རྐྱེན་ཆེན་པོ་ཡོད།

༸གོང་ས་མཆོག་གིས་འབྲས་ལྗོངས་རཱ་ཝང་ལར་མཐོ་ཚད་ཕི་ཊི་ ༡༣༥ ཡོད་པའི་སྟོན་པའི་སྐུ་བརྙན་ཆེན་པོ་ཞིག་ལ་རབ་གནས་དང་ས་གནས་ཏ་ཐཱ་ག་ཐ་སྐྱེད་ཚལ་དབུ་འབྱེད་གནང་ཡོད་འདུག

༸གོང་ས་མཆོག་གིས་ལྡི་ལིའི་མཛད་འཆར་ཁག་གྲུབ་རྗེས། འབྲས་ལྗོངས་མངའ་སྡེ་གཞུང་གིས་གསོལ་འདེབས་ཞུས་དོན་ལྟར། ཕྱི་ཚེས་ ༢༤ ཉིན་ལྡི་ལི་ནས་མཁའ་ལམ་བརྒྱུད་ (Bagdogra) པག་ཌོག་རའི་གནམ་ཐང་དུ་ཞབས་སོར་འཁོད་ཡོད་ཅིང་། དེ་གར་འབྲས་ལྗོངས་གཞུང་གི་དགོན་སྣེ་ལྷན་ཁང་གི་དྲུང་ཆེས་གཙོས་མངའ་སྡེའི་ཡུལ་སྐོར་སྤྲོ་འཆམ་དྲུང་ཆེ། ཀ་རྡོར་སྒང་གསུམ་མི་དམངས་བཅས་ཀྱིས་ཕེབས་བསུ་ཞུས་ཡོད་པ་དང་། གནམ་ཐང་ནས་ཐད་འཕུར་གནམ་གྲུ་བརྒྱུད་རཱ་ཝང་ལ་ས་གནས་སུ་ཆིབས་བསྒྱུར་སྐབས། མངའ་སྡེའི་སྤྱི་ཁྱབ་བློན་ཆེན་སྐུ་ཞབས་པཱ་ཝན་ལྕམ་ལིང་མཆོག་གཙོས་མངའ་སྡེའི་གྲོས་ཚོཊ་འཐུས་མི་དང་བློན་ཆེན་རྣམ་པ། སྒེར་རྩེ་རིན་པོ་ཆེ། རིས་མེད་དགོན་སྡེ་ཁག་གི་དགེ་འདུན་པ། བོད་པ་དང་ནང་པའི་ཡུལ་མི། སློབ་ཕྲུག་བཅས་ཀྱིས་ཕེབས་བསུ་ཞུས་འདུག

ཕྱི་ཚེས་ ༢༥ ཉིན་གྱི་སྔ་དྲོ་༸གོང་ས་མཆོག་གིས་འབྲས་ལྗོངས་རཱ་ཝང་ལ་ས་གནས་སུ་མངའ་སྡེ་གཞུང་གིས་གསར་བཞེངས་བྱས་པའི་མཐོ་ཚད་ཕི་ཊི་ ༡༣༥ དང་ས་ཁྱོན་ཨེ་ཀར་ ༢༣ ཙམ་ཡོད་པའི་སྟོན་པའི་སྐུ་བརྙན་ཆེན་པོ་ཞིག་ལ་རབ་གནས་དང་། ཁུལ་དེའི་ཏ་ཐཱ་ག་ཏ་ (Tathagata tsal) སྐྱེད་མོས་ཚལ་ཞེས་པ་དབུ་འབྱེད་དང་འབྲེལ་མང་ཚོགས་ལ། སྟོན་པའི་སྐུ་བརྙན་བྱིན་རླབས་གཟི་འོད་འབར་བ་གསར་བཞེངས་གནང་སྟེ། གནས་ཀྱི་ཁྱད་པར་དང་འབྲེལ་པཎ་ཆེན་རྡོ་རྗེ་གཞོན་ནུའི་ཆོ་གའི་སྒོ་ནས་རབ་གནས་གནང་ཐུབ་པར་སྐལ་བ་བཟང་པོ་བྱུང་ཡོད་པ་དང་། ས་གནས་སེར་སྐྱ་མང་ཚོཊ་ལའང་སེམས་ནང་དགའ་ཚོར་ཆེན་པོ་བྱུང་ཡོད་པ། མངའ་སྡེ་བློན་ཆེན་མཆོག་གིས་སྟོན་པའི་སྐུ་བརྙན་བཞེངས་པར་ཐུཊ་ཁུར་བསྐྱེད་དེ། ཐུབ་པའི་བསྟན་པར་དམིཊ་བསལ་དོ་སྣང་གནང་བར་ཁོང་བཅོམ་ལྡན་འདས་ཀྱི་རྗེས་འབྲང་དགེ་སློང་ཞིག་ཡིན་པའི་ཆ་ནས་ཐུཊ་རྗེ་ཆེ་རྒྱུ་ཡིན་ཞེས་སོགས་གསུངས་ཡོད་འདུག

སྐབས་དེར་༸གོང་ས་མཆོག་གིས་འབྲས་ལྗོངས་ཡུལ་དེ་སྤྱིའི་ཆ་ནས་ནང་ཆོས་ཀྱིས་ཤུཊ་རྐྱེན་ཆེ་བའི་ས་ཁུལ་ཞིག་ཆཊ་ཡོད་སྟབས། མང་ཚོགས་ཀྱིས་ནང་སེམས་ཀྱི་ཡོན་ཏན་ལ་སྔར་ལས་དོ་སྣང་བྱ་དགོས་ཤིང་། སྤྱིར་བཏང་ལུང་པ་གང་ཡིན་རུང་མི་རིཊ་སོ་སོའི་རིག་གཞུང་དང་གོམས་གཤིས་མང་པོ་ཞིག་ས་ཁུལ་དེའི་ཆོས་ལུཊ་ཀྱིས་ཤུཊ་རྐྱེན་ཐེབས་ཡོད་པ་ལྟར། འབྲས་ལྗོངས་ཁུལ་དུའང་གོམས་གཤིས་ནང་ནང་ཆོས་ཀྱིས་ཤུཊ་རྐྱེན་གསལ་པོ་ཐེབས་ཡོད་ཅིང་། འབྲས་ལྗོངས་བའི་ནང་ལ་སྒེར་ངོས་ནས་ནང་པ་དང་ཧིན་རྡུ། ཁ་ཆེ། ཡེ་ཤུ་ཆོས་ལུཊ་སོཊ་ལ་དད་མོས་བྱེད་མཁན་སྣ་ཚོགས་ཡོད་ཀྱང་། འབྲས་ལྗོངས་སྤྱི་ཡོངས་ཀྱི་ཆ་ནས་བཤད་ན་ནང་ཆོས་ཀྱིས་ཤུཊ་རྐྱེན་ཆེན་པོ་ཡོད་པ་ཞིག་དང་། ནང་ཆོས་ལ་དོ་སྣང་བསླེབས་ཏེ་སྟོན་པའི་སྣང་བརྙན་བཞེངས་པ་སོཊ་ནི་ཡུལ་དེའི་ཡུལ་གོམས་གཤིས་ལུཊ་ཇེ་བརྟན་དུ་ཡོང་ཆེད་ཡིན་རུང་། གཙོ་བོ་རིག་གཞུང་དང་སེམས་ཀྱི་ཡོན་ཏན་དེ་དག་ལ་སློབ་སྦྱོང་བྱ་དགོས་པའི་ནན་སྐུལ་གནང་འདུག དེའི་རྗེས་༸གོང་ས་མཆོག་གིས་ཆོས་ཞུ་བ་ ༩༠༠༠ བརྒལ་བར་རྒྱལ་སྲས་ཐོཊ་མེད་ཀྱིས་མཛད་པའི་༼ལག་ལེན་སོ་བདུན་མ༽བཀའ་ཁྲིད་གནང་འདུག

འབྲས་ལྗོངས་སུ་ཆིབས་བསྒྱུར་མ་གནང་གོང་སྟེ། ཕྱི་ཚེས་ ༢༣ ཉིན་༸གོང་ས་མཆོག་གིས་ལྡི་ལིར་རྟེན་གཞི་བྱས་པའི་ཏཱ་ཅི་གསོལ་མགྲོན་ཁང་དུ། ལྡི་ལི་ཁུལ་གྱི་སློབ་གྲྭ་འདྲ་མིན་ནས་བཅར་བའི་སློབ་ཕྲུག་བརྒྱ་ཕྲག་བརྒལ་བར་ཆོས་ལུགས་མཐུན་སྒྲིལ་དང་། གནའ་རབས་རྒྱ་གར་གྱི་འཚེ་མེད་ཞི་བར་གཞི་བཅོལ་བའི་བཟང་སྤྱོད་ཐོག་བཀའ་སློབ་བསྩལ་ཏེ།

ལོ་ངོ་ ༥༠༠༠ གོང་འགྲོ་བ་མིའི་རིཊ་ཀྱིས་རང་བྱུང་ཁོར་ཡུག་གི་འཇིཊ་པ་ལས་སྐྱོབ་ཆེད་ཆོས་ལ་དོ་སྣང་བྱེད་མགོ་བཙུཊ་ཏེ། རང་ལས་ནུས་པ་ཆེ་བ་ཞིག་གིས་རང་ཉིད་སྐྱོབ་ཐུབ་པའི་ཐོག་མའི་བསམ་བློ་རྙེད་ཡོད་ཅིང་། བསམ་བློ་གཏོང་ཕྱོགས་དེ་འགྲོ་བ་མིའི་རིཊ་མ་གཏོགས་འགྲོ་བ་གཞན་སུ་ལའང་ཡོང་ཐུབ་ཀྱི་མེད་པ། འཇིགས་པའི་བསམ་བློ་དེའི་ཐོག་ནས་རིམ་བཞིན་མིའི་རིགས་ཀྱིས་ཉི་མ་དང་ཟླ་བ། རི་བོ་དང་མེ་སོགས་ལ་དད་པ་དང་ཡིད་ཆེས་བྱས་ཏེ་འཇིག་རྟེན་བཀོད་པ་པོ་དཀོན་མཆོག་ཡོད་པར་ངོས་འཛིན་བྱས་ཡོད་སྐོར་གསུངས་འདུག

༸གོང་ས་མཆོག་གིས་མུ་མཐུད་དུ་འཇིག་རྟེན་བཀོད་པ་པོ་འདོད་མཁན་ཚོས་དཀོན་མཆོག་ལ་བྱམས་བརྩེའི་ནུས་པ་མཐའ་ཡས་པ་ཞིག་ཡོད་པར་ཡིད་ཆེས་བྱེད་པ་དང་། རང་གཅེས་འཛིན་གྱི་བསམ་པ་ནི་བྱམས་བརྩེ་དང་སྙིང་རྗེའི་བསམ་པ་ལས་ཡོངས་སུ་ལྡོག་ཟླ་ཆཊ་ཡོད་སྟབས། རང་ཉིད་འཇིག་རྟེན་བཀོད་པ་པོ་དང་ཅི་ཙམ་གྱིས་སེམས་ཐག་ཉེ་བ་དེའི་ཚོད་ཀྱིས་རང་གཅེས་འཛིན་གྱི་བསམ་བློ་ཆུང་དུ་འགྲོ་སྲིད་ཅིང་། ཨ་མའི་ནུ་ཞོར་བརྟེན་ནས་འཚོ་དགོས་པའི་སྲོག་ཆགས་རྣམས་ཆུང་དུས་ནས་མའི་བྱམས་སྐྱོང་ལ་བརྟེན་ནས་ངེས་པར་དུ་འཚོ་དགོས་ཤིང་། བྱམས་བརྩེ་ཞེས་པ་དེ་ནི་ཆོས་ལུགས་ཀྱི་སྐད་ཆ་གང་ཡང་མིན་པར་ལུས་པོའི་འཚར་ལོངས་སྐབས་རང་བཞིན་ལྷན་སྐྱེས་སུ་གྲུབ་པ་ཞིག་ཡིན་པ།  རྒྱ་གར་གནའ་རབས་ཀྱི་ཆོས་ལུགས་ནང་གྲངས་ཅན་པ་དང་གཅེར་བུ་བ། ནང་པ་བཅས་ཀྱིས་འཇིག་རྟེན་བཀོད་པ་པོ་མི་འདོད་པར། རང་རང་གི་བདེ་སྡུག་གི་ཚོར་བ་ལས་འབྲས་ཀྱི་རྣམ་གཞག་ལ་བརྟེན་ནས་ཡོང་བའི་འགྲེལ་བཤད་རྒྱག་བཞིན་པའི་ཁར། གཞན་ལ་གནོད་པ་བྱས་ན་སྡིག་པ་དང་ཕན་པ་བྱས་ན་དགེ་བའི་ལས་ཡིན་པར་ངོས་འཛིན་དང་། འགྲོ་བ་སེམས་ཅན་ཀུན་གྱི་འབྲས་བུ་བདེ་སྡུག་རྣམས་ལས་བཟང་ངན་ཇི་བསགས་པ་ཁོ་ན་ལས་འབྱུང་བཞིན་ཡོད་ཚུལ་གསུངས།  

མཇུག་ཏུ་༸གོང་ས་མཆོག་གིས་ང་ཚོས་རབ་བྱུང་ན་གཞན་ཕན་གྱི་བྱ་བ་ཅི་ཐུབ་ཀྱིས་བསྒྲུབ་དགོས་ཀྱང་། དེ་ལྟར་མ་བྱུང་ཡང་མ་མཐར་ཡང་མི་གཞན་ལ་གནོད་འཚེ་མ་བྱེད་པ་ནི་གཞི་རྩའི་དམ་བཅའ་རུ་འཛིན་དགོས་རྒྱུ་དང་། བྱམས་དང་བརྩེ་བ། བཟོད་བསྲན་བཅས་ལྟ་གྲུབ་ཡོད་མཁན་ཆོས་ལུཊ་ཁག་ཚང་མས་གསུང་བཞིན་ཡོད་ཅིང་། ཆོས་ལུགས་དེ་དག་གི་རྗེས་འབྲང་བ་ཚོས་འགྲོ་བ་མིའི་སྤྱི་ཚོགས་ནང་གཞན་ཕན་གྱི་ལས་དོན་རླབས་ཆེན་སྒྲུབ་བཞིན་ཡོད་པ། ཁྱེད་ཚོ་ནི་དུས་རབས་ཉེར་གཅིག་པའི་མི་རབས་ཆཊ་ཡོད་སྟབས། ཆོས་ལུཊ་མཐུན་སྒྲིལ་ནི་རིག་གཞུང་རྙིང་པ་ཡིན་པའི་རྒྱུ་མཚན་གྱིས་གལ་གནད་དུ་འཛིན་པ་མ་ཡིན་པར། རྒྱ་གར་ནང་ཆོས་ལུཊ་འདྲ་མིན་འཆམ་མཐུན་མཉམ་གནས་བྱེད་བཞིན་པར་བརྟེན་འཛམ་གླིང་ཐོག་མིག་དཔེ་བཟང་པོ་སྟོན་ཐུབ་པའི་ནུས་པ་ཡོད་པ་དང་། དེ་ལྟ་བུའི་ཆོས་ལུགས་རིས་མེད་ཀྱི་བསམ་བློ་དངོས་སུ་ལག་བསྟར་བྱ་རྒྱུ་ནི་རིན་ཐང་བྲལ་བའི་མིག་དཔེ་བཟང་པོ་ཞིག་ཡིན་སྐོར་གསུངས་འདུག

ཉིན་རྒྱབ་༸གོང་ས་མཆོག་གིས་ལྡི་ལིའི་གནད་ཡོད་མི་སྣ་དང་ནང་ཆོས་དོན་གཉེར་བ་སྐོར་ཞིག་ལ། རྗེ་ཙོང་ཁ་པ་ཆེན་པོས་མཛད་པའི་༼ལམ་རིམ་བསྡུས་དོན༽བཀའ་ཁྲིད་དང་འབྲེལ་སངས་རྒྱས་སྨན་བླའི་བཀའ་དབང་བཅས་བསྩལ་འདུག

དེ་རིང་ཕྱི་ཚེས་ ༢༦ ཉིན་མུ་མཐུད་འབྲས་ལྗོངས་རྒྱལ་ས་སྒང་ཏོག་མཐོ་རིམ་སློབ་ཕྲུག་ཚོར་ཤེས་ཡོན་དང་འབྲེལ་བའི་བཀའ་སློབ་དང་། ཕྱི་ཚེས་ ༢༧ ཉིན་ནུབ་བྷང་གྷལ་ས་གནས་ས་ལི་གྷར་སྲས་རྒྱུད་གྲྭ་ཚང་དང་ཧི་མ་ལ་ཡའི་ཆོས་ཚོགས་ཐུན་མོང་གིས་གསོལ་འདེབས་ཞུས་དོན་ལྟར། ༸གོང་ས་མཆོག་ས་གནས་སུ་ཆིབས་བསྒྱུར་གྱིས་མང་ཚོགས་ལ་འཇམ་མགོན་བླ་མ་ཙོང་ཁ་པ་ཆེན་པོས་མཛད་པའི་༼ལམ་རིམ་བསྡུས་དོན༽ དང་ཀུན་མཁྱེན་ཀློང་ཆེན་རབ་འབྱམས་པས་མཛད་པའི་༼སེམས་ཉིད་ངལ་གསོ༽ ། སྦྱན་རས་གཟིགས་ཀྱི་བཀའ་དབང་བཅས་ཆོས་འབྲེལ་གནང་རྒྱུ་ཡིན་འདུག