བོད་ནས་འབྱོར་བའི་གནས་ཚུལ་ལྟར་ན། ཉེ་ལམ་མདོ་སྨད་རེབ་གོང་ཁུལ་འོག་གི་ཞང་སོ་སོར་༼བོད་རང་བཙན་གྱི་ངོ་བོ་ལྡན་པའི་ཁྲིམས་འགལ་གྱི་བྱ་སྤྱོད་བཅུ་གསུམ༽ཞེས་པའི་ཡིག་ཆ་ཟླ་ཚེས་གསལ་བོ་མེད་པ་ཞིག་བཀྲམས་ཡོད་འདུག
བོད་འབྱོར་གནས་ཚུལ་ནང་བཀོད་དོན། “རང་རྫོང་གི་རྒྱུན་ལྡན་གྱི་སྤྱི་ཚོགས་བདེ་སྐྱོང་གི་སྒྲིག་ལམ་ལ་ཤུགས་ཆེན་པོས་སྲུང་སྐྱོང་བྱེད་པ་དང་། ཁྲིམས་འགལ་ཉེས་བསགས་ཀྱི་བྱ་སྤྱོད་རིགས་སྣ་ཚོགས་ལ་རྡུང་རྡེག་དྲག་པོ་གཏོང་ཆེད། ད་ལྟ་༼བོད་རང་བཙན་གྱི་ངོ་བོ་ལྡན་པའི་ཁྲིམས་འགལ་གྱི་བྱ་སྤྱོད་བཅུ་གསུམ༽ཞེས་པ་དཔར་ཏེ་ཁྱེད་རྣམས་ལ་བཀྲམ་ཡོད་པས། འདིས་རང་རྫོང་གི་རྒྱ་ཆེ་བའི་ལས་བྱེད་མང་ཚོགས་ཀྱི་ངོས་ཟིན་ཇེ་མཐོར་གཏོང་བ་དང་བསམ་བློ་གཅིག་གྱུར་འབྱུང་བ། བོད་རང་བཙན་གྱི་བྱ་སྤྱོད་ལ་རང་རྟོགས་སྒོས་འཐབ་རྩོད་བྱེད་པར་རོགས་རམ་བྱེད་ཐུབ།
གཅིག མི་གཞན་རང་སྲེག་བྱེད་པར་སྐུལ་སློང་དང་ངན་སྐུལ་བྱེད་པ། མགོ་སྐོར་གཏོང་བ།
གཉིས། རང་སྲེག་གི་གྱོད་དོན་བྱུང་རྗེས། སྲིད་གཞུང་ལས་ཁུངས་ཀྱིས་མྱུར་སྐྱོབ་བྱེད་པ་དང་སྤྱི་བདེ་མི་སྣས་བདེན་དཔང་འཚོལ་བར་བར་ཆད་བྱེད་པ་དང་། གོ་སྐབས་ལ་བརྟེན་ནས་འདུ་ཚོགས་བྱེད་པ་དང་བེམ་པོ་འཁུར་ནས་ཁྲོམ་སྐོར་བྱེད་པ། ཁྲིམས་འགལ་གྱིས་བལྟ་རུ་འགྲོ་བ་དང་འཚམས་འདྲི་བྱེད་པ། ཞལ་འདེབས་འབུལ་བ།
གསུམ། རྒྱལ་ཁོངས་ཕྱིའི་ཁ་བྲལ་སྟོབས་ཤུགས་ལ་འབྲེལ་མཐུད་བྱེད་པ་དང་། རང་སྲེག་བྱས་པའི་ཡུལ་དངོས་དང་མང་ཚོགས་འདུས་པའི་ཡུལ་དངོས་༼ཡང་ན་དོན་དག་བྱུང་རྗེས་འཚོལ་བསྡུ་བྱེད་པ་༽པར་ལེན་པ་དང་བརྙན་ཕབ་སྟེ། ཁ་བྲལ་སྟོབས་ཤུགས་ལ་གསང་འཕྲིན་དང་ཆ་འཕྲིན་མཁོ་འདོན་བྱེད་པ།
བཞི། རྒྱལ་ཁོངས་ཕྱིའི་ཁ་བྲལ་སྟོབས་ཤུགས་དང་ཕན་ཚུན་རྒྱང་རིང་ནས་གཞོགས་འདེགས་བྱེད་པ་དང་། གཞི་རིམ་སྤྱི་ཚོགས་ནས་མང་ཚོགས་ཀྱིས་“མཉམ་འབྲེལ་བྱེད་དུ་མི་འཇུག་པར”བཙན་ཤེད་ཀྱིས་རྩ་འཛུགས་བྱེད་པའི་རེ་ངན་བཅངས་པ།
ལྔ། བོད་རང་བཙན་གྱི་རྒྱབ་ལྗོངས་ཡོད་པའི་ཁྲིམས་འགལ་གྱི་རྩ་འཛུགས་དང་བོད་རང་བཙན་གྱི་ཆེད་དུ་ཟིང་ཆ་སློང་བའི་ངོ་བོ་ལྡན་པའི་ཁྲིམས་འགལ་གྱི་སྤྱི་ཚོགས་རྩ་འཛུགས་ཀྱི་བྱ་འགུལ་དུ་ཞུགས་པ།
དྲུག “ཕ་སྐད་ལ་སྲུང་སྐྱོབ་བྱེད་པ་”དང་”ཁོར་ཡུག་བསྲུང་སྐྱོབ་བྱེད་པ་” སོགས་ལ་ཁ་གཡར་ཏེ། མི་གཞན་རྣམས་སྲང་དུ་སོང་ནས་ཁྲིམས་འགལ་གྱི་ཁྲོམ་སྐོར་བྱེད་པ་དང་ངོ་རྒོལ་གྱི་སྦྱར་ཡིག་སྦྱོར་བར་བཙན་སྐུལ་བྱེད་པ།
བདུན། ཁ་བྲལ་རིང་ལུགས་ཀྱི་གཏམ་བརྗོད་སྒྲོག་པ་དང་། ཁ་བྲལ་རིང་ལུགས་ཀྱི་གཏམ་བརྗོད་ཡོད་པའི་རི་མོ་དང་སྒྲ་བརྙན་བཟོ་བ་དང་འཚོང་བ། བརྒྱུད་སྒྲོག་བྱེད་པ།
བརྒྱད། རྒྱལ་ཁོངས་ཕྱིའི་ལས་དོན་ལ་ཁ་གཡར་ཏེ་སྤྱི་ཚོགས་ཀྱི་སྟེང་ནས་མ་དངུལ་བསྡུ་རུབ་བྱེད་པ་དང་ཞལ་འདེབས་འབུལ་བར་རྩ་འཛུགས་བྱེད་པ།
དགུ། སློབ་རའི་ནང་དུ་བོད་རང་བཙན་གྱི་གཏམ་བརྗོད་དང་ཐལ་དྲགས་པའི་མི་རིགས་རིང་ལུགས་ཀྱི་བསམ་བློ་སྤེལ་བ།
བཅུ། “མི་རིགས་ཀྱི་བྱ་གཞག་”ཅེས་པར་ཁ་གཡར་ཏེ། ཉེས་མེད་ཀྱི་མང་ཚོགས་དང་ཏང་སྲིད་ལས་བྱེད་པར་འཇིགས་སྐུལ་བ་དང་རྡུང་རྡེག་གཏོང་བ། འཁོན་ལན་སློག་པ།
བཅུ་གཅིག བསང་ཕུད་པ་དང་ཆོས་འདོན་པ། ཚེ་ཐར་དུ་གཏོང་བ། ལཱ་སྒྲོན་བཀར་པ་སོགས་ཀྱི་བྱེད་ཐབས་ལ་བརྟེན་ནས། རང་སྲེག་མཁན་ལ་བསྔོ་སྨོན་བྱེད་པ་དང་ཡང་ན་བོད་རང་བཙན་ཚོགས་པར་རྒྱང་རིང་ནས་གཞོགས་འདེགས་བྱེད་པ།
བཅུ་གཉིས། བོད་ཁུལ་བདེ་སྲུང་དང་འབྲེལ་བའི་དོན་རྐྱེན་ཐག་གཅོད་པའི་བྱ་བ་མི་བརྩི་བར་བསམ་བཞིན་ངོ་རྒོལ་བྱེད་པ།
བཅུ་གསུམ། རྒྱལ་ཁོངས་ཕྱིའི་ཁ་བྲལ་སྟོབས་ཤུགས་ཀྱི་བསླུ་བྲིད་ལ་གཞོགས་འདེགས་བྱས་ཏེ། བོད་ཁུལ་ནས་མི་རིགས་ཕན་ཚུན་བར་བསམ་བཞིན་འགལ་བ་བཟོ་བ་སོགས་སོ།།” ཞེས་བཀོད་འདུག
གོང་གསལ་གནས་ཚུལ་དེ་༼ཁུལ་ཨུའི་ཧྲུའུ་ཅུ་ཅུས་ཁི་ཀྲོང་གིས་ཁུལ་ཡོངས་ཀྱི་ལས་བྱེད་པའི་ཚོགས་ཆེན་སྟེང་གནངས་པའི་གསུང་བཤད་ལས་བཏུས་པ་ཡིན༽ ཞེས་བཀོད་འདུག
དང་པོ། ངན་སྐུལ་བྱེད་མཁན་མེད།
གཉིས་པ། ང་ཁག་གཡོག་པ་རེད།
གསུམ་པ། དབང་ཡོད་རེད།
བཞི་པ། བཙན་ཤེད་རེད།
ལྔ་པ། ཁྲིམས་འགལ་རེད།
དྲུག་པ། ཐོབ་ཐང་འཕྲོག་པ་རེད།
བདུན་པ། ཁ་བྲལ་རིང་ལུགས་སུ་འཇུག་མཁན་གཏེ་བོ་དེ་རྒྱ་གཞུང་རེད།
བརྒྱད་པ། གྲངས་ཉུང་མི་རིགས་རྩ་གཏོར་གྱི་འཆར་གཞི་རེད།
དགུ་པ། ལོ་རྒྱུས་ལ་འཁྱོག་བཤད་རེད།
བཅུ་པ། རྒྱ་གཞུང་གིས་བོད་རིགས་ལ་གདུག་རྩུབ་གསལ་སྟོན་བྱས་པ་རེད།
བཅུ་གཅིག་པ། རྒྱ་གཞུང་ཆོས་མེད་ཀླ་ཀློ་ཡིན་པར་མཚོན།
བཅུ་གཉིས་པ། ཁག་དཀྲིས་དང་རང་གི་གདུག་རྩུབ་བསྟན་པ་རེད།
བཅུ་གསུམ་པ། རྒྱ་གཞུང་གི་བསླུ་བྲིད་དང་། མི་རིགས་ཕན་ཚུན་བར་འགལ་ཟླ་བཟོ་མཁན་གཙོ་བོ་དེ་རྒྱ་གཞུང་གི་སྲིད་བྱུས་ངན་པ་དེ་རེད།
རྒྱ་གཞུང་གིས། 《བོད་རང་བཙན་གྱི་ངོ་བོ་ལྡན་པའི་ཁྲིམས་འགལ་གྱི་བྱ་སྤྱོད་བཅུ་གསུམ》་ཟེར་བའི་ཡིག་ཆ་ཞིག་བཀྲམས་པ་འདིས། ལྡོག་ཕྱོགས་ནས་བོད་མི་རིགས་ལ་སྐུལ་འདེད་དང་གསལ་འདེབས་བྱས་འདུག