གཟའ་ཕུར་བའི་ཉིན་བཞུགས་སྒར་དུ་བོད་མི་གཞོན་སྐྱེས་ཤིག་གིས་སྐད་ཡིག་འདྲ་མིན་ནང་ཡོད་པའི་༧གོང་ས་མཆོག་གི་གསུང་རྩོམ་དཔེ་དེབ་འགྲེམས་སྟོན་གནང་སོང་ལ། མ་འོངས་པར་བོད་པའི་སློབ་གྲྭ་ཁག་ནང་འགྲེམས་སྟོན་གནང་འཆར་ཡོད་འདུག
ཁ་སང་ཕྱི་ཚེས་ ༢༧ ཉིན་གྱི་ཞོགས་པའི་ཆུ་ཚོད་ ༡༠ ཐོག བཞུགས་སྒར་ངྷ་རམ་ས་ལར་གནས་བཞུགས་མགོན་པོ་རྒྱལ་ལགས་ཀྱིས། སྐད་ཡིག་འདྲ་མིན་ནང་ཡོད་པའི་༸གོང་ས་མཆོག་གི་གསུང་རྩོམ་དེབ་ ༢༣༧ ཙམ་ཀིརྟི་བྱེས་པ་གྲྭ་ཚང་དུ་འགྲེམས་སྟོན་གནང་སོང་། དེབ་དེ་དག་ཁྲོད་བོད་ཡིག་གེ་དེབ་ ༨༩ དང་། དབྱིན་ཡིག་གི་དེབ་ ༡༢༡ ། རྒྱ་ཡིག་གི་དེབ་ ༡༠ ། ཧིན་རྡུའི་དེབ་ ༦། ཀོ་རི་ཡའི་སྐད་ཡིག་ཐོག་གི་དེབ་ ༡༠ བཅས་ཡོད་པ་དང་། དེབ་དེ་དག་ཁོ་སྒེར་ངོས་ནས་འདས་པའི་ཟླ་ ༨ ལྷག་རིང་ཉོ་སྒྲུབ་དང་འཚོལ་བསྡུ་གནང་བ་ཞིག་ཡིན་འདུག
ཕྱི་ཚེས་ ༢༩ ཉིན་ནས་བཟུང་བཞུགས་སྒར་ཉེ་འཁྲིས་ཤེས་རབ་དགའ་ཚལ་སློབ་གླིང་དང་ནོར་གླིང་མཐོ་སློབ་བཅས་རིམ་པ་བརྒྱུད་དེ་བཙན་བྱོལ་བོད་མིའི་གཞི་རིམ་སློབ་གྲྭ་ ༢༠ ལྷག་གི་ནང་འགྲེམས་སྟོན་བྱ་འཆར་ཡོད་པ་དང་། ས་གནས་ཁག་གི་འགྲེམས་སྟོན་གྱི་ལས་འགུལ་མཇུག་སྒྲིལ་རྗེས་བོད་པ་དང་ཕྱི་རྒྱལ་བ། རྒྱ་རིགས་བཅས་ཀྱི་མཁས་དབང་ ༢༠ ལྷག་གདན་ཞུའི་ཐོག་རྒྱལ་བའི་གསུང་རྩོམ་དང་འབྲེལ་བའི་བགྲོ་གླེང་ཞིག་གོ་སྒྲིག་གནང་འཆར་ཡོད་འདུག
གོ་སྒྲིག་པས་གསུང་རྩོམ་འགྲེམས་སྟོན་གྱི་དམིགས་ཡུལ་ངོ་སྤྲོད་གནང་བ་ལྟར་ན། ད་ལྟའི་བར་༸གོང་ས་མཆོག་ལ་སྐད་ཡིག་འདྲ་མིན་ཐོག་གསུང་རྩོམ་གང་ཡོད་འཚོལ་བསྡུ་བྱས་ཏེ། དེ་དག་གི་དགོངས་དོན་མི་མང་ལ་གོ་རྟོགས་སྤེལ་རྒྱུ་དང་། ཆོས་སྲིད་གཉིས་གཙོ་བོར་གྱུར་བའི་ཚན་རིག་དང་འཕྲོད་བསྟེན། ཁོར་ཡུག ཤེས་རིག་བཅས་ཀྱི་ཐད་༸གོང་ས་མཆོག་གི་ལྟ་གྲུབ་དང་དགོངས་གཞི་གང་འདྲ་ཡིན་མིན་ཐོག་སྤྱི་ཚོགས་ནང་བགྲོ་གླེང་གི་གར་སྟེགས་བསྐྲུན་རྒྱུ་བཅས་ལ་དམིགས་པ་ཡིན་ཟེར།
མགོན་པོ་རྒྱལ་ལགས་ཀྱིས་ལས་དོན་འདིའི་ཐོག་མའི་བྱུང་རིམ་ངོ་སྤྲོད་གནང་བ་ལྟར་ན། ཁོང་གིས་ཐོག་མ་༧གོང་ས་མཆོག་གི་གསུང་རྩོམ་ཁག་ཅིག་བཀླགས་རྗེས། བསམ་བློ་གཏོང་སྟངས་དང་སྤྱོད་པ་འཁྱེར་སྟངས་འགྱུར་བ་ཐེབས་ཏེ། རིམ་པས་༧གོང་ས་མཆོག་ལ་དེབ་ག་ཚོད་ཡོད་མེད་ཤེས་འདོད་ཆེན་པོ་སྐྱེས་ཏེ། ངོ་ཤེས་གྲོགས་པོ་དང་ཤེས་ཡོན་ཅན་མང་པོ་ཞིག་ལ་སྐད་ཆ་དྲིས་ཀྱང་ལན་གསལ་བོ་མ་རག་སྟབས། ཁོང་སྒེར་ངོས་ནས་༧གོང་ས་མཆོག་གི་གསུང་རྩོམ་འཚོལ་བསྡུ་བྱ་རྒྱུའི་སེམས་ཐག་བཅད་དེ། འདས་པའི་ཟླ་བ་ ༨ ལྷག་རིང་དེབ་ཁང་དང་དཔེ་མཛོད། དགོན་པ་དང་སློབ་གྲྭ ལས་ཁུངས་ཁག གྲྭ་རྒྱ་སོགས་སུ་འཚོལ་བསྡུ་བྱས་ཡོད་འདུག
བོད་མི་མང་སྤྱི་འཐུས་ལྷན་ཚོགས་དང་ཆོས་རིག་ལས་ཁུངས་བཅས་ཀྱི་རྒྱབ་གཉེར་འོག ༢༠༡༢ ལོའི་ཕྱི་ཟླ་ ༡༢ ཚེས་ ༡༡ ཉིན་༸གོང་ས་མཆོག་གིས་རྒྱ་གར་ལྷོ་ཕྱོགས་འབྲས་སྤུངས་དུ་ལམ་རིམ་ཆེན་མོའི་གསུང་ཆོས་གནང་སྐབས། དེབ་བརྗོད་གཞི་མི་འདྲ་བ་ ༢༠ དང་དེབ་གྲངས་ ༢༠༠ མ་ཟིན་ཙམ་བསྡུ་རུབ་ཀྱིས་འགྲེམས་སྟོན་ཐོག་མ་དེ་གནང་ཡོད་འདུག
གསར་འགོད་པས་ཁོང་ལ་༧གོང་ས་མཆོག་གི་གསུང་རྩོམ་བསྡུ་རུབ་ཀྱི་འགྲོ་སོང་ཇི་ལྟར་གཏོང་གི་ཡོད་མེད་དྲིས་པར། “ ང་ལ་དངུལ་ཏོག་ཙམ་རེ་རག་སྐབས་༧གོང་ས་མཆོག་གི་གསུང་རྩོམ་ཉོས་པ་ཡིན། ཉེ་སྔོན་ཨ་རིར་ཡོད་པའི་གཅེན་མོས་ང་ལ་ཀུ་ཤུ་ཁ་པར་ (iphon 5 ) ཞིག་ཉོ་བྱེད་ཀྱི་དངུལ་བསྐུར་སོང་། དངུལ་དེས་གོང་ཚད་ཅུང་མཐོ་བའི་དེབ་ ༣༨ ཙམ་ཉོ་ཐུབ་སོང་། དེ་ནས་ཧྥ་རན་སིའི་མི་ངག་དབང་འཕྲིན་ལས་ལགས་ཀྱིས་ཧིན་སྒོར་ཉིས་ཁྲི་ལྷག་དང་། གྲོགས་པོ་ཁག་ཅིག་གིས་ཧིན་སྒོར་ ༥༠༠ རེ་བཅས་ཀྱི་ཞལ་འདེབས་གནང་སོང་། མ་འོངས་པར་དེབ་གང་འཚམ་རག་རྗེས་ངྷ་སར་གསུང་རྩོམ་འགྲེམས་སྟོན་ཁང་ངམ་དེབ་ཀློག་ས་ཞིག་ཐབས་ཤེས་བྱ་དགོས་བསམ་ཡོད ” ཅེས་བརྗོད་བྱུང་།
གསར་འགོད་པས་རྒྱལ་བའི་གསུང་རྩོམ་འགྲེམས་སྟོན་ལ་གཟིགས་མཁན་གྲྭ་སེང་གེ་ལགས་སུ་བཅར་འདྲི་ཞུས་པར་ཁོང་གིས། “ མི་སྒེར་བ་ཞིག་གིས་འདི་འདྲའི་ལས་འགུལ་ཞིག་སྤེལ་བ་དེར་ང་རང་གི་ངོས་ནས་ཧ་ཅང་ཡག་པོ་མཐོང་བྱུང་། སྤྱིར་བཏང་བོད་པའི་སྤྱི་ཚོགས་ནང་༸གོང་ས་མཆོག་ལ་དད་པ་ཚད་མཐོ་བོ་ཡོད་ཀྱང་། བོད་ཡིག་ཐོག་ཁོང་གི་གསུང་རྩོམ་ཉུང་ཉུང་ཡིན་པ་དང་། བོད་པའི་སྤྱི་ཚོགས་ཀྱི་ཤེས་ཡོན་གནས་ཚད་དང་གོ་རྟོགས་ཀྱི་དབང་གིས་༧གོང་ས་མཆོག་གི་གསུང་རྩོམ་ཐོག་དོ་སྣང་སྤྲོད་མཁན་དེ་ཙམ་མེད་པའི་ཚོར་སྣང་བྱུང་སོང་། ངས་སྔོན་མ་བོད་ཡིག་ཐོག་ནས་བཀའ་རྩོམ་དེབ་རེ་ཟུང་བཀླགས་པ་ཡིན། དབྱིན་ཡིག་ཐོག་མང་པོ་ཡོད་པ་གོ་མྱོང་བ་ལས་དངོས་སུ་དེ་རིང་མ་གཏོགས་མཐོང་མྱོང་མེད། ” ཅེས་བརྗོད་བྱུང་།
ལྷུན་འགྲུབ་རྒྱ་མཚོ་ལགས་ཀྱིས། “ ང་སྔོན་མ་སློབ་གྲྭར་ཡོད་སྐབས་ནས་འདི་འདྲའི་བསམ་བློ་འཁོར་མྱོང་ཡོད། སྐབས་དེར་ཆ་རྐྱེན་མེད་སྟབས་པར་བཤུས་བརྒྱབ་སྟེ་སློབ་གྲོགས་ཚོར་ངོ་སྤྲོད་བྱེད་པ་ལས། མགོན་པོ་རྒྱལ་གྱི་འདི་ལྟར་སྤྱི་ཚོགས་ནང་དངོས་སུ་འགྲེམས་སྟོན་བྱས་ཐུབ་མ་སོང་། ༸གོང་ས་མཆོག་གི་གསུང་རྩོམ་འགྲེམས་སྟོན་ཐེངས་དང་པོར་མཐོང་པ་ཡིན། ཡག་པོ་ཞེ་དྲག་རེད། ངས་དབྱིན་ཡིག་ཐོག་གི་༧གོང་ས་མཆོག་གི་བཀའ་རྩོམ་མང་པོ་ཞིག་བཀླགས་མྱོང་ཡོད། འདི་ན་ད་དུང་དེབ་མང་པོ་ཚང་མི་འདུག མ་འོངས་པར་དེབ་དེ་དག་ཀྱང་རག་ཐབས་བྱས་ཏེ་མུ་མཐུད་འགྲེམས་སྟོན་བྱེད་ཐུབ་ན་ཧ་ཅང་ཡག་པོ་འདུག ” ཅེས་བརྗོད་བྱུང་།
གསར་འགོད་པ། དོན་གོ
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
Tibetans are bewildered now days not as same sas before.
བོད་མི་སྒེར་བ་ཞིག་གིས་འདི་འདྲའི་ལས་འགུལ་སྤེལ་སྟངས་ཀྱིས་སེམས་ཤུགས་སྤར་སོང་། སྤྱིར་ན། མི་སྒེར་ཞིག་ལ་མཚོན་ན། ལས་འགུལ་སྤེལ་སྟངས་དེ་རྣམ་པ་འདྲ་མིན་ཡོད་རེད་དེ། ལས་འགུལ་འདིའི་རིགས་ནི། བོད་མིའི་སྤྱི་ཚོགས་ཁྱོན་ཡོངས་ལ་དགོས་ངེས་ཤིག་ཡིན་པས་ཐུགས་རྗེ་ཆེ་ཞུ།
ད་ཡིན་ན། དྲི་བ་ཁ་ཤས་ཤིག་འདྲི་འདོད་བྱུང་སོང་། བཀུར་འོས་མཁྱེན་དཔྱོད་ལྡ་པ་སུ་ཞིག་གི་ངོས་ནས་གནད་ལ་འཁེལ་ཞིང་དོན་ལ་གནས་པའི་དྲིས་ལན་རེ་ཡོང་བའི་རེ་འདུན་ཞུ།
༡》 ༸གོང་ས་མཆོག་གི་དགོངས་གཞི་ལམ་སྟོན་དང་བོད་མིའི་ངོས་འཛིན། ལག་ལེན་སོགས་ཀྱི་སྟོང་ཆ་ཇི་ལྟར་གསབ་རྒྱུ་ཡིན་ནམ། དེའི་དགོས་པ་དང་རྒྱབ་ལྗོངས་གང་ཡིན་ནམ།
༢》 སྤྱིར། བོད་མི་རིགས་སྤྱི་ཡོངས་ཀྱི་ངོས་ནས། ༸གོང་ས་མཆོག་ལ་ངོས་འཛིན་དང་ལྟ་སྟངས་གང་འདྲ་ཞིག་ཡོད་མེད། དེ་བཞིན་རྒྱ་མི་རིགས། ལྷག་པར་དུ། ནུབ་ཕྱོགས་སྤྱི་ཚོགས་ཀྱི་ངོས་ནས་༸གོང་ས་མཆོག་ལ་ངོས་འཛིན་དང་ལྟ་སྟངས་གང་འདྲ་ཞིག་བཟུང་ཡོད་དམ།
༣》 གཞུང་ངོས་ནས་༸གོང་ས་མཆོག་གི་དགོངས་གཞི་དང་ལམ་སྟོན་ཁག་ཉམས་ཞིབ་པའི་སྡེ་ཚན་ནམ་རིགས་གཅིག་རྐང་འཛིན་ག་ཚོད་ཡོད་དམ། མེད་ན་སྐྱེད་སྲིང་བྱེད་རན་པའི་དུས་ཚོད་གནད་འགག་ཅན་ཞིག་མ་རེད་དམ།
༤》 ཕྱིའི་སྐད་ཡིག་འདྲ་མིན་གྱི་ཐོག་ཏུ་ཐོག་པའི་༸གོང་ས་མཆོག་གི་བཀའ་རྩོམ་དང་གསུང་བཤད། གསུང་འཕྲིན་ཁག་བོད་རང་གི་སྐད་ཡིག་ལ་བསྒྱུར་མཁན་གྱི་རྩོམ་སྒྲིག་སྡེ་ཚན་དམིགས་བ་ཞིག་ཡོད་དམ།
ངོ་མ་བསྟོད་བསྔག་ཡོད། མུ་འཐུད་དུ་སྐྱོང་རོགས་ཞུ།
༸གོང་ས་མཆོག་ནི་ང་ཚོ་གངས་ཅན་པའི་མགོན་སྐྱབས་དང་། དཔུང་གཉེན་ལགས་ཤིང་། འཛམ་གླིང་སྐྱེ་འགྲོ་ཡོད་དོ་ཅོག་གིས་སེམས་ཀྱིས་ཉན་ས་དང་། ཡིད་ཀྱི་དམིགས་རྟེན་དེ་ལགས་ན།ཁོང་གི་ཐུགས་རྒྱ་མཚོ་ལས་བྱུང་བའི་ལེགས་བཤད་རིན་ཆེན་ནོར་བུ་དག་ནི་ངེས་པར་བཙལ་ལ་་འཚོལ་དང་། བདག་གཅེས་ཉར་ཚགས་བྱ་རྒྱུ་ཁ་ཚ་དགོས་གཏུགས་ཤིག་ལགས།རྒྱུ་མཚན་དེའི་ཕྱིར་སློབ་གྲོགས་མགོན་པོ་རྒྱལ་གྱིས་མ་བསྐུལ་དང་བླང་གིས་བགྱི་བ་འདི་ཁུར་དུ་འཁྱེར་བར་ཡི་རངས་དང་རྒྱབ་སྐྱོར་ཞུ།