དབུས་བོད་མིའི་སྒྲིག་འཛུགས་བཀའ་ཤག་གི་བཀའ་དགོངས་ལྟར་ཤེས་རབ་དགའ་ཚལ་སློབ་གླིང་གི་སློབ་ཡུན་ལོ་ལྔ་ནས་བརྒྱད་དུ་སྤར་ཏེ། འདི་ལོའི་ཕྱི་ཟླ་ ༥ ཚེས་ ༡ ནས་བཟུང་དངོས་སུ་རྩ་འཛིན་ལག་བསྟར་བྱ་རྒྱུ་ཡིན་འདུག
ཉེ་ཆར་ཕྱི་ཟླ་གསུམ་པའི་སྔོན་རྩིས་གཏན་འབེབས་གྲོས་ཚོགས་ནང་། དཔལ་འབྱོར་བཀའ་བློན་མཆོག་གིས་ཤེས་རབ་དགའ་ཚལ་སློབ་གླིང་གི་ལོ་འཁོར་སྔོན་རྩིས་གྲོས་ཚོགས་ནང་སྙན་སྒྲོན་དང་འབྲེལ་སློབ་གྲྭའི་སློབ་ཡུན་ལོ་ ༥ ནས་ ༨ ལ་སྤར་ཡོད་སྐོར་གསལ་བསྒྲགས་གནང་རྗེས། སྤྱི་འཐུས་ཁག་ཅིག་གི་དོགས་འདྲི་དང་དགོངས་འཆར་བཏོན་པར། བཀའ་བློན་མཆོག་གིས་རྒྱབ་ལྗོངས་བཅས་པ་གསལ་བཤད་གནང་ཡོད། ཕྱི་ཚེས་ ༢༥ ཉིན་གསར་འགོད་པས་སམ་བྷོ་ཊའི་སྤྱི་ཁྱབ་འགན་འཛིན་ཀརྨ་ཆུང་བདག་ལགས་སུ་སློབ་གྲྭའི་སློབ་ཡུན་འགྱུར་བ་བཏང་བའི་རྒྱུ་མཚན་དང་། མ་འོངས་པར་བསླབ་གཞི་དང་དགེ་རྒན་བཅས་ཀྱི་ཐོག་འཆར་གཞི་གང་འདྲ་ཡོད་མེད་བཅར་འདྲི་ཞུས་ཡོད།
ཀརྨ་ཆུང་བདག་ལགས་ཀྱིས་བརྗོད་པ་ལྟར་ན། ཕྱི་ལོ་ ༢༠༡༡ ལོར་སམ་བྷོ་ཊ་སྤྱི་ཁྱབ་ཡིག་ཚང་གིས་ཤེས་རབ་དགའ་ཚལ་སློབ་གླིང་རྩིས་ལེན་གནང་རྗེས་ཤེས་ཡོན་དང་ལག་ཤེས་བཅས་སྡེ་ཚན་གཉིས་ཀྱི་སློབ་ཁྲིད་གནང་ཕྱོགས་དང་སློབ་སྦྱོང་གི་མཐུན་རྐྱེན་བཅས་ཕྱོགས་ཡོངས་ཡར་རྒྱས་གཏོང་ཐབས་ལ་འབད་བརྩོན་གནང་ཡོད་པ་དང་། མ་འོངས་པར་སློབ་མ་ཚོར་ཤེས་ཡོན་དང་ལག་ཤེས་ཀྱི་སློབ་སྦྱོང་ཆ་ཚང་སྤྲད་དེ་སྤྱི་ཚོགས་ནང་རང་ཁ་རང་གསོ་ཡོང་ཐུབ་དང་། ལྷག་པར་དུ་ཨ་རིའི་གཞུང་དང་བོད་མིའི་སྒྲིག་འཛུཊ་ཀྱིས་གཏན་འབེབས་གནང་བ་བཞིན་སྔར་གྱི་སློབ་ཡུན་ལོ་ ༥ ནས་ ༨ ལ་སྤར་བ་ཞིག་ཡིན་པ་དང་། སློབ་ཡུན་བསྐྱར་སྒྲིག་སྒྲིག་གཞི་དེ་ད་ལོའི་ཟླ་ ༥ ཚེས་ ༡ ཉིན་ནས་ལག་བསྟར་བྱ་རྒྱུ་ཡིན་འདུག
སྔོན་མ་བོད་ནས་གསར་དུ་འབྱོར་མཁན་ཚོ་ཤེས་རབ་དགའ་ཚལ་སློབ་གླིང་དུ་འཛུལ་རྗེས། ཐོག་མར་ཟུར་གསོག་འཛིན་གྲྭར་ཟླ་བ་ ༦ དང་རྨང་གཞི་འཛིན་གྲྭར་ཟླ་བ་ ༦ བསྡད་རྗེས་ཡིག་རྒྱུགས་ཀྱི་གྲུབ་འབྲས་ལྟར་ཤེས་ཡོན་དང་ལག་ཤེས་ལ་བགོ་བྱ་རྒྱག་གི་ཡོད་ཀྱང་། ཐེངས་འདིར་སློབ་ཡུན་སྤར་རྗེས་རྨང་གཞིའི་འཛིན་གྲྭ་ལོ་ ༢ ནས་ ༣ བར་བཞག་ཡོད་འདུག་ལ། དུས་ཡུན་དེའི་ནང་སྔར་གྱི་བསླབ་གཞི་བོད་ཡིག་དང་དབྱིན་ཡིག་གཉིས་ཀྱི་ཐོག ཧིན་རྡུ་དང་གློག་ཀླད་སློབ་ཚན་བཞག་ཡོད་འདུག སློབ་ཡུན་རྫོགས་རྗེས་སློབ་མའི་ཤེས་ཡོན་གནས་ཚད་དང་དགའ་ཕྱོགས་ལྟར་སྡེ་ཚན་བགོ་བྱ་རྒྱག་འཆར་ཡོད་འདུག
ཤེས་ཡོན་སྡེ་ཚན་ནང་བོད་ཡིག་དང་དབྱིན་ཡིག་བཅས་སྡེ་ཚན་གཉིས་སུ་བགོས་ཏེ། དབྱིན་ཇི་ཡག་པོ་ཡོད་མཁན་ཚོར་ (Open School) འཛིན་རིམ་བཅུ་བའི་སློབ་ཚན་ ༥ དང་འཛིན་རིམ་བཅུ་གཉིས་བར་སློབ་ཚན་ ༥ བཅས་རིམ་པར་སློབ་སྦྱོང་སྤྲོད་རྒྱུ་དང་། འཛིན་རིམ་བཅུ་གཉིས་སློབ་ཐོན་གྱི་ལག་འཁྱེར་དེ་རྒྱ་གར་རྒྱལ་ཡོངས་འཛིན་རིམ་བཅུ་གཉིས་དང་གཅིག་མཚུངས་སྤྲོད་རྒྱུ་ཡིན་འདུག དེའི་རྗེས་མཐོ་རིམ་ཡིག་རྒྱུགས་ལ་ཞུགས་ཏེ་གཙུག་ལག་རབ་འབྱམས་པ་དང་འབུམ་རམས་པ་བཅས་ཀྱི་སློབ་སྦྱོང་གི་ལམ་ཁ་བཟོས་ཡོད་འདུག བོད་ཡིག་ཡག་པོ་ཡོད་མཁན་གྱི་སློབ་མ་ཚོར་སློབ་གྲྭ་རང་དུ་བོད་ཡིག་གཙོས་དབྱིན་ཡིག་དང་གློག་ཀླད་བཅས་ཀྱི་སློབ་སྦྱོང་སྤྲད་དེ་རིག་གནས་རབ་འབྱམས་པའི་སློབ་སྦྱོང་གོ་སྐབས་སྤྲད་དེ། ཡིག་འབྲེལ་གྱི་ལམ་ནས་ས་རཱ་མཐོ་སློབ་ཀྱི་མཐོ་རིམ་རིག་གནས་རབ་འབྱམས་པའི་ལག་འཁྱེར་ལེན་ཐུབ་པར་བྱ་རྒྱུ་དང་། ལག་འཁྱེར་དེ་བརྒྱུད་ནས་བོད་མིའི་སྒྲིག་འཛུགས་ཀྱི་དྲུང་གཞོན་གནས་རིམ་བར་གྱི་ཡིག་རྒྱུགས་ཁྲོད་འཛུལ་ཞུགས་བྱ་ཆོག་པའི་ལམ་ཁ་བཟོས་ཡོད་འདུག
ལག་ཤེས་སྡེ་ཚན་དུ་སྔར་ཡོད་ཀྱི་ལྷ་བྲིས་དང་འཚེམ་བཟོ་གཉིས་ཀྱི་ཐོག ཟས་རིགས་ལག་ཤེས་གཞན་ཁག་ཅིག་ཟུར་སྣོན་བྱ་འཆར་ཡོད་པ་དང་། ལྷ་བྲིས་སློབ་ཡུན་ལོ་ ༣ ནས་ ༥ ལ་སྤར་རྒྱུ། འཚེམ་བཟོའི་སློབ་ཡུན་ལོ་ ༢ ནས་ ༣ གསུམ་ལ་སྤར་རྒྱུ་བཅས་ཡིན་འདུག ལག་ཤེས་སློབ་སྦྱོང་བྱེད་མཁན་ཚོར་སློབ་ཡུན་རིང་བོད་ཡིག་དང་དབྱིན་ཡིག གློག་ཀླད་བཅས་ཀྱི་སློབ་སྦྱོང་ཡང་སྤྲོད་འཆར་ཡོད་འདུག
གསར་འགོད་པས་ཁོང་ལ་འགྱུར་བ་འདི་བརྒྱུད་མ་འོངས་པར་སློབ་འཇུག་བྱེད་ཕྱོགས་སྐོར་དྲིས་པར་ཁོང་གིས། “ སྔོན་མ་ཤེས་རབ་དགའ་ཚལ་སློབ་གླིང་གི་ལོ་ལྔ་ཐོན་པའི་ལག་འཁྱེར་དེས་གངས་ཅན་སྐྱིད་གཤོངས་ནང་ཡིག་སྐྱེལ་གྱི་ལས་ཀ་ཙམ་ཡང་རག་གི་ཡོད་པ་མ་རེད། མ་འོངས་པར་ང་ཚོའི་སློབ་མ་ཚོ་སློབ་མཐར་ཕྱིན་རྗེས་མི་མང་དཀྱུས་མ་བཞིན་འདུག་མི་དགོས་པར་སྤྱི་ཚོགས་ཀྱི་སྣེ་འཁྲིད་ཐུབ་པའི་རེ་བ་བྱེད་ཀྱི་ཡོད། ངས་སློབ་གྲྭ་རྩིས་ལེན་པའི་ཉིན་མོ་དེར་བཀའ་བློན་དང་དགེ་སློབ་ཡོངས་ལ་ང་རང་བོད་ནས་བསླེབས་པའི་སློབ་མ་ཚོར་གཡོག་པོར་རྒྱུཊ་རྒྱུའི་གོ་སྐབས་བྱུང་བ་དེ་ངའི་བསོད་ནམས་རེད་ཅེས་བཤད་མྱོང་ཡོད་ལ། ཉིན་གཅིག་ཤེས་རབ་དགའ་ཚལ་སློབ་གླིང་གི་སློབ་ཟུར་ཞིག་བཀའ་ཁྲི་ཆགས་པའི་རེ་བ་བྱེད་ཀྱི་ཡོད། བོད་ནས་ཡོང་མཁན་ཚོ་དང་ཕྱི་ནས་སྐྱེ་མཁན་ཚང་མ་གཅིག་པ་རེད” ཅེས་བརྗོད་བྱུང་ལ། སློབ་མ་གསར་འཇུག་གི་ཐད་ནས་ད་ལྟའི་བར་དབུས་སྣེ་ལེན་ཁང་གིས་རྩིས་སྤྲོད་བྱས་པའི་མིང་ཐོ་ལྟར་སློབ་འཇུག་བྱེད་ཀྱིན་པ་ལས། སློབ་གྲྭའི་ངོས་ནས་གོ་སྐབས་གཉིས་པ་ཞུ་མཁན་ཚོར་ལམ་ཁ་སྤྲོད་ཐབས་མེད་སྐོར་བརྗོད་བྱུང་།
ཡང་གསར་འགོད་པས་ཤེས་རབ་དགའ་ཚལ་སློབ་གླིང་གི་སློབ་ཟུར་དང་བོད་མི་མང་སྤྱི་འཐུས་བསོད་ནམས་རྒྱལ་མཚན་ལགས་སུ་གོང་གསལ་གནས་ཚུལ་སྐོར་གྲོས་ཚོགས་ནང་གླེང་སློང་ག་རེ་བྱུང་ཡོད་མེད་དྲིས་པར་ཁོང་གིས། “ བཀའ་ཤག་གིས་གྲོས་ཚོགས་ནང་སྔོན་རྩིས་སྙན་སྒྲོན་སྐབས་གནས་ཚུལ་དེ་བསླེབས་པ་རེད། སྐབས་དེར་སྤྱི་འཐུས་མང་པོ་ཞིག་གིས་ཤེས་རབ་དགའ་ཚལ་སློབ་གླིང་གི་སློབ་མ་ཚོ་ལོ་ཆེན་པོ་ཡིན་སྟབས། སློབ་ཚན་མང་པོ་ཞིག་བཞག་ན་ཕན་གནོད་གང་འདྲ་འབྱུང་མིན་ཐོག་དོགས་འདྲི་གནང་བ་རེད། དེ་ལ་དཔལ་འབྱོར་བཀའ་བློན་གྱིས་ལོ་གསུམ་རིང་རྨང་གཞིའི་སློབ་སྦྱོང་སྤྲོད་རྒྱུ་དང་། དེའི་རྗེས་ལོ་ལྔའི་རིང་དངོས་གཞིའི་སློབ་སྦྱོང་གི་གོ་སྐབས་ཡོད་སྐོར་གསལ་བཤད་གནང་པ་རེད། འདིས་བོད་ནས་གསར་དུ་འབྱོར་བ་ཚོས་གོ་སྐབས་དམ་འཛིན་བྱ་ཐུབ་པ་ཡིན་ན། ཤེས་ཡོན་གཅིག་པུའི་ཐོག་ནས་འཛིན་རིམ་བཅུ་གཉིས་དང་མཐོ་སློབ་འགྲིམ་རྒྱུའི་གོ་ཆ་ཚང་ཡོད་པ་རེད” ཅེས་གསུངས་བྱུང་།
ཕྱི་ལོ་ ༡༩༩༣ ལོ་ནས་ ༢༠༡༣ ལོའི་ཕྱི་ཟླ་ ༣ པའི་ཚེས་ ༢༥ བར་ཤེས་རབ་དགའ་ཚལ་སློབ་གླིང་དུ་བོད་ནས་ཁྱོན་སློབ་མ་གྲངས་ ༧༠༠༠ མ་ཟིན་ཙམ་འབྱོར་ཡོད་པའི་ཁྲོད་ནས། སློབ་ཡུན་ཆ་ཚང་རྫོགས་ཏེ་སློབ་མཐར་ཕྱིན་པའི་སློབ་མ་ ༩༠༠ ལྷག་བྱུང་ཡོད། ད་ལྟའིོ་ཆར་སློབ་གྲྭར་བུ་ ༡༧༩ དང་བུ་མོ་ ༡༠༢ བཅས་ཁྱོན་སློབ་མ་ ༢༧༢ དང་། དགེ་རྒན་དང་ལས་བྱེད་ ༥༠ ཡོད་འདུག
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
རྗེས་སུ་ཡི་རང་ཡོད།
གསོག་སྒར་སློབ་གྲྭའི་འགན་འཛིན་གྱིས་སློབ་གྲྭ་ངོ་སྤྲོད་བྱས་པའི་གནས་ཚུལ་ཞིག་འདིར་བཀོད་ཡོད།
༡༩༩༣ ལོ་ནས་ད་ལྟ་སློབ་གྲྭ་འདིར་སློབ་མ་ ༦༥༦༧ བསླེབས་ཡོད་པ་ལས། སློབ་མཐར་མ་ཕྱིན་པར་རྩ་དགོངས་སུ་ཕྱིན་པ་ ༥༣༤༨ དང་། ཤེས་ཡོན་སྡེ་ཚན་དང་སློབ་ལོ་ཡོངས་སུ་ཚང་སྟེ་མཐར་ཕྱིན་མཁན་ ༧༡༧ དང་། འཚེམ་བཟོ་སློབ་མ་ ༧༥ ། ལྷ་བྲིས་སློབ་མ་ ༢༡ བཅས་ཁྱོན་སྡོམ་སློབ་མ་ ༨༡༣ སློབ་མཐར་ཕྱིན་ཡོད་འདུག
ས་བྱི་ཞི་རྒོལ་ཆེན་མོའི་རྗེས་ནས་བཟུང་བོད་ནས་ཕེབས་མཁན་ཉུང་དུ་ཕྱིན་ཏེ། སློབ་གྲྭ་འདིར་སློབ་འཇུག་སློབ་མ་རྦད་དེ་ཇེ་ཉུང་དུ་ཕྱིན་འདུག
༢༠༠༨ ལོར་སློབ་མ་ ༡༥༣ དང་།
༢༠༠༩ ལོར་ ༡༧༨།
༢༠༡༠ ལོར་ ༡༣༥།
༢༠༡༡ ལོར་སློབ་མ་ ༡༢༠ །
༢༠༡༢ ལོའི་ཕྱི་ཟླ་ ༡ ནས་ ༧ པའི་བར་སློབ་མ་ ༡༡༠ བཅས་རེད།
གནས་ཚུལ་དེ་འདི་ན་འདུག https://tibettimes.net/wordpress/news.php?id=4782
https://tibettimes.net/wordpress/news.php?cat=49&&id=6467
ངས་སྔོན་ཆད་ཅིག་ལ་ཤེས་རབ་དགའ་ཚལ་སློབ་གྲྭ་བཙུགས་པ་ནས་ད་བར་སློབ་མ་སློབ་ཞུགས་བྱེད་མཁན་གྲངས་ 6000 ་ལྷག་ཅིག་བྱུང་བ་ལས། སློབ་ཡུན་ཡོངས་སུ་རྫོགས་ཏེ་ཐོན་མཁན་གྲངས་ 600 ་ཡང་མི་ཟིན་པ་ཙམ་ལས་མེད་པ་ཞིག་དྲན་སོས་ཀྱི་འདུག གྲངས་ཀ་འདི་དག་ཏག་ཏག་ཅིག་ཡིན་མིན་ངས་ཤོད་ཐུབ་ཀྱི་མི་འདུག་ཀྱང་། ཕལ་ཆེར་གནས་སྟངས་འདི་འདྲ་ཞིག་ཡིན་བསམ་སོང་། སྔོན་ཆད་ལོ་སློབ་དུས་ལོ་ལྔ་ཡིན་སྐབས་མཐར་འཁྱོལ་མེད་ཆེས་ཉུང་ཉུང་ལས་མེད་པའི་སློབ་གྲྭ་ཞིག་ད་ལྟ་སློབ་དུས་ལོ་བརྒྱད་ལ་སྤར་ན་མཐར་ཕྱིན་མཁན་ག་ཚོད་ཅིག་ཡོང་གི་རེད། འདི་ལ་དགོངས་པ་ཡག་པོ་བཞེས་དགོས་རེད།
བོད་ཡིག་མི་ཤེས་ལ། བོད་སྐད་ཆག་རོ་ཁྱི་འདྲ་ཞིག་གསུངས་མཁན་གྱི་སྲིད་སྐྱོང་ཤོག་བུའི་སེང་གེ་ནས་འགྱུར་བ་འདི་འདྲ་བཏང་བ་དེ་ཡག་པོ་རེད། ཡིན་ནའང། ཁུངས་འཁྱོལ་བ་གནང་རོགས། ཁྱབ་བསྒྲགས་མ་སྔ་རོགས། དགེ་རྒན་ཚད་ལྡན་བསྐོ་རོགས་ཞེས་ཞུ་རྒྱུ་ཡིན། །
གསོག་སྒར་སློབ་གྲྭ་འདི་ཚོར་བ་རྐྱེན་པོ་ཅན་གྱི་སློབ་གྲྭ་གལ་ཆེན་ནང་གི་དོན་ཆེན་ཞིག་ཡིན། སློབ་གྲྭ་འདི་ལ་བོད་གཞུང་གིས་བདག་གཅེས་བྱེད་ཚད་རྦད་དེ་ཕྱི་དྲགས་པ་རེད། ངས་འོག་ཏུ་བོད་ཀྱི་དུས་བབ་ཚང་གིས་སྔ་ལོའི་ཕྱི་ཟླ་བརྒྱད་པའི་ནང་ཤེས་རབ་དགའ་ཚལ་སློབ་གྲྭ་འདི་ལ་ཞིབ་འཇུག་གནང་བའི་སྙན་ཐོ་ཞིག་འདིག་བསྐྱར་དུ་འགོད་ཆོག་པ་བགྱིས།
(( གསར་འགོད་པ་ཆེད་དུ་བཞུགས་སྒར་ཉེ་འཁྲིས་ཤེས་རབ་དགའ་ཚལ་སློབ་གླིང་དུ་ ཕྱིན་སྟེ་རྒྱུས་ལོན་བྱས་པར། ཤེས་རབ་དགའ་ཚལ་སློབ་གླིང་དུ་ད་ལྟའི་ཆར་བུ་ ༢༠༠ དང་བུ་མོ་ ༡༣༧ བཅས་ཁྱོན་སློབ་མ་ ༣༣༧ དང་། དགེ་ལས་ ༥༤ ཙམ་ཡོད་འདུག སློབ་གྲྭ་འདིར་ཕྱི་ལོ་ ༢༠༠༠ ནས་ ༢༠༠༦ ལོའི་བར་ལོ་རེར་བོད་ནས་ཆ་སྙོམས་སློབ་མ་ ༥༠༠ ཡས་མས་དང་། ༢༠༠༧ ལོར་སློབ་མ་ ༨༠༠ བཅས་བསླེབས་ཡོད་འདུག་ཀྱང་། ༢༠༠༨ ལོ་ནས་བཟུང་ཉུང་དུ་ཕྱིན་ཏེ། ༢༠༡༡ ལོར་སློབ་མ་ ༡༢༠ དང་། ༢༠༡༢ ལོའི་ ཕྱི་ཟླ་ ༡ ནས་ ༧ པའི་བར་སློབ་མ་ ༡༡༠ ཙམ་ལས་འབྱོར་མི་འདུག ༢༠༡༡ ལོར་མཐར་ཕྱིན་མ་ཡིན་པར་རང་འགུལ་གྱིས་རྩ་དགོངས་ཞུ་མཁན་ ༡༦༡ དང་། ༢༠༡༢ ལོའི་ཕྱི་ཟླ་ ༡ ནས་ ༧ པའི་བར་མཐར་ཕྱིན་མ་ཡིན་པར་རང་འགུལ་གྱིས་རྩ་དགོངས་ཞུ་མཁན་ ༩༣ ཙམ་བྱུང་འདུག ད་ལྟའི་ཆར་སློབ་མའི་ཡོངས་ཁུངས་གཙོ་བོ་བོད་ནས་འབྱོར་བ་ཡིན་ཞིང་། གདན་ས་ཁག་ཏུ་གཟུགས་པོའི་འཕྲོད་བསྟེན་གྱི་དཀའ་ངལ་དང་། སློབ་གྲྭ་གཞན་ནས་རྩ་དགོངས་ཞུས་ཏེ་བསྐྱར་དུ་གོ་སྐབས་གཉིས་པ་ལེན་མཁན་བཅས་ སློབ་ཕྲུག་ ༤ བདེ་སྲུང་ལས་ཁུངས་ཀྱི་ངོ་སྦྱོར་འོག་འཛུལ་ཞུགས་བྱས་ཡོད་འདུག))
ཧ་ཅང་ཡག་པོ། ད་ཆ་ཤེས་རབ་དགའ་ཚལ་སློབ་གླིང་ཡང་དངོས་གནས་སློབ་གྲྭ་ཞིག་ཏུ་ཕེབས་པར་རྟེན་འབྲེལ་ཞུ། ད་དུང་ཁྱབ་ཁོངས་དོག་ཙམ་ཆེན་པོ་བྱས་ནས།
བོད་ནས་ཐོན་མ་ཐག་ཙམ་མ་ཡིན་པར། ཧི་མ་ལ་ཡ་དང་། སོག་རིགས། འབྲུག ད་དུང་རྒྱ་གར་དང་། བལ་ཡུལ་སོགས་ནས་ས་ཆུ་མ་འཕྲོད་པའམ། དེར་ཞུགས་འདོད་ཡོད་པའི་གྲྭ་བཙུན་ཀྱང་ཚུད་ཐུབ་ན་དགེ་མཚན་ཡོད་པར་འདོད་དོ།།
སློབ་ཡུན་ཇེ་རིང་དང་སྦྱང་གཞིའི་ནང་དོན་ཇེ་མང་དུ་བཏང་བ་ཧ་ཅང་ལེགས། ད་དུང་མུ་མཐུད་ནས་ལས་ཞུགས་ཀྱི་ཚོང་རར་བྲིན་པའི་ཤེས་ཡོན་དང་ལག་ཤེས་རིགས་ཁ་གསབ་དང་། སློབ་ཁྲིད་ཀྱི་སྤུས་ཚད་ལེགས་པའི་ཕྱོགས་སུ་ཤུགས་རྒྱག་དགོས། ཁ་ཡོད་ལག་ཡོད་དང་དགོས་ངེས་ཀྱི་བརྒྱབ་སྐྱོར་མེད་ཚེ། སློབ་མའི་ལྟག་ཆུ་ཆད་ལ་ཉེ་བའི་སློབ་གྲྭ་འདིའི་མདུན་ལམ་ཅི་ཡིན་བཤད་དཀའ།
སྔོན་གྱི་ལོ་གསུམ་དང་ལོ་ལྔའི་དུས་ཡུན་ནང་བཞིན་ཤེས་རབ་དགའ་ཚལ་སློབ་གླིང་གི་སློབ་མ་ཚོས་སློབ་སྦྱོང་བྱ་ཐུབ་ཀྱི་མེད་པ་གོ་རྒྱུ་འདུག དེ་སྔོན་གྱི་སློབ་མ་ཚོ་ཡིན་ན་སློབ་སྦྱོང་གི་དུས་ཚོད་ཀྱིས་མ་ལྡེང་ནས་ཕྱིན་པ་རེད། ཡིན་པ་ཡིན་ནའང་ཁོང་ཚོས་འཛམ་གླིང་གི་རྒྱལ་ཁབ་གང་སར་རང་ཁ་རང་གསོ་དང་། རང་འགྲིག་གཞན་ཕན་བྱས་དང་བྱེད་མུས་སུ་ཡོད། ཁོང་ཚོའི་ཤེས་ཡོན་ལ་དཔོག་པའི་རླབས་ཆེན་གྱི་བྱ་བཞག་རེ་སྒྲུབ་མུས་སུ་ཡོད། ད་ལྟ་དུས་ཡན་ལོ་བརྒྱད་བཟོས་ཀྱང་ལྟ་ས་ཞིག་ཨེ་ཡོད་ན། དེ་སྔོན་ཤེས་རིག་ལས་ཁུངས་ནས་གནང་བའི་དབྱིན་ཡིག་འཛིན་རིམ་བརྒྱད་པ་དང་། བོད་ཡིག་འཛིན་རིམ་བཅུ་གཉིས་ཐོན་པར་ཚད་འཛིན་བྱེད་པའི་ལག་ཁྱེར་དེས་བཙན་བྱོལ་ནང་གི་ཡིག་གད་ཀྱི་ལས་ཀ་ཡང་རེག་ཐུབ་ཀྱི་མེད་ན་མ་འོངས་པའི་ཤེས་རབ་དགའ་ཚལ་སློབ་གླིང་གི་སློབ་མ་ཚོ་ལྟ་རྒྱུ་ཞིག་གང་ནས་ཡོང་། རང་གཞུང་ཤེས་རིག་ལས་ཁུངས་ཀྱིས་གནང་བའི་ལག་ཁྱེར་ལ་རང་གཞུང་གིས་ངོས་ལེན་མ་བྱས་ན་གཞན་སུ་ཞིག་གིས་ངོས་ལེན་བྱེད་ཀྱི་རེད། ཞལ་ནས་སྙན་པོ་རེ་གསུང་བ་རྒྱུ་མཚན་རེ་ལོས་ཡོད། བཀའ་ཁྲི་ཡང་སློབ་གླིང་འདི་ནས་མ་འོངས་པར་འབྱུང་སྲིད་པར་གསུང་བ་ནི་ངས་བལྟས་ན་ཟུར་བལྟས་ལེབ་མཐོང་རང་རེད།
སྣེ་ལེན་ཁང་སྟོང་བ་ཆགས་ལ་ཉེ་བ་དང། བོད་དུ་གཉེན་འཕྲད་འགྲོ་མིའང་ཉིན་རེ་ནས་ཉིན་རེར་ཇེ་མང་འགྲོ་བཞིན་པའི་སྐབས་འདིར། བོད་མི་རིགས་ཀྱི་མདུན་ལམ་ཆེད་བཙན་བྱོལ་དུ་བྲོས་ཡོང་མཁན་ཚོར་དེའི་ཚོད་ཀྱིས་འགན་འཁུར་ཞིག་མ་གནང་དུས། ལྟ་རྒྱུའི་ལྟད་མོ་རྗེས་ལ་ཡོང་ས་རེད་བསམས་ནས་སེམས་འཚབ་ཡོད་སྐབས་འདིར། འདི་འདྲ་ཙམ་པོ་བ་ཞིག་བྱས་པའང་ཞེ་དྲག་ཡག་པོ་རེད། དེ་བཞིན་ལོ་མཚམས་གང་ནས་ཡིན་ན། རྡ་སར་སླེབས་བསྡད་པའི་གསར་འབྱོར་ཚོར་ས་གནས་གང་རུང་ཞིག་ཏུ་གཞིས་ཆགས་ཀྱི་མཐུན་རྐྱེན་ཡང་གནང་ཨེ་ཐུབ་ལྟོས་ན་ཡག་གི་རེད་འདོད།།
དེ་ནི་བོད་ཀྱི་དབུས་གཙང་ཙམ་མིན་པར། ཁམས་དང་མདོ་སྨད་ཕྱོགས་ནས་ཀྱང་བཙན་བྱོལ་ནང་གི་༧རྒྱལ་བ་རིན་པོ་ཆེར་མཇལ་ཐུབ་པ་དང། བཙན་བྱོལ་སྒྲིག་འཛུགས་ཀྱི་བྱུང་བ་དང་གནས་སྟངས་རྣམས་གང་འཚམས་ཤེས་ཡོད་དུས་འདིར། དེ་བས་ཀྱང་རྒྱ་ནག་གིས་བཙོག་པ་ཚ་བ་ཟུང་འབར་གྱི་ཆ་རྐྱེན་ཞན་པའི་ལུང་པར་བརྩི་བའི་རྒྱ་གར་འཕགས་ཡུལ་གྱི་གནས་བབ་ཀྱང་མཐོང་ཐོས་ཉུང་ཙམ་བྱུང་བའི་སྐབས་འདིར། རྒྱ་ནག་གིས་དེང་སང་ཁྱབ་བསྒྲགས་རྙིང་པ་འདི་བསྐྱར་དུ་དོ་ནན་ཆེན་པོས་བསྒྲགས་ཀྱི་འདུག་ཟེར།
༼ རྒུད་སྐྱོབ་ཀྱི་དངུལ་དངོས་བགོ་བཤའ་རྒྱག་པ་སོགས་གནད་དོན་ཞིབ་ཕྲ་ཐུག་དུས་ཨ་མདོ་བ་དང་ཁམས་པ་དང། དགེ་ལུགས་པ་མིན་པའི་གྲུབ་མཐའ་གཞན་གྱི་ཆོས་དད་པ་རྣམས་ལ་དྲང་པོ་མིན་པ་དང། འདྲ་མཉམ་མིན་པའི་སྤྱོད་ཚུལ་འཛིན་གྱི་ཡོད་པ་དཔེར་ན། རྟག་པར་དབུས་གཙང་པར་རྒུད་སྐྱོབ་ཀྱི་དངུལ་དངོས་མང་པོ་ཐོབ་པ་(དེ་ལས་དབང་ཤེད་ཡོད་པའི་གོང་རིམ་མི་སྣར་ཐོབ་པ་དེ་བས་མང།)དང། ཁམས་པ་དང་ཨ་མདོ་བ་ལ་ཉུང་ཉུང་ལས་ཐོབ་ཀྱི་མེད་པ་སོགས་མང་པོ་ཡོད། དེས་ན་དབུས་གཙང་བ་དང་ཁམས་པ་དང་ཨ་མདོ་བའི་བར་དང། དགེ་ལུགས་པ་དང་གྲུབ་མཐའ་གཞན་དག་བར་གྱི་སྔར་ཡོད་ཀྱི་འགལ་ཟླ་སྔར་བས་ཆེ་རུ་འགྲོ་གི་ཡོད་པར་མ་ཟད། དེ་ལས་བཀའ་བཀའ་ཤག་ལ་ངོ་རྒོལ་བྱེད་པའི་རླབས་རྒྱུན་ཡང་ཡང་འཕྱུར་གྱི་ཡོད། ༽
དེ་བཞིན་ཡང་རྒྱ་མི་ཞིག་གིས་འདི་ལྟར་བཤད་འདུག
༼ མི་ལོ་དྲུག་ཅུ་འགོར་གྲབས་ཡོད་པའི་ཏཱ་ལའི་རུ་ཚོགས་ཀྱི་དཔལ་འབྱོར་དང་རིག་གནས། མི་མང་གི་འཚོ་བ་བཅས་ནི་རྒྱལ་ནང་གི་བོད་མིའི་འཚོ་བ་དང་བསྡུར་ཐབས་མེད་ལ། ཕུགས་འཕེར་རང་བཞིན་དང་རང་ཁ་རང་གསོའི་དཔལ་འབྱོར་ལམ་བུའི་ནང་རྒྱལ་ནང་གི་བོད་མི་ཚོར་སྔ་མོ་ནས་གོམས་ཤུགས་ཆེ་རུ་སོང་ཡོད་པ་དང། བོད་ཀྱི་རིག་གནས་དང་སྐད་ཡིག་གི་གནས་ཚད་ནི་དེ་བས་ཀྱང་རང་རྐྱ་ཐུབ་པར་སླེབས་ཡོད་པས། རྒྱལ་ནང་གི་བོད་མིའི་འཚོ་བས་དོན་དངོས་བོད་མི་རིགས་ཀྱི་ངོ་བོ་རྒྱུད་འཛིན་ཐུབ་ཀྱི་ཡོད་པ་ལས། ཕྱི་ཕྱོགས་ཀྱི་དབྱིན་བོད་མཉམ་བསྲེས་དང། གཞན་ལ་སློང་མོ་རྒྱག་པའི་འཚོ་བ་བསྐྱལ་སྟངས་དེ་དག་གིས་བོད་མི་རིགས་ནམ་ཡང་ཡར་རྒྱས་གཏོང་གི་མ་རེད ། ༽
ད་སྔ་ཕན་ཆད་དང་བསྡུར་ན་སློབ་མ་ཁ་ཤས་ལས་ལྷག་མི་འདུག་ལབ་ཀྱང་འགྲིག་པའི་ཚོད་དུ་སླེབས་འདུག སློབ་གྲ་འདི་མ་སྟོངས་པའི་ཆེད་དུ་ཐབས་ལམ་ཡག་པོ་ཐེན་འདུག མ་འོངས་པར་རྒན་གསོ་ཁང་ཞིག་གི་ངོ་བོར་ཆགས་པ་ལས་ཧི་མ་ལ་ཡི་མི་རིགས་ཚོར་གོ་སྐབས་སྤྲོད་དགོས་ཀྱང་སྤྲོད་དགོས་པ་ལས་སློབ་གྲ་དེ་རང་གར་ཐོར་གཞིག་ཏུ་མི་འགྲོ་བར་བྱེད་རྒྱུར་གལ།
ཤེས་རབ་དགའ་ཚལ་སློབ་གླིང་གི་སློབ་མའམ་གསར་འབྱོར་ཚོར་གོ་སྐབས་སྤྲོད་པ་ནི་དངོས་གནས་ཡག་པོ་རེད་འདུག།