རྒྱ་གཞུང་གིས་བོད་མདོ་སྨད་རྨ་ལྷོ་ཁུལ་གྱི་བོད་མི་བཞི་ལ་རྒྱལ་ཁབ་ཁ་བྲལ་སྐུ་སློང་ཞེས་པའི་ཉེས་མིང་འོག་ལོ་ ༣ ནས་ ༦ བར་གྱི་དུས་བཀག་བཙོན་འཇུག་གི་ཁྲིམས་ཐག་བཅད་འདུག
ཉེ་ཆར་བོད་མདོ་སྨད་མཚོ་སྔོན་ཞིང་ཆེན་རྨ་ལྷོ་བོད་རིགས་རང་སྐྱོང་ཁུལ་གྱི་འབྲིང་རིམ་མི་དམངས་ཁྲིམས་ཁང་གིས། ཐུན་རིན་རྫོང་དང་རྩེ་ཁོག་རྫོང་གཉིས་སུ་ཁྲིམས་ར་ཚོགས་ཏེ། བོད་མི་གཅོད་པ་རྒྱལ་དང་ལྕགས་ཐར། ནམ་མཁའ་བྱམས། མགོན་བྷེ་བཅས་བཞི་ལ་རྒྱལ་ཁབ་ཁ་བྲལ་སྐུལ་སློང་གི་ཉེས་མིང་འོག ཁོང་ཚོ་སོ་སོར་ལོ་ ༣ ནས་ ༦ བར་གྱི་དུས་བཀག་བཙོན་འཇུག་གི་ཁྲིམས་ཐག་བཅད་ཡོད་པ་མ་ཟད། ཕྱི་ཟླ་ ༤ བའི་ཚེས་ ༡༢ ཉིན་གྱི་མཚོ་སྔོན་ཉིན་རེའི་ཚགས་པར་ཐོག བོད་མི་གཅོད་པ་རྒྱལ་ལ་ལོ་ ༦ དུས་བཀག་བཙོན་འཇུག་དང་ལོ་ ༣ ཆབ་སྲིད་ཁེ་དབང་བཙན་འཕྲོག་བྱས་ཡོད་པ་དང་། ལྕགས་ཐར་ལ་ལོ་ ༤ དུས་བཀག་བཙོན་འཇུག་དང་ལོ་ ༢ ཆབ་སྲིད་ཁེ་དབང་བཙན་འཕྲོག ནམ་མཁའ་བྱམས་ལ་ལོ་ ༦ དུས་བཀག་བཙོན་འཇུག་དང་ལོ་ ༣ ཆབ་སྲིད་ཁེ་དབང་བཙན་འཕྲོགམགོན་པོ་(དཀོན་བྷེ) ལ་ལོ་ ༣ དུས་བཀག་བཙོན་འཇུག་དང་ལོ་ ༡ ཆབ་སྲིད་ཁེ་དབང་བཙན་འཕྲོག་བཅས་ཀྱི་ཁྲིམས་ཐག་བཅད་ཡོད་ཚུལ་བསྒྲགས་འདུག
ཡང་མཚོ་སྔོན་ཉིན་རེའི་ཚགས་པར་སྟེང་། བོད་མི་གཅོད་པ་རྒྱལ་གྱིས་ཁེའུ་ཁེའུ་ QQ བརྒྱུད་དེ་བོད་རང་བཙན་དང་འབྲེལ་བའི་པར་རིས་དང་ཡི་གེ་སོགས་གནས་ཚུལ་ཕྱིར་བསྒྲགས་དང་རྒྱལ་ཁབ་ཁ་བྲལ་གྱི་གཏམ་བརྗོད་བྱས་ཡོད་ཚུལ་དང་། ལྕགས་ཐར་གྱིས་མི་གཞན་གྱིས་རང་སྲེག་བྱེད་བཞིན་པ་ཤེས་བཞིན་དུ།སྔ་ཕྱིར་ཐེངས་གསུམ་ལ་མི་གཞན་པར་རང་སྲེག་གནང་མཁན་གྱི་འདྲ་པར་དང་ཁ་བྲལ་གྱི་ནང་དོན་ལྡན་པའི་པར་རིས་བཀྲམས་ཡོད་ཚུལ། ནམ་མཁའ་བྱམས་ཀྱིས་རང་སྲེག་བྱེད་མཁན་ལ་པར་བརྒྱབ་སྟེ་གནས་འཕྲིན་དྲ་རྒྱ་སྤྱད་ནས་ཕྱི་ཕྱོགས་དང་བོད་ནང་གི་མི་གཞན་པར་བརྒྱུད་གཏོང་བྱས་ཡོད་ཚུལ། མགོན་པོས་རྒྱལ་ཁབ་ཁ་བྲལ་གྱི་ནང་དོན་ལྡན་པའི་རང་སྲེག་འདྲ་པར་སོགས་བརྒྱུད་སྒྲོག་བཅས་རྒྱལ་ཁབ་ཁ་བྲལ་སྐུལ་སློང་བྱས་པའི་དབང་གིས་ཁྲིམས་ཐག་བཅད་ཡོད་སྐོར་བཀོད་འདུག
ཐེངས་འདིར་རྒྱ་གཞུང་གིས། ལྕགས་ཐར་དང་མགོན་བྷེ་གཉིས་ཀྱིས་རང་ཉེས་རང་ཞུ་བྱས་པ་དང་། གཅོད་པ་རྒྱལ་དང་ནམ་མཁའ་བྱམས་གཉིས་ཀྱིས་ཉེས་པ་ཁས་ལེན་གྱི་རྣམ་འགྱུར་ཡག་པོ་བསྟན་པ་བཅས་ལ་བརྟེན་ནས་ཁྲིམས་ཆད་ཡང་པོ་བཅད་ཡོད་ཚུལ་ཙམ་ལས། ཁོ་ཚོའི་ལོ་ཚད་དང་ལས་གནས། སྡེ་བ་གང་ནས་ཡིན་མིན་སོགས་གང་ཡང་བརྒྱུད་ལམ་ཁག་ཏུ་གསལ་འདོན་བྱས་མེད་པ་རེད།
གསར་འགོད་པ། དོན་གོ
