བླ་བྲང་དགོན་ནང་གི་ཕྱོཊ་ཡོང་གྲྭ་བ་ཚོ་ཕྱིར་འཕུད་གཏོང་གི་འདུག

མདོ་སྨད་བླ་བྲང་དགོན་པའི་ནང་གི་ཕྱོགས་ཡོང་གྲྭ་བ་སློབ་གཉེར་བ་ཚོར་རྒྱ་གཞུང་གིས་སུན་པོ་བཟོ་བཞིན་ཡོད་པ་དང་། ལོ་འདི་འགར་གྲྭ་བ་མང་པོ་ཞིག་སྔ་རྗེས་སུ་ཕྱིར་འཕུད་བཏང་ཡོད་འདུག

ཉེ་ཆར་བོད་ནས་འབྱོར་ཞིང་ད་ལྟ་ངྷ་རམ་ས་ལར་གནས་སྡོད་མིང་བརྗོད་འདོད་མེད་མཁན་ཞིག་དང་གླེང་མོལ་བྱས་སྐབས། ཁོང་གིས་རྒྱ་ནག་གཞུང་གིས་སྔོན་མ་ནས་མདོ་སྨད་བླ་བྲང་བཀྲ་ཤིས་འཁྱིལ་དགོན་པའི་གྲྭ་བའི་གྲངས་འབོར་ལ་ཚོད་འཛིན་དང་། དགོན་པའི་ཆོས་རྭར་ཞུགས་ཚད་ཐོག་དམ་དྲག་ཆེན་པོ་བྱེད་ཀྱིན་ཡོད་པ་དང་། ༢༠༠༩ ལོ་ནས་བཟུང་དམ་དྲག་སྔར་ལས་ཆེ་རུ་བཏང་སྟེ། ཞིང་ཆེན་གཞན་ནས་ཡོང་བའི་གྲྭ་བ་ཚོ་ཚོགས་ཞུགས་བྱ་མི་ཆོག་པའི་ཡིག་ཆ་གསལ་བསྒྲགས་བྱས་ཏེ། ལྷ་ས་དང་ཟི་ཁྲོན། མཚོ་སྔོན་སོགས་ནས་ཡོང་བའི་སློབ་གཉེར་བ་ ༡༧༠ ལྷག་ཕྱིར་ལོག་བྱེད་དགོས་བྱུང་ཡོད་སྐོར་རྗོད་བྱུང་ལ།  ཁོང་གིས། “ རྒྱ་ནག་གཞུང་གིས་བླ་བྲང་དགོན་པའི་གྲྭ་བ་ཚོར་ཚོད་འཛིན་བྱེད་ཀྱི་ཡོད་པ་དེར་དམིགས་ཡུལ་གཉིས་བཟུང་ཡོད་པ་རེད། གཅིག་ནི་དགོན་པར་དོ་དམ་སྟངས་འཛིན་བྱེད་པར་སྟབས་བདེ་བཟོ་བཞིན་ཡོད་པ་དང་། གཉིས་པ་གྲྭ་བ་ཉུང་དུ་བཏང་སྟེ་དགོན་སྡེའི་ཆོས་ལུགས་པའི་སྟོབས་ཤུགས་གཅོག་འཕྲི་བྱེད་ཐབས་བྱེད་ཀྱི་ཡོད་པ་རེད” ཅེས་བརྗོད་བྱུང་།

ཁོང་གིས་མུ་མཐུད་དུ་བརྗོད་པ་ལྟར་ན། རྒྱ་གཞུང་གིས་གྲྭ་བའི་གྲངས་འབོར་ཚོད་འཛིན་ཆེད་རང་ལོ་བཅོ་བརྒྱད་མ་སོན་པའི་རིགས་གྲྭ་བ་བྱེད་མི་ཆོག་པ་དང་། སློབ་གྲྭའི་ལག་རྟགས་མེད་མཁན་གྲྭ་བ་བྱེད་མི་ཆོག་པ་སོགས་ཀྱི་སྒྲིག་གཞི་ལག་བསྟར་བྱས་རྗེས། རྒྱ་ནག་གཞུང་གི་མིང་ཐོའི་ནང་བླ་བྲང་བཀྲ་ཤིས་འཁྱིལ་དུ་ཚོགས་ཞུགས་གྲྭ་བ་གྲངས་འབོར་ ༩༩༩  ལས་ཚུད་མེད་པ་དང་། གལ་སྲིད། གྲྭ་པ་གྲངས་འབོར་ ༡༠༠༠ ལ་བསླེབ་ཚེ། དེ་ལ་ཁ་གཡར་ཏེ་གྲྭ་བ་གཞན་མང་པོ་དུས་མཉམ་དུ་ཕྱིར་འཕུད་གཏོང་གི་ཡོད་འདུག གནས་སྟངས་དེའི་འོག་ཕྱོགས་ཡོང་སློབ་གཉེར་བ་མང་པོ་ཞིག་ལ་དཀའ་ངལ་ཆེན་པོ་འཕྲད་ཀྱི་ཡོད་འདུག

༢༠༠༨ ལོའི་ཞི་རྒོལ་ཆེན་མོའི་སྐབས་དང་། ༢༠༠༩ ལོ་ནས་བཟུང་རང་ལུས་མེར་བསྲེཊ་བྱུང་སྐབས་བཅས་ལ། དགོན་པའི་ནང་དང་ཉེ་འཁོར་ཡོངས་སུ་དྲག་ཆས་ཐོགས་ཡོད་པའི་དམག་མི་ཕོན་ཆེན་འགྲེམས་འཇོག་བྱས་ཏེ་མི་མང་ལ་འཇིགས་སྣང་སྐུལ་གྱི་ཡོད་ནའང་། རྗེས་སུ་བྱེད་ཐབས་དེ་ལ་འགྱུར་བ་བཏང་སྟེ། དམག་མི་དང་ཉེན་རྟོག་པ་ཚོས་མི་མང་དཀྱུས་མའི་ལ་བ་གྱོན་ཏེ་དགོན་པའི་གླང་བར་དང་གྲོང་ཁྱེར་ནང་། དེ་བཞིན་མང་ཚོགས་ཁྲོད་བཅས་སུ་ཁ་བཀྲམས་ཏེ། ཕྱི་ཚུལ་དུ་དམ་དྲག་མེད་པར་ཧ་ཅང་ལྷིང་འཇགས་ཀྱི་རྣམ་པ་སྟོན་ཅི་ཐུབ་བྱེད་ཀྱིན་ཡོད་འདུག

དེང་སྐབས་བླ་བྲང་དགོན་པ་དང་རྗེ་སྐུ་འབུམ་དགོན་པ། རྔ་པ་ཀིརྟི་དགོན་པ། རེབ་གོང་རོང་བོ་དགོན་པ་སོགས་གཙོས་པའི་མདོ་སྨད་ཕྱོགས་ཀྱི་དགོན་སྡེ་མང་པོའི་ནང་གཞུང་སྒྲུབ་ཁང་གསར་འཛུགས་ཀྱིས་རྒྱ་ནག་གཞུང་གི་ལས་བྱེད་མི་སྣ་བསྐོ་བཞག་བྱེད་ཀྱི་ཡོད་འདུག་ལ། ཐ་ན་དགོན་པའི་ཉེ་འཁོར་གྱི་མང་ཚོགས་ནང་དུའང་དམ་དྲག་བྱེད་ཤུགས་ཆེ་རུ་བཏང་ཞིང་། ས་གནས་གང་སར་གློག་མིག་བཙུགས་ཏེ་ཕྱི་རྒྱལ་ཡུལ་སྐོར་སྤྲོ་འཆམ་པ་ཁྱིམ་ཚང་ནང་སྐྱོད་མི་ཆོག་པ་དང་། ཡུལ་མི་ཚོས་ས་གནས་གཞན་གྱི་མི་ལ་གནས་ཚང་གཡར་མི་ཆོག་པ། སློབ་གྲྭ་ཁག་གི་སློབ་ཕྲུག་ཚོས་ཕྱི་རྒྱལ་བ་དང་ཐུག་འཕྲད་ཀྱིས་དབྱིན་སྐད་ཐོག་ཁ་བརྡ་བྱེད་མི་ཆོག་པ་སོགས་བཟོས་ཡོད་འདུག  

གསར་འགོད་པས་ཁོང་ལ་བོད་ནང་གི་སྐད་ཡིག་སྐོར་ལ་གླེང་མོལ་བྱེད་སྐབས། “ བོད་ནང་གི་གྲོང་ཁྱེར་ཚང་མའི་ནང་བོད་རིགས་ལས་རྒྱ་རིགས་མང་བ་ཡོད་པ་རེད། གྲོང་ཁྱེར་ནང་གི་བོད་པ་གཞོན་སྐྱེས་ཚོས་བོད་སྐད་ལས་རྒྱ་སྐད་བཤད་བདེ་བོ་དང་། བོད་སྐད་བཤད་སྐབས་ཀྱང་ནང་དུ་རྒྱ་སྐད་དང་རྒྱ་སྐད་ཀྱི་ཚིག་མང་པོ་བྱེད་སྤྱོད་མ་བཏང་ན་བཤད་ཤེས་ཀྱི་ཡོད་པ་མ་རེད། འབྲོག་ཕྱོགས་ཀྱི་སྐད་ཆའི་ནང་དུའང་རྒྱ་སྐད་མང་པོ་འདུག ཡིན་ནའང་སྔོན་མ་དང་བསྡུར་ན་བོད་སྐད་ཇེ་གཙང་དུ་འགྲོ་བཞིན་འདུག ས་ཁུལ་མང་པོར་བོད་སྐད་སྲུང་སྐྱོབ་ལས་འགུལ་འདྲ་མིན་སྤེལ་གྱི་འདུག བོད་ཆོལ་ཁ་གསུམ་གྱི་མཁས་དབང་མང་པོ་ཞིག་མཉམ་རུབ་ཐོག་བསྡུ་སྒྲིག་བྱས་པའི་༼བོད་རྒྱ་དབྱིན་གསུམ་གསར་བྱུང་རྒྱུན་བཀོད་མིང་མཛོད༽ གཙོས་པའི་དཔེ་དེབ་ཁག་དང་། གསར་བྱུང་གི་ཐ་སྙད་སྐོར་འགྲེམས་སྤེལ་བྱས་ཏེ་སློབ་གསོ་གཏོང་བ་དང་། བགྲོ་གླེང་འཛུགས་པ་སོགས་ཐབས་ལམ་སྣ་ཚོགས་འཐེན་བཞིན་འདུག སྔར་ལོ་རྒྱ་གཞུང་གིས་དཔེ་དེབ་དེ་དག་ཀན་སུའུ་ཞིང་ཆེན་འོག་བཀྲམས་མི་ཆོག་སྐོར་བཤད་དེ་བཀག་བསྡོམས་བྱས་སོང་། དཔེ་ཁང་སོགས་སུའང་དེབ་དེ་རིགས་བཙོང་བ་ཡིན་ན་ཆབ་སྲིད་ཀྱི་གནད་དོན་དུ་བརྩི་བཞིན་འདུག ཁོང་ཚོར་རྒྱུ་མཚན་མང་པོ་བཤད་རྒྱུ་མི་འདུག” ཅེས་བརྗོད་བྱུང་།

བོད་ནང་རང་གི་རང་ལུས་མེར་བསྲེགས་ཐོག་བོད་ནང་གླེང་ཕྱོགས་གང་འདྲ་ཡོད་མེད་དྲིས་པའི་ལན་དུ “རང་ལུས་མེར་བསྲེཊ་རེ་བྱུང་སྐབས་ཚང་མས་ཕན་ཚུན་ལ་ཁ་པར་ནང་ནས་གནས་ཚུལ་གཏོང་རེས་བྱས་ཏེ། ལམ་སང་ལམ་སང་གོ་ཡོང་གི་འདུག སྔོན་མ་གནས་ཚུལ་དེ་འདྲ་བྱུང་སྐབས་ལམ་སང་དགོན་པར་སོང་སྟེ་བསྔོ་སྨོན་མཆོད་འབུལ་བྱེད་པའི་ལུགས་སྲོལ་ཞིག་དར་འདུག ཉེ་ལམ་ཞིག་ནས་རྒྱ་གཞུང་གིས་མཆོད་འབུལ་བྱེད་དུ་སྐྱོད་པར་དམ་དྲག་ཤུགས་ཆེ་རུ་བཏང་འདུག མང་ཚོགས་ཚོས་རང་ལུས་མེར་བསྲེགས་གནང་མཁན་ཚོར་ཧ་ཅང་རྩ་ཆེན་པོ་དང་གུས་ཞབས་ཆེན་པོ་བྱེད་ཀྱི་འདུག མི་རིགས་ཀྱི་དཔའ་བོ་དང་རྒྱལ་གཅེས་བར་ངོས་འཛིན་བྱེད་ཀྱི་འདུག” ཅེས་བརྗོད་སོང་།

ཁོ་རང་སྒེར་ལ་བསམ་ཚུལ་ག་རེ་ཡོད་མེད་དྲིས་པར། “མེར་བསྲེགས་གཏོང་མཁན་ཁྲོད་ལོ་ཆུང་ཆུང་མང་པོ་འདུག ལོ་ ༡༧ ཅན་དེ་འདྲའི་སྲོག་ཤོར་ཡོང་སྐབས་ཕངས་པོ་འདུག ངས་བལྟས་ན་བོད་ཕྱི་ནང་གཉིས་ཀས་སྐད་ཡིག་སྲུང་སྐྱོབ་ཐོག་ཤུགས་བརྒྱབ་ན་ལས་འགུལ་རྩ་ཆེན་པོ་ཞིག་རེད་དྲན་གྱི་འདུག” ཅེས་དང་། “གཞོན་སྐྱེས་ཚོ་འཛོམས་ས་མང་ཆེ་བར་བོད་དོན་སྐོར་གྱི་གླེང་མོལ་ཡོད་ཡོད་པ་རེད། སྲིད་སྐྱོང་བློ་བཟང་སེང་གེ་མཆོག་གི་སྐོར་ལ་ཁ་བརྡ་བྱེད་རྒྱུར་ཚང་མ་སྤྲོ་བ་ཆེན་པོ་འདུག ཁོ་རང་སློབ་གྲྭ་གང་ནས་ཐོན་པ་དང་ཤེས་ཡོན་ག་རེ་ཡོད་མེད། ཐ་ན་ཁོང་གིས་གཏམ་བཤད་ག་རེ་གནང་ཡོད་མེད་སོགས་ཀྱང་ཤེས་ཀྱི་འདུག” ཅེས་བརྗོད་སོང་།

གསར་འགོད་པ། དོན་གོ