འབར་བཞིན་པའི་བོད།

དེ་རིང་ཕྱི་དྲོར་ངྷ་སའི་བོད་སྨྱུག་མཐུན་ཚོགས་(Tibetwrites.org)ཀྱི་གོ་སྒྲིག་འོག མེག་ལོར་(Club House) ཞེས་པའི་གསོལ་མགྲོན་ཁང་དུ། བོད་མི་རང་ལུས་མེར་བསྲེགས་སྐོར་ཆེད་སྒྲིག་བྱས་ཡོད་པའི་རྒྱ་གར་དུས་དེབ་དབུ་འབྱེད་དང་བགྲོ་གླེང་འདུ་འཛོམས་ཤིག་གནང་སོང་། དེར་ཕྱི་རྒྱལ་བ་དང་བོད་མི་རྩོམ་པ་པོ་དང་སྲིད་དོན་པ། ལས་འགུལ་བ་བཅས་མི་ ༥༠ ཙམ་མཉམ་ཞུགས་ཐོག རྒྱ་གར་གྱི་དུས་དེབ་༼དཔྱད་གླེང་ (Seminar)༽ ཞེས་པ་དེའི་སྟེང་དབྱིན་ཡིག་ཐོག་བོད་མིའི་རང་ལུས་མེར་བསྲེགས་སྐོར་གྱི་རྩོམ་ཡིག་སྤེལ་མཁན་བོད་རིགས་རྩོམ་པ་པོ་ཁག་ཅིག་གིས། དུས་དེབ་ཏུ་སྤེལ་པའི་སོ་སོའི་རྩོམ་ཡིག་གི་བརྗོད་སྙིང་ངོ་སྤྲོད་དང་རྩོམ་ཡིག་སྒྲོག་སྦྱངས་གནང་སོང་།

འདུ་འཛོམས་ཀྱི་ཐོག་མར་བུ་ཆུང་བསོད་ནམས་ལགས་ཀྱིས་ངོ་སྤྲོད་གནང་པ་ལྟར་ན། རྒྱ་གར་གྱི་དུས་དེབ་དཔྱད་གླེང་ཞེས་པ་ནི་རྒྱ་གར་གྱི་ཤེས་ལྡན་མི་སྣས་དཔྱད་གླེང་རྩོམ་ཡིག་འགྲེམས་སྤེལ་བྱེད་སའི་དུས་དེབ་མིང་གྲངས་ཅན་ཞིག་དང་། དུས་དེབ་དེ་ ༡༩༥༩ ལོར་མགོ་བཙུགས་པ་ནས་ཟླ་རེའི་འདོན་སྤེལ་བྱས་ཏེ། རྒྱ་གར་དང་རྒྱལ་སྤྱིའི་གནད་དོན་རེར་དམིགས་སུ་བཀར་ནས་ཆེད་སྒྲིག་རྩོམ་ཡིག་སྤེལ་གྱི་ཡོད་ཅིང་། འདི་ལོའི་ཕྱི་ཟླ་ ༤ འདོན་སྤེལ་གྱི་དམིགས་བཀར་ཆེད་སྒྲིག་བོད་མིའི་རང་ལུས་མེར་བསྲེགས་སྐོར་ཡིན་འདུག

ཐེངས་འདིའི་དཔྱད་གླེང་དུས་དེབ་ཀྱི་ཆེད་སྒྲིག་ཁ་བྱང་དུ་༼འབར་བཞིན་པའི་བོད་༽ཅེས་པའི་ནང་བོད་རིགས་རྩོམ་པ་པོ་ཁག་ཅིག་དང་ཕྱི་རྒྱལ་གྱི་རྩོམ་པ་པོ། རྒྱ་རིགས་རྩོམ་པ་པོ་བཅས་ཀྱིས་བོད་མིའི་རང་ལུས་མེར་བསྲེགས་དང་འབྲེལ་པའི་དཔྱད་རྩོམ་དང་། སྙན་ངག རང་ལུས་མེར་བསྲེགས་གནང་མཁན་ཚོའི་ཞལ་ཆེམས་སོགས་བཀོད་འདུག

དེ་རིང་གི་འདུ་འཛོམས་ཐོག་དཔྱད་གླེང་དུས་དེབ་སྟེང་རྩོམ་ཡིག་སྤེལ་མཁན་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཐུབ་བསྟན་བསམ་འཕེལ་ལགས་དང་། སྤྱི་འཐུས་ཟླ་སྒྲོན་ཤར་གླིང་ལགས། རང་བཙན་འཐབ་རྩོད་པ་བསྟན་འཛིན་བརྩོན་འགྲུས་ལགས། རྩོམ་པ་པོ་བུ་ཆུང་བསོད་ནམས་ལགས་བཅས་ཀྱིས་སོ་སོའི་རྩོམ་ཡིག་གི་བརྗོད་སྙིང་ངོ་སྤྲོད་དང་སྒྲོག་སྦྱངས་གནང་མཐར། ཚོགས་ཞུགས་པ་ཚོ་དང་ལྷན་བགྲོ་གླེང་དང་དྲི་བ་དྲིས་ལན་གནང་སོང་།

༼ གནས་ཚུལ་རྒྱས་པ་བོད་ཀྱི་དུས་བབ་གསར་ཤོག་ཐོག་འགོད་རྒྱུ་ཡིན ༽

གསར་འགོད་པ། བནྡེ་སྐྱབས།