ཨ་རིའི་སྲིད་འཛིན་ཟུར་པ་ཁག་གི་དཔེ་མཛོད།

ཁ་སང་གཟའ་ཕུར་བུའི་ཉིན། ད་ལྟ་འཚོ་བཞུགས་གནང་བཞིན་པའི་ཨ་རིའི་སྲིད་འཛིན་ ༥ གཙོས་གཞན་གཞུང་འབྲེལ་མ་ཡིན་པའི་གནད་ཡོད་མི་སྣ་བཅས་ཚོགས་བཞུགས་པ་ ༡༠༠༠༠ ལྷག  སྲིད་འཛིན་ཟུར་བ་བྷུ་ཤི་(George W Bush) མཆོག་གི་དཔེ་མཛོད་དང་འགྲེམས་སྟོན་ཁང་དབུ་འབྱེད་མཛད་སྒོའི་སྟེང་ཕེབས་ཡོད་འདུག   

བྷུ་ཤི་དཔེ་མཛོད་དང་འགྲེམས་སྟོན་ཁང་འདིར་བྷུ་ཤི་ཐེབས་རྩ་ཁང་གིས་ཨ་སྒོར་ས་ཡ་ ༢༥༠ ཙམ་གྱི་འགྲོ་གྲོན་བཏང་སྟེ། ཨ་རིའི་གྲོང་ཁྱེར་ཌལ་ལྰ་(Dalla)ཡི་གཙུག་ལག་སློབ་གྲྭའི་ནང་འཛུགས་སྐྲུན་བྱས་ཡོད་ལ། ཁོང་གིས་ཨ་རིའི་ཕོ་བྲང་དཀར་པོའི་ནང་ལས་ཡུན་ལོ་ངོ་ ༡༠ རིང་འཛིན་སྐྱོང་གནང་སྐབས་ཀྱི་གཞུང་དོན་ལས་རིམ་སྐོར་གྱི་ཡིག་ཆ་ཕྱོགས་བསྡུས་དང་བརྙན་པར། སྒྲ་མཛོད། འཛམ་གླིང་གི་གནད་ཡོད་མི་སྣ་དག་གིས་སྤྲད་པའི་ལེགས་སྐྱེས་དང་ ༩་༡༡ དོན་རྐྱེན་གྱི་སྐོར། ཐ་ན་སྲིད་དབང་སྒེར་སྤྱོད་པ་ས་ཌན་ཧོ་སམ་གྱི་ལག་བཟུང་ཐུང་མདའ་སོགས་ཀྱང་གཉར་ཚགས་འགྲེམས་སྟོན་བྱས་ཡོད་འདུག

ཨ་རི་སྲིད་འཛིན་ཟུར་བ་ཇི་མེ་ཁར་ཊིར་(Jimmy Carter)མཆོག་དང་བྷུ་ཤི་རྒན་གཞོན་གཉིས། ཁུ་ལིན་ཏོན་(Bill Clinton) ལས་ཐོག་སྲིད་འཛིན་ཨོ་བྷ་མ་བཅས་ཀྱི་གཏམ་བཤད་གནང་ཡོད་འདུག  ཇི་མེ་ཁར་ཊིས་མཆོག་གིས་སྲིད་འཛིན་ཟུར་བ་བྷུ་ཤིས་ཨ་ཧྥི་རི་ཀིའི་ནང་དུ་ཨད་ཙི་ (AIDS) ནད་ཚ་སྔོན་འགོག་དང་མི་རིགས་བདེ་སྡུག་ཐོག་ཏུ་རྒྱབ་སྐྱོར་རོགས་རམ་གནང་བར་བསྔགས་བརྗོད་བྱས་ཡོད་པ་དང་།  དེའི་རྗེས་སུ་སྲིད་འཛིན་ཨོ་བྷ་མས་ཀྱང་ངེད་གཉིས་ཀྱི་ཆབ་སྲིད་ངོ་བོ་མ་འདྲ་བ་ཡིན་ཡང་། མི་མང་ཚོགས་པར་འོས་ཤོག་ལྡུག་མཁན་ཙམ་མ་ཡིན་པར། ཁོ་རང་རྒྱལ་ཁབ་དང་མི་མང་ལ་དགའ་བོ་བྱེད་བཞིན་ཡོད་ཅེས་གསུངས་འདུག

བྷུ་ཤི་ཐེབས་རྩ་ཚོགས་པས་༧གོང་ས་མཆོག་ལའང་མཛད་སྒོ་དབུ་འབྱེད་སྟེང་སྐུ་མགྲོན་དུ་མགྲོན་ཤོག་ཕུལ་འདུག་ཀྱང་། ཉེ་ཆར་ ༧གོང་ས་མཆོག་གིས་ཡུ་རོབ་ནང་མཛད་འཕྲིན་སྐྱོང་བཞིན་པའི་དུས་ཚོད་ཀྱི་དབང་གིས་ཕེབས་ཐུབ་མེད་ཀྱང་།  བྱང་ཨ་རིའི་སྐུ་ཚབ་དོན་གཅོད་བློ་བཟང་སྙན་གྲགས་མཆོག་༧གོང་ས་མཆོག་གི་སྐུ་ཚབ་ཏུ་ཕེབས་ཡོད་འདུག་པ་དང་། ༢༠༡༠ ལོར་༧གོང་ས་མཆོག་བྷུ་ཤི་ཐེབས་རྩ་ཚོགས་པའི་ནང་ཕེབས་ཡོད་འདུག

འཛམ་གླིང་དམག་འཁྲུག་ཐེངས་གཉིས་པའི་སྐབས་ཀྱི་ཨ་རིའི་སྲིད་འཛིན་ཪོད་སེ་བེལ་ཏི་(Franklin D Roosevelt) ་ནས་སྲིད་འཛིན་ཨོ་བྷ་མ་བར་ཁྱད་ཆོས་མ་འདྲ་བའི་སྲིད་འཛིན་བཅུ་གཉིས་ཀྱིས་ཁོང་ཚོའི་མིང་ཐོག་ནས་ཁྱད་ཆོས་མ་འདྲ་བའི་དཔེ་མཛོད་ཁང་རེ་བརྒྱབ་ཡོད་པ་རེད།