ཁ་སང་ཕྱི་ཚེས་ ༣ ཉིན་གྱི་སྔ་དྲོར་ཀི་སི་ཐན་གྱི་རྒྱལ་ས་ཨེ་སི་ལཱ་མ་ཌ་ཊི་(Islamabad ) རུ་ལྐོག་གསོད་དོན་རྐྱེན་ཞིག་བྱུང་ཡོད་པ་དང་། དེ་ནི་པ་ཀི་སི་ཐན་གྱི་སྲིད་འཛིན་ཟུར་བ་ལྕམ་སྦུ་ཌོ་ (Benazir Bhutto) མཆོག་གི་ཁྲིམས་གཏུག་པ་ཅཱའོ་ཌ་རཱེས་(chaudhry Zulfiqar Ali) ལགས་རང་ཁྱིམ་ནས་རཱ་བཱ་པེན་ཊིའི (Rawalpindi) ཁྲིམས་ཁང་དུ་སྤུ་ཌོ་ལྐོག་གསོད་གྱོད་དོན་སྐོར་གྱི་དྲི་བ་དྲིས་ལན་ཞིག་ལ་འགྲོ་བཞིན་པའི་ལམ་བར་དུ། སྦག་སྦག་ཞོན་མཁན་ཞིག་གིས་ཁོང་གི་མགོ་དང་རྒྱབ་མདུན་གཉིས་ལ་མེ་མདའ་ཐེངས་ ༧ བརྒྱབ་སྟེ་ལྐོག་གསོད་བྱས་ཡོད་པ་དང་། ཁོང་དེ་མ་ཐག་སྨན་ཁང་དུ་འཁྲིད་ཡོད་ཀྱང་མྱུར་སྐྱོབ་མ་ཐུབ་པར་འདས་གྲོངས་སུ་ཕྱིན་འདུག་ལ། ལྐོག་གསོད་པ་ཡང་འཛིན་བཟུང་མ་ཐུབ་པར་བྲོས་ཡོད་འདུག
ས་གནས་ཉེན་རྟོག་པས་བརྗོད་པ་ལྟར་ན། ཁོ་རང་སྦོ་ཌོའི་ལྐོག་གསོད་དོན་རྐྱེན་ཆེད་རཱ་བཱ་པེན་ཊིའི་ཁྲིམས་ཁང་དུ་སྐྱོད་པའི་ལམ་བར་ནས་ལྐོག་གསོད་ཐེབས་ཡོད་པ་དང་། ཁོང་ལྐོག་གསོད་བྱས་པའི་རྒྱུ་མཚན་གསལ་བོ་བརྗོད་མེད་ཀྱང་། ཁོང་ཚོར་བདེན་དཔང་མང་པོ་ཡོད་ལ་གནས་སྐབས་རིང་ཕྱི་བསྒྲགས་བྱ་རྒྱུ་མིན་པ། ཅཱའོ་ཌ་རཱེས་ལ་ལྐོག་ནས་མེ་མདའ་བརྒྱབ་མ་ཐག་ཁོང་གི་རླངས་འཁོར་གྱིས་བུད་མེད་ཞིག་ལ་གདོང་ཐུག་བརྒྱབ་སྟེ་བུད་མེད་དེ་བསད་ཡོད་པ་མ་ཟད། རླངས་འཁོར་ཁ་ལོ་བའང་རྨས་ཡོད་སྐོར་བརྗོད་འདུག
ཟླ་འགའི་སྔོན་དུ་བྷེ་བྷེ་སི་གསར་ཁང་གིས་ཅཱའོ་ཌ་རཱེས་ལགས་སུ་བཅར་འདྲི་ཞིག་བྱས་པའི་ནང་། ཁོང་ལ་ངོ་མི་ཤེས་པའི་མི་མང་པོ་ཞིག་གིས་ཁ་པར་བརྒྱུད། ཁོ་རང་གྱོད་དོན་རྟོག་ཞིབ་ལས་ཀ་ནས་ཕྱིར་འཐེན་བྱ་དགོས་བའི་འཇིགས་སྐུལ་ཐེངས་མང་བྱས་སོང་ཚུལ་བརྗོད་འདུག
ཁྲིམས་རྩོད་པ་ཅཱའོ་ཌ་རཱེས་ནི་ཉེས་དོན་ཁྲིམས་རྩོད་པ་དང་གཞུང་གི་བདེ་འཇགས་ཞིབ་དཔྱོད་ལས་ཁུངས་ཀྱི་ཆེས་མཐོའི་ཞིབ་དཔྱོད་པ་བཅས་ཡིན་པ་དང་། ༢༠༠༧ ལོར་པ་ཀི་སི་ཐན་མི་མང་ཚོགས་པའི་དབུ་ཁྲིད་ལྕམ་སྦུ་ཌོ་ལྐོག་གསོད་གྱོད་དོན་ལ་ཞིབ་འཇུག་དང་། ༢༠༠༨ ལོའི་རྒྱ་གར་མུམ་པེ་(Mumbai)འཇིགས་སྐུལ་དོན་རྐྱེན་ལ་ཞིབ་འཇུག་བྱས་ཏེ། པ་ཀི་སི་ཐན་ནང་གི་ལཱ་ཞི་ཀར་ཨེ་ཌའ་སྦ་ (Lashakar-e-Taiba)ཞེས་པའི་ཚོགས་པའི་མི་བདུན་གྱིས་མུམ་པེར་གཏོར་རྒོལ་པ་དག་ལ་འཆར་གཞི་དང་སྦྱོང་བརྡར། དངུལ་གྱི་འགྲོ་སོང་སོགས་བཏང་ཡོད་པའི་བདེན་དཔང་ཁག་ཅིག་པ་ཀི་སི་ཐན་འཇིགས་སྐུལ་ཁྲིམས་ཁང་(Terror court)ལ་སྙན་གསེང་ཞུས་ཡོད་འདུག
༢༠༡༡ ལོར་ཁོང་གིས་སྲིད་འཛིན་ཟུར་པ་མུ་ཤི་རཱ་ཧྥི་ཡིས་སྤོ་ཌོའི་བདེ་སྲུང་ལ་བཀོད་སྒྲིག་ཡག་པོ་བྱས་མེད་པའི་ནག་ཉེས་ཁྲིམས་གཏུག་བྱས་སྟབས། དེང་སང་མུ་ཤི་རཱ་ཧྥི་རང་ཁྱིམ་དུ་བཟང་བཙོན་ལ་བཅུག་ཡོད།
ཁ་སང་པ་ཀི་སི་ཐན་གྱི་སྐྱ་རེངས་གསར་ཤོག་སྟེང་། རྒྱལ་ས་ཨེ་སི་ལཱ་མ་པ་ཊི་དང་རཱ་བཱ་པེན་ཊི་ཁྲིམས་ཁང་གཉིས་ཀྱི་ཁྲིམས་ཞིབ་པ་དང་ཁྲིམས་རྩོད་པ་ཚོས་ཅཱའོ་ཌ་རཱེས་ལྐོག་གསོད་བྱས་པར། ལས་མཚམས་ངོ་རྒོལ་བྱ་རྒྱུ་ཡིན་པའི་གསལ་བསྒྲགས་བྱས་འདུག མུ་ཤི་རཱ་ཧྥི་ཆབ་སྲིད་ཚོགས་པ་དང་པ་ཀི་སི་ཐན་རྒྱལ་ཡོངས་ཁ་ཆེ་མཐུན་ཚོགས་སོཊ་ཀྱིས་ཀྱང་ཐེངས་འདིའི་ཁོང་ལྐོག་གསོད་དོན་རྐྱེན་ལ་སྐྱོན་བརྗོད་བྱས་འདུག
ཉེ་ལམ་པ་ཀི་སི་ཐན་ནང་དྲང་བདེན་ལ་དགའ་བའི་ཆབ་སྲིད་པ་སཱ་ཊེ་ཁུ་ཛཱ་མཱན་ཀཱ་ཌའ་ཀུ(Sadiq Zaman Khattak) དང་ཁོང་གི་བུ་ཆུང་བ། མོ་ཧཱ་ཊི་ཨ་ཊིལ (Mohammad Adil) བཅས་ལྐོག་གསོད་དོན་རྐྱེན་སྔ་ཕྱིར་བྱུང་བ་དེ་ནི། འབྱུང་འགྱུར་པ་ཀི་སི་ཐན་གྱི་སྲིད་འཛིན་འོས་བསྡུས་ལ་ཁྲག་གི་འོས་བསྡུས་ཞེས་འགྲེལ་བཤད་རྒྱག་གིན་ཡོད་པ་རེད།
