ལོ་ཙྭ་བ་རིན་ཆེན་བཟང་པོའི་ནུབ་ཕྱོགས་ཀྱི་གདུལ་བྱ།

འདས་པའི་ལོ་ངོ་དུ་མའི་རིང་ནང་༸གོང་ས་མཆོག་གི་རླབས་ཆེན་གྱི་མཛད་འཕྲིན་ལ་བརྟེན་ནས་ནུབ་ཕྱོགས་རྒྱལ་ཁབ་ཁག་ཏུ་ནང་ཆོས་སློབ་སྦྱོང་གི་ཚ་རླབས་ཤིག་འཕྱུར་ཞིང་། གནས་སྟངས་དེའི་དབང་གིས་ཁོང་གི་བཞུགས་གནས་ངྷ་རམ་ས་ལ་གཙོས་པའི་བོད་པའི་དགོན་སྡེ་དང་སློབ་གྲྭ་ཁག་ཏུ་ནུབ་ཕྱོགས་ཀྱི་ནང་ཆོས་སློབ་གཉེར་བ་དང་། བོད་ཡིག་སློབ་སྦྱོང་བྱེད་མཁན་མང་པོ་བྱུང་དང་འབྱུང་བཞིན་ཡོད། ངྷ་ས་གངས་སྐྱིད་དུ་རྟེན་གཞི་བྱས་ཡོད་པའི་ལོ་ཙཱ་བ་རིན་ཆེན་བཟང་པོ་སློབ་གྲྭ་ནི་ཕྱི་རྒྱལ་གྱི་ནང་ཆོས་དོན་གཉེར་ཅན་དག་ལ་སྐད་སྒྱུར་གྱི་ཆེད་དུ་བཙུགས་པ་ཞིག་ཡིན་འདུག  

ཉེ་ལམ་གསར་འགོད་པས་སློབ་གྲྭ་འདིའི་འགན་འཛིན་ཧྥ་རན་སིའི་ལྕམ་ཁེ་ལེ་རེ་ཡེ་ཤེས་(ClaiRe Yeshe) ལགས་སུ་བཅར་འདྲི་ཞུས་དོན་ལྟར་ན། ལོ་ཙཱ་བ་རིན་ཆེན་བཟང་པོ་སྐད་སྒྱུར་སློབ་གྲྭ་ (LOTSAWA RINCHEN ZANGPO TRASLATER PROGRAM ) ཞེས་པ་འདི་ནི། ཕྱི་ལོ་ ༡༩༩༦ ལོར་བླ་མ་བཟོད་པ་རིན་པོ་ཆེ་མཆོག་གི་མཐུན་འགྱུར་འོག་བཙུགས་པ་ཞིག་ཡིན་པ་དང་། དམིགས་ཡུལ་གཙོ་བོ། ཕྱི་རྒྱལ་ཁག་ཏུ་ནང་ཆོས་ངོ་སྤྲོད་བྱེད་མཁན་བླ་མ་དགེ་བཤེས་ཚོར་གསུང་བསྒྱུར་དང་། ནུབ་ཕྱོགས་ཡུལ་གྲུ་ཁག་གི་ནང་ཆོས་དང་བོད་ཡིག་བོད་སྐད་ལ་སློབ་སྦྱོང་བྱེད་འདོད་ཡོད་མཁན་ཚོའི་རེ་བ་སྐོང་ཆེད་ཡིན་འདུག

སློབ་གྲྭའི་འགན་འཛིན་གྱིས་བརྗོད་པ་ལྟར་ན། ད་བར་སློབ་གྲྭ་འདིར་ཨ་རི་དང་དབྱིན་ལན། ཧྥ་རན་སི། ཨེ་སི་རེལ། ཉི་ཧོང་སོགས་རྒྱལ་ཁབ་ ༡༠ ཡི་སློབ་མ་ ༡༢༠ ཙམ་འཛུལ་ཞུགས་བྱས་ཡོད་པ་ལས་སློབ་མ་ ༣༥ ཙམ་སློབ་མཐར་ཕྱིན་ཡོད་འདུག སློབ་དུས་གཅིག་ལ་བདུན་ཕྲག་བརྒྱད་དང་། དུས་ཡུན་ལོ་གཉིས་རིང་འཛིན་གྲྭའི་ནང་སློབ་སྦྱོང་གནང་རྗེས། ཡིག་རྩལ་བཏང་སྟེ་བླ་མ་བཟོད་པ་རིན་པོ་ཆེའི་ཆོས་ཚོགས་ (FPMT) ཁྱབ་ཁོངས་དང་ཆོས་རྒྱུད་རིས་མེད་ཀྱི་ཆོས་ཚོགས་ཁག་ཏུ་ལག་ལེན་དང་མཉམ་དུ་སློབ་སྦྱོང་བྱས་མཐར་ལོ་ཙཱ་བ་རིན་ཆེན་བཟང་པོ་སྐད་སྒྱུར་སློབ་གྲྭའི་ལག་འཁྱེར་སྤྲོད་ཀྱི་ཡོད་འདུག

ལོ་ཙཱ་བ་རིན་ཆེན་བཟང་པོ་སྐད་སྒྱུར་ཕྱག་འཁྱེར་དེ་ (FPMT) ཞེས་པའི་ཆོས་ཚོགས་ ༢༠༠ ཙམ་དང་། ཆོས་ཚོགས་གཞན་ཁག་ཅིག་གིས་ངོས་འཛིན་གནང་གི་ཡོད་པ་དང་། འདས་པའི་ལོ་བཅུ་གྲངས་ལྷག་གི་རིང་སློབ་གྲྭ་འདི་ནས་སློབ་མ་ ༥༠ ཙམ་སློབ་མཐར་ཕྱིན་ཏེ། ད་ཆར་ཨ་རི་དང་ཧྥ་རན་སི། ཨོ་སི་ཊོ་ལི་ཡཱ། ཧོ་ལན་ཌི་བཅས་སུ་ཆོས་ཚོགས་ཁག་དང་། ངྷ་རམ་ས་ལའི་ཉེ་ཁུལ་གྱི་དགོན་སྡེ་ཁག་ནང་གསུང་སྒྱུར་གྱི་ཕྱག་ལས་གནང་བཞིན་ཡོད་འདུག  

སློབ་གྲྭ་འདི་ངྷ་རམ་ས་ལར་འཛུགས་དགོས་དོན་དང་སློབ་ཡོན་སྐོར་ལ་ཁོ་མོས། “ ངྷ་རམ་ས་ལ་༸རྒྱལ་བ་རིན་པོ་ཆེའི་བཞུགས་གནས་ཡིན་པ་དང་གསུང་ཆོས་ཞུ་རྒྱུའི་གོ་སྐབས་མང་པོ་ཡོད་སྟབས། ང་ཚོའི་སློབ་གྲྭ་དེ་འདིར་བཙུགས་པ་རེད། ད་ལྟའི་ཆར་ལོ་གཉིས་རིང་སློབ་ཡོན་ཨ་སྒོར་ ༤༣༠༠ བསྡུ་བཞིན་ཡོད། ལོ་གཉིས་རྗེས་སུ་རང་ངོས་ནས་ཆོས་ཚོགས་ཁག་ཏུ་སློབ་སྦྱོང་དང་ཞོར་ལས་འཚོལ་དགོས་པ་རེད། སློབ་མ་མང་པོ་ཞིག་གིས་བློས་གཏོང་ཆེན་པོ་བྱས་ཏེ་འདིར་བསྡད་ཡོད། དེ་གཙོ་བོ་བོད་པའི་ནང་ཆོས་འདི་རྩ་ཆེན་པོ་ཞིག་ལ་མཐོང་གི་ཡོད་པ་རེད ” ཅེས་བརྗོད་བྱུང་།

གསར་འགོད་པས་སློབ་གྲྭ་དེ་གའི་བོད་དགེ་ཤེས་རབ་དར་རྒྱས་ལགས་སུ་སློབ་ཚན་སྐོར་ལ་བཅར་འདྲི་ཞུས་པར་ཁོང་གིས། “ སློབ་གྲྭ་འདི་ཐོག་མ་གསར་འཛུགས་སྐབས་ཀྱི་དགེ་རྒན་དབྱིན་ཇི་བ་ཞིག་རེད། སྐབས་དེར་དགེ་རྒན་ཁོ་རང་གིས་བཟོས་པའི་སློབ་ཚན་གྱི་འཆར་གཞི་ཞིག་འདུག ལོ་དང་པོར་ཀ་ཁ་ནས་མགོ་བཙུགས་ཏེ་ཁ་སྐད་སློབ་ཁྲིད་དང་། དེ་ནས་ཁ་སྐད་དང་ཡིག་སྐད་གཉིས་སྦྲགས་ཏེ་སློབ་ཁྲིད། ཡིག་སྐད་འཁྲིད་སྐབས་མང་ཆེ་བ་ཆོས་དང་འབྲེལ་བའི་རིགས་འཁྲིད་ཀྱི་ཡོད། ལོ་གཅིག་ཚར་སྐབས་ཁ་སྐད་དང་བརྡ་སྤྲོད་ཀྱི་འགྲོ་སྟངས་འགྲིག་ཙམ་འདུག ལོ་གཉིས་པར་ནང་ཆོས་རྐྱང་རྐྱང་སློབ་འཁྲིད་བྱེད་ཀྱི་ཡོད། ལོ་གཉིས་ཚར་རྗེས་ཡོངས་གྲགས་ཀྱི་ནང་ཆོས་སྐོར་རོབ་ཙམ་རྒྱུས་ཡོད་པ་ཆགས་ཀྱི་འདུག ནང་པའི་ཆོས་ཀྱི་ཕྱོགས་ནས་བླ་མ་དགེ་བཤེས་མ་བསྟེན་པར་ཁོང་ཚོའི་ངོས་ནས་སྤེལ་ཐུབ་རྒྱུ་དཀའ་ཡང་། རམ་འདེགས་ཡག་པོ་ཐུབ་ཀི་རེད་བསམ་ཡོད ” ཅེས་བརྗོད་བྱུང་།

ཨུ་རུ་སུའི་སློབ་མ་ཨཱ་ནཱ་བདེ་ཆེན་ལགས་སུ་བཅར་འདྲི་ཞུས་པར་ཁོ་མོས། “ སྔོན་མ་ཨུ་རུ་སུར་འབྲས་སྤུངས་དགོན་པའི་བླ་མ་ཁག་ཅིག་ཕེབས་སྐབས། ངས་ཁོང་ཚོར་མཇལ་ཁ་ཞུས་ཏེ་གསུང་ཆོས་ཉན་མྱོང་ཡོད། དེ་ནས་ནང་ཆོས་སྦྱོང་འདོད་སྐྱེས་སོང་། ལོ་གཉིས་རིང་ཨུ་རུ་སུ་མཐོ་སློབ་ཅིག་ཏུ་བོད་སྐད་དང་བོད་ཡིག་སྦྱངས་པ་ཡིན། སྔར་ལོའི་ཕྱི་ཟླ་ ༡༠ ནང་འདིར་ཡོང་བ་ཡིན། ད་ལྟ་ང་ཧ་ཅང་སྐྱིད་པོ་འདུག  ངས་༸རྒྱལ་བ་རིན་པོ་ཆེ་སངས་རྒྱས་ཡིན་མིན་ལབ་ཐུབ་ཀྱི་མི་འདུག་མོད། ཁོང་གི་ལས་ཀ་བྱེད་ཕྱོགས་དང་བཀའ་སློབ་གནང་སྟངས་ལ་གུས་བརྩི་ཆེན་པོ་བྱེད་ཀྱི་ཡོད། ངས་ད་ཆར་ཁོང་གི་གསུང་ཆོས་ཞུ་རྒྱུའི་གོ་སྐབས་རག་པ་དེ་བྱིན་རླབས་ཆེན་པོ་རེད་བསམ་གྱི་འདུག ” ཅེས་བརྗོད་བྱུང་།  

ཧོ་ལན་ཌི་ནས་ཡིན་པའི་མེའོ་ཡཱོ་ཨ་ནེ་བསྟན་དཔལ་ལྷ་ལགས་ཀྱིས། “ ངས་དེ་སྔོན་ཧོ་ལན་ཌི་ནས་དབྱིན་ཇི་དང་ཧོ་ལན་ཌིའི་སྐད་ཐོག་ནང་ཆོས་སྦྱངས་པ་ཡིན། ཕྱིས་སུ་ནང་ཆོས་ངོ་སྤྲོད་རེ་ཟུང་ལ་འགྲོ་མྱོང་ཡང་། སྐད་སྒྱུར་བ་ཞིག་བརྒྱུད་ནས་ཉན་དགོས་དུས་དོགས་པ་ཡོང་གི་འདུག དེ་ནས་སྔ་ལོའི་ཕྱི་ཟླ་ ༧ པར་ངྷ་རམ་ས་ལར་ཡོང་བ་ཡིན། ལོ་ ༢ སྔོན་དུ་ངས་བླ་མ་ཆོས་ལྡན་རིན་པོ་ཆེའི་གམ་ནས་རབ་བྱུང་གི་སྡོམ་པ་དང་། ༸རྒྱལ་བ་རིན་པོ་ཆེའི་གམ་ནས་དགེ་ཚུལ་མའི་སྡོམ་པ་ཞུས་པ་ཡིན། ངས་ད་ལྟ་མི་ཞིག་གི་མི་ཚེ་ནང་དུ་ནང་པའི་ཆོས་འདི་ཧ་ཅང་གལ་ཆེན་པོ་ཞིག་ལ་མཐོང་གི་འདུག” ཅེས་བརྗོད་བྱུང་།

ཨི་ཊ་ལི་ནས་ཡོང་བའི་རཱེ་དཱང་ལགས་ཀྱིས། “ ང་རང་ལ་མཚོན་ན་ཐོག་མར་ངྷ་ས་བོད་ཀྱི་དཔེ་མཛོད་ཁང་དུ་ཟླ་གཅིག་དང་། དེ་ནས་ནོར་གླིང་དུ་ཟླ་དྲུག་བཅས་སུ་བོད་སྐད་དང་བོད་ཡིག་སྦྱངས་པ་ཡིན། སྔར་ལོའི་ལོ་མཇུག་ལ་སློབ་གྲྭ་འདིར་ཡོང་སྟེ་ཟླ་བ་ ༦ འགྲོ་བཞིན་ཡོད། ངས་བོད་སྐད་དང་བོད་ཡིག་སྦྱོང་དགོས་པའི་རྒྱུ་རྐྱེན་གཙོ་བོ་ནང་པ་སངས་རྒྱས་པའི་ཆོས་སྦྱོང་བའི་ཆེད་དུ་ཡིན། ད་ལྟ་ངས་བརྒྱ་ཆ་མང་ཤོས་གོ་ཐུབ་ཀྱི་འདུག བོད་ཡིག་སྦྱོང་རྒྱུ་ཧ་ཅང་དཀའ་ལས་ཁག་པོ་འདུག ཡིན་ནའང་རང་ཉིད་ཀྱི་མི་ཚེའི་ལས་དོན་དང་བཟའ་ཚང་ཡོངས་རྫོགས་བློས་བཏང་སྟེ་འདིར་ཡོང་བ་ཡིན་སྟབས་ཤུགས་མ་བརྒྱབ་ན་འགྲིག་གི་མི་འདུག་དྲན་གྱི་འདུག” ཞེས་བརྗོད་བྱུང་།

གསར་འགོད་པ། དོན་གོ