སྲིད་བློན་ལི་ལ་ངོ་རྒོལ་བྱས།

དེ་རིང་ཞོགས་པའི་ཆུ་ཚོད་ ༡༡ ཙམ་ལ། རྒྱ་གར་རྒྱལ་ས་ལྡི་ལི་རུ་བོད་རང་བཙན་སློབ་ཕྲུག་ཚོགས་པའི་ལས་འགུལ་བ་གསུམ་གྱིས་རྒྱ་ནག་གི་སྲིད་བློན་ལི་ཁེ་ཆང་རྒྱ་གར་ལ་གཞུང་འབྲེལ་གཟིགས་སྐོར་བྱེད་བཞིན་པར་ངོ་རྒོལ་ཤུགས་ཆེན་བྱས་འདུག

བོད་རང་བཙན་སློབ་ཕྲུག་ཚོགས་པའི་ལས་འགུལ་བ་ཚོས་དེ་རིང་། སྲིད་བློན་ལི་ཁེ་ཆང་རྒྱ་གར་རྒྱལ་ས་ལྡི་ལིར་གཟིགས་སྐོར་རིང་སྡོད་སའི་ཏ་ཇ་མགྲོན་ཁང་གི་(Taj Palace་Hotel)གི་ཉེ་འགྲམ་མི་ཊར་ ༡༠༠ ཙམ་གྱི་སར་ལས་འགུལ་ཤུགས་ཆེན་སྤེལ་ཡོད་པ་དང་། སྐབས་དེར་ལས་འགུལ་ནང་མཉམ་ཞུགས་བྱེད་མཁན་བཀྲ་ཤིས་ལགས་ཀྱིས། རྒྱ་དམར་བོད་ནས་ཕར་རྒྱུགས། རྒྱ་ནག་རྒྱ་གར་ནས་ཕར་རྒྱུགས། ལི་ཁེ་ཆང་། བོད་ལ་རང་དབང་མྱུར་དུ་ཐོབ་རྒྱུ་རེད་ཅེས་སོགས་ཀྱི་འབོད་ཚིག་འཁོད་པའི་ཕིཊི་ ༢༠ ཅན་གྱི་འཕྲེད་དར་རིང་པོ་ཞིག་བཏོན་ནས་བོད་རང་བཙན། བོད་མིའི་རང་དབང་ནི་རྒྱ་གར་གྱི་བདེ་འཇགས་ཡིན་ཞེས་ངོ་རྒོལ་སྐད་འབོད་བྱས་ཡོད་འདུག ལི་ཁེ་ཆང་རྒྱ་གར་ནང་འབྱོར་བའི་ཁ་སང་དང་དེ་རིང་གཉིས་ཀྱི་ངོ་རྒོལ་ལས་འགུལ་དག་རྒྱ་གར་གྱི་གསར་ལམ་ཁག་ཏུ་ཤུགས་ཆེན་ཐོན་ཡོད་ཅིང་། བོད་མི་ལས་འགུལ་སྤེལ་མཁན་མང་ཆེ་བ་རྒྱ་གར་ཉེན་རྟོག་པའི་འཇུ་བཟུང་བྱས་ཏེ་ཉེ་འགྲམ་གྱི་བཙོན་ཁང་ཞིག་གི་ནང་བཀག་ཉར་བྱས་ཡོད་འདུག

ལས་འགུལ་ཐད་རྒྱ་གར་རྒྱལ་ཡོངས་བོད་རང་བཙན་སློབ་ཕྲུག་ཚོགས་པའི་འབྲེལ་མཐུད་པ་བསྟན་འཛིན་ཚེ་ལྷ་ལགས་ཀྱིས་ “ང་ཚོ་དེ་རིང་འདིར་ཡོང་ནས་ལས་འགུལ་སྤེལ་བ་དེ་རྒྱ་ནག་གི་སྲིད་བློན་ལི་ཁེ་ཆང་ལ་བོད་ནང་གི་ད་ལྟའི་དངོས་ཡོད་གནས་སྟངས་རྣམས་ཁོ་སྲིད་བློན་ཞིག་ཡིན་པའི་ཆ་ནས་ནག་ཉེས་ཡོད་སྟབས། ཁོ་ལ་གདོང་ལེན་དང་ངོ་ཚ་ཕབ་པའི་ཆེད་དུ་ཡིན། རྒྱ་ནག་གི་དྲང་བདེན་མ་ཡིན་པའི་སྲིད་བྱུས་འོག ད་བར་བོད་མི་ ༡༡༧ གྱིས་རང་ལུས་མཆོད་མེར་ཕུལ་ཡོད་སྟབས། རྒྱ་ནག་གི་གདུག་རྩུབ་ཅན་གྱི་སྲིད་བྱུས་དེ་མཚམས་འཇོག་བྱེད་དགོས་པའི་བརྡ་ལན་སྤྲོད་ཆེད་ཡིན”ཞེས་དང་། “གལ་ཏེ་རྒྱ་གར་གྱི་ཆེས་མཐོའི་མགོ་ཁྲིད་ཚོ་སོ་སོའི་རྒྱལ་ཁབ་ལ་ཞི་བདེ་དང་བདེ་འཇགས་སྲ་བརྟན་ཡོང་བའི་རེ་འདུན་ཡོད་ཚེ་སྲིད་བློན་ལི་དང་མཉམ་དུ་བོད་ཀྱི་གནད་དོན་ཐད་གྲོས་བསྡུར་བྱེད་དགོས་པ་དང་། རྒྱ་ནག་གིས་བོད་དོན་དཀའ་རྙོག་སེལ་བ་ཡིན་ན་རྒྱ་དཀར་ནག་བར་གྱི་ས་མཚམས་དཀའ་རྙོག་རང་བཞིན་གྱིས་སེལ་འགྲོ་བ་རེད” ཆེས་སོགས་བརྗོད་འདུག

གནས་ཚུལ་བཏང་འབྱོར་བྱུང་བའི་ནང་། ཉེ་ཆར་(Li Premier League)ཞེས་པའི་རྒྱ་ནག་གི་སྲིད་བློན་ཁོང་ལ་འཕྱ་སྨོད་དང་ཟུར་ཟའི་རྣམ་པ་གསལ་པོ་མཚོན་ཐུབ་པའི་བརྙན་པར་ཐུང་ངུ་ཞིག་རྒྱལ་སྤྱིའི་བརྙན་པར་དྲ་གནས་ཡོ་ཀྲོ་བྷི་དང་། རྒྱ་ནག་གི་བརྙན་པར་དྲ་གནས་ཁྱབ་ཆེ་ཤོས་ཡོ་ཁཱོ་གཉིས་ཀྱི་ནང་ཁྱབ་སྤེལ་བྱས་ཡོད་པ་དང་། བརྙན་པར་དེ་ནི་དེང་སང་རྒྱ་གར་ན་གྲགས་ཆེ་བའི་དབྱུག་རྕེད་རྩེད་མོའི་མཐུན་ཚོགས་( T20 Indian Premier League)ཀྱི་སྔོན་འགྲོའི་གླུ་དབྱངས་(Dil Jumpin Zapak)ཞེས་པ་དེ་ལས་དབྱངས་རྟ་བླངས་ཏེ་བེད་སྤྱོད་པ་ཞིག་ཡིན་འདུག

བརྙན་པར་ཐུང་ངུ་འདིའི་ནང་སྲིད་བློན་ལི་ཁེ་ཆང་གིས་སོ་སོ་རང་ཉིད་ཉེ་ལམ་རྒྱ་གར་གྱི་ས་མཚམས་ནང་རྒྱ་ནག་དམག་མི་ཆོག་མཆན་མེད་པར་སིམ་འཛུལ་བྱས་པར་འཕྱ་སྨོད་དང་གནོང་འགྱོད་བྱེད་པའི་རྣམ་པ་ཟུར་གཅིག་་བསྟན་ཡོད་ལ་པེ་ཅིན་གཞུང་གིས་བོད་མི་ཚོའི་འགྲོ་བ་མིའི་གཞི་རྩའི་རང་དབང་འཕྲོགས་ཏེ་རྟག་ཏུ་གཉའ་གནོན་བྱེད་བཞིན་པའི་རྣམ་པ་གསལ་བོ་བསྟན་ནས་བོད་དོན་རྒྱབ་སྐྱོར་བ་དང་བོད་མི་གང་མང་ཞིག་གིས་སྲིད་བློན་ཁོ་ལ་ངོ་རྒོལ་སྐད་འབོད་སོགས་ཀྱི་རྡུང་རྡེག་དྲག་པོ་ཕོག་པའི་གནས་སྟངས་མཚོན་ཐུབ་པ་བྱས་ཡོད་འདུག