ང་ཚོར་ཁྱད་གསོད་བྱས་སོང་།

ཕྱི་ཚེས་ ༡༣ ཉིན་ཨ་རིའི་པེན་སེལ་ཝ་ནེ་ཡཱ་ (Pensylvania) སློབ་ཆེན་གྱི་མཐར་ཕྱིན་སློབ་མའི་མཛད་སྒོའི་སྐུ་མགྲོན་དུ་སྲིད་འཛིན་ཨོ་བྷ་མའི་བཟའ་ཟླ་མེ་ཁཱལ་ལེ་ཨོ་བྷ་མ་ (Michelle Obama ) དང་སྲིད་འཛིན་ཟུར་པ་བྷེལ་ཁི་ལེན་ཊོན (Bill Clinton) ། ཨ་རིའི་སྲིད་འཛིན་གཞོན་པ་ཇའོ་བྷེ་ཌེན་ (Joe Biden) བཅས་གདན་ཞུ་བྱས་ཡོད་ཅིང་། མཛད་སྒོའི་ཐོག་སྲིད་འཛིན་གཞོན་པ་བྷེ་ཌེན་གྱིས་གཏམ་བཤད་སྤེལ་བ་དེས། དེར་ཡོད་རྒྱ་རིགས་སློབ་མ་ཚོར་ཕོག་ཐུག་བྱུང་ཡོད་པ་མ་ཟད། ཕྱི་ཚེས་ ༢༢ ཉིན་སློབ་ཆེན་དེར་ཡོད་པའི་རྒྱ་རིགས་སློབ་མ་ ༣༠༠ ཙམ་གྱི་མིང་རྟགས་བཀོད་པའི་སྐྱོན་བརྗོད་ཡི་གེ་ཞིག་སློབ་ཆེན་དེའི་མགོ་གཙོ་བརྒྱུད་ཇའོ་བྷེ་ཌེན་ལ་ཕུལ་ཡོད་འདུག

རྒྱ་རིགས་སློབ་མ་ཚོར་ཕོག་ཐུག་བྱུང་དོན་ནི་སྲིད་འཛིན་གཞོན་པའི་གཏམ་བཤད་ནང་།  “རྒྱ་མིས་ང་ཚོའི་ཟ་མ་ཟ་འཆར་ཡོད་པ་རེད། འོན་ཀྱང་ཁོ་ཚོར་དཀའ་ངལ་རྫོགས་མཐའ་མེད་པ་ཞིག་ཡོད། ང་ཚོར་ཡོད་པ་མང་པོ་ཞིག་ཁོ་ཚོར་ཕུང་བསྡད་ཡོད། ” ཅེས་དང་། ཡང་ཁོང་གིས་ “ཨ་རིའི་ཤེས་ཡོན་ལམ་ལུགས་དང་ཁྲིམས་ལུགས། ཁྲོམ་རའི་རྒྱ་ཁྱབ། འཕྲུལ་རིགས་གསར་གཏོད་སོགས་ཚང་མ་བསམ་བློ་མ་འདྲ་བ་བཏང་བ་ལས་བྱུང་ཡོད། ” ཅེས་བརྗོད་ཡོད་པ་མ་ཟད། ཁོས་རྒྱ་རིགས་སློབ་མ་ཚོར་ཁ་ཕྱོགས་ཏེ། “ཁྱེད་རང་ཚོས་རང་དབང་གི་མཁའ་དབུགས་འབྱིན་རྔུབ་བྱེད་མི་ཐུབ་པའི་མི་རིགས་ (Nation) དེའི་ནང་བསམ་བློ་འདྲ་མིན་གཏོང་ཐུབ་ཀྱི་མེད།  ཁྱེད་རང་ཚོས་མཁྲེགས་འཛིན་ལམ་ལུགས་ (Orthodoxy) ལ་ངོ་རྒོལ་བྱེད་མི་ཐུབ་པའི་མི་རིགས་ (Nation) དེའི་ནང་བསམ་བློ་མ་འདྲ་བ་གཏོང་ཐུབ་ཀྱི་མ་རེད། གང་ཡིན་ཟེར་ན། འགྱུར་བ་ནི་མཁྲེགས་འཛིན་ལམ་ལུགས་ལ་ངོ་རྒོལ་བྱེད་པ་ཁོ་ན་ལས་འབྱུང་གི་ཡོད། ” ཅེས་བརྗོད་འདུག

ཐེངས་འདིའི་སྲིད་འཛིན་གཞོན་པའི་གཏམ་བཤད་དེར་ངོ་རྒོལ་ཞུ་ཡིག་དང་མིང་རྟགས་བསྡུ་རུབ་བྱེད་མཁན་གཙོ་བོ་རྒྱ་རིགས་སློབ་མ་ཀྲང་ཐེན་པུ་ (Zhang Tianpu) ཟེར་བ་ཞིག་ཡིན་པ་དང་། ཁོ་ཚོས་གནས་སྟངས་མང་པོ་ཞིག་གི་ཐོག་ཇའོ་བྷེ་ཌེན་གྱིས་བཤད་པ་བདེན་ཡང་། རྒྱ་རིགས་སློབ་མ་ཚོས་ལོ་མང་རིང་དཀའ་ལས་བརྒྱབ་སྟེ་རྒྱལ་ཁབ་གཞན་གྱི་སློབ་མ་དང་མཉམ་དུ་དགའ་སྤྲོའི་མཐར་ཕྱིན་མཛད་སྒོར་ཞུགས་ཡོད་སྟབས། སྲིད་འཛིན་གཞོན་པས་ཁོ་ཚོར་མ་མཐར་ཡང་ངོ་སོ་ཞིག་སྤྲོད་དགོས་ནའང་། དེ་ལས་ལྡོག་སྟེ་མཛད་སྒོའི་སྟེང་ཁོ་ཚོར་ངོ་ཚ་དང་རྒྱལ་ཁབ་ལ་ཁྱད་གསོད་བྱས་ཡོད་སྐོར་བརྗོད་འདུག

རྒྱ་རིགས་སློབ་མ་ཚོས་གནད་དོན་གཙོ་བོ། ཇའོ་བྷེ་ཌེན་གྱིས་རྒྱ་ནག་ལ་རྒྱལ་ཁབ་ (Country or state) ཅེས་མ་བརྗོད་པར་མི་རིགས་ (Nation) ཙམ་གྱི་ངོ་བོར་དམའ་འབེབས་ཁྱད་གསོད་བྱས་ཡོད་སྐོར་བརྗོད་འདུག་ལ། ཀྲང་ཐེན་པུ་ཡིས་སྲིད་འཛིན་གཞོན་པའི་གཏམ་བཤད་དེ་ཡིག་ཐོག་ལ་ཕབས་ཏེ་རན་རེན་དྲ་གནས་ (renren.com) ཞེས་པའི་རྒྱ་ནག་གི་ངོ་དེབ་སྟེང་བཀོད་པར། ཉིན་གཉིས་གསུམ་རིང་རྒྱ་རིགས་ཁྲི་ ༤ ལྷག་གིས་ལྟ་ཀློག་དང་གླེང་སློང་ཤུགས་ཆེར་བྱེད་བཞིན་ཡོད་འདུག