ཡུལ་ཤུལ་དུ་རང་ལུས་མེར་བསྲེཊ་གནང་།

དཔའ་བོ་ཁོང་ལ་རྗེས་དྲན་དང་ཁོང་གི་ནང་མི་རྣམས་ལ་ཐུགས་གསོའི་འཚམས་འདྲི་ཡོད།

གཞིས་ལུས་བོད་མི་ཚོ། སྲིད་སྐྱོང་སྐྱོབ་རོགས།
ཐུགས་རྗེ་གཟིགས།

༄༅།། ད་མང་པོ་སྲེག་གི་བསྡད་ན། སྲིད་སྐྱོང་བློ་བཟང་སེང་གེ་འཚིགས་འགྲོ་གི་འདུག སྲིད་སྐྱོང་གི་རྒྱག་གཏམ་ཡོད་ཚད་རྩ་སྐྱ་མེ་ལ་ཤོར་བ་ལྟར་འཚིགས་འགྲོ་གི་འདུག སྲིད་སྐྱོང་གི་ཕྱོགས་བསྐྱོད་མགོ་སེར་ཚོར་ཐུག་འཕྲད་གནང་རྒྱུ་འཚིགས་འགྲོ་གི་འདུག གྲོས་ཚོགས་ཁག་གི་གྲོས་ཆོད་འཚིགས་འགྲོ་གི་འདུག བཙན་བྱོལ་སྒྲིག་འཛུགས་ཀྱི་ནུས་སྟོབས་ཡོད་ཚད་འཚིགས་འགྲོ་གི་འདུག ༸རྒྱལ་བ་རིན་པོ་ཆེ་གདན་འདྲེན་ཞུ་རྒྱུའི་སྐྱག་རྫུན་འཚིགས་འགྲོ་གི་འདུག ཁྱེད་ཚོའི་བློས་གཏོང་ཆུད་ཟོས་སུ་མི་གཏོང་བ་དང། ང་ཚོ་ཁྱེད་ཚོའི་རྒྱབ་ཏུ་ཡོད། མཉམ་དུ་ཡོད་ཟེར་བའི་མགོ་བསྐོར་གཏོང་སྤྱད་ཀྱི་ཚིག་སྐམ་པོ་དེ་དག་འཚིགས་འགྲོ་གི་འདུག ནང་པ་ཞིག་ཡིན་པའི་ཆ་ནས་མཆོད་འབུལ་དགེ་སྒྲུབ་བྱེད་ཀྱི་ཡིན་ཞེས་པའི་ཁ་ཡག་ཁོག་ནག་གི་ངན་ཇུས་དེའང་འཚིགས་འགྲོ་གི་འདུག མི་ཞིག་ཡིན་པའི་ཆ་ནས་ཚེ་སྲོག་རྩ་ཆེར་བརྩི་གི་ཡོད་ཅེས་པའི་སྐད་ཆ་འདྲ་ཆགས་པོ་དེའང་འཚིགས་འགྲོ་གི་འདུག བོད་མི་ཞིག་ཡིན་པའི་ཆ་ནས་གདུང་སེམས་མཉམ་བསྐྱེད་ཡོད་ཅེས་པའི་ཚིག་སྐམ་པོ་དེའང་འཚིགས་འགྲོ་གི་འདུག ད་མ་སྲེག་རོགས། ཐུགས་རྗེ་གཟིགས། ཐམས་ཅད་འཚིགས་འགྲོ་གི་འདུག སྲིད་སྐྱོང་བློ་སེང་གི་ལོ་ལྔ་ཚན་དང་པོ་མཐར་མ་ཕྱིན་པར་འཚིགས་འགྲོ་གི་འདུག སྲིད་སྐྱོང་ཁྲི་ཁར་བསླེབས་པ་ནས་རང་སྲེག་མཚམས་མ་བཞག་སྟབས། སྲིད་སྐྱོང་མེས་འཚིགས་ནས་དེ་རིང་སང་ཉིན་ཅི་བྱ་གཏོལ་མེད་ཆགས་འདུག གཞིས་ལུས་བོད་མི་ཚོ། ཁྱེད་ཚོར་སྙིང་རྗེ་ཡོད་ན། ང་ཚོའི་སྲིད་སྐྱོང་སྐྱོབ་རོགས། སྲིད་སྐྱོང་གི་དམ་བཅའ་ཐམས་ཅད་མེས་འཚིགས་ནས་ཁྱེད་ཚོའི་ཕུང་བོ་ལྟར་འཚིགས་རོ་ཆགས་འདུག དམ་བཅའ་རེ་རེ་མེས་འཚིགས་ན་སྲིད་སྐྱོང་གོ་རྒྱུ་ཚོར་རྒྱུ་མེད་པར་ཆགས་འགྲོ་གི་འདུག སྲིད་སྐྱོང་ཡིབ་ས་མ་རྙེད་པར་ཡར་ཕེབས་མར་ཕེབས་གནང་གི་འདུག

སྲིད་སྐྱོང་ཁྲི་ཁར་བསླེབས་མ་ཐག ཕྱི་རྒྱལ་ཁག་ཏུ་འགྲོ་དུས་ཉམས་ཞིག་ཡོད། མིག་ཤེལ་ནག་པོ་གྱོན་ན་རྫིག་ནོ་ཚོད་ཅིག་མེད། ཨ་རིའི་རླུང་འཕྲིན་ཁང་དང་ཨེ་ཤ་ཡ་རང་དབང་རླུང་འཕྲིན་ཁང་གཉིས་ནས་ཁྱེད་གཞིས་ལུས་བོད་མི་ཚོར་གཏམ་བཤད་གནང་དུས་སྟོབས་ཤིག་ཡོད། རེ་བ་སྟོང་པ་སྤྲོད་རྒྱུར་ཡ་ང་བག་ཚ་གང་ཡང་མེད། ཡིན་ནའང། དེ་རིང་སྲིད་སྐྱོང་གྲགས་རྒྱུ་མི་འདུག གོ་རྒྱུ་མི་འདུག མཚམས་རེར་གངས་སྐྱིད་ན་ཡོད་དམ། ཕྱི་རྒྱལ་དུ་ཡོད་མེད་ཀྱང་མི་རྣམས་ཀྱིས་ཤེས་ཀྱི་མི་འདུག ཡང་ལ་ལས་བདེ་སྐྱིད་ཆོས་དབྱིངས་ཀྱི་ཤག་ནས་གཉིད་ལ་ཤོར་བ་མིན་འགྲོ་ཟེར།

སྲིད་སྐྱོང་སྐྱོབ་རོགས། གཞིས་ལུས་བོད་མི་ཚོ། སྲིད་སྐྱོང་མེས་འཚིགས་ནས་འཚིགས་དྲི་ཁ་གི་འདུག སྲིད་སྐྱོང་གིས་ང་གུ་ཡངས་ཅན་ཡིན་ཟེར། དེང་རབས་མཁས་དབང་ཡིན་ཟེར། སློབ་དཔོན་ཟམ་གདོང་རིན་པོ་ཆེ་ངེད་གཉིས་ལ་གྲྭ་བ་དང་མི་སྐྱའི་ཁྱད་པར་མ་གཏོགས། གཞན་མཁས་ཚང་མ་གཅིག་པ་ཡིན་ཟེར། བཀའ་ཤག་སྐབས་གོང་མའི་སྲིད་བྱུས་ཡོངས་རྫོགས་ལ་འགྱུར་བ་གཏོང་སྲིད་པ་རེད་ཟེར། ལོ་གཅིག་གི་ནང་ལྷིང་འཇགས་པོ་བྱུང་སོང་ཟེར། བཙན་བྱོལ་སྒྲིག་འཛུགས་ཀྱི་དཔལ་འབྱོར་གནས་བབ་ཡར་རྒྱས་སོང་ཡོད་ཟེར། བཀའ་ཤག་སྐབས་བཅུ་བཞི་པས་བཙན་བྱོལ་མི་མང་ལ་འབྲེལ་བ་དམིགས་བསལ་ཞིག་འཇོག་ཐུབ་ཡོད་ཟེར། ད་དུང་ཕྱིའི་རྣམ་པ་ལས་ནང་དོན་གལ་ཆེ་ཟེར། དབུ་མའི་ལམ་མུ་མཐུད་འཛིན་གི་ཡིན་ཟེར། འབྲེལ་མོལ་ལ་གྲ་སྒྲིག་ཨང་གསར་ཡོད་ཟེར།

ཡིན་ནའང། འབྲེལ་མོལ་ལ་ད་དུང་རྒྱ་ནག་གཞུང་དང་ཐད་འབྲེལ་ཞུ་ས་ཙམ་ཡང་རྙེད་མི་འདུག་ལ། རྒྱལ་སྤྱིའི་བོད་དོན་ལས་འགུལ་ཁང་གི་རིགས་བདག་ལ་ཕོག་ཐུག་སོང་བས། རྒྱ་རི་བློ་རྒྱན་གྱིས་བློ་བཟང་སེང་གེ་ཤར་ཤར་གཡུག་སོང། གཡུག་ཁ་ལ་མོར་སྐྱག་རྫུན་ལུང་པ་གང་བཤད་ནས་གཡུག་སོང། སྐྱག་རྫུན་དེས་འབྲེལ་མོལ་ལ་རེ་བ་མེད་པ་ལྟ་བུ་ཞིག་བཤད་དེ་གང་ཟག་སྒེར་གྱི་འཁོན་རྩོད་སྤྱི་པའི་རྩ་དོན་སྟེང་གཡོག་སོང། སྐྱག་རྫུན་འདི་སྲིད་སྐྱོང་དང་རྒྱ་རི་གཉིས་ཀའི་མགོ་ན་ད་དུང་ལྗིད་ཏིག་གེར་འདུག བྱེད་སྟངས་དེ་འདྲས་རྒྱ་ནག་གཞུང་གིས་བློ་སེང་ལ་འབྲེལ་བ་གནང་འདོད་ཡོད་པ་ཤེས་བཞིན་དུ། བརྒྱུད་ལམ་ཐབས་ཆག་ཅིག་གི་ཆ་རྐྱེན་ཡང་བསྐྲུན་མ་སོང། དེའི་ཆ་ནས་ཕྱིའི་རྣམ་པ་ལས་ནང་གི་དོན་གཙོ་བོ་ཡིན་པས་སྐྱག་རྫུན་ཞིག་བསྐྱར་དུ་བཤད་དགོས་ཐུག་སོང། སྐྱག་རྫུན་དེ་ལྟར་བཤད་དེ་ནང་ལོག་ཅིག་ན་ཅིག་ཡོད་མདོག་མདོག་གི་སྦུག་སྦུག་ཅིག་བཟོས་སོང། ཡིན་ནའང། དེ་ལ་རྣམ་དཔྱོད་ཅན་རྣམས་གད་མོ་ཤོར་ནས་ཁ་སིམ་གྱི་མི་འདུག

སྲིད་སྐྱོང་གུ་ཡངས་ཅན་རེད་དམ། ཡིན་ན་ཁོང་གི་དགའ་ཉེ་ཕྱོགས་གཏོགས་དགའ་རོགས་སྤུན་མཆེད་ཐམས་ཅད་ཡར་འཐེན་ནས། དགའ་ལྡན་ཕོ་བྲང་གི་ཁྲིམས་རྒྱུན་འཁུར་བའི་དབུས་བོད་མིའི་སྒྲིག་འཛུགས་ལ་རུལ་སུངས་དང་སྒེར་གཅོད་ཡོད་པའི་རྣམ་འགྱུར་ཞིག་བཟོ་གི་རེད་དམ། དཔེར་ན། དགའ་རོགས་བཀའ་བློན་དུ་བསྐོས་པ། སྤུན་མཆེད་རིག་ལྡིབ་བཀའ་བློན་དུ་བསྐོས་པ། ཕྱོགས་ཁག་རྒད་པོ་བཀའ་བློན་དུ་བསྐོས་པ། དེ་བཞིན་བློས་ཐུབ་གྲོགས་པོ་ཨ་རིའི་དོན་གཅོད་དུ་བསྐོས་པ། འདི་དག་མིག་གིས་མཐོང་བའི་ཡོངས་གྲགས་ཁག་རེད། འདིའི་འོག་ཏུ་མ་མཐོང་བའི་གནས་ཚུལ་ག་ཚོད་མེད་དམ།

སྲིད་སྐྱོང་མཁས་པ་རེད་དམ། སློབ་དཔོན་ཟམ་གདོང་རིན་པོ་ཆེ་དང་གཅིག་པ་རེད་དམ། ལོ་གཉིས་འགོར་གྲབས་འདུག ལོ་གསུམ་པའི་མཇུག་ནས་སྲིད་སྐྱོང་སྐབས་བཞི་པའི་འོས་གཞི་མགོ་འཛུགས་ཀྱི་རེད། མཁས་པའི་མཁས་རྟགས་ག་དུས་སྟོན་རྒྱུ་རེད། ”ང་དང་ངའི་ཨ་ཞང་། ངའི་པ་ལགས་”རྐྱང་རྐྱང་བཤད་པ་མ་གཏོགས་གཏམ་བཤད་སྐད་གྲགས་ཅན་གཅིག་ཀྱང་ད་བར་གནང་ཐུབ་མེད་པ་མ་ཤེས་སམ། ཨ་རིའི་ཨའོ་བྷ་མ་སོགས་དབུ་ཁྲིད་ཚོར་མཁས་པ་ཚོས་གཏམ་བཤད་སྐད་གྲགས་ཅན་ག་དུས་གནང་མིན་གྱི་ཞིབ་འཇུག་ཅིག་བྱེད་སྲོལ་ཡོད། གཏམ་བཤད་སྐད་གྲགས་ཅན་དེ་དབུ་ཁྲིད་དེའི་གསེར་མདོག་གི་ལོ་རྒྱུས་ཤིག་ཡིན། འཛམ་གླིང་མི་མང་གི་ཡིད་སེམས་འགུགས་པའི་ཁྱད་ཡོན་བླ་མེད་ཅིག་ཡིན། ཡིན་ནའང། རྒྱ་ནག་གི་ཨའོ་བྷ་མ་བློ་བཟང་སེང་གེ་མཆོག་གིས་བོད་ཀྱི་གནད་དོན་གཙོས་བརྗོད་གཞི་གང་གི་ཐད་ལའང་གཏམ་བཤད་སྐད་གྲགས་ཅན་གཅིག་ཀྱང་གནང་ཐུབ་མེད། ཁོང་གི་གཏམ་བཤད་ཡོད་ཚད། ཁོང་གི་འབུམ་རམས་པའི་ཆེད་རྩོམ་དེ་དང་གཅིག་པ་གཅིག་རྐྱང་ཆགས་ཏེ། དཔེར་ན། བརྒྱ་ཆ་དྲུག་ཅུ་ལོན་མ་ལོན་གྱིས་ཡིག་རྩལ་འཕྲོད་ཁག་པོའི་གནས་སུ་ལྷུངས་ཡོད་པས། སྲིད་སྐྱོང་སེང་གེ་མཁས་པ་རེད་དམ། གཞིས་ལུས་བོད་མི་ཚོ། རྡོ་རྗེ་གདན་ནས་ཁྱེད་ཚོར་སློབ་དཔོན་ཟམ་གདོང་རིན་པོ་ཆེ་དང་གཅིག་པ་ཡིན་ཚུལ་གསུངས་པའི་སྐྱག་རྫུན་དེ་ད་ལྟ་ཡིད་ཆེས་བྱེད་བཞིན་ཡོད་དམ། ངས་བལྟས་ན་གཏན་ནས་ཡོད་ཀྱི་མ་རེད། ཁ་དཔེར། མི་ཚང་མ་གླེན་པ་མ་རེད་ཟེར་སྲོལ་ཡོད་པ་རེད།

ལོ་གཉིས་ཀྱི་རིང་ལྷིང་འཇགས་པོ་བྱུང་ཡོད་དམ། དབུ་མའི་ལམ་གྱི་སྲིད་བྱུས་དམ་འཛིན་གནང་ཡོད་དམ། ལོ་གཅིག་གཉིས་ནང་ལྷིང་འཇགས་ལྟ་ཞོག། དེ་ལས་ལྡོག་སྟེ་རང་བཙན་པ་རེ་ཤོས་ཀྱི་སྲིད་སྐྱོང་གི་ནུས་པ་དང་བསྟུན་ནས་༸གོང་ས་མཆོག་དང་དབུས་སྒྲིག་འཛུགས་ཀྱི་སྲིད་བྱུས་ལ་གནས་དུས་ཚོད་རྩིས་ག་ཚོད་བྱས་སོང། འགྲེལ་ལོག་ག་ཚོད་བྱས་སོང། མི་མང་ནང་བརྡབ་གསིག་ག་ཚོད་ཐེབས་སོང། བརྡབ་གསིག་དང་དཀྲོགས་རྐྱེན་དེ་དག་གི་དབང་གིས་༸གོང་ས་ཆེན་པོ་འུ་ཐུག་ནས་གསལ་བཤད་ཞལ་གསང་པོ་ག་ཚོད་གནང་མ་སོང་ངམ། ཡིན་ནའང། བཀའ་ཤག་གིས་ག་རེ་བྱས་ཡོད། ཐ་ན་གསལ་བསྒྲགས་ཚད་ལྡན་ཞིག་བྱེད་ཐུབ་ཡོད་དམ། སོང་ཙང། ང་ཚོ་དོན་དམ་པར་ལྷིང་འཇགས་པོ་བྱུང་ཡོད་དམ། བོད་ཕྱི་ནང་གཉིས་གང་ནས་ལྷིང་འཇགས་པོ་བྱུང་སོང། ངས་བལྟས་ན་ལོ་གཉིས་ཀྱི་ནང་བོད་ཕྱི་ནང་གཉིས་ནས་རང་སྲེག་ལ་རེ་བ་བྱས་པ་དང། སྲིད་སྐྱོང་གི་སྟོང་གཏམ་ལ་ཡིད་ཆེས་བྱས་ཏེ། དེ་རིང་༸གོང་ས་མཆོག་གདན་འདྲེན་ཞུ་རྒྱུ་ཕར་ཟད། རང་སྲེག་དེར་འཛམ་གླིང་མི་མང་ནང་ལྟ་སྟངས་ཁྱད་མཚར་ཞིག་ཡོང་གི་ཡོད་སྟབས། བོད་མི་ཚོའི་གཞི་རྩའི་སེམས་ཤུགས་ལ་བདག་པོ་རྒྱག་ཐུབ་མེད་པ་ནི་སྲིད་སྐྱོང་བློ་སེང་གི་ལྷིང་འཇགས་པོ་བྱུང་བའི་ནང་སྙིང་ངོ་མ་མ་རེད་དམ།

ད་དུང་དཔལ་འབྱོར་གནས་བབ། གཞུང་ཞབས་ཚོར་ཕྱུ་པ་༼བོད་ཆས།༽བཟོས་ཚུལ། སྲིད་སྐྱོང་གིས་སྔོན་རྩིས་འགྲོ་སྟངས་མི་མཁྱེན་པ། ཤེས་རིག་སྐོར་ནས་ཆིག་ཁྲི་ཆིག་འབུམ། བོད་སློབ་འཛིན་ཚོགས་སོགས་ལ་རེ་རེ་བཞིན་དཔྱད་པ་གཏོང་དགོས་དུས། གཞིས་ལུས་བོད་མི་ཚོས་སྲིད་སྐྱོང་བློ་སེང་དམྱལ་བ་རྡོ་རྗེ་གདན་དུ་ཟགས་ཚར་བ་མཁྱེན་ཐུབ་པ་མཟད། དམིགས་བསལ་ཚ་དམྱལ་ན་མེས་འཚིགས་པའི་འཇིགས་སྐྲག་གིས་གཟིར་ནས་ཡོད་པ་གསལ་བོར་མཐོང་བ་ཡིན་མོད། དེ་དག་ཐམས་ཅད་རེ་རེ་བཞིན་རི་མོར་འབྲི་རྒྱུར་ངེད་ལ་ཆུ་ཚོད་ཁྱོན་ནས་མི་འདུག་པས་དགོངས་བཞེས་གནང་རོགས།

གནད་དོན་འདི་དག་ལ་འདི་ལྟར་བསམས་བློ་ཞིག་བཏང་དུས། ངས་ད་གཟོད་སྲིད་སྐྱོང་མཆོག་སྙིང་རྗེ། རྡོ་ལས་འོ་མ་ཐོན་རྒྱུ་མེད་ཀྱང་ཨུ་ཚུགས་རྒྱབ་ན་མི་འགྲིག་པ་ཤེས་ཏེ། གཞིས་ལུས་བོད་མི་ཚོ། སྲིད་སྐྱོང་བློ་བཟང་སེང་གེ་སྐྱོབ་རོགས་ཞེས་སྡུག་སྐད་མ་རྒྱག་ཐབས་མེད་ཆགས་སོང། ཁ་སང་ཡུལ་ཤུལ་ནས་ཡང་བསྐྱར་མེར་སྲེག་བཏང་སོང། དེའི་སྔོན་ཉིན་འགར་སྲིད་སྐྱོང་མཆོག་ལྷིང་འཇགས་པོ་བྱུང་ཡོད་ཀྱང། བསྟན་འཛིན་ཤེས་རབ་ཀྱིས་ཡང་བསྐྱར་སྲིད་སྐྱོང་མཆོག་གི་ལྷིང་འཇགས་དཀྲོགས་སོང། སོང་ཙང། གཞིས་ལུས་བོད་མི་ཚོ་དང་པོར་ང་ཚོའི་སྲིད་སྐྱོང་སྐྱོབ་རོགས། ཁོང་ལ་ལོ་ལྔ་འདི་ལྷིང་འཇགས་པོ་བྱས་ཏེ་བསྐྱལ་འཇུག་རོགས། རང་སྲེག་གི་མེས་ཁོང་མ་བསྲེགས་རོགས། ཁོང་གི་མིག་ཤེལ་ནག་པོ་མ་བསྲེགས་རོགས། ཁོང་གི་འཇིབ་འཁོར་མདུན་ལ་དམར་པོ་རྟགས་ཅན་དེ་མ་བསྲེགས་རོགས། ཁོང་གི་སྤོབས་པ་ལྡན་མདོག་གི་སྟོང་བཤད་རྣམས་མ་བསྲེགས་རོགས། ཁོང་གི་ཞལ་གྱི་འཛུམ་མདངས་མ་བསྲེགས་རོགས། ཁོང་གི་ལོ་ལྔ་ཚན་ཕྱི་མའི་འཆར་གཞི་རྣམས་མ་བསྲེགས་རོགས། སྲིད་སྐྱོང་ལྷིང་འཇགས་པོ་མ་བྱུང་ན། ཁོང་གིས་འོས་འཕེན་ཕྱི་མ་ཅི་ལྟར་ཐོབ་མིན་ལ་ཐུགས་བསམ་ལྷོད་ལྷོད་བཞེས་མི་ཐུབ་ལ། ཁོང་གི་ཨབ་ཕྲུག་ཕྱོགས་གཏོགས་ཚོ་ལས་ཀ་མེད་སོང་བས། ཁྱེད་རྣམས་ཀྱིས་སྲིད་སྐྱོང་མ་བསྲེགས་རོགས། གཞིས་ལུས་བོད་མི་ཚོ།།
བསྟན་འཛིན་ཤེས་རབ་ཀྱིས་རང་སྲེག་བཏང་བ་ཐོས་རྗེས་ཤར་མར་བགྱིས།།
༢༠༡༣། ༥།